विजेट आपके ब्लॉग पर

Monday, January 26, 2015

अपराध आउ दंड - भाग – 2 ; अध्याय – 4



अपराध आउ दंड

भाग – 2

अध्याय – 4

ज़ोसिमोव उँचगर आउ मोटगर अदमी हलइ, थुलथुल आउ बेरंग पीयर, सफाचट चेहरा, सीधा सन नियन उज्जर केश, चश्मा लगइले, आउ मोटगर फुल्लल अँगुरी पर सोना के अँगूठी । ऊ करीब सताइस साल के हलइ । ऊ ढीला-ढाला फैशनदार हलका रंग के कोट पेन्हले हलइ, हलका रंग के गरमी वला फुलपैंट, आउ सामान्य रूप से देह पर सब कुछ ढीला-ढाला, फैशनदार आउ बिलकुल नया कपड़ा (ब्रैंड-न्यू), घड़ी के चेन भारी-भरकम । ओकर चाल-चलन सुस्त हलइ, मानूँ निष्क्रिय आउ साथे-साथ जानल-पछानल मनमौजी; मिथ्याभिमान, हलाँकि जबरदस्ती गोपनीय बनावे के प्रयास, तइयो हमेशे उभरके सामने आ जा हलइ । ओकरा से परिचित लोग ओकरा भारी अदमी समझऽ हलइ, लेकिन ओकन्हीं के कहना हलइ, कि ऊ अपन काम में होशियार हइ ।

"हम तो, भाय, तोरा हीं दू तुरी गेलियो हल ... देखऽ हो, होश में आ गेला ह !" रज़ुमिख़िन चिल्लइलइ ।
"देखऽ हिअइ, देखऽ हिअइ; अच्छऽ, त अभी तबीयत कइसन हको, अयँ ?" ज़ोसिमोव रस्कोलनिकोव से मुखातिब होलइ, ओकरा तरफ एकटक देखते आउ ओकर पास सोफा पर अपन गोड़ रखके बइठते, जाहाँ ऊ तुरते यथासंभव अपन देह फैला लेलकइ ।

"अभियो अवसाद (depression) में हका", रज़ुमिख़िन बात जारी रखलकइ, "उनकर छालटी (linen) हमन्हीं अभिए बदललिए ह, आउ ई एकरा चलते कन्ने-कन्ने (रोवे-रोवे) के अवस्था में आ गेला हल ।"
"ई बात समझल जा सकऽ हइ; छालटी बाधो में देल जा सकऽ हलइ, अगर उनका खुद इच्छा नयँ हइ ... नस तो ठीक चल रहले ह । आउ मथवा अभियो कुछ-कुछ पिराऽ हको, अयँ ?"

"हम ठीक हकूँ, हम बिलकुल ठीक हकूँ !" अचानक सोफा पर उठके बइठके आउ आँख चमकाके रस्कोलनिकोव दृढ़ स्वर में आउ चिढ़के बोललइ, लेकिन तुरते उ फेर से तकिया पर पड़ गेलइ आउ देवाल तरफ मुँह कर लेलकइ। ज़ोसिमोव एकटक ओकरा देखते रहलइ ।
"बहुत अच्छा ... सब कुछ जइसे होवे के चाही, ओइसीं हइ", ऊ धीमे स्वर में बोललइ । "कुछ खइलका ह ?"
ऊ लोग बता देलकइ आउ पुछलकइ, कि कउची-कउची खाय लगी देल जा सकऽ हइ ।

"सब कुछ देल जा सकऽ हइ ... सूप, चाय ... मशरूम आउ खीरा, जाहिर हइ, नयँ देवे के चाही, आउ अच्छा हइ कि बीफ़ (गोमांस) भी नयँ देल जाय, आउ ... हाँ, एकरा में बकवास करे के की जरूरत हइ ! ...", ऊ आउ रज़ुमिख़िन एक दोसरा के देखलकइ । "कोय द्रव वला दवाय नयँ आउ दोसरा सब कुछ नयँ; आउ कल हम देखबइ ... आझो हो सकऽ हइ ... अच्छऽ, हाँ ..."

"बिहान साँझ के हम इनका टहलावे लगी ले जइबइ !" रज़ुमिख़िन निश्चय कइलकइ । "यूसुपोव बाग, आ बाद में "Palais de Crystal" (पले द क्रिस्ताल) [1] जइबइ ।
"बिहान तो हम इनका जरिक्को छेड़े ल नयँ चाहबइ, तइयो ... थोड़ा-बहुत ... खैर, तखने देखल जइतइ ।"
"अरे, अरे ! आझ तो हमरा घरहेली (गृह-प्रवेश) मनावे के हके, दुइये डेग आगू; एहो आ सकऽ हका । हमन्हीं बीच ई सोफा पर पड़ सकऽ हका ! तूँ तो रहबऽ न ?" अचानक रज़ुमिख़िन ज़ोसिमोव तरफ मुखातिब होलइ । "भूलिहऽ नयँ, वादा कइलऽ हल ।"

"शायद हम कुछ देर से अइबो । हुआँ कउची-कउची के इंतजाम कइलऽ ह ?"
"अरे, कुछ नयँ - चाय, वोदका, हिलसा मछली (herring)। समोसा परसल जइतइ -  अपने लोग होते जइता ।"
"ठीक-ठीक केऽ ?"
"सब्भे हिएँ के हका आउ सब लगभग नयके हका, वास्तव में - बूढ़े चाचा के छोड़के, लेकिन ओहो नयके हका, कल्हिएँ पितिरबुर्ग अइला ह, कोय काम के सिलसिले में; हमन्हीं के भेंट पाँच बरस में एक तुरी होवऽ हइ ।"

"ऊ की करऽ हथुन ?"
"ऊ जिला के पोस्मास्टर के पद पर सारी जिनगी नीरस बितइलका ... जरी-मनी पेंशन मिल्लऽ हइ, पैंसठ साल के हथिन, चरचा के लायक कोय विशेष बात नयँ हइ ... तइयो हम उनका प्यार करऽ ही । पोरफ़ीरी पित्रोविच आवेवला हका - अन्वेषण विभाग के स्थानीय पुलिस इंस्पेक्टर ... वकील । लेकिन, शायद तोरा मालूम हको ..."

"त ओहो कोय तरह से तोर रिश्तेदार हथुन ?"
"बहुत दूर के; लेकिन तूँ त्योरी काहे लगी चढ़ा रहलऽ ह ? चूँकि एक तुरी उनका साथ झगड़ा कइलऽ, मतलब शायद तूँ नयँ अइबऽ ?"
"हम तो ओकरा पर थुक्कऽ हिअइ ..."

"ई तो आउ निम्मन बात हइ । खैर, आ हुआँ - छात्र सब, एगो शिक्षक, एगो सरकारी किरानी, एगो संगीतज्ञ, सेना के एगो अफसर, ज़म्योतोव ..."
"किरपा करके हमरा बतावऽ, कि तोहर चाहे उनकर" (ज़ोसिमोव सिर हिलाके रस्कोलनिकोव तरफ इशारा कइलकइ), "हुआँ पर ज़म्योतोव के साथ की एक रंगन पसीन के चीज हो सकऽ हइ ?"

"ओह, ई झगड़ालू लोग ! सिद्धान्त ! ... आउ तूँ सब्भे त कमानी (स्प्रिंग) नियन सिद्धान्त पर अड़ल व्यक्ति; अपन इच्छा-शक्ति के अनुसार तो मुड़ नयँ सकबऽ; लेकिन हमर विचार में, अगर निम्मन अदमी हइ - त एहे सिद्धान्त हइ, आउ हम आउ कुछ जाने ल नयँ चाहऽ ही । ज़म्योतोव एगो बहुत निम्मन अदमी हइ ।"
"आउ अप्पन हाथ गरम रक्खऽ हइ (अर्थात् घूस ले हइ) ।"

"अच्छऽ, आउ अपन हाथ गरम करऽ हइ, त ओकरा पर थुक्कल जाय ! अगर घूस ले हइ, त एकरा से की होवऽ हइ!" अचानक रज़ुमिख़िन चिल्लइलइ, एक प्रकार से अस्वाभाविक रूप से गोसाऽ के । "की हम तोहन्हीं से ई बात के प्रशंसा कइलियो, कि ऊ अपन हाथ गरम करऽ हइ ? हम कहलियो, कि ऊ अपन प्रकार के खाली निम्मन अदमी हकइ ! आउ सीधे-सीधे सब्भे तरह से कोय अदमी के देखल जाय, त केतना अदमी निम्मन बचतइ ? हमरा ई पक्का विश्वास हइ, कि तब हमरा, हमर अँतड़ी मिलाके, कोय एगो पकावल पियाज से जादे कीमत के नयँ समझतइ, ओहो तब, जब तोरो मिला देवल जाय ! ..."

"ई कम हइ; हम तो तोरा लगी दू (पियाज) देबो ..."

"लेकिन हम तो तोरा लगी देबो खाली एगो ! बहुत मजाक हो गेलो ! ज़म्योतोव अभियो लड़का हइ, हम अभियो ओकर बाल नोच सकऽ हिअइ, काहेकि ओकरा तीरे के चाही, ढकले के नयँ । कोय व्यक्ति के ढकेलके सुधार नयँ सकऽ हो, खास करके अगर ऊ लड़का हइ । लड़का के साथ दोगना सवधानी के जरूरत होवऽ हइ । ए प्रगतिशील बुद्धू लोग, तोहन्हीं के कुच्छो नयँ समझ में आवऽ हको ! अदमी के आदर नयँ करके, खुद के अनादर करऽ ह ... आउ अगर जाने ल चाहऽ ह, तब हम सब शायद मिलके एक काम शुरू कइलिए ह ।"

"हम ई जाने लगी चाहबइ ।"
"अरे, ई सब कुछ पेंटर के संबंध में हकइ, मतलब एगो घर के पुताई करे वला के बारे ... हमन्हीं ओकरा बाहर निकासबइ (छोड़इबइ) ! हलाँकि, अब कोय तकलीफ के बात नयँ हइ । मामला बिलकुल, बिलकुल अब साफ हइ ! हमन्हीं के बस थोड़े जोर लगावे पड़तइ ।"
"अब फेर ई घर के पुताई करे वला के की खिस्सा हइ ?"
"काहे, सच में हम नयँ बतइलियो हल ? वास्तव में नयँ ? अरे हाँ, हम तोरा खाली शुरुआत वला खिस्सा बतइलियो हल ... ई, बुढ़िया के हत्या के बारे, जे गिरवी रक्खे के काम करऽ हलइ, एगो सरकारी किरानी के विधवा ... हियाँ पर एगो घर के पुताई करे वला फँस गेलइ ..."

"अरे, ई हत्या के बारे तो हम तोरो से पहिले सुनलिए हल, आउ एकरा में हमरा दिलचस्पियो हइ ... कुछ-कुछ ... एक कारण से ... हम ई घटना के बारे अखबरवो में पढ़लिए हल ! आउ अइकी ..."
"लिज़ावेता के भी तो हत्या हो गेलइ !" अचानक नस्तास्या बक गेलइ, रस्कोलनिकोव तरफ मुखातिब होके । ऊ पूरे समय तक कमरे में हलइ, दरवजवा के बगल में चिपकल सुन रहले हल ।
"लिज़ावेता के ?" मोसकिल से सुनाय देल जाय वला अवाज में रस्कोलनिकोव बड़बड़इलइ ।
"आ ऊ लिज़ावेता के, समान बेचे वली के, तूँ नयँ जानऽ ह ? ऊ हियाँ निचला मंजिल पे अइते रहऽ हलइ । एक तुरी तोहर कमीज के रफू कइलको हल ।"

रस्कोलनिकोव देवाल के तरफ मुँह कर लेलकइ, जाहाँ गंदका पियरका कगजवा पर के उजरकन छोटगर-छोटगर फुलवन में से एगो भद्दा सन उज्जर फूल चुन लेलकइ, जेकरा में भूरा रंग के एक प्रकार के धारी हलइ, आउ ओकरा जाँचे लगलइ - ओकरा में केतना पत्ती हकइ, पतियन में कइसन दाँता (काँटा) हकइ आउ केतना धारी हइ । ओकरा अइसन लग रहले हल कि ओकर हाथ-गोड़ सुन्न पड़ल हइ, मानूँ काटके अलगे कर देल गेल ह, लेकिन ऊ तनिक्को हिलहूँ-डुल्ले के कोशिश नयँ कर रहले हल आउ फुलवा तरफ एकटक देख रहले हल ।

"लेकिन ऊ घर के पुताई करे वला के की होलइ ?" एक प्रकार के खास नराजगी के साथ ज़ोसिमोव नस्तास्या के बड़बड़ाहट के बीच में कटलकइ । ऊ एगो उच्छ्वास लेके चुप हो गेलइ ।
"आ ओकरा तो हत्यारा समझ लेल गेलइ !" रज़ुमिख़िन जोश के साथ बात जारी रखलकइ ।
"एकर कोय सबूतो हइ की ?"

"खाक हइ सबूत ! बल्कि, सबूत के नाम पर, खाली ई सबूत तो कोय सबूत नयँ हइ, अइकी एहे बात के साबित करे के जरूरत हइ ! ई बिलकुल पक्का ओहे हइ कि ओकन्हीं सबसे पहिले एकन्हीं के धर लेलकइ आउ एकन्हीं पर सन्देह कइलकइ, की नाम हइ एकन्हीं के ... हाँ, कोख़ आउ पेस्त्र्याकोव । छी ! कइसन बेवकूफी कइल जा रहले ह, कोय बाहरी अदमी के भी घिन आवऽ हइ ! पेस्त्र्याकोव तो शायद आझ हमरा हीं आवे वला हइ ... अच्छऽ, रोद्या, तूँ तो ई मामला के बारे जानऽ होतऽ, तोर बेमार पड़े के पहिले के बात हको, ठीक ऊ घटना के एक दिन पहिले के, जब थनमा में तूँ बेहोश होके गिर गेलहो हल, जब हुआँ लोग एकरा बारे बातचीत कर रहले हल ?..."

ज़ोसिमोव उत्सुकता से रस्कोलनिकोव के देख रहले हल; लेकिन ऊ हिललइ नयँ ।
"आ तूँ जन्नऽ ह, रज़ुमिख़िन ? हम तोरा देखऽ हियो - तूँ कइसन हड़बड़िया अदमी हकऽ !" ज़ोसिमोव टिप्पणी कइलकइ ।
"अइसन हो सकऽ हइ, तइयो हमन्हीं ओकरा छोड़ा लेबइ !" रज़ुमिख़िन टेबुल पर मुक्का मारके चिल्ला उठलइ ।

"जानऽ हो, हमरा सबसे जादे खेदजनक की लगऽ हइ ? ई बात से नयँ कि ओकन्हीं झूठ बोलऽ हइ; झूठ के हमेशे माफ कर देल जा सकऽ हइ; झूठ बोलना तो निम्मन बात हइ, काहेकि एकरा सहारे सच के पता लगावल जा हइ। नयँ, खेदजनक ई बात हइ, कि ओकन्हीं झूठ बोलऽ हइ, आउ साथे-साथ अपन झूठ के पूजा करऽ हइ । हम पोरफ़ीरी के आदर करऽ हिअइ, लेकिन ... मसलन, पहिले-पहिल कउची उनका चक्कर में डाल देलकइ ? दरवाजा अन्दर से बन हलइ, लेकिन जब दरबान के साथ अइते गेला - त दरवाजा खुल्लल हलइ - एकर मतलब ई हइ, कि कोख़ आउ पेस्त्र्याकोव हत्या कइलकइ ! त ई हई ओकन्हीं के तर्क !"  

"एतना उत्तेजित मत होवऽ; ओकन्हीं के खाली गिरफ्तार कइल गेलइ; ओकन्हीं के अइसन कइसूँ करहीं पड़ते हल ... प्रसंगवश - हम ई कोख़ से मिल्लऽ हलिअइ; ऊ, मालूम पड़लइ, बुढ़िया के हियाँ से गिरवी के गर-छोड़ावल समान खरीदऽ हलइ, हइ न ?"

"हाँ, एक प्रकार के चालबाज ! ऊ करजा के वचनपत्र भी खरीदऽ हइ । अवैध व्यापारी । भाड़ में जाय ऊ ! जन्नऽ हो, हमरा कउची पर जरनी बरऽ हइ ? ओकन्हीं के घिसल-पिट्टल, सबसे ओछा, दकियानूसी रूटीन से जरनी बरऽ हइ ... आ हियाँ, ई खास मामला, बिलकुल नयका तरीका अपनावे के रस्ता खोल सकऽ हइ । "खाली मनोवैज्ञानिक आँकड़े से ई देखावल जा सकऽ हइ, कि सच तक कइसे पहुँचल जा सकऽ हइ । ओकन्हीं के कहना हइ - 'हमरा पास तथ्य हकइ !' लेकिन तथ्य सब कुछ नयँ हइ; कम से कम आधा काम ई बात में हइ, कि तथ्य के उपयोग कइसे कइल जा हइ !"

"आउ तूँ तथ्य के उचित तरह से उपयोग कर सकऽ हो ?"

"लेकिन चुप नयँ रहल जा सकऽ हइ, जब ई महसूस होवऽ हइ, आउ ठोस बुनियाद पर महसूस होवऽ हइ, कि ई मामला में मदत कइल जा सकऽ हइ, खाली बस ... ओह ! ... तोरा मामला के विस्तार से जनकारी हको ?"
"खाली घर के पुताई करे वला के बारे में जनकारी के इंतजार में हकिअइ ।"

"हाँ, हम की कह रहलूँ हल ! अच्छऽ, सुन्नऽ खिस्सा - हत्या के ठीक तीन दिन बाद, सुबहे, जब ओकन्हीं कोख़ आउ पेस्त्र्याकोव के साथ निपटिए रहला हल - हलाँकि ओकन्हीं अपन कदम-कदम के हिसाब रिपोर्ट कर चुकले हल; आउ मामला सब कुछ साफ हो चुकले हल ! - कि अचानक बिलकुल अप्रत्याशित तथ्य उभरके अइलइ ।

दुश्किन नाम के एगो किसान, जे ओहे घर के सामने के एगो कलाली के मालिक हइ, थाना में हाजिर होवऽ हइ आउ जेवर के एगो डिबिया लावऽ हइ, जेकरा में सोना के कनबाली हइ, आउ ई पूरा खिस्सा बयान करऽ हइ –
‘परसुन साँझ के, ठीक आठ बजे के बाद दौड़ल अइलइ’ - दिन आउ समय ! ध्यान देहो ? - ‘घर के पुताई करे वला मजदूर, मिकोलाय (मानक रूसी में ‘निकोलाय’), जे एकर पहिलहूँ दिन में हमरा हीं अइले हल, आउ हमरा पास ई डिबिया लइलकइ, जेकरा में सोना के कनबाली आउ रत्न हलइ, आउ ई सब के गिरवी पे रखके दू रूबल मँगलकइ, जेकरा पर हमर प्रश्न - काहाँ से लइलहीं ?, त ऊ उत्तर देलकइ, कि फुटपाथ पर से उठइलकइ । एकर आगे हम आउ कुछ नयँ पुछलिअइ ।’ ई तो दुश्किन के कहना हइ - ‘आउ एक नोट निकासके देलिअइ, मतलब एक रूबल, काहेकि सोचलिअइ, कि हमरा हीं नयँ, त दोसरा हीं गिरवी रखतइ, आउ ई सब ले-देके एक्के पड़तइ - ऊ पी-पाके उड़ा देतइ, आ बेहतर होतइ कि ऊ चीज हमरा हीं रहतइ - जेतने दूर रखबऽ, ओतने असानी से पइबऽ, आउ कहीं कोय अइसन-ओइसन बात होतइ, चाहे कोय अफवाह सुनाय देतइ, त हम पुलिस के सामने रिपोर्ट कर देबइ ।’ खैर, वस्तुतः ई सब तो ऊ अपन नानी के सपना सुनाब करऽ हइ, घोड़ा नियन झूठ बोलऽ हइ (अर्थात्, सफेद झूठ बोलऽ हइ), काहेकि हम दुश्किन के जानऽ हिअइ, खुद्दे ऊ गिरवी रक्खऽ हइ आउ चोरी के माल छिपावऽ हइ, आउ मिकोलाय से ठगके तीस रूबल कीमत के चीज ई लगी नयँ लेलकइ, कि पुलिस के सामने ‘पेश करतइ’ । अच्छऽ, भाड़ में जाय, सुन्नऽ; दुश्किन बात जारी रक्खऽ हइ – ‘आउ ई किसान मिकोलाय देमेन्त्येव के हम बचपन से जानऽ हिअइ, हमरे गुबेर्निया (राज्य) आउ जिला ज़रायस्क के रहेवला हकइ, काहेकि हम खुद रियाज़ान से हकूँ । आउ मिकोलाय हलाँकि पियक्कड़ तो नयँ हइ, लेकिन पीयऽ हइ, आउ ई हमरा मालूम हलइ कि ऊ एहे घर में काम करऽ हइ, पुताई करऽ हइ, मित्रेय (मानक रूसी में ‘द्मित्री’) के साथे, आउ दुन्नु एक्के जगह के हइ । आउ नोट पइतहीं, ऊ ओकरा तुरते भँजा लेलकइ, एक्के बैठकी में दू गिलास चढ़ा लेलकइ, रेजकी लेलकइ आउ चल पड़लइ, लेकिन मित्रेय के ओकरा साथ ऊ बखत हम नयँ देखलिअइ । आउ दोसरा दिन हमरा सुन्ने में अइलइ, कि अल्योना इवानोव्ना आउ ओकर बहिनी लिज़ावेता इवानोव्ना के कुल्हाड़ी से हत्या कर देल गेलइ, आउ हम ओकन्हीं के जानऽ हलिअइ, श्रीमान, आउ तुरते हमरा कनबाली के बारे शक्का हो गेलइ, काहेकि हम जन्नऽ हलिअइ, कि दिवंगत बुढ़िया समान गिरवी रखके पइसा दे हलइ । हम ओकन्हीं के घर पर गेलिअइ आउ सवधानी से अपने खातिर जनकारी लेवे लगलिअइ, चउआ पर चलके (दबे पाँव), आउ सबसे पहिले पुछलिअइ - 'मिकोलाय हकइ?' आउ मित्रेय बतइलकइ, कि मिकोलाय मस्ती मारे गेले हल, सुबहे पी-पाके घर अइले हल, घरवा पर लगभग दस मिनट ठहरलइ आउ फेर से बहरा गेलइ, आउ मित्रेय ओकरा बाद में नयँ देखलकइ आउ अकेलहीं काम पूरा कर रहले ह । आउ ओकन्हीं के काम दोसरा मंजिल पर हकइ, ओहे ज़ीना पर जेकरा पर दिवंगत लोग के फ्लैट हकइ । ई सब सुनके, हम ऊ बखत केकरो कुछ नयँ बतइलिअइ ।' - ई दुश्किन के कहना हइ - 'आउ हत्या के संबंध में जेतना हो सकलइ, ओतना मालूम कइलिअइ आउ पहिलौके शक्का के साथ हम घर वापिस आ गेलिअइ । आउ आझ सुबह में, आठ बजे - मतलब आझ तेसरा दिन, समझऽ हो न ? - देखऽ ही, कि मिकोलाय हमरा हीं घुस्सऽ हके, बिन निसा में तो नयँ, लेकिन जादे पीयल भी नयँ, आ बातचीत समझे के हालत में तो हके। बेंच पर बइठ गेलइ, चुपचाप हइ । आउ ओकरा अलावे कलाली में ऊ बखत खाली एगो अजनबी हलइ, आउ एगो दोसर कोय, जे परिचित हलइ, बेंच पर सुत्तल हलइ, आउ दू गो हमर लड़कन, श्रीमान ।

‘मित्रेय के देखलहीं हँ ?’ हम पुच्छऽ हिअइ ।
‘नयँ, नयँ देखलूँ हँ ।’ ऊ बोलऽ हइ ।
‘आउ तूँ हियाँ नयँ हलहीं ?’
‘नयँ, नयँ हलूँ, परसुन से ।’ ऊ बोलऽ हइ ।
‘आउ राते काहाँ हलहीं ?’
‘पेस्की में, कोलोम्ना [2] के लड़कन के साथ ।’
‘त फेर, कनबाली काहाँ से लेलहीं ?’ हम कहऽ हिअइ ।
‘हमरा फुटपाथ पर मिल्लल हल ।’ आउ ऊ हमरा तरफ बिन देखले अइसे बोलऽ हइ, जे असंगत लगऽ हइ ।
‘आउ तूँ सुनलहीं हल, कि अइसन अइसन घटना, ओहे साँझ के आउ ओहे बखत, ओहे ज़ीना पर घटले हल ?’ हम बोलऽ हिअइ ।
‘नयँ, नयँ सुनलूँ ।’ ऊ बोलऽ हइ । आउ आँख गिड़ोरले, खुद सुन्नऽ हइ, आउ ओकर चेहरा अचानक खल्ली नियन उज्जर हो जा हइ ।

ओकरा हम ई सब के बारे बतावऽ हिअइ, त देखऽ ही, कि ऊ अपन टोप तरफ हाथ बढ़इलकइ आउ उट्ठे लगलइ । एज्जे परी हम ओकरा रोके लगी चहलिअइ, आउ बोलऽ हिअइ, ‘ठहर, मिकोलाय, कुछ पीमँऽ-ऊमँऽ नयँ ?’ आउ हम आँख से लड़का के इशारा कइलिअइ, कि दरवजवा के पकड़ले रहे, आउ हम काउंटर के पीछू से बाहर निकसऽ हूँ, कि ऊ हमरा भिर से झट से भाग गेलइ, आउ तुरते सड़क पर, आउ फेर एगो गल्ली में - आउ ओहे अन्तिम बखत ओकरा देखलिअइ ।  तभिए हमर शक्का पक्का हो गेलइ, काहेकि ओकर पाप, बिलकुल साफ ...’
"पक्का ! ..." ज़ोसिमोव बोललइ ।

"ठहरऽ ! आखिर तक सुन लऽ ! जाहिर हइ, मिकोलाय के खोजे खातिर धरती-असमान एक कर देवल गेलइ; दुश्किन के गिरफ्तार कर लेवल गेलइ आउ (ओकर घर पर) तलाशी कइल गेलइ, मित्रेय के साथ भी एहे सब; कोलोम्ना के लड़कन के भी खिंचाई कइल गेलइ - तेसरा दिन बीत गेला पर अचानक खुद मिकोलाय के लावल जा हइ - ओकरा -स्की गेट के पास गिरफ्तार कइल गेलइ, एगो सराय में । ऊ हुआँ अइले हल, अपन गरदन से चानी के क्रॉस निकसलकइ, आउ क्रॉस के बदले में एक पेग दारू मँगलकइ । देल गेलइ । कुछ मिनट के बाद, एगो औरत गोशाला में गेलइ आउ एगो दरार से देखऽ हइ - ऊ पास के शेड में शहतीर से चमोटी बान्हके एगो फंदा बनइलके ह; आउ लकड़ी के एगो कुंदा पर खड़ी होके अपन गरदन के ऊ फंदा में डाले ल चाह रहल ह; औरतिया पूरा जोर लगाके चिल्लइलइ, लोग दौड़के अइलइ - ‘हूँ, त अइसन करे पर तूँ अमादा हो गेलँऽ !’ ‘आ हमरा ले चलऽ’, ऊ बोलऽ हइ, ‘फलना-फलना थाना में, हम सब कुछ कबूल कर लेबो ।’ खैर, ओकरा बाइज्जत ऊ थाना में, मतलब हियाँ, पेश कइल गेलइ । आउ तब ऊ, ई, केऽ, कइसे, केतना उमर - ‘बाइस’ - आदि-आदि । प्रश्न - ‘जब मित्रेय के साथ काम कर रहलहीं हल, त ज़ीना पर केकरो फलना-फलना बजे देखलहीं हल, कि नयँ?’ उत्तर - ‘जाहिर हइ, कुछ लोग अइते-जइते रहले होत, लेकिन हमरा ध्यान में नयँ हइ ।’

‘आउ कुछ सुनलहीं हल, कउनो प्रकार के शोर, चाहे आउ कुछ ?’
‘अइसन कुछ विशेष सुनाय नयँ देलकइ ।’
‘आ मिकोलाय, तोरा मालूम हलउ, कि ओहे दिन, फलना-फलना विधवा के फलना दिन के फलना बजे ओकर बहिनी के साथ-साथ हत्या कर देल गेलइ आउ लूट लेल गेलइ ?’
‘हम बिलकुल नयँ जानऽ हलिअइ, हमरा कुछ जनकारी नयँ हलइ । पहिले तुरी हम अफानासी पावलिच से तेसरा दिन कलाली में सुनलिअइ ।’
‘आउ तोरा कनबाली काहाँ मिललो हल ?’
‘फुटपाथ पर मिलल हल ।’
‘दोसरा दिन तूँ मित्रेय के साथ काम पर काहे नयँ अइलहीं ?’
‘काहेकि हम मौज-मस्ती कर रहलूँ हल ।’
‘आ काहाँ पर मौज-मस्ती कर रहलँऽ हल ?’
‘फलना-फलना ठमाँ ।’
‘दुश्किन के हियाँ से काहे भाग गेलहीं हल ?’
‘काहेकि हम वास्तव में ऊ बखत डर गेलूँ हल ।’
‘कउन बात से डर गेलहीं हल ?’
‘कि हमरा पर इल्जाम लगावल जात ।’
‘तूँ काहे लगी डर गेलहीं, जबकि तोरा लगऽ हउ कि तोर कोय कसूर नयँ हकउ ?’ …

अब विश्वास करऽ, चाहे नयँ करऽ, ज़ोसिमोव, अइसन प्रश्न कइल गेले हल, आउ शाब्दिक रूप से अइसने वाक्य में, हम ई बात पक्का तरह से जानऽ हूँ, हमरा भिर हू-ब-हू दोहरावल गेल हल ! तोरा की कहना हको ? तोरा की कहना हको ?"
"अच्छऽ, नयँ, तइयो सबूत तो हकइ ।"

"हम तो सबूत के बात नयँ कर रहलियो ह अभी, हम तो बात कर रहलियो ह प्रश्न के बारे, एकरा बारे, कि ओकन्हीं अपन निष्कर्ष के कइसे समझऽ हका ! खैर, भाड़ में जाय ! ... खैर, त ओकरा पर दबाव डालल गेलइ, दबाव डालल गेलइ, एतना दबाव डालल गेलइ, एतना दबाव डालल गेलइ, कि ऊ कबूल कर लेलकइ –
‘हमरा फुटपाथ पर नयँ मिल्लल’, ऊ बोललइ, ‘बल्कि फ्लैट में मिल्लल, जेकरा में मित्रेय के साथ पुताई के काम कर रहलूँ हल ।’ "
"ओइसे कइसे ?"

"ऊ बिलकुल अइसे, कि हम मित्रेय के साथ में दिन भर पुताई करते रहलूँ, आठ बजे तक, आउ जाहीं वला हलूँ, कि मित्रेय ब्रश लेलक आउ हमर मुँह पर रंग लगा देलक, रंग लगइलक हमर मुँह पे, आउ भाग गेल, आउ हम ओकर पीछू-पीछू दौड़लूँ । ओकरा पीछू-पीछू दौड़ रहलूँ हल, आउ जोर-जोर से चिल्ला रहलूँ हल; आउ जब हम ज़ीना से गेट तरफ मुड़लूँ, त हमर सीधा मुठभेड़ दरबान आउ कुछ भलमानुस के साथ हो गेल, आ केतना भलमानुस हला, हमरा आद नयँ, आउ दरबान हमरा गारी देलक, आउ दोसरो दरबान हमरा गारी देलक, आउ दरबान के घरवली निकसल, ओहो हमरा गारी देलक, आउ एगो भलमानुस गेट के अन्दर घुसला, अपन मेम साहिबा के साथ, ओहो हमरा गरिअइलका, काहेकि हम आउ मित्का (मतलब ‘मित्रेय’) उनकन्हीं के रस्ता के बीच में आ गेलिए हल । हम मित्का के झोंटिया पकड़ लेलिअइ, आउ घींचके गिरा देलिअइ, आउ लगलिअइ डेंगावे, आउ मित्का भी, जे हम्मर निच्चे हलइ, हमरो झोंटा पकड़ लेलकइ आउ धमक्का लगावे लगलइ, लेकिन ई सब हमन्हीं गोस्सा में नयँ कर रहलिए हल, बल्कि सब कुछ दोस्ताना ढंग से, खेलवाड़ में । आउ बाद में मित्का अपना के छोड़ा लेलकइ आउ भागके सड़क पर पहुँच गेलइ, आउ हम ओकर पीछू-पीछू गेलिअइ, लेकिन पकड़ नयँ पइलिअइ आउ फ्लैट में अकेल्ले चल अइलिअइ, काहेकि हमरा समान सब सरियावे के हले । हम समान जौर करे लगलिअइ आउ मित्रेय के इंतजार में हलिअइ, कि हो सकऽ हइ कि आ जाय । आउ ड्योढ़ी के दरवाजा के पास, देवाल के पीछू, कोना में, हमर लात डिबिया पर पड़ गेल । देखऽ हूँ, कि कागज में लपटल पड़ल हके । हम कगजवा अलगे कर देलूँ, देखऽ हूँ कि छोटगर-छोटगर हुक लगल हइ, ई सब हुक हटइलिअइ - त देखऽ ही कि डिबिया में कनबाली हइ ..."

"दरवाजा के पीछू में ? दरवाजा के पीछू में पड़ल हलइ ? दरवाजा के पीछू में ?" अचानक रस्कोलनिकोव चिल्ला उठलइ, रज़ुमिख़िन तरफ सूना-सूना आउ आतंकित दृष्टि से देखते, आउ धीरे-धीरे हाथ के सहारे सोफा पर उठके बइठ गेलइ ।
"हाँ ... लेकिन की बात हको ? तोरा की होलो ? अइसे काहे कर रहलहो ह ?" रज़ुमिख़िन भी अपन जगह से उठ गेलइ ।
"कुछ नयँ ! ...", मोसकिल से सुनाय देवे वला अवाज में रस्कोलनिकोव जवाब देलकइ, फेर से तकिया पर लोघड़इते आउ फेर से देवाल तरफ मुँह फेरते ।
सब कोय थोड़े देर तक चुप रहलइ ।
"शायद झुक रहला होत, आउ अचानक जग गेला होत", आखिर रज़ुमिख़िन बोललइ, ज़ोसिमोव तरफ प्रश्नात्मक दृष्टि से देखते; ऊ सिर से हलका निषेधात्मक इशारा कइलकइ ।

"अच्छऽ, बात जारी रक्खऽ", ज़ोसिमोव बोललइ, "आगे की होलइ ?"
"हाँ, आगे की होलइ ? जइसीं ऊ कनबाली देखलकइ, ओइसीं तुरते फ्लैट आउ मित्का के भूलके अपन टोप पकड़लकइ आउ दौड़के दुश्किन के पास गेलइ, आउ जइसन कि मालूम हइ, ओकरा से एगो रूबल पइलकइ, लेकिन ओकरा से झूठ बोललइ कि फुटपाथ पर मिलल हल, आउ तुरते मौज-मस्ती खातिर निकस गेले हल । आउ हत्या के बारे ऊ पहिलौके बात के पुष्टि करऽ हइ –
‘हम बिलकुल नयँ जानऽ हलिअइ, हमरा कुछ जनकारी नयँ हलइ, खाली तेसरा दिन सुनलिअइ ।’
‘आ पहिले तूँ अभी तक काहे नयँ अइलहीं ?’
‘डर के चलते ।’
‘आ फाँसी काहे लगी लगावे ल चाहऽ हलहीं ?’
‘चिंता के चलते ।’
‘कइसन चिंता के चलते ?’
‘कि हमरा पर इल्जाम लगावल जात ।’

हूँ, त ई हकइ सारा खिस्सा । अब की सोचऽ हो, ओकन्हीं एतना से कउन निष्कर्ष पर पहुँचला ?"

"अरे, एकरा में सोचे के की बात हइ, सुराग हइ, चाहे जइसन होवे, हकइ तो । एगो तथ्य । कहीं ई तो नयँ सोच रहलऽ ह, कि तोर पुताई करे वला के छोड़ देल जाय ?"
"लेकिन ओकन्हीं तो ओकरा सीधे अब हत्यारा समझ लेते गेला ह ! ओकन्हीं के एकरा में कोय शक्के नयँ रह गेले ह ..."
"ई सब बकवास हइ; तूँ बहुत उत्तेजित हकऽ । अच्छऽ, आ कनबाली के बारे की कहना हको ? ई तो मानहीं पड़तो, कि जब ओहे दिन ओहे समय बुढ़िया के सन्दूक से निकोलाय के हाथ में कनबाली आ जा हइ, त एहो माने पड़तो कि ई कइसूँ तो हुआँ पहुँचले होत ? अइसन खोजबीन में ई सधारण बात नयँ हइ ।"

"अरे, कइसे पहुँचलइ ! कइसे पहुँचलइ ?" रज़ुमिख़िन चिल्लइलइ, "आउ की वास्तव में तूँ, डॉक्टर, जेकर सबसे पहिला कर्तव्य हइ व्यक्ति के अध्ययन करना, आउ जबकि तोरा दोसर सब के अपेक्षा जादे अवसर मिल्लऽ हको व्यक्ति के स्वभाव के अध्ययन करे के - की वास्तव में तोरा, ई सब तथ्य के अधार पर, देखाय नयँ दे हको, कि ई निकोलाय कइसन स्वभाव के हइ ? की तूँ पहिलहीं तुरी से नयँ देखऽ हो, कि सब कुछ, जे पूछताछ के दौरान ऊ बयान कइलकइ, ऊ बहुत पवित्र सत्य हइ ? बिलकुल ओइसीं ओकर हाथ में पहुँचलइ, जइसन कि ऊ बयान कइलकइ । डिबिया पर ओकर लात पड़लइ आउ ऊ उठा लेलकइ !"

"बहुत पवित्र सत्य ! तइयो ऊ खुद की कबूल नयँ कइलके हल, कि पहिले तुरी ऊ झूठ बोलले हल ?"

"सुन्नऽ हमर बात, ध्यान से सुन्नऽ - दरबान, कोख़, पेस्त्र्याकोव, दोसरा दरबान, पहिला दरबान के घरवली, फेरीवाला के घरवली, जे ऊ बखत दरबान के घरवली के साथ बइठल हलइ, कोर्ट काउंसिलर क्र्यूकोव, जे ओहे समय गाड़ी से उतरला, आउ एगो मेम साहेब के साथ हाथ में हाथ डालले गेट के प्रवेशद्वार से घुसला - ई सब्भे, मतलब आठ-दस गोवाह, एक मत से ई बात स्वीकार करऽ हका, कि निकोलाय द्मित्री के जमीन पर पटक देलके हल, ओकरा पर चढ़ बइठले हल आउ ओकरा डेंगा रहले हल, आउ ओहो ओकर झोंटा पकड़ले हलइ आउ मार रहले हल । ओकन्हीं रस्ता के बीच में पड़ल हइ आउ आवाजाही में बाधा डालले हइ; ओकन्हीं के सगरो से लोग गरिया रहले ह, लेकिन ओकन्हीं 'छोटगर बुतरून नियन' (गोवाह सब के शाब्दिक वचन) एक दोसरा पर पड़ल हइ, केकिया रहल ह, लड़ रहल ह आउ हँस रहल ह, बहुत हास्यास्पद चेहरा बनाके दुन्नु प्रतियोगिता के तौर पर खिखिया रहल ह, आउ बिलकुल बुतरू नियन दौड़ल एक दोसरा के पीछा करते सड़क पर निकस गेते गेलइ । सुनलहो ? अब पूरा ध्यान देके सुनहो - उपरौका मंजिल पे लाश अभियो गरम हलइ, सुनहो, अभियो गरम; अइसीं पावल गेलइ ! अगर ओकन्हीं हत्या करते हल, चाहे खाली अकेल्ले निकोलाय, आउ सन्दूक तोड़के लूट लेते हल, चाहे खाली डाका डाले में भाग लेते हल, त हमरा एक्के सवाल करे द - खिखियाना, गेट के पास बुतरू नियन मारामारी - (की ई सब घटना के बखत ओकन्हीं के दिमागी हालत) कुल्हाड़ी, खून, आपराधिक धूर्तता, सवधानी, डाका (से मेल खा हइ) ? तखनिएँ हत्या करते गेलइ, कुल्लम कोय पाँच, चाहे दस मिनट पहिले - एहे निष्कर्ष निकलऽ हइ, काहेकि लाश अभियो गरम हइ - आउ अचानक लाश आउ फ्लैट के खुल्ला छोड़के, आउ ई जानते, कि अभी-अभी लोग ओद्धिर गेते गेला ह, आउ लूट के माल फेंकके ओकन्हीं बुतरू नियन रस्ता पर लोघड़नियाँ खा रहले ह, खिखिया रहले ह, सबके ध्यान अपना तरफ आकर्षित कर रहले ह, आउ एक्कर एक्के मत के दस-दस गो गवाह हकइ !"
"वास्तव में विचित्र बात हइ ! जाहिर हइ, असंभव हइ, लेकिन ..."

"नयँ भाय, कोय 'लेकिन-वेकिन' नयँ, आउ अगर कनबाली ओहे दिन ओहे समय निकोलाय के हाथ में पहुँच जाना ओकर खिलाफ वास्तव में एगो मुख्य तथ्यात्मक प्रमाण बन जा हइ - तइयो ओकर देल गेल सफाई से जाँच से संबंधित रूप में ओकर खिलाफ सीधे समझल जाय वला अभियो विवादास्पद प्रमाण रह जा हइ - त दोष निवारक तथ्य पर भी ध्यान देवे के चाही, विशेष रूप से ई चलते कि ई तथ्य सब दुर्निवार (irrefutable) हकइ । आउ हमर कानूनी व्यवस्था के स्वरूप के ध्यान में रखते, की तूँ सोचऽ हो, कि उनकन्हीं अइसन तथ्य के - जे खाली एगो मनोवैज्ञानिक असंभवता (impossibility) पर आउ एगो खाली दिमागी हालत पर आधारित हकइ - एगो दुर्निवार तथ्य के रूप में, आउ सब्भे अभियोगात्मक (incriminating) आउ वस्तुपरक (material) तथ्य सब  के, चाहे ई सब कइसनो होवे, चकनाचूर कर देवे वला तथ्य के रूप में, मानथिन, चाहे माने के स्थिति में हथिन ? नयँ, नयँ मानथिन, कउनो हालत में नयँ मानथिन, काहेकि ओकन्हीं के जेवर के डिबिया मिल गेलइ आउ ऊ अदमी फाँसी लगावे ल चहलकइ, "जे नयँ होते हल, अगर ऊ खुद के अपराधी नयँ समझते हल !" ई एगो बड़गो सवाल हकइ, ओहे से हम उत्तेजित हकूँ ! समझ लऽ !"

"अच्छऽ, देखऽ हियो, कि तूँ उत्तेजित हकऽ । जरी ठहरऽ, हम एक बात पुच्छे लगी भूल गेलियो - ई कइसे साबित होलइ, कि कनबाली वला डिबिया वास्तव में ऊ बुढ़िया के सन्दूक के हकइ ?"
"ई साबित हो चुकले ह", रज़ुमिख़िन नाक भौं सिकोड़ते आउ मानूँ अनिच्छा से जवाब देलकइ, "कोख़ वस्तु के पछान लेलकइ आउ गिरवी में देवे वला असली मालिक के देखा देलकइ, आउ ऊ पक्का साबित कर देलकइ, कि ई वस्तु ओकरे हलइ ।"
"अरे, ई तो खराब बात हइ । अब आउ कुछ - की निकोलाय के ऊ बखत कोय देखलकइ, जब कोख़ आउ पेस्त्र्याकोव उपरौला मंजिल पर गेलइ, आउ कइसूँ एकरा साबित कइल जा सकऽ हइ ?"

"एहे तो असली बात हइ, कि ओकरा कोय नयँ देखलकइ", रज़ुमिख़िन चिढ़के बोललइ, "ई तो खराब बात हइ; कोख़ आउ पेस्त्र्याकोव भी उपरौका मंजिल पर जइते बखत ओकन्हीं के नयँ देखलकइ, हलाँकि ओकन्हीं के गोवाही अब ओतना जादे महत्त्व नयँ रक्खऽ हइ । ‘देखलिअइ’, ओकन्हीं के कहना हइ, ‘कि फ्लैट खुल्लल हइ, कि ओकरा में शायद काम कर रहले हल, लेकिन उपरे जाते बखत ध्यान नयँ देलिअइ आउ ई पक्का आद नयँ हइ, कि ऊ बखत ओकन्हीं हुआँ काम कर रहले हल कि नयँ ।’ "

"हूँ । मतलब, सफाई में खाली एहे सबूत हकइ, कि ओकन्हीं एक दोसरा के ठोकाय कर रहले हल आउ खिखिया रहले हल । मान लेल जाय, कि ई एगो बड़गो सबूत हकइ, लेकिन ... हम पूछ सकऽ हियो, कि ई पूरा तथ्य के खुद्दे कइसे स्पष्ट करबहो ? कनबाली मिल्ले के बात के कइसे स्पष्ट करबहो, अगर वास्तव में ऊ ओकरा ओइसीं मिललइ, जइसे कि ऊ बतावऽ हइ ?"

"कइसे स्पष्ट करियो ? एकरा में स्पष्ट करे लगी की रक्खल हकइ ? बात साफ हइ ! कम से कम ऊ रस्ता, जेकरा पर ई मामला ले जा सकऽ हइ, बिलकुल साफ आउ साबित होल हइ, आउ ई डिबिए हइ जे एकरा साबित कइलके ह । असली हत्यारा से ई कनबाली गिर गेलइ । हत्यारा उपरौला मंजिल पर हलइ, जब कोख़ आउ पेस्त्र्याकोव दरवाजा खटखटइलकइ, आउ ऊ दरवाजा बन करके अन्दर बइठल हलइ । कोख़ बेवकूफी कइलकइ आउ निच्चे चल गेलइ; एहे समय हत्यारा उछलके बहरसी अइलइ आउ ओहो निच्चे दौड़के गेलइ, काहेकि ओकरा लगी आउ कोय विकल्प नयँ हलइ । ज़ीना पर ऊ कोख़, पेस्त्र्याकोव आउ दरबान के नजर से खाली (vacant) फ्लैट में छिप गेलइ, ठीक ऊ समय, जब द्मित्री आउ निकोलाय ऊ फ्लैट से दौड़के बाहर निकसलइ, थोड़े देर दरवाजा के पीछू में रुकलइ, जब दरबान आउ ओकन्हीं उपरे जा रहले हल, ओकन्हीं कदम के आहट शांत होवे तक इंतजार कइलकइ, आउ तब अराम से निच्चे गेलइ, बिलकुल ओहे समय, जब द्मित्री आउ निकोलाय दौड़के सड़क पे चल गेते गेलइ आउ सब कोय तितर-बितर हो गेलइ, आउ गेट पर कोय नयँ रहलइ । हो सकऽ हइ कि कोय ओकरा देखवो कइलके होत, लेकिन ध्यान नयँ देलकइ; की हुआँ परी कमती लोग के आवाजाही रहऽ हइ ? आउ डिबिया ओकर धोकड़ी से गिर गेलइ, जब ऊ दरवजवा के पीछू में खड़ी हलइ, आउ ओकर ई बात के ध्यान नयँ गेलइ, कि कुछ गिर गेल ह, काहेकि ओकरा ई सब सोचे के समय नयँ हलइ । डिबिया के हुआँ मिलना ई बात के सबूत हइ, कि ऊ हुआँ ठहरले हल । त ई हको सारा करतूत !"

"दाँव-पेंच वला बात हइ ! नयँ, भाय, ई तो दाँव-पेंच वला बात हइ । ई तो सबसे जादे दाँव-पेंच वला बात हइ!"
"लेकिन काहे, काहे ?"
"काहेकि सब कुछ बिलकुल फिट बइठ जा हइ ... आउ बारीकी से अन्तर्गुम्फित (interwoven) ... बिलकुल मंच पर के नाटक जइसन ।"
"ओह !" रज़ुमिख़िन चिल्लाहीं जा रहले हल, कि एतने में दरवाजा खुललइ, आउ एगो नयका अदमी घुसलइ, जे हुआँ परी मौजूद सब्भे लोग खातिर अजनबी हलइ ।

सूची            पिछला                      अगला

Tuesday, January 20, 2015

अपराध आउ दंड - भाग – 2 ; अध्याय – 3



अपराध आउ दंड

भाग – 2

अध्याय – 3

तइयो अइसन बात नयँ हलइ कि बेमारी के पूरे समय ऊ बिलकुल बेहोश हलइ - ई बोखार के अवस्था हलइ, बड़बड़ाहट (delirium) आउ आधा बेहोशी के साथ । बहुत कुछ ओकरा बाद में आद आ गेलइ । कभी ओकरा लगइ, कि कइएक अदमी ओकरा भिर जामा हइ आउ पकड़के कहीं दूर ले जाय ल चाहऽ हकइ, ओकरा बारे बहुत वाद-विवाद करऽ हइ आउ झगड़ते जा हइ । कभी अचानक ओकरा लगइ कि ऊ कमरा में एकसरे हइ, सब कोय चल गेलइ आउ ओकरा से डरऽ हइ, आउ खाली बीच-बीच में ओकरा तरफ देखे लगी जरी सन दरवाजा खोलऽ हइ, ओकरा धमकावऽ हइ, आपस में कुछ तो बतियाके तय करऽ हइ, हँस्सऽ हइ आउ ओकरा चिढ़ावऽ हइ। अपन बगल में रहते नस्तास्या के ऊ अकसर पछान ले हलइ; एगो आउ अदमी के ऊ पछानऽ हलइ, जे ओकरा बहुत परिचित लगऽ हलइ, लेकिन पक्का ऊ के हलइ, ऊ कइसूँ अंदाज नयँ लगा पावऽ हलइ आउ उदास हो जा हलइ, कनियो जा हलइ । कभी ओकरा लगइ, कि ऊ एक महिन्ना से पड़ल हइ; कभी लगे लगइ, कि ओहे दिन चल रहले ह । लेकिन ओकरा बारे, ओकरा बारे ऊ बिलकुल भूल गेले हल; लेकिन ओकरा हरेक मिनट आद रहऽ हलइ, कि ऊ कुछ तो भूल गेले ह, जेकरा कभियो भुल्ले के नयँ चाही - दुखी होवऽ हलइ, तड़पऽ हलइ, आद करे के कोशिश में कराहऽ हलइ, झुंझला उठऽ हलइ, चाहे ओकरा भयानक असहनीय डर सतावे लगऽ हलइ । तब ऊ अपन जगह से उट्ठे के कोशिश करऽ हलइ, भाग जाय लगी चाहऽ हलइ, लेकिन हमेशे कोय न कोय ओकरा जबरदस्ती रोक ले हलइ, आउ ऊ फेर से कमजोरी आउ बेहोशी के शिकार हो जा हलइ । आखिरकार, ऊ बिलकुल होश में आ गेलइ ।

अइसन सुबह में घटलइ, दस बजे । सुबह के ई बखत, साफ दिन में, रौदा हमेशे एगो लमगर पट्टी के रूप में ओकर दहिना देवाल पर आवऽ हलइ आउ दरवाजा के पास के कोना में रोशनी भर दे हलइ । ओकर बिछौना के पास खड़ी हलइ नस्तास्या आउ एगो आउ अदमी, जे बहुत उत्सुकतापूर्वक ओकरा तरफ तक रहले हल आउ जे ओकरा लगी बिलकुल अपरिचित हलइ । ई कफ्तान [1] में एगो नौजवान हलइ, छोटगर दाढ़ी वला, आउ चेहरा से सहकारी संघ (artel) के सदस्य मालूम पड़ऽ हलइ । आधा खुल्लल दरवाजा से मकान-मालकिन हुलक रहले हल। रस्कोलनिकोव उठके बइठ गेलइ ।

"ई के हइ, नस्तास्या ?" ऊ नौजवान तरफ इशारा करते पुछलकइ ।
"अरे देखऽ, होश में आ गेला !" ऊ बोललइ ।
"होश में आ गेलथिन !" नौजवान बात दोहरइलकइ ।

ई अंदाज लगाके, कि ऊ अब होश में आ गेलइ, मकान-मालकिन, जे दरवजवा से हुलक रहले हल, तुरते ओकरा बन कर लेलकइ आउ गायब हो गेलइ । ऊ हमेशे से शर्मीली हलइ आउ मोसकिल से बातचीत आउ बहस सहन कर पावऽ हलइ; ऊ करीब चालीस साल के हलइ, आउ मोटी-तगड़ी, भौं आउ आँख कार, मोटापा आउ आलस्य के चलते दयालु; आउ सलोनी भी । जरूरत से जादे लजालु ।

"अपने ... केऽ ?" ऊ पुछते रहलइ, सीधे सहकारी संघ के सदस्य के संबोधित करके । लेकिन एतने में फेर से दरवाजा धड़ से खुललइ, आउ, थोड़े से झुकके, काहेकि उँचगर हलइ, रज़ुमिख़िन अन्दर घुसलइ ।
"ई कइसन जहाज के केबिन हइ !" अन्दर घुसते ऊ चिल्लइलइ, "हमेशे हमर सिर टकरा जा हके; तइयो एकरा क्वाटर कहल जा हइ ! आ तूँ भाय, होश में आ गेलऽ ? अभिये पाशेन्का से सुनलियो ।
"अभिये होश में अइला ह", नस्तास्या बोललइ ।
"अभिये होश मे अइलथिन हँ", फेर से ऊ नौजवान मुसकइते दोहरइलकइ ।
"आउ खुद अपने के हथिन, बता सकऽ हथिन, महोदय ?" अचानक ओकरा संबोधित करते रज़ुमिख़िन पुछलकइ।

"हम हकिअइ, अपने के सूचनार्थ, व्रज़ुमिख़िन; रज़ुमिख़िन नयँ, जइसन कि सब कोय पुकारऽ हका, बल्कि व्रज़ुमिख़िन, एगो छात्र आउ कुलीन घराना के बेटा, आउ ऊ हमर मित्र । अच्छऽ, महोदय, आउ अपने केऽ हथिन?"
"आ हम हकिअइ सहकारी संघ के दफ्तर के एगो सदस्य, व्यापारी शेलोपायेव के हियाँ से, श्रीमान, आउ हियाँ काम के सिलसिले में अइलिए ह, श्रीमान ।"
"ई कुरसी पर तशरीफ रखथिन", खुद रज़ुमिख़िन दोसरा कुरसी पर बइठलइ, टेबुल के दोसरा तरफ । "आउ तूँ, भाय, अच्छा होलो कि होश में आ गेलऽ", ऊ आगू बोललइ, रस्कोलनिकोव के संबोधित करते । "ई चौठा दिन हको, कि मोसकिल से तूँ कुछ खा ह आउ पीयऽ ह । वस्तुतः, तोरा चम्मच से चाय देल गेलो । हम तोरा भिर ज़ोसिमोव के दू तुरी लइलियो हल । आद हको ज़ोसिमोव के बारे? तोरा ध्यान से जँचलको आउ तुरते बता देलको, कि घबराय के कोय बात नयँ हइ - सिर में कुछ तो कइसूँ आघात कइलकइ । एक प्रकार के स्नायु (nervous) संबंधी बकवास, राशन खराब हलइ, ओकर कहना हइ कि तोरा काफी बियर आउ मूली नयँ देल गेलो, ओहे से ई बेमारी, लेकिन कोय बात नयँ, ई दूर हो जइतो आउ सब कुछ ठीक हो जइतो । नौजवान ज़ोसिमोव ! ओकर डगडरी बढ़ियाँ से चल पड़ले ह । अच्छऽ जी, हम अपने के जादे देर नयँ रोकके रखबइ ।", ऊ फेर से संघ के नौजवान के संबोधित कइलकइ, "अपने बता सकऽ हथिन, कि अपने के की काम हइ ? ई ध्यान में रख रोद्या, कि ओकन्हीं के दफ्तर से ई दोसरा तुरी केकरो भेजल गेलो ह; खाली पहिले ई नयँ अइला, बल्कि दोसर कोय, आउ हम ओकरा से बातचीत कइलियो हल । ई पहिले तुरी तोरा पास केऽ अइलो हल ?"

"हमरा लगऽ हइ, कि ई तेसरा दिन हइ जी, बिलकुल सही जी । ई अलिक्सेय सिम्योनविच हलथिन; हमन्हिएँ के दफ्तर में काम करऽ हथिन जी ।"
"आउ ऊ अपने से जादे समझदार लगऽ हका, अपने के की कहना हइ ?"
"जी हाँ; ऊ जरी जादे तगड़ा हथिन जी ।"
"बहुत अच्छा; अच्छऽ जी, आगे बोलथिन ।"

"आ ई अफ़नासी इवानोविच वख़रूशिन के तरफ से, जिनका बारे, हम समझऽ हिअइ, कइएक तुरी सुनलथिन होत जी, अपने के माताजी के निवेदन पे, हमर दफ्तर से अपने खातिर मनीआडर हइ जी", नौजवान कहे ल शुरू कइलकइ, रस्कोलनिकोव के सीधे संबोधित करके । "अगर अपने समझे के हालत में हथिन, श्रीमान, त हमरा अपने के पैंतीस रूबल देवे के हइ, काहेकि पहिलहीं जइसन, अपने के माताजी के निवेदन पे, अफ़नासी इवानोविच से सिम्योन सिम्योनविच के ई संबंध में नोटिस मिल चुकले ह । अपने उनका जानऽ हथिन, श्रीमान?"

"हाँ ... आद हइ ... वख़रूशिन ...", रस्कोलनिकोव ध्यानमग्न हालत में बोललइ ।
"सुन्नऽ हो - व्यापारी वख़रूशिन के जानऽ हका !" रज़ुमिख़िन चिल्लइलइ । "ऊ कइसे नयँ होश में हका ? बल्कि, हम अब नोटिस करऽ ही कि अपनहूँ समझदार व्यक्ति हथिन । अच्छऽ जी ! अकलमंदी के बात सुने में खुशी होवऽ हइ ।"
"जी श्रीमान, ओहे वख़रूशिन, अफ़नासी इवानोविच, आउ अपने के माताजी के निवेदन के अनुसार, जे उनकर माध्यम से ओइसीं एक तुरी अपने के रकम भेज चुकलथिन हँ, ऊ अबरियो इनकार नयँ कइलथिन श्रीमान, आउ सिम्योन सिम्योनविच के ओहे दिन अपना तरफ से नोटिस देलथिन, कि अपने के पैंतीस रूबल अदा कर देल जाय श्रीमान, आउ बेहतर के आशा में, श्रीमान ।

"अपने के मुँह से 'आउ बेहतर के आशा में' - ई सबसे निम्मन बात निकसलइ; आउ 'अपने के माताजी' के मामले में भी कुछ खराब नयँ हलइ । अच्छऽ, त अपने के मत में - ऊ पूरा तरह से, या कि पूरा तरह से नयँ, होश में हका? अयँ?"
"हम्मर मत में की रक्खल हइ, श्रीमान । बस, खाली दसखत हो जइते हल, श्रीमान ।"
"हाँ, कइसूँ घसीट तो देवे करता ! अपने के पास किताब हइ न ?"
"अइकी हइ कितब्बा, श्रीमान ।"

"एद्धिर देथिन । अच्छऽ, रोद्या, जरी उठ के बइठऽ । हम तोरा सहारा देले रहबो; ओकरा लगी 'रस्कोलनिकोव' रगड़के लिख देहो, कलम ले ल, काहेकि, भाय, पइसा हमन्हीं के अभी मध से जादे जरूरत हको ।"
"जरूरत नयँ", रस्कोलनिकोव कहलकइ, कलम के ढकेलके दूर करते ।
"काहे नयँ जरूरत हइ ?"
"हम दसखत नयँ करम ।"
"अरे, शैतान कहीं के, त दसखत के बगैर कइसे काम चलतउ ?"
"नयँ चाही ... पइसा ..."

"ई पइसा नयँ चाही ! अच्छऽ, भाय, ई तो झूठ हउ, हम गोवाह हकिअउ ! किरपा करके, फिकिर नयँ करथिन, ई अइसीं ... फेर से घुम्मब करऽ हइ । ओकरो साथ तो जगलो पर अइसन होवऽ हइ ... अपने बुद्धिमान हथिन, आउ हमन्हीं ओकरा मार्गदर्शन करते जइबइ, मतलब ओकर हाथ के मामूली तौर से रखबइवइ, आउ ऊ दसखत करतइ । चालू कइल जाय ..."
"लेकिन हम फेर आ जइबइ, श्रीमान ।"
"नयँ, नयँ; अपने के तकलीफ काहे लगी देबइ । अपने बुद्धिमान व्यक्ति हथिन ... अच्छऽ, रोद्या, मेहमान के रोकके मत रख ... देखऽ हीं, इंतजार कर रहलथिन हँ ।" आउ ऊ गंभीरतापूर्वक रस्कोलनिकोव के हाथ के दसखत खातिर तैयार कइलकइ ।
"रहे दे, हम खुद्दे ...", ऊ बोललइ, कलम लेलकइ आउ किताब में दसखत कर देलकइ ।
संघ के अदमी पइसा दे देलकइ आउ चल गेलइ ।

"चाबस ! आउ अब, भाय, खाय के मन करऽ हउ ?"
"हाँ", रस्कोलनिकोव जवाब देलकइ ।
"तोरा पास शोरबा (सूप) हको ?"
"कल्हे वला", नस्तास्या जवाब देलकइ, जे अभी तक ओज्जे खड़ी हलइ ।
"आलू आउ चावल के साथ ?"
"आलू आउ चावल के साथ ।"
"हमरा मुँहजबानी आद हके । सूप लेके आव, आउ चइयो दे दे ।"
"लावऽ हियो ।"

रस्कोलनिकोव ई सब कुछ बड़ी अचरज आउ जरी व्यर्थ के डर से देखब करऽ हलइ । ऊ चुपचाप रहे आउ इंतजार करे के फैसला कर लेलकइ - "आगू की होतइ ? लगऽ हइ, हम सरसाम (delirium) में नयँ हकूँ ।", ऊ सोचलकइ, "शायद, ई वास्तव में ..."

दू मिनट के बाद नस्तास्या सूप लेके वापिस अइलइ आउ बतइलकइ, कि चाय अभिये तैयार हो जइतइ । सूप के साथ अइलइ दू गो सम्मच, दू गो प्लेट, आउ पूरा सेट - नीमक, गोलकी, गोमांस खातिर सरसों, वगैरह-वगैरह, जे पहिले ई तरह से लम्बा समय से नयँ सजावल गेले हल । मेजपोश (टेबुल-क्लॉथ) साफ-सुथरा हलइ ।

"बेजाय नयँ होतइ, नस्तस्यूश्का (नस्तास्या), अगर प्रस्कोव्या पावलोव्ना दू बोतल बियर भेज देतइ । हमन्हीं पी जइबइ जी।"
"अरे, तूँ भी बड़ी तेज ह !", नस्तास्या बड़बड़इलइ आउ हुक्म के पालन करे खातिर चल पड़लइ ।

रस्कोलनिकोव बेहूदा आउ तनावपूर्ण ढंग से घूरते रहलइ । एहे दौरान रज़ुमिख़िन सोफा पर ओकर बगल में बइठ गेलइ, अनाड़ी नियन, भालू जइसे; आउ ओकर सिर के बामा हथवा से पकड़ लेलकइ, हलाँकि ऊ खुद बइठ सकऽ हलइ, आउ दहिना हथवा से एक चम्मच सूप ओकर मुँहमा भिर लइलकइ, लेकिन पहिले ओकरा कुछ तुरी मुँहाँ से फूँक मार ले हलइ, ताकि ओकर मुँह नयँ जल जाय । लेकिन सूप खाली हलका गरम हलइ । रस्कोलनिकोव तरसल नियन एक चम्मच गटक गेलइ, बाद में दोसर, तेसर । लेकिन कुछ चम्मच देला के बाद, रज़ुमिख़िन अचानक रुक गेलइ आउ बोललइ, कि आउ अधिक देवे के संबंध में ज़ोसिमोव से सलाह लेवे के चाही।

दू बोतल बियर लेले नस्तास्या घुसलइ ।
"आ चाय चाही ?"
"हाँ, चाही ।"
"जल्दी से जाके चइयो ले आ, नस्तास्या, काहेकि जाहाँ तक चाय के बात हइ, हमरा लगऽ हइ, कि बिन डागडर के सलाह लेलहूँ पीयल जा सकऽ हइ । लेकिन हियाँ तो बियर भी हइ !" ऊ अपन कुरसी पर बइठ गेलइ, अपना तरफ सूप आउ बीफ़ (गोमांस) घींच लेलकइ, आउ अइसे खाय लगलइ, जइसे तीन दिन से भुक्खल होवे ।

"हम तो भाय, रोद्या, अब तोरा पास रोज अइसीं खाना खइबो", ऊ बड़बड़इलइ जाहाँ तक बीफ़ से भरल ओकर मुँह से बन पइलइ, "आउ ई सब तोर प्यारी मकान-मलकिन पाशेन्का के मेहरबानी हको, जे हमरा बिलकुल दिल से इज्जत करऽ हको । जाहिर बात हइ, एकरा लगी हम कोय जोर नयँ दे हिअइ, लेकिन हम विरोधो नयँ करऽ हिअइ । आउ अइकी नस्तास्या भी चाय लेके आ गेलइ । केतना फुरतीली हकइ ! नस्तेन्का (नस्तास्या), तोरा बियर चाही ?"
"अरे, करबऽ हमरा से हुलचुल्ली !"
"आ चाय ?"
"चाय, अच्छऽ ।"
"ढार दे । ठहर, हम तोरा लगी खुद्दे ढार दे हिअउ; टेबुल के पास बइठ जो ।"

ऊ तुरते सब कुछ सजइलकइ, चाय ढरलकइ, फेर आउ दोसर कप ढरलकइ, अपन खाना छोड़ देलकइ आउ फेर से सोफा पर बइठ गेलइ । पहिलहीं नियन ऊ अपन बामा हाथ से रोगी के सिर पकड़लकइ, ओकरा उठइलकइ आउ चम्मच से ओकरा चाय पिलावे लगलइ, फेर से लगातार आउ खास लगन के साथ चम्मच पर फूँक मारते, मानूँ फूँक मारे के ई प्रक्रिया में ही रोगी के चंगा होवे के सबसे मुख्य आउ रक्षक बिन्दु होवे । रस्कोलनिकोव चुपचाप रहलइ आउ कोय विरोध नयँ कइलकइ, हलाँकि ऊ अपना में एतना यथेष्ट सामर्थ्य अनुभव कर रहले हल, कि बिन कोय बाहरी सहारा के उठ आउ सोफा पर बइठ सकऽ हलइ, खाली हाथ से चमचवे, चाहे कपवे पकड़ नयँ सकऽ हलइ, बल्कि शायद चलियो-फिर सकऽ हलइ । लेकिन कोय विचित्र, लगभग जानवर के धूर्तता नियन ओकरा अचानक दिमाग में विचार अइलइ कि अभी खातिर अपन सामर्थ्य के छिपइले रहे, चुप्पी साधले रहे, अगर जरूरत पड़े तो ई ढोंग करते रहे, कि अभियो तक ओकर होश पूरा तरह से ठीक नयँ होले ह, आउ ई दौरान सुन्ने आउ जाने, कि हियाँ की-की हो रहले ह । लेकिन, ऊ अपन घृणा पर नियंत्रण नयँ कर पइलकइ - दस चम्मच चाय घोंट गेला पर, ऊ अचानक अपन सिर छोड़ा लेलकइ, सनकी नियन चम्मच के ढकेलके दूर कर देलकइ, आउ फेर से तकिया पर लुढ़क गेलइ । अब ओकर सिर के निच्चे वास्तविक तकिया पड़ल हलइ - चिरईं के रोएँदार पंख से भरल आउ साफ-सुथरा तकिया के खोल के साथ; एहो ऊ देखलकइ आउ ध्यान में रखलकइ । "पाशेन्का के आझ हमन्हीं हीं रसभरी के जाम (raspberry jam) भेजे के चाही, ओकरा लगी पेय (drink) बनावे खातिर", रज़ुमिख़िन बोललइ, अपन जगह पर बइठते आउ फेर से सूप आउ बियर पीये में लगते । "आउ ऊ तोहरा खातिर रसभरी काहाँ से लइता ?", नस्तास्या पुछलकइ, कश्तरी के अपन पाँचो अंगुरी फैलाके पकड़ले आउ शक्कर के डला (lump) मुँह में रखले चाय पीते [2] ।

"रसभरी, हमर यार, ऊ दोकान से लेतइ । देखऽ हीं, रोद्या, हियाँ पूरा खिस्सा तोर गैरहाजिरी में होलो ह । जब तूँ ओइसन धोखेबाज तरीका से हमरा हीं से भाग गेलहीं आउ अपन डेरा के पतो नयँ देलहीं, तब हमरा अइसन गोस्सा अइलउ, कि हम तोरा खोजके दंड देवे के फैसला कर लेलिअउ । ओहे दिन हम काम पे लग गेलिअउ । हम तोरा खोजे खातिर चक्कर लगइते रहलिअउ, चक्कर लगइते रहलिअउ, लोग से पुछते रहलिअउ, पुछते रहलिअउ । ई अभी वला फ्लैट के बारे तो हम भूलिए गेलिअउ; बल्कि एकरा बारे हमरा कभियो आद नयँ हल, काहेकि एकरा बारे हम जानवे नयँ करऽ हलूँ । हूँ, आउ पहिलौका फ्लैट के बारे - हमरा एतने आद हउ, कि पंचकोण [3] में ख़र्लामोव के मकान हलउ । ई ख़र्लामोव के घर हम ढूँढ़ते रहलूँ, ढूँढ़ते रहलूँ - लेकिन बाद में पता चलल, कि वास्तव में ई ख़र्लामोव के घर नयँ, बल्कि बुख़ के घर हकइ - कभी-कभी ध्वनि से कइसन भ्रम हो जा हइ ! त हमहूँ गोसा गेलूँ । गोसइलूँ आउ चलियो पड़लूँ, जे होवे से होवे, दोसर दिन पता वला दफ्तर (address bureau), आउ मालूम हउ - दुइए मिनट में तोर पता ढूँढ़के दे देवल गेल । तोर नाम हुआँ दर्ज कइल हकउ ।"

"दर्ज कइल !"
"बिलकुल ! आउ अउकी हमर सामनहीं सेनापति कोबेलेव के नाम कइसूँ ओकन्हीं ढूँढ़ नयँ पइलका ! अच्छऽ जी, ई एगो लम्मा खिस्सा हइ । हियाँ हमर कदम रखतहीं तुरते हम तोर सब किरिया-करम से परिचित हो गेलूँ; सब कुछ, भाय, सब कुछ, सब कुछ जन्नऽ हिअउ; अइकी एहो (नस्तास्या) देखलको ह - आउ निकोदिम फ़ोमिच से परिचय होलउ, इल्या पित्रोविच से परिचय करावल गेल, आउ दरबान से, मिस्टर ज़म्योतोव से, अलिक्सान्द्र ग्रिगोरयेविच, ई दफ्तर के मैनेजर से, आउ आखिरकार पाशेन्का से - ई तो ताज मिले जइसन बात हल; अइकी एहो जन्नऽ हउ ..."

"शक्कर लगाके बोलला", शरारत से मुसकइते नस्तास्या बड़बड़इलइ ।
"ओकरा चइया में डाल द, नस्तास्या निकिफ़ोरोव्ना ।"
"अरे, कुत्ता कहीं के !" अचानक नस्तास्या चिल्लइलइ आउ खिलखिला उठलइ । "आ हम पित्रोव्ना हकूँ, निकिफ़ोरोव्ना नयँ", ऊ अचानक आगे बोललइ, जब हँसना बन कर देलकइ ।

"ध्यान में रखबो जी । अच्छऽ, भाय, फालतू बात छोड़ देल जाय, पहिले हम चाहऽ हलिअइ कि हियाँ सगरो बिजली के करंट (धारा) लगा दिअइ, ताकि हियाँ के सब्भे स्थानीय (लोकल) अंधविश्वास एक्के तुरी में जड़ से उखड़ जाय, लेकिन पाशेन्का जीत गेलइ । हमरा तो भाय बिलकुल आशा नयँ हल, कि ऊ अइसन हकइ ... दिल के खींच लेवे वली ... की ? तोरा की कहना हइ ?"
रस्कोलनिकोव चुप रहलइ, हलाँकि एक्को मिनट लगी ऊ अपन चिंताग्रस्त आँख के ओकरा से अलगे नयँ कइलकइ, आउ अब लगातार ओकरा एकटक देखना जारी रखलकइ ।
"आउ बहुत", रज़ुमिख़िन बात जारी रखलकइ, ओकर चुप्पी से बिन कोय परेशानी के आउ मानूँ प्राप्त उत्तर से सहमत होते, "आ बहुत ठीके-ठाक हइ, सब्भे हालत में ।"
"अरे नीच !" नस्तास्या फेर चिल्लइलइ, जेकरा ई बातचीत शायद वर्णनातीत आनन्द दे रहले हल ।
"ई खराब बात हउ, भाय, कि तूँ शुरुए से ई बात पे ध्यान नयँ दे पइलहीं । ओकरा साथ अइसन नयँ होवे के चाही हल । वास्तव में ऊ, तथाकथित, बिलकुल अप्रत्याशित स्वभाव के हइ ! खैर, ओकर स्वभाव के बारे बाद में देखल जइतइ ... खाली एहे बात लेल जाय, मसलन, तूँ नौबत कइसे हियाँ तक पहुँचे देलहीं कि ऊ तोरा खानो भेजना बन कर देलकउ ? चाहे, मसलन, करजा के ई वचनपत्र ? तूँ पागल हो गेलहीं हल की, कि करजा के वचनपत्र पे दसखत कइलहीं ! चाहे, मसलन, ई प्रस्तावित विवाह, जब ओकर बेटी, नताल्या येगोरोव्ना, जिन्दे हलइ ... हमरा सब कुछ मालूम हकउ ! बल्कि हम देखऽ हिअउ, कि ई बहुत नाजुक मामला हकउ आउ हम गदहा हकूँ; तूँ हमरा माफ कर । लेकिन अब जब बात बेवकूफी के निकस गेलउ, त तूँ जइसन सोचऽ हीं, प्रस्कोव्या पाव्लोव्ना बिलकुल, भाय, ओतना बेवकूफ नयँ हइ, जेतना पहिले नजर में देखे में लगऽ हइ, की ?"

"हाँ ...", रस्कोलनिकोव दाँत भींचके बोललइ, बगल तरफ देखते, लेकिन ई जानके, कि बातचीत जारी रखना ओकर जादे फयदा में रहतइ ।

"सच हइ न ?", रज़ुमिख़िन चिल्ला पड़लइ, स्पष्टतया, ई बात से खुश होके कि ओकरा जवाब मिललइ, "लेकिन वस्तुतः बुद्धिमान नयँ, की ? बिलकुल, बिलकुल अप्रत्याशित स्वभाव वली ! हम, भाय, जरी भ्रमित हिअउ, तोरा हम विश्वास देलावऽ हिअउ ... ऊ चालीस के तो पक्का होतइ । ऊ बतावऽ हइ - छत्तीस आउ ई बात के ओकरा पूरा हक हइ । लेकिन हम विश्वास देलावऽ हिअउ कि ओकरा हम जादे बौद्धिकता के कसौटी पर परखऽ हिअउ, खाली आध्यात्मिक दृष्टिकोण से; भाय, हियाँ पर हमन्हीं बीच अइसन प्रतीक शुरू होले ह, कि तोर बीजगणित की हउ ! हमरा कुछ समझ में नयँ आवऽ हउ ! खैर, ई सब तो बकवास हइ, लेकिन खाली ऊ ई देखके, कि तूँ अब छात्र नयँ रह चुकलहीं हँ, तोर टीसनी करे के काम छूट गेलो ह आउ ढंग के पोशाक तक नयँ रहलउ, कि ओकर रईसजादी (बेटी) के मौत के बाद ओकरा कोय तरह से तोरा रिश्तेदार जइसन व्यवहार करे के जरूरत नयँ रह गेले ह, त ऊ अचानक डर गेलइ;  आउ चूँकि तूँ अपना तरफ से कोना में दुबकल रहलहीं आउ पहिले जइसन कुच्छो संबंध बनइले नयँ रखलहीं, त ऊ तोरा अपन फ्लैट से निकास बाहर करे के सोच लेलकउ । आउ ई इरादा बहुत पहिले से कइले हलउ, लेकिन ओकरा करजा के वचनपत्र के अफसोस हलइ (अर्थात् पइसा डुब्बे के अफसोस) । एकरा बारे तूँ खुद्दे विश्वास देलइलहीं हल, कि तोर माय भुगतान करथुन ..."

"ई हमर कमीनापन हलइ कि हम अइसे बोललिअइ ... हमर माय खुद्दे लगभग भिखारिन हकइ ... आउ हम झूठ बोललिए हल, ताकि हमरा फ्लैट में रहे दे आउ ... खाना देते रहे", रस्कोलनिकोव उच्च स्वर से आउ साफ-साफ बोललइ ।

"हाँ, ई तो तोर समझदारी हलउ । खाली बड़गर मामला हइ ई, कि ओहे बखत टपक जा हका मिस्टर चेबारोव, कोर्ट काउंसिलर आउ व्यापारी अदमी । पाशेन्का ओकरा बिन कुच्छो सोच नयँ सकऽ हलइ, ऊ हइए हइ जादे शर्मीली; लेकिन एगो व्यापारी अदमी तो लजालु नयँ होवऽ हइ, आउ जाहिर हइ, ऊ सबसे पहिले प्रश्न कइलकइ - वचनपत्र के मोताबिक वसूली के कोय आशा हइ ? उत्तर – ‘हइ, काहेकि माय अइसन हइ, कि अपन एक सो पचीस रूबल के पेंशन से, चाहे भुखले काहे नयँ रहे, लेकिन रोदिन्का के जरूर बचइतइ, आउ बहिनी अइसन हइ, कि अपन भाय खातिर बंधुआ मजूरनी बन जइतइ । एहे बात पर तो ऊ दिलजमई हलइ ...’ तूँ कसमसा हीं काहे ? हम तो, भाय, तोर सब असलियत जन गेलियो ह, ई बेकार के बात नयँ हलइ, कि तूँ पाशेन्का के सामने सब कुछ दिल खोलके बता दे हलहीं, जब ओकरा साथ रिश्तेदारी के स्तर पर हलहीं, आउ अब हम प्यार से कह रहलियो ह ... असली बात तो ई हइ - ईमनदार आउ कोमलहृदय व्यक्ति खुल्लल दिल से बात करऽ हइ, लेकिन एगो व्यापारी अदमी सुनते रहऽ हइ आउ खइते रहऽ हइ, आ बाद में पूरा खा जा हइ । त ऊ ई वचनपत्र के चेबारोव के कोय भुगतान के रूप में लेवे देलकइ, आ ऊ औपचारिक रूप से भुगतान के तगादा कइलकइ, आउ एकरा में ओकरा कोय शरम नयँ बुझइलइ । जइसीं हमरा ई सब पता चललइ, हमरा मन कइलकइ, कि अपन अंतःकरण के सफाई खातिर ओकरो खाल घींच लिअइ, लेकिन ऊ समय तक हमर पाशेन्का के साथ तालमेल बइठ गेले हल, आउ हम ई सब खिस्सा के समाप्त कर देवे ल कहलिअइ, मतलब कि बिलकुल जड़ से, ई गारंटी देके कि तूँ भुगतान कर देमहीं । हम तो, भाय, तोरा खातिर गारंटी देलिअउ, समझलहीं ? चेबारोव के बोलावल गेलइ, चानी के दस रूबल ओकर चेहरा पर बिग देलिअइ, आउ कागज वापस ले लेलिअइ, आउ एकरा हम तोर खिदमत में पेश कर रहलियो ह - अब तोर बात पर लोग विश्वास करते जा हका - अइकी, ले ल, आऊ हम थोड़े सन एकरा फाड़ देलियो ह, जइसन कि साधारणतः कइल जा हइ ।

रज़ुमिख़िन करजा के वचनपत्र टेबुल पर रख देलकइ; रस्कोलनिकोव ओकरा तरफ देखलकइ, आउ बिन एक्को शब्द बोलले, अपन मुँह देवाल तरफ फेर लेलकइ । रज़ुमिख़िन के भी जरी बुरा लगलइ ।

"हम देख रहलियो ह, भाय,", ऊ एक मिनट के बाद बोललइ, "कि फेर से हम बेवकूफी कइलूँ हँ । हम तोर ध्यान हटावे आउ अपन बकबक से दिल बहलावे लगी सोचब करऽ हलूँ, लेकिन लगऽ हउ, कि हम खाली तोर पित्त छेड़ देलिअउ ।"
"ई की तूँ हलहीं जेकरा हम सरसामी हालत में पछान नयँ पइलूँ हल ?" रस्कोलनिकोव पुछलकइ, एक मिनट तक चुप्पी साधला के बाद आउ अपन सिर बिन घुमइले ।
"हाँ हमहीं हलिअउ, आउ तूँ ऊ बखत उखड़ गेलहीं हल, खास करके जब हम एक तुरी ज़म्योतोव के लइलियो हल ।"
"ज़म्योतोव ? ... किरानी ? ... काहे लगी ?" रस्कोलनिकोव तेजी से अपन सिर घुमइलकइ आउ अपन दृष्टि रज़ुमिख़िन पर जमइलकइ ।

"लेकिन तूँ अइसे काहे बरत रहलँऽ हँ ... परेशान काहे हकँऽ ? ऊ तोरा साथ परिचय करे ल चाहऽ हलइ; ऊ खुद चाहऽ हलइ, काहेकि ओकरा साथ हम तोरा बारे बहुत कुछ बात कइलिए हल ... नयँ तो तोरा बारे एतना जनकारी हमरा केकरा से मिल्लत हल ? भाय, ऊ निम्मन अदमी हकइ, बहुत करामाती ... जाहिर हइ, अपन ढंग के । अभी हमन्हीं दोस्त हकिअइ; लगभग रोज दिन मिल्लऽ हिअइ । हम एहे इलाका में आ गेलियो ह । तोरा अभी तक नयँ मालूम ? अभी-अभी अइलियो ह । ओकरा साथ दू तुरी लविज़ा के पास होके अइलिए ह । लविज़ा के तो आद आवऽ हउ न, लविज़ा इवानोव्ना ?"

"बड़बड़ा रहलिए हल हम कुच्छो ?"
"बिलकुल ! तूँ अपने आप के नयँ हलऽ, जी ।"
"हम कउची के बारे बड़बड़ा रहलिए हल ?"
"बाप रे ! कउची के बारे बड़बड़ा रहलहीं हल ? ई जाहिर हइ कि सब कउन चीज के बारे बड़बड़ा हइ ... अच्छऽ, भाय, अब हम समय बरबाद नयँ कर सकऽ हूँ, काम हके ।"
ऊ कुरसी से उठ खड़ी होलइ आउ अपन टोपी धर लेलकइ ।
"अरे, हम कउची के बारे बड़बड़ाब करऽ हलिअइ ?"

"कइसन रट लगइले हके ! कहीं कोय भेद खातिर तो डरल नयँ हकऽ ? फिकिर नयँ करऽ - कोय शहजादी के बारे तोर मुँह से कुछ नयँ निकसलो । बल्कि कोय बुलडॉग के बारे, आउ कनबाली के बारे, आउ केकरो चेन (सिकरी) के बारे, आउ क्रेस्तोव्स्की टापू के बारे, आउ कोय दरबान के बारे, आउ निकोदिम फ़ोमिच के बारे, आउ इल्या पित्रोविच, पुलिस चीफ के सहायक, के बारे, बहुत कुछ बक गेलऽ । आउ एकरा अलावे, अपन पेताबा लगी भी तोरा बहुत दिलचस्पी हलो, बहुत ! शिकायत कर रहलऽ हल - 'हमरा दे दऽ, बस' । ज़म्योतोव खुद्दे तोर पेताबा खातिर सब्भे कोना छान मरलको, आउ अपन इत्र से महँकते आउ अंगूठी से सज्जल हाथ से तोरा ई चिथड़ा देलको । तब तोरा चैन अइलो, आउ पूरे चोबीस घंटे ई चिथड़ा के हथवा में दबइले रहलऽ; तोर हाथ से एकरा निकासना संभव नयँ होल । शायद अभियो कहीं पे तोर रजाय के अन्दर पड़ल होतो । आउ फेर पतलून के फुचड़ो मँग रहलऽ हल, आउ ओहो केतना लोर बहइते ! आउ हमन्हीं तो ई समझे के कोरसिस कर रहलियो हल - हुआँ आउ कइसन फुचड़ा होतइ ? लेकिन कुच्छो समझ में नयँ आ रहलो हल ... अच्छऽ, अब काम के बात हो जाय ! अइकी पाँच रूबल हको; ओकरा में से दस ले ले हकियो, आउ लगभग दू घंटा के बाद ऊ सब के हिसाब दे देबो । एहे दौरान हम ज़ोसिमोव के भी बता देबो, हलाँकि एकरा बगैर ओकरा बहुत पहिलहीं आ जाय के चाही हल, काहेकि एगारऽ से जादे बज गेलइ । आउ तूँ नस्तेन्का (नस्तास्या), हमर गैरहाजिरी में जेतना जादे हो सके ओतना तुरी बीच-बीच में जरी देख लिहो हल, कि इनका कुछ पीये लगी, चाहे आउ कुछ चाही ... आउ पाशेन्का के खुद्दे जे कुछ जरूरत हइ ऊ बता दे हिअइ । फेर भेंट होतइ !"

"उनका पाशेन्का कहके पुकारऽ हइ ! बदमाश कहीं के !" ओकर पीछू में नस्तास्या बोललइ; फेर दरवाजा खोललकइ आउ कान देके सुन्ने लगलइ, लेकिन ओकरा बरदास नयँ होलइ आउ खुद ज़ीना से उतरते निच्चे दौड़ल गेलइ । ओकरा बहुत उत्सुकता हलइ ई जाने के, कि हुआँ ऊ मकान-मालकिन से कउची बारे बात करऽ हइ; आउ कुल मिलाके ई साफ लगऽ हलइ, कि ऊ रज़ुमिख़िन पर बिलकुल मोहित हो गेले हल ।

जइसीं ओकर पीछू दरवाजा बन होलइ, ओइसीं रोगी रजाय अपने ऊपर से हटा लेलकइ आउ अधपगला नियन बिछौना पर से उछल खड़ी होलइ । जलते झटकदार उजलत से ऊ इंतजार कर रहले हल, कि केतना जल्दी ओकन्हीं हियाँ से घसके, कि ओकन्हीं के गैरहाजिरी में अपन काम में जल्दी से लग जाय । लेकिन काहे लगी, कउन काम लगी ? - मानूँ अब ओकरा चिढ़ावे खातिर, सब कुछ भुला गेलइ । "हे भगमान ! हमरा खाली एक बात बता दे - ओकन्हीं के सब कुछ मालूम हकइ, कि अभियो कुछ मालूम नयँ हइ ? आउ कि जान गेते गेला ह आउ खाली ढोंग करऽ हका, चिढ़ावऽ हका, जब हम पड़ल रहऽ हकूँ, आउ अइकी अन्दर घुसता आउ कहता, कि सब कुछ तो पहिलहीं मालूम चल चुकलो हल आउ खाली अइसीं ... अब की करूँ ? अइकी हम भूल गेलूँ, मानूँ जान-बूझके; अचानक भूल गेलूँ, अभी-अभी तो आद हले ! ..."

ऊ कमरा के बिच्चे में खड़ी हलइ आउ कष्टदायक विस्मय से चारो तरफ देखते रहलइ; फेर दरवाजा भिर गेलइ, एकरा खोललकइ, ध्यान देके सुनलकइ; लेकिन ई ऊऽ नयँ हलइ । अचानक, मानूँ ओकरा कुछ आद आ गेल होवे, लपकके ऊ कोनमा में गेलइ, जाहाँ देवाल के कागज में भूड़ हलइ, आउ सब कुछ जाँचे लगलइ, भुड़वा में हाथ नइलकइ, टटोललकइ, लेकिन एहो ऊ नयँ हलइ । ऊ स्टोव के पास अइलइ, एकरा खोललकइ, आउ राख में टटोले लगलइ - पतलून के फुचड़ा आउ जेभी में से नोचल चिथड़ा अइसीं पड़ल हलइ, जइसे कि ऊ तखनी फेंकलके हल, मतलब कि कोय नयँ देखलके हल ! तभिये ओकरा पेताबा के बारे आद पड़लइ, जेकरा बारे रज़ुमिख़िन अभी ओकरा बतइलके हल । सच में, अइकी ऊ सोफा पर पड़ल हइ, रजाय के निच्चे, लेकिन अब तक ऊ एतना घिस चुकले हल आउ गंदा हो गेले हल, कि ज़म्योतोव कुछ नयँ देख पइलके हल ।

"अरे, ज़म्योतोव ! ... दफ्तर ! ... आ काहे लगी हमरा दफ्तर में बोलावल जा हइ ? नोटिस काहाँ हइ ? अरे ! ... हम सब कुछ मिला देलिअइ - एकर ऊ बखत जरूरत हलइ ! हम ऊ बखत पेताबा जाँच रहलिए हल, लेकिन अब ... अब तो हम बेमार हलिअइ । लेकिन ज़म्योतोव काहे लगी अइले हल ? काहे लगी लइलके हल ओकरा रज़ुमिख़िन ? ...", ऊ कमजोरी में बड़बड़ा रहले हल, फेर से सोफा पर बइठते । "ई की हइ ? हम अभियो सरसाम में हकूँ, कि ई सब वास्तव में हो रहल ह ? लगऽ हइ, ई सच हइ ... आह, हमरा आद पड़ल - भाग ! जल्दी से भाग, जरूर, जरूर भाग ! हाँ ... लेकिन काहाँ ? आउ हमर पोशाक काहाँ हके ? बूट नयँ ! लेके चल गेते गेलइ ! नुका देते गेलइ ! हम समझऽ ही ! आह, अइकी हमर पोशाक हके - ओकन्हीं के नजर से चूक गेलइ ! अइकी टेबुल पर पइसवो हइ, भगमान के किरपा से ! अइकी वचनपत्र भी हकइ ... हम पइसवा ले लेम आउ दूर चल जाम, आउ दोसर फ्लैट किराया पर ले लेम, ओकन्हीं ढूँढ़ नयँ पइता ! ... हाँ, लेकिन पता वला दफ्तर (address bureau)? हमरा खोज लेवल जात ! रज़ुमिख़िन तो खोजिए लेत । सबसे अच्छा बिलकुल भाग जाय के ... दूर ... अमेरिका में, आउ ओकन्हीं सब पर थूक देवे के ! आउ वचनपत्र ले लेवे के ... ई हुआँ काम देत। आउ कउची लेवे के ? ओकन्हीं सोचतइ, कि हम बेमार हकिअइ ! ओकन्हीं ई जानवो नयँ करतइ, कि हम चलियो-फिर सकऽ हिअइ, हे हे हे ! ... ओकन्हीं के अँखिया से हम अन्दाज लगइलिअइ, कि ओकन्हीं के सब कुछ मालूम हइ ! बस कहीं ज़ीना से उतर पाऊँ ! आउ अगर ओकन्हीं के पहरेदार हुआँ खड़ी रहइ - पुलिसवला ! ई की हइ - चाय ? आउ, अइकी बियर भी बच्चल हइ, आधा बोतल, ठंढका !"

ऊ बोतल उठा लेलकइ, जेकरा में एक पूरा गिलास बियर बच्चल हलइ, आउ बड़ी चाव से एक साँस में गटक गेलइ, मानूँ अपन सीना के आग बुझा रहल होवे । लेकिन एक्को मिनट नयँ होलइ, कि बियर ओक्कर सिर में चढ़ गेलइ, आउ ओकर रीढ़ से एगो हलका आउ सुखद भी सिहरन दौड़ गेलइ । ऊ पड़ गेलइ आउ रजाय तानके ओढ़ लेलकइ। ओकर बेमार आउ बिखरल विचार अधिकाधिक उलझे लगलइ, आउ जल्दीए हलका आउ सुखद नीन ओकरा धर लेलकइ । अराम के साथ ऊ अपन सिर तकिया के अन्दर जमा लेलकइ, आउ नरम रजाय, जे अब ओकर चिथड़ा होल पहिलौका ओवरकोट के जगह ले लेलके हल, ऊ कसके खुद पर लपेट लेलकइ, अराम से उच्छ्वास लेलकइ आउ गहरा, गाढ़ा, सेहतगर (स्वास्थ्यप्रद) नीन में सुत गेलइ ।

ऊ जग गेलइ, ई सुनके कि कोय तो ओकर कमरा में घुसलइ, आँख खोललकइ आउ रज़ुमिख़िन के देखलकइ, जे दरवाजा पूरा खोलके चौखट भिजुन खड़ी हलइ, ई संकोच में, कि अन्दर जाय कि नयँ । रस्कोलनिकोव तेजी से उठके सोफा पर बइठ गेलइ आउ ओकरा तरफ देखे लगलइ, मानूँ कुछ तो आद करे के प्रयास कर रहल होवे ।

"अच्छऽ, त तूँ सुत्तल नयँ हकऽ, ल हम पहुँच गेलियो ! नस्तास्या, बंडल घसीटके हियाँ ले आव !" रज़ुमिख़िन निच्चे तरफ चिल्लइलइ । "अभिये हिसाब मिल जइतो ..."
"केतना बजले ह ?" रस्कोलनिकोव पुछलकइ, बेचैनी से चारो तरफ देखते ।
"तूँ तो अच्छा नीन लेलऽ, भाय - बाहर तो साँझ हो गेलो ह, लगभग छो बजलो होत । तूँ छो घंटा से जादहीं सुतलऽ ह ..."
"हे भगमान ! हमरा की हो गेल ह ! ..."

"आ ओकरा से की ? ई तो सेहत लगी अच्छे हको ! काहाँ के जल्दी हको ? केकरो से मिल्ले के हको की ? हमन्हीं के पास बखते बखत हइ । हम तोर तीन घंटा से इंतजार कर रहलियो ह; दू तुरी हम हियाँ अइलियो हल, तूँ सुत्तल हलऽ । ज़ोसिमोव के हियाँ दू तुरी गेलिअइ - जब देखऽ त घरे पर नयँ ! खैर, कोय बात नयँ, आ जइतइ!... अपन छोट-मोट कामो खातिर हम कुछ देर लगी बाहर गेलूँ हल । हम आझे घर बदललूँ, बिलकुल बदल लेलूँ, अपन चाचा के साथ । अब हमरा साथ चाचा रहऽ हका ... खैर, ई सब बात के छोड़ऽ, काम के बात पर आवल जाय ! ... बंडल हियाँ पर लाव, नस्तेन्का । त काम शुरू कइल जाय ... आउ भाय, कइसन हकऽ ?"

"हम ठीक हकूँ; हम बेमार नयँ हकूँ ... रज़ुमिख़िन, तूँ हियाँ पर लम्मा समय से हकऽ ?"
"कहलियो न, तीन घंटा इंतजार कइलियो ।"
"नयँ, लेकिन पहिले ?"
"पहिले की ?"
"तूँ कबसे हियाँ अइते रहलऽ ह ?"
"ई तो हम तोरा सुबहीं बता चुकलियो ह; कि तोरा आद नयँ ?"

रस्कोलनिकोव सोचे लगलइ । सुबह के बात ओकरा सपना नियन लग रहले हल । ऊ खुद्दे आद नयँ कर पइलकइ आउ प्रश्नात्मक ढंग से रज़ुमिख़िन तरफ देखे लगलइ ।
"हूँ !" ऊ बोललइ, "भूल गेलऽ ! हमरा सुबहे के लग रहऽ हल, कि तूँ अभियो पूरा होश में नयँ हकऽ ... अब सुतला से तो कुछ बेहतर लगऽ हकऽ ... सच में, बिलकुल बेहतर देखाय दे ह । नौजवान ! खैर, अब काम के बात! अइकी तोरा अब आद आ जइतो । एन्ने देखऽ, प्यारे दोस्त ।"

ऊ बंडल खोले लगलइ, आउ साफ लगऽ हलइ कि जे ओकरा बड़ी दिलचस्प लग रहले हल ।
"जन्नऽ हो, भाय, ई हम खास करके हम अपन दिल में ले लेलियो ह । काहेकि, हमरा तोरा में से इंसान बनावे के चाही । चलऽ - उपरे से शुरू कइल जाय । ई टोपी देखऽ हो ?" ऊ शुरू कइलकइ, बंडल से एगो काफी निम्मन लेकिन मामूली सन आउ सस्ता टोपी निकासते । "पेहनाके देखे द ।"
"थोड़े देर में, बाद में", चिड़चिड़ाल रस्कोलनिकोव ओकरा दूर हटइते बोललइ ।

"नयँ नयँ, भाय रोद्या, विरोध मत करऽ, बाद में बहुत देर हो जइतो; आउ हमरो रात भर नीन नयँ आत, काहेकि बिन नाप के अन्दाज से हम खरीदलूँ हँ । बिलकुल ठीक !" टोपी पेहनाके ऊ विजय के लहजा में चिल्ला उठलइ - "नाप में बिलकुल ठीक ! सिर के टोपी, भाय - ई पहनावा में सबसे पहिला चीज होवऽ हइ, अपने तरह के एगो अनुशंसा (सिफारिश) । हमर दोस्त तल्सत्याकोव हर तुरी अपन ढक्कन उतारे खातिर लचार हो जा हइ, जब कभी कहीं अइसन सार्वजनिक स्थान पे जा हइ, जाहाँ सब्भे दोसर कोय टोप आउ टोपी में रहऽ हइ । सब कोय सोचऽ हइ, कि ऊ दास जइसन विनम्रता के कारण अइसन करऽ हइ, लेकिन ऊ खाली ई कारण से अइसन करऽ हइ, कि ओकरा अपन चिड़ियाँ के खोंथा से शरम आवऽ हइ -  अइसन शर्मीला अदमी हइ ! अच्छऽ नस्तास्या, ई दू तरह के सिर के टोपी हको - ई पलमेर्स्तोन (ऊ कोनमा से रस्कोलनिकोव के फट्टल-चिट्टल गोलगाल टोपी निकसलकइ, जेकरा नयँ मालूम काहे ऊ 'पलमेर्स्तोन' कहऽ हलइ), अथवा ई जेवर के छोटगर चीज ? एकर कीमत आँकऽ, रोद्या, की सोचऽ हो, हम केतना चुकइलिए होत ? नस्तस्यूश्का ?" ऊ ओकरा (नस्तास्या) तरफ मुड़लइ, ई देखके कि ऊ (रस्कोलनिकोव) चुप हकइ ।

"बीस कोपेक देलऽ होत", नस्तास्या जवाब देलकइ ।

"बीस कोपेक ? मूरख कहीं के !" ऊ नराज होके चिल्लइलइ, "आझकल तो तोरो बीस कोपेक में कोय खरीद नयँ पइतइ - आठ ग्रिव्ना [4] ! ओहो ई कारण से, कि ई पुराना हकइ । आउ सच में एकरा ई शर्त पर, कि पेन्हला के बाद अगर फट जइतो, त अगले साल दोसर फोकट में दे देतो, भगमान कसम ! अच्छऽ जी, अब 'संयुक्त राज्य अमेरिका' पर बात शुरू कइल जाय, जइसन कि हमन्हीं के इस्कूल में ई नाम से पुकारल जा हलइ । हम आगाह करऽ हियो - हमरा ई फुलपैंट पर नाज हके !" आउ ऊ रस्कोलनिकोव के सामने सिलेटी रंग के हलका ऊनी कपड़ा के गरमी में पहने वला पतलून देखइलकइ । "न तो कोय भूड़, न कोय धब्बा, आउ साथे-साथ पुराना होलो पर काफी अच्छा हइ, आउ ओइसने वास्कट, एक्के रंग के (मैचिंग), जइसन कि फैशन के मोताबिक जरूरत हइ । आउ जे पुराना हइ, त वास्तव में आउ बेहतर हइ - जादे कोमल, जादे मोलायम ... देखऽ, रोद्या, संसार में जीविका बनावे के हको, त हमर विचार से, ई काफी हइ कि ऋतु के अनुसार रहन-सहन रक्खे के चाही; अगर जनवरी में शतावर (asparagus) के इस्तेमाल नयँ करऽ ह, त अपन बटुआ (पर्स) में कुछ रूबल बचा लेबऽ; एहे बात लागू होवऽ हइ ई खरीदारी के मामले में । अभी ग्रीष्म ऋतु हइ, आउ हम ग्रीष्म खातिर ही खरीदारी कइलूँ, काहेकि पतझड़ ऋतु तक तो कइसूँ आउ जादे गरम सामग्री के जरूरत होत, आउ एकरा फेंक देवे पड़त ... खास करके ई वजह से, कि ई सब कुछ उ बखत तक खुद्दे बरबाद हो जइतइ, अगर ऐशो-आराम के स्तर उँचगर हो गेला के वजह से नयँ, त अन्दरूनी अव्यवस्था के चलते । अच्छऽ, त एकर कीमत आँकऽ ! तोहर विचार में केतना होतइ ? दू रूबल पचीस कोपेक ! आउ आद रहे, फेर ओहे पहिलौका शर्त के साथ - अगर पेहन-पेहनके कहीं फट जाय, त अगले साल दोसर फोकट के मिल जइतो ! फ़ेद्यायेव के दोकान पर आउ दोसरा तरह से कारोबार नयँ होवऽ हइ - एक तुरी भुगतान कइलऽ, आउ सारी जिनगी लगी काफी हो जा हइ, काहेकि दोसरा तुरी खुद्दे नयँ जइबऽ । अच्छऽ जी, अब बूट के बारे बात कइल जाय - ई कइसन लगऽ हको ? ई साफ झलकऽ हइ, कि ई पुराना हइ, लेकिन दू महिन्ना तो चलिए जइतइ, काहेकि ई विदेशी काम हइ आउ विदेशी माल से बन्नल हइ - अंगरेजी दूतावास के सचिव पिछले सप्ताह फुटपाथ पर के हाट में डाल देलके हल; ऊ एकरा खाली छो दिन पेन्हलके हल, लेकिन ओकरा पइसा के बहुत जरूरत हलइ । कीमत एक रूबल पचास कोपेक । हइ न बढ़ियाँ सौदा ?"

"लेकिन हो सकऽ हइ, ई उनका फिट नयँ होबइ !" नस्तास्या टिप्पणी कइलकइ ।

"फिट नयँ होतइ ? आ एकरा में की रक्खल हइ ?" आउ ऊ झोला से रस्कोलनिकोव के पुरनका, रूखड़ा, सुक्खल कीचड़ से सन्नल, भूड़े-भूड़ होल, बूट निकसलकइ । "हम तैयार होके गेलिए हल, हमर ई भीमकाय बूट के मोताबिक असली नाप मालूम कर लेलकइ । ई सब काम दिल से कइल गेले ह । जाहाँ तक छालटी (linen, सन या पटसन के रेशा से बन्नल कपड़ा) के बात हइ, त एकरा बारे मकान-मालकिन से बात पक्का करके लइलिए ह । अइकी, सबसे पहिले तो सन के (hempen) तीन गो कमीज,  लेकिन उपरे से फैशनदार ... अच्छऽ जी, त ई तरह से - आठ ग्रिव्ना (अस्सी कोपेक) के टोपी, दू रूबल पचीस कोपेक के दोसर-दोसर कपड़ा, कुल मिलाके तीन रूबल पाँच कोपेक; एक रूबल पचास कोपेक के बूट, काहेकि ई बहुत निम्मन हइ, कुल्लम चार रूबल पचपन कोपेक, आउ पाँच रूबल कुल छालटी के - थोक में मोलजोल कइल - सब कुछ मिलाके नो रूबल पचपन कोपेक। (मतलब, दस रूबल में से बच्चल) पैंतालीस कोपेक रेजकी, तामा के पँच-पँच कोपेक के सिक्का, अइकी जी, स्वीकार करऽ । त ई तरह से, रोद्या, तूँ अब पूरे सूट-बूट में हकऽ, काहेकि हमर विचार से, तोर ओवरकोट अभियो काम देतो, बल्कि देखे में अपने आप में विशेष शानदार लगतो - एहे मतलब होवऽ हइ शार्मेर [5] से खरीदारी करे के ! जाहाँ तक पेताबा आउ बाकी चीज के बात हइ, ई हम तोरे ऊपर छोड़ दे हियो; हमन्हीं के पास पैंतीस रूबल बच जात, आउ पाशेन्का के बारे आउ फ्लैट के किराया के भुगतान के बारे फिकिर मत करऽ; हम कहलियो - मतलब बिन सीमा के उधार । आउ अब, भाय, अपन छालटी बदले द, काहेकि शायद तोर कमीजिए में खाली अब रोग बइठल हको ... "

"रहे दऽ ! नयँ चाही !" रस्कोलनिकोव झटकके हटा देलकइ, जे अनिच्छा से पोशाक के खरीदी के रज़ुमिख़िन के तनावपूर्ण ओछा रिपोर्ट सुन रहले हल ...

"ई तो, भाय, असंभव हको; त हम काहे लगी एतना जुत्ता घिसलूँ !" रज़ुमिख़िन जिद कइलकइ । "नस्तस्यूश्का, शरमाऽ मत, आ मदत करऽ, अइकी अइसे !" आउ रस्कोलनिकोव केतनो विरोध कइलकइ, तइयो ऊ ओकरा छालटी बदलिए देलकइ । ऊ (रस्कोलनिकोव) तकिया पर पड़ गेलइ आउ करीब दू मिनट तक एक्को शब्द नयँ बोललइ ।

"ओकन्हीं से लम्मा समय तक छुटकारा नयँ मिल्लत !" ऊ सोचलकइ । "कउन पइसा से ई सब खरीदल गेले ह ?" देवाल तरफ नजर कइले आखिर ऊ पुछलकइ ।
"पइसा ? अच्छऽ, त ई बात हइ ! ई तोरे खुद के पइसा से । आझ सुबहे सहायक संघ से वख़रूशिन के तरफ से नौजवान अइलो हल, माय भेजवइलथुन हल; एहो तूँ भूल गेलऽ की ?"
"अब आद आल ...", रस्कोलनिकोव बोललइ, लम्मा उदासी भरल सोच के बाद । रज़ुमिख़िन, त्योरी चढ़इते, बेचैनी से ओकरा तरफ देखते रहलइ ।

दरवाजा खुललइ, आउ एगो लमगर तगड़ा अदमी अन्दर घुसलइ, जे रस्कोलनिकोव के मानूँ पहिले से कुछ जानल-पछानल भी लग रहले हल ।
"ज़ोसिमोव ! आखिरकार !" खुशी से रज़ुमिख़िन चिल्ला उठलइ ।


सूची            पिछला                      अगला