विजेट आपके ब्लॉग पर

Saturday, July 25, 2015

अपराध आउ दंड - भाग – 5 ; अध्याय – 2



अपराध आउ दंड

भाग – 5

अध्याय – 2

सही-सही ई कारण बताना मोसकिल होतइ, जेकरा चलते कतेरिना इवानोव्ना के परेशान दिमाग में ई असंगत मृतक भोज के विचार उठलइ । वास्तव में, रस्कोलनिकोव से बीस से अधिक प्राप्त कइल में से लगभग दस रूबल मरमेलादोव के अंत्येष्टि क्रिया में ही बरबाद हो चुकले हल । शायद कतेरिना इवानोव्ना "जइसन चाही" ओइसीं आद के सम्मान करे लगी मृतक के प्रति अपन कर्तव्य समझऽ हलइ, ताकि सब्भे किरायेदार आउ खास करके अमालिया इवानोव्ना ई जान जाय, कि ऊ "नयँ खाली ओकन्हीं से बिलकुल नयँ बत्तर हलइ, बल्कि, शायद, आउ बहुत जादहीं बेहतर" हलइ, आउ ई, कि ओकन्हीं के ओकरा सामने "अपन नाक-भौं सिकोड़े" के अधिकार नयँ हइ। शायद, हियाँ परी सबसे बड़गो असर हलइ गरीब लोग के ऊ आन, जेकरा चलते, कुछ सामाजिक रस्म में, जे हमन्हीं के दैनिक जीवन में सब्भे आउ हरेक लगी अनिवार्य होवऽ हइ, कइएक गरीब लोग अपन पूरा जोर लगा दे हइ आउ अपन संजोगल अंतिम कोपेक (दमड़ी) तक के खरच कर दे हइ, ताकि "दोसरा से बत्तर नयँ" होवइ आउ ऊ दोसर लोग कइसूँ ओकन्हीं के "ताना नयँ देइ" । बहुत संभव एहो हइ, कि कतेरिना इवानोव्ना के मन कइलकइ, ठीक अइसन हालत में, ठीक अइसन पल में, जब लगले होत, कि ओकरा संसार में सब्भे कोय छोड़ देलके हल, कि ई सब्भे "दू कौड़ी के आउ घटिया किरायेदार लोग" के देखा देल जाय, कि ऊ नयँ खाली "जी सकऽ हइ आउ स्वागत-सत्कार कर सकऽ हइ", आउ ओकर पालन-पोषण भी बिलकुल अइसन काम लगी नयँ होले हल, बल्कि ओकर लालन-पालन एगो "निम्मन घर-घराना में, एहो कहल जा सकऽ हइ, पुश्तैनी रईस, कर्नल के घर में" होले हल, आउ अइसन काम में बिलकुल नयँ तैयार कइल गेले हल, कि खाली फर्श पे झाड़ू-बहारू करइ आउ रात-बेरात बुतरुअन के लुग्गा-फट्टा फिंच्चइ । कभी-कभी गरीब से गरीब आउ बिलकुल टुट्टल (हतोत्साह) लोग पर भी शान आउ मिथ्याभिमान के अइसन दौरा पड़ऽ हइ, आउ कभी-कभार, ओकन्हीं में कष्टप्रद आउ दुर्निवार (irrepressible) आवश्यकता के रूप में बदल जा हइ । लेकिन एकर अलावे कतेरिना इवानोव्ना टुट्टल लोग में से भी नयँ हलइ - परिस्थिति ओकरा बिलकुल मार डललके हल, लेकिन नैतिक रूप से ओकरा तोड़ल, मतलब भयभीत कइल आउ ओकर इच्छा-शक्ति के कुचलल नयँ जा सकऽ हलइ । एकर अलावे, सोनेच्का ओकरा बारे बिलकुल आधार पर कहलके हल, कि ओकर दिमाग ठिकाने नयँ हइ । ई सच हलइ, कि ई बात अकीन के साथ आउ आखिरी रूप में अभियो नयँ कहल जा सकऽ हलइ, लेकिन वस्तुतः एन्ने हाल में पूरे साल भर से, ओकर बेचारा सिर एतना जादे कष्ट झेललके हल, कि अइसन नयँ हो सकऽ हलइ कि कम से कम आंशिक रूप से भी क्षति नयँ होते हल । जइसन कि डाक्टर सब के कहना हइ, तपेदिक के तीव्र विकास भी बौद्धिक क्षमता के पागलपन के हद तक प्रभावित कर दे हइ ।

शराब तो बहुत अधिक संख्या में आउ तरह-तरह के नयँ हलइ, मदिरा भी - ई बात अतिरंजित (exaggerated) हलइ, लेकिन शराब तो हलइ । वोदका हलइ, रम आउ लिस्बन शराब हलइ, सब्भे सबसे खराब गुणवत्ता के, लेकिन सब्भे काफी मात्रा में । भोजन में से, कुत्या [1] के अलावे, तीन-चार पकवान (जेकरा में मालपूआ भी) हलइ, सब्भे कुछ अमालिया इवानोव्ना के भनसा घर से, आउ एकर अलावे, भोजन के बाद प्रस्तावित चाय आउ पंच (पानी, फल के रस, मसाला आदि मिल्लल शराब से बन्नल पेय) लगी एक्के साथ दू गो समोवार रक्खल हलइ । खरीदी के काम खुद कतेरिना इवानोव्ना देखलके हल, एगो किरायेदार के मदत से, जे मुसीबत के मारल एगो नाटा कद के पोल (पोलैंड निवासी) हलइ, जे भगमान जाने कउन कारण से मिसेज़ लिप्पेवेख़ज़ेल के हियाँ रह रहले हल, आउ जे तुरते कतेरिना इवानोव्ना के साथ दौड़-धूप वला काम करे खातिर लग गेलइ आउ कल्हे दिन भर आउ आझ के पूरा सुबह, गरदनतोड़ परिश्रम के साथ आउ जीभ निकासके लटकइले, दौड़-धूप करते रहलइ, शायद खास करके ई प्रयास करते, कि ई अंतिम परिस्थिति पर सबके नजर जाय । हरेक तुच्छ बात पर ऊ दौड़के सीधे कतेरिना इवानोव्ना भिर आ जा हलइ, ओकरा खोजते-खाजते गोस्तिनि द्वोर (Gostiny Arcade - एगो बड़गो दोकान के नाम) भी दौड़के चल जा हलइ, ओकरा जब न तब "पानी ख़ोरुनझिना" [2] कहके पुकारऽ हलइ, आउ आखिर ओकरा पूरा बोर कर देलकइ, हलाँकि ऊ (कतेरिना इवानोव्ना) शुरू-शुरू में एहो बोलले हल, कि ई "सेवापरायण आउ उदार" व्यक्ति के बगैर ऊ तो समाप्त हो जइते हल । कतेरिना इवानोव्ना के चरित्र के विशेषता हलइ - पहिले जे कोय मिल जा हलइ ओकरा जल्दीबाजी में सबसे उत्तम आउ चमकदार रंग में सजावऽ हलइ, ओकरा ई तरह से प्रशंसा के झड़ी लगा दे हलइ, कि कोय-कोय के शरम भी लग जा हलइ, ओकर प्रशंसा में कइएक तरह के परिस्थिति के गढ़ ले हलइ, जेकर बिलकुल अस्तित्व नयँ होवऽ हलइ, बिलकुल अंतःकरण से आउ खुले दिल से ओकर (अर्थात् गढ़ल परिस्थिति के) वास्तविकता में पक्का विश्वास करऽ हलइ, आउ अचानक एक्के तुरी हताश हो जा हलइ, आउ जे अदमी के ऊ कुच्छे घंटा पहिले शाब्दिक रूप से पूजा कर रहले हल, ओकरा से नाता तोड़ ले हलइ, ओकरा पर थूक दे हलइ आउ ओकरा निकास बाहर कर दे हलइ । स्वभाव से ऊ हँसमुख, खुशमिजाज आउ शांतिप्रिय चरित्र के हलइ, लेकिन लगातार विपत्ति आउ विफलता के कारण, ऊ एतना प्रचंड रूप से कामना आउ माँग करे लगऽ हलइ, कि सब कोय शांति आउ खुशी से जिनगी व्यतीत करइ आउ दोसरा कोय तरह से जीए के साहस नयँ करइ, कि जीवन में जरिक्को सन के विसंगति (dissonance), छोटगर से छोटगर विफलता ओकरा तुरतम्मे लगभग क्रोधावेश में ले आवऽ हलइ, आउ ऊ एक्के क्षण में, सबसे उज्ज्वल आशा आउ कल्पना के बाद, अपन भाग्य के कोसे लगऽ हलइ, जे कुछ ओकर हाथ में आवऽ हलइ, ओकरा फाड़े आउ फेंके लगऽ हलइ, आउ अपन सिर देवाल से टकरावे लगऽ हलइ । अमालिया इवानोव्ना भी अचानक कोय वजह से कतेरिना इवानोव्ना के तरफ से असाधारण महत्त्व आउ असाधारण सम्मान पा लेलकइ, शायद खाली ई वजह से, कि ई मृतक भोज के प्लान बन गेलइ, कि अमालिया इवानोव्ना पूरे तहे दिल से सब तरह के दौड़-धूप वला काम में हिस्सा लेवे के फैसला कर लेलकइ - ऊ टेबुल सजावे, छालटी (linen), पकवान आदि जुटावे  आउ अपन भनसा घर में भोजन तैयार करे के भार अपने ऊपर ले लेलकइ । कतेरिना इवानोव्ना ओकरा सब कुछ के भार सौंप देलकइ आउ प्रभारी (in-charge) बना देलकइ, आउ खुद्दे कब्रिस्तान चल गेलइ । सचमुच सब कुछ अच्छा से तैयार हो गेलइ - टेबुल लगा देल गेलइ आउ काफी साफ-सुथरा; पकवान, काँटा, छुरी, शराब के गिलास, पानी के गिलास, कप - ई सब्भे, जाहिर हइ, तरह-तरह के आकार आउ माप के हलइ, जे कइएक किरायेदार के हियाँ से लावल गेले हल, लेकिन सब कुछ अपन जगह पर निश्चित समय पर रख देल गेले हल, आउ अमालिया इवानोव्ना, ई महसूस करके कि ऊ अपन काम उत्तम ढंग से पूरा कर लेलके हल, अपन टोपी पर नयका मातमी फीता लगाके आउ कार पोशाक में पूरा सज्जल-धज्जल, कुछ गर्व के साथ भी (कब्रिस्तान से) लौटे वलन के स्वागत करे लगी खड़ी हो गेले हल । ई गर्व, हलाँकि समुचित हलइ, तइयो कोय वजह से कतेरिना इवानोव्ना के पसीन नयँ पड़लइ - "वास्तव में, लगऽ हइ, जइसे अमालिया इवानोव्ना के बगैर टेबुल सब सजावल नयँ जा सकऽ हलइ !" ओकरा नयका फीता वला टोपियो नयँ पसीन पड़ले हल - "कहीं ई बेवकूफ जर्मन औरत ई बात से तो नयँ इतरा रहले ह, कि ऊ मकान-मालकिन हइ आउ अनुग्रह करके गरीब किरायेदार के मदत करे लगी सहमत होलइ ? अनुग्रह करके ! विनयपूर्वक पुच्छऽ हियो ! कतेरिना इवानोव्ना अपन प्यारे पापा के हियाँ, जे कर्नल हला आउ लगभग गवर्नर के पद तक पहुँच गेला हल, कभी-कभी चालीस-चालीस लोग खातिर टेबुल सजावल जा हलइ, आउ अमालिया इवानोव्ना, चाहे बेहतर रूप से कहल जाय लूदविगोव्ना, जइसन के हुआँ भनसो घर में घुस्से के अनुमति नयँ देल जा हलइ ..." लेकिन कतेरिना इवानोव्ना तब तक खातिर अपन भावना के नयँ अभिव्यक्त करे के निश्चय कइलकइ, हलाँकि ऊ अपन दिल में फैसला कइलकइ, कि अमालिया इवानोव्ना के आझे गर्व चूर कर देवे के चाही आउ ओकर अपन हैसियत के आद देला देवे के चाही, नयँ तो, भगमान जाने, ऊ अपना बारे की-की कल्पना करे लगतइ, लेकिन अभी खातिर तो ऊ ओकरा तरफ खाली शांति बरतलकइ । कतेरिना इवानोव्ना आंशिक रूप से दोसर तकलीफ लगी भी चिढ़ल हलइ - अंत्येष्टि में नेवतल किरायेदार में से, ऊ पोल के छोड़के, जे कइसूँ कब्रिस्तान तक दौड़के पहुँच जाय में कामयाब हो गेले हल, लगभग आउ  कोय नयँ अइले हल; जबकि मृतक भोज में, मतलब भोजन लगी, ओकन्हीं में से सबसे महत्त्वहीन आउ गरीबे लोग अइले हल, जेकरा में से कइएक लोग तो अपन होश में नयँ हलइ, बस कइसनो फटीचर लोग । जे, कुछ जादे उमर के आउ जादे इज्जतदार लोग हलइ, ऊ सब्भे, मानूँ सोद्देश्य, एकमत होल जइसन, अनुपस्थित रहलइ । प्योत्र पित्रोविच, उदाहरणार्थ, कहल जा सकऽ हइ, किरायेदार लोग में सबसे इज्जतदार, नयँ अइले हल, आउ साथे-साथ कल्हिंएँ साँझ के कतेरिना इवानोव्ना समुच्चे संसार के बता चुकले हल, मतलब अमालिया इवानोव्ना, पोलेच्का, सोनिया आउ नटघूरन पोल के, कि ई हला एगो सबसे उदार, सुहृदय व्यक्ति, सबसे बड़गर पहुँच वला आउ धनमान, ओकर पहिला मरद के भूतपूर्व मित्र, ओकर बाप के घर में स्वागत-सत्कार कइल गेल व्यक्ति, आउ जे ओकरा अपन सब साधन के प्रयोग करके काफी पेंशन देला देवे के वादा कइलका हल । हियाँ परी ई नोट कइल जाय, कि अगर कतेरिना इवानोव्ना केकरो पहुँच आउ धन के प्रशंसा करऽ हलइ, त ई बिन कोय स्वार्थ के, बिन कोय व्यक्तिगत लाभ के, बिलकुल निष्काम भाव से, अइसे कहल जाय, पूरे तहे दिल से, खाली प्रशंसित व्यक्ति के आउ अधिक महत्त्व देके खुशी लगी अइसे करऽ हलइ । लूझिन के साथ-साथ, आउ निस्संदेह, "ओकर देखादेखी", "ई कमीना हरामजादा लिबिज़्यातनिकोव" भी नयँ अइलइ । "ई खुद के की समझऽ हइ ? ओकरा तो बस रहम खाके नेवतल गेले हल, आउ ओहो ई खातिर, कि ऊ प्योत्र पित्रोविच के साथ एक्के कमरा में रहऽ हइ आउ ओकर परिचित हकइ, ओहे से नयँ नेवता देना अनुचित होते हल ।" नयँ अइलइ अपन "काफी बड़गर उमर के अविवाहित" लड़की के साथ एगो कुलीन महिला भी, जे हलाँकि कुल्लम लगभग दुइए सप्ताह अमालिया इवानोव्ना के फ्लैट में रहल होले हल, लेकिन मरमेलादोव परिवार के कमरा से आ रहल शोर आउ चीख के कइएक तुरी शिकायत कर चुकले हल, खास करके जब दिवंगत (मृतक) पी-पाके घर लौटऽ हलइ, जेकरा बारे, निस्संदेह, कतेरिना इवानोव्ना के अमालिया इवानोव्ना के माध्यम से मालूम हो चुकले हल, जब ऊ, कतेरिना इवानोव्ना के साथ झगड़ा करते आउ पूरा परिवार के निकास बाहर करे के धमकी देते बखत, गला फाड़के चिल्लइले हल, कि ओकन्हीं "जेकर गोड़वो के महत्त्व के नयँ हइ, अइसन कुलीन किरायेदार के" शांति में बाधा डालऽ हइ । कतेरिना इवानोव्ना ई महिला आउ ओकर बेटी के, जेकर "गोड़वो के महत्त्व के ऊ नयँ हलइ", जान-बूझके अब नेवता देवे के निश्चय कइलकइ, आउ जादे ई कारण से कि अभी तक, आकस्मिक भेंट के दौरान, जे अकड़ के साथ मुँह फेर ले हलइ - ताकि ऊ जान लेइ, कि हियाँ के लोग "अधिक उदार विचार आउ भावना वला होते जा हइ, आउ बिन कोय दुर्भाव के आमंत्रित करते जा हइ", आउ ओकन्हीं देख लेते जाय, कि कतेरिना इवानोव्ना अइसन जिनगी जीए के आदी नयँ हइ । एकरा बारे अनिवार्य रूप से टेबुल भिर (अर्थात् भोज के बखत) ओकन्हीं के समझा देल जइतइ, कि ओकर स्वर्गीय पिता के कइसन गवर्नरी हलइ, आउ साथे-साथ  इशारा कर देल जइतइ, कि ओकरा साथ भेंट हो गेला पर मुँह फेर लेवे लायक कुछ नयँ हलइ, आउ अइसन करना बेहद बेवकूफी हलइ । नयँ अइलइ एगो मोटगर लेफ्टेनेंट-कर्नल भी [वस्तुतः एगो सेवा-निवृत्त स्टाफ-कैप्टेन (रैंक में लेफ्टेनेंट आउ कैप्टेन के बीच के अफसर)] , लेकिन मालूम होलइ, कि कल्हिंएँ सुबह से "चल्ले-फिरे में ओकर गोड़ काम नयँ कर रहले हल" । एक शब्द में, आवे वलन में खाली हलइ - नाटा पोल; फेर एगो फटीचर क्लर्क, जे कुछ नयँ बोल पावऽ हलइ, चीकट कोट पेन्हले, कटहा (मुँहासा) भरल आउ जेकर देह से ओकाय बरे वला बदबू आ रहले हल; फेर आउ एगो बहिर आउ लगभग आन्हर बूढ़ा, जे कभी कोय डाकखाना में नौकरी कइलके हल, आउ जेकरा कोय तो एक जमाना से कोय, नयँ मालूम काहे लगी, अमालिया इवानोव्ना के हियाँ रखले हलइ । एगो सेवा-निवृत्त पीयल लेफ्टेनेंट भी अइले हल, वस्तुतः रसद आपूर्ति करे वला एगो अफसर हलइ, बहुत बेहूदा तरीका से आउ जोर-जोर से खिखिया हलइ, आउ "कल्पना करथिन", बिन वास्कट (waistcoat) के ! एक अदमी तो सीधे टेबुल के पीछू जाके बइठ गेलइ, कतेरिना इवानोव्ना के तरफ बिन आदरार्थ झुकले, आउ आखिरकार, एक व्यक्तित्व, पोशाक नयँ होवे के कारण, ड्रेसिंग गाउन में आ गेलइ, लेकिन ई एतना हद तक अशिष्टाचार हलइ, कि अमालिया इवानोव्ना आउ नाटा पोल के प्रयास से कइसूँ ओकरा निकास बाहर कर देवल गेलइ । लेकिन ऊ नाटा पोल आउ कोय दूगो नटघूरन पोल के अपने साथ ले अइले हल, जे कभियो अमालिया इवानोव्ना के हियाँ नयँ रहले हल, आउ जेकरा अभियो तक  कोय घर में नयँ देखलके हल । ई सब कुछ के चलते अमालिया इवानोव्ना के बेहद बुरा तरह से चिड़चिड़ाहट हो रहले हल । "तब फेर ई सब तैयारी केकरा लगी कइल गेले हल ?" (मेहमान सब लगी) जगह खातिर बुतरुअन  के टेबुल भिर नयँ बइठावल गेले हल, तइयो (टेबुल सब) पूरा कमरा के जगह छेंक लेलके हल, आ ओकन्हीं के पीछू कोना में संदूक पर बइठके खाय लगी देल गेलइ, आउ दूगो छोटकुन्ना बुतरुअन के बेंच पर बइठावल गेलइ, आउ पोलेच्का के, बड़ होवे के नाते, ओकन्हीं के देख-भाल करे, खिलावे आउ नाक "कुलीन घराना के बुतरुअन नियन" पोंछे-पाछे पड़ रहले हल । एक शब्द में, कतेरिना इवानोव्ना के, अपन इच्छा के विरुद्ध, सब लोग से दोगना मान-मर्यादा के साथ आउ अकड़ के साथ भी मिल्ले पड़ रहले हल । खास करके कुछ लोग के सख्ती के साथ घूरके देखलकइ आउ घमंड के साथ टेबुल भिर बइठ जाय लगी कहलकइ । कोय कारणवश, नयँ आवे वला लोग सब खातिर अमालिया इवानोव्ना ही जिम्मेवार हइ, अइसन सोच-समझके, ऊ अचानक ओकरा साथ बेहद उपेक्षा सहित बर्ताव करे लगलइ, जे ऊ तुरतम्मे नोटिस कर लेलकइ आउ ओकरा ई बात बुरा लगलइ । अइसन शुरुआत से निम्मन अंत के उमीद नयँ हलइ । आखिरकार सब कोय बइठ गेते गेलइ ।

रस्कोलनिकोव लगभग ओहे क्षण अंदर अइलइ, जब लोग कब्रिस्तान से वापिस अइते गेलइ । कतेरिना इवानोव्ना ओकरा देखके भयानक तरह से खुश होलइ, पहिला तो ई कारण से, कि ऊ सब्भे मेहमान में से अकेला "पढ़ल-लिक्खल मेहमान" हलइ, आउ "जइसन कि मालूम हलइ, दू साल के बाद हियाँ के विश्वविद्यालय में ऊ प्रोफेसर के पद पावे वला हलइ", आउ दोसरा ई कारण से, कि ऊ तुरतम्मे आउ आदरपूर्वक ओकरा सामने क्षमा माँग लेलके हल, कि ऊ चाहियो के अंत्येष्टि में उपस्थित नयँ हो सकतइ । ऊ सीधे ओकरा पर झपट पड़लइ, ओकरा टेबुल भिर अपना बामा तरफ बइठइलकइ (दहिना तरफ अमालिया इवानोव्ना बइठल हलइ), आउ लगातार भाग-दौड़ आउ दौड़-धूप के बावजूद, कि ठीक-ठाक तरह से भोजन परसल जाय आउ सबके यथेष्ट खाना मिल जाय, आउ कष्टदायक खोंखी (खाँसी) के बावजूद, जे पल-पल ओकरा बाधा दे रहले हल आउ बेदम कइले हलइ, आउ शायद, लगऽ हइ, खास करके पिछले दू दिन में जड़ जमा चुकले हल, लगातार रस्कोलनिकोव के संबोधित कर रहले हल, आउ ओकरा सामने अपन सब्भे उमड़ल भावना के आउ विफल होल मृतक भोज पर उत्पन्न अपन कुल उचित क्रोध के आधा फुसफुसाहट में उँड़ेल देवे लगी जल्दीबाजी कर रहले हल; आउ ई क्रोध अकसर एकत्रित मेहमान तरफ, आउ मुख्य रूप से मकान-मालकिन तरफ, बहुत विनोदपूर्ण आउ दुर्निवार (irrepressible) हँसी में बदल जा हलइ ।

"ई सब में ई कोयल के कसूर हइ । अपने समझऽ हथिन, हम केकरा बारे बात कर रहलिए ह - ओकरा बारे, ओकरा बारे !" आउ कतेरिना इवानोव्ना ओकरा मकान-मालकिन तरफ सिर हिलाके इशारा कइलकइ । "ओकरा तरफ देखथिन - अँखिया बाहर निकास लेलके ह, महसूस करऽ हइ, कि हमन्हीं ओकरा बारे बोलब करऽ हिअइ, लेकिन समझ नयँ पावऽ हइ आउ अँखिया फाड़ लेलकइ । उफ, कइसन उल्लू हइ ! हा-हा-हा ! ... खि-खि-खि ! आउ ऊ ई अपन टोपिया से कउची देखावे लगी चाहऽ हइ ! खि-खि-खि ! अपने नोटिस कइलथिन, ऊ हमेशे चाहऽ हइ, कि ओकरा सब कोय समझइ, कि ऊ हमरा आश्रय दे रहले ह आउ अपन उपस्थिति से हमरा सम्मान कर रहले ह । हम नम्र महिला के रूप में ओकरा निवेदन कइलिए हल, कि जरी बेहतर आउ हमर स्वर्गीय पति के बिलकुल परिचित लोग के निमंत्रण देइ, लेकिन देखवे करऽ हथिन, कइसन लोग के ऊ लइलके ह - कइसन विदूषक ! मैला-कुचैला लोग ! देखथिन ई गंदा चेहरा वला के - ई कइसन दू टाँग के बंदर हइ ! आऊ ई नटघूरन पोल सब ... हा-हा-हा ! खि-खि-खि ! कोय नयँ, कोय नयँ ओकन्हीं के कभी हियाँ देखलके ह, आउ हमहूँ कभी नयँ देखलूँ हँ; त फेर काहे लगी ओकन्हीं अइले ह, हम अपने के पुच्छऽ हिअइ ? कतार बाँधके बइठल हकइ । 'अजी, पानिये !' [panie (पॉलिश) = श्रीमान], अचानक ऊ ओकन्हीं में से एगो तरफ चिल्लइलइ, 'मालपूआ लेलथिन ? आउ कुछ लेथिन ! कुछ बियर पीथिन, बियर ! वोदका लेथिन ?' देखथिन - उछल पड़लइ, झुकके सलाम कर रहले ह, देखथिन, देखथिन - हो सकऽ हइ, बिलकुल भुक्खल हकइ, बेचारा ! कोय बात नयँ, खाय देल जाय । कम से कम हल्ला-गुल्ला नयँ करते जा हइ, खाली ... खाली, सचमुच, हमरा मकान-मालकिन के चानी के चम्मच के डर हइ ! ... 'अमालिया इवानोव्ना !' अचानक ऊ ओकरा संबोधित कइलकइ, लगभग जोर से, 'अगर संयोगवश अपने के चम्मच चोरा लेते जइतइ, त हम ओकन्हीं खातिर अपने के  जवाब नयँ देबइ, हम पहिलहीं  बता दे हिअइ ! हा-हा-हा !' ऊ फेर से रस्कोलनिकोव तरफ मुड़के हँस पड़लइ, फेर से मकान-मालकिन तरफ सिर हिलाके इशारा करते आउ अपन शरारत पर खुश होते । 'नयँ समझलकइ, फेरु ओकरा नयँ समझ में अइलइ ! मुँह खोलले बइठल हइ, देखथिन - उल्लू, असली उल्लू, नयका फीता में सींग वली उल्लू, हा-हा-हा !' "

हियाँ परी हँसी फेर से असह्य (unbearable) खोंखी में बदल गेलइ, जे पाँच मिनट तक जारी रहलइ । रूमाल पर कुछ खून लगल हलइ, निरार पर पसेना छलक पड़लइ । ऊ चुपचाप खून रस्कोलनिकोव के देखइलकइ, आउ मोसकिल से साँस ले पइलके हल, कि तुरतम्मे फेर से बेहद जोश के साथ ओकरा कान में फुसफुसइते कहलकइ आउ ओकर गाल पर लाल धब्बा उभर अइलइ –
"देखथिन, हम ओकरा बिलकुल नाजुक, कहल जा सकऽ हइ, ई महिला आउ ओकर बेटी के नेवता देवे के काम सौंपलिए हल, समझऽ हथिन, हम केकरा बारे बात कर रहलिए ह ? हियाँ परी ओकरा बहुत व्यवहार-कुशल तरीका से आचरण करे के चाही हल, अत्यन्त दक्षतापूर्वक काम करे के चाही हल, लेकिन ऊ अइसन तरह कइलकइ, कि ई आगन्तुक बेवकूफ, ई घमंडी जीव, ई तुच्छ देहाती औरत, खाली ई कारण से कि ऊ एगो मेजर के विधवा हकइ आउ हियाँ पेंशन खातिर दौड़-धूप करे लगी, आउ सरकारी काम करे के जगह में (अर्थात् दफ्तर में) अपन घंघरा लहरावे खातिर अइले ह, काहेकि पचपन बरस के उमर में आँख में सुरमा लगवऽ हइ, पाउडर आउ लिपिस्टिक लगवऽ हइ (ई सब कोय के मालूम हइ) ... आउ अइसन जीव, नयँ खाली भोज में उपस्थित होवे के जरूरत नयँ समझलकइ, बल्कि क्षमायाचना के पत्र भी नयँ भेजलकइ, अगर ऊ नयँ आ सकऽ हलइ, जइसन कि अइसन परिस्थिति में सामान्य से सामान्य शिष्टाचार माँग करऽ हइ ! समझ में नयँ आवऽ हइ, कि प्योत्र पित्रोविच भी काहे नयँ अइलथिन ? लेकिन सोनिया काहाँ हइ ? काहाँ चल गेलइ ? ओह, अइकी आखिर ऊ पहुँच गेलइ ! की, सोनिया, काहाँ चल गेलहीं हल ? अचरज के बात हउ, कि तूँ अपन बाप के कफनो-दफन के दिन समय पे नयँ अइलँऽ । रोदियोन रोमानोविच, ओकरा अपन बगल में बइठे देथिन । ई तोर जगह हउ, सोनेच्का ... जे मन करउ, ले ले । जेली वला मछली ले, ई सबसे अच्छा हउ । तुरते मालपूआ आ जइतउ । आउ बुतरुअन के कुछ मिललइ ? पोलेच्का, ओज्जा तोहन्हीं लगी सब कुछ हकउ ? अह-अह-अह ! अच्छऽ, ठीक हउ । निम्मन लड़की बन, लेन्या (लीदा), आउ तूँ, कोल्या, अपन गोड़ मत हिलइते रह; ओइसे बइठ, जइसे कुलीन घराना के बुतरुअन के बइठे के चाही । तूँ की कहब करऽ हलहीं, सोनया ?"

सोनिया तुरते प्योत्र पित्रोविच के क्षमायाचना के संदेश ओकरा सुनावे में शीघ्रता कइलकइ, काफी जोर से बोले के प्रयास करते, ताकि सब कोय सुन ले सकइ, आउ सबसे सम्मानजनक अभिव्यक्ति चुनके, जे ऊ प्योत्र पित्रोविच के तरफ से जान-बूझके गढ़ करके जरी अलंकृत कर लेलके हल । ऊ एहो बतइलकइ, कि प्योत्र पित्रोविच विशेष रूप से ई बतावे लगी कहलका, कि यथासंभव ऊ तुरते आ जइता, ताकि कुछ मामला में अकेले में काम के बात कइल जा सकइ आउ ई बात के चर्चा कइल जा सकइ, कि भविष्य में की कइल जा सकऽ हइ, आउ कइसन काम हाथ में लेल जा सकऽ हइ, आदि, आदि ।

सोनिया के मालूम हलइ, कि एकरा से कतेरिना इवानोव्ना के शांति आउ सांत्वना मिलतइ, ओकरा खुशी होतइ, आउ मुख्य बात - ओकर गौरव के संतुष्टि मिलतइ । ऊ रस्कोलनिकोव के बगल में बइठलइ, जेकरा तरफ जल्दी-जल्दी में आदरार्थ झुकलइ, आउ सरसरी निगाह से उत्सुकतापूर्वक ओकरा तरफ देखलकइ । लेकिन, बाकी पूरे समय ऊ कइसूँ ओकरा तरफ देखे आउ ओकरा साथ बात करे से कतरइलइ । ऊ मानूँ अन्यमनस्क भी हलइ, हलाँकि अइसीं ऊ कतेरिना इवानोव्ना के चेहरा तरफ देखते रहलइ, ताकि ऊ प्रसन्न रहइ । न तो ऊ, आउ न कतेरिना इवानोव्ना, मातमी लिबास में हलइ, पोशाक नयँ रहे के वजह से; सोनिया एक प्रकार के गाढ़ा गुलाबी रंग के पोशाक पेन्हले हलइ, जबकि कतेरिना इवानोव्ना अपन एकमात्र पोशाक पेन्हले हलइ, गढ़गर रंग के धारी वला सूती पोशाक । प्योत्र पित्रोविच के संदेश बहुत असानी से काम कर गेलइ । सोनिया से (ओकर संदेश) सादर सुनला पर कतेरिना इवानोव्ना ओतने आदर से पुछलकइ - प्योत्र पित्रोविच के स्वास्थ्य कइसन हइ ? तब तुरतम्मे आउ लगभग उच्च स्वर में ऊ रस्कोलनिकोव के कान में फुसफुसइलइ, कि प्योत्र पित्रोविच जइसन इज्जतदार आउ हैसियत वला अदमी के, ओकर परिवार के साथ उनकर गहरा लगाव आउ ओकर बाप के साथ उनकर पुराना दोस्ती के बावजूदो, अइसन "असाधारण संगति" में अपने आप के पाना वास्तव में विचित्र लगते हल ।

"ओहे से हम अपने के विशेष करके कृतज्ञ हिअइ, रोदियोन रोमानोविच, कि अपने हमर नून-रोटी के अइसन माहौल में भी नयँ ठुकरइलथिन [3]", ऊ लगभग उच्च स्वर से बोललइ, "लेकिन हमरा विश्वास हइ, कि हमर बेचारे स्वर्गीय पति के प्रति अपने के विशेष मित्रता ही अपने के वादा पूरा करे के प्रेरित कइलकइ ।"

तब ऊ एक तुरी आउ घमंड आउ रोब से अपन मेहमान सब के तरफ नजर डललकइ आउ अचानक विशेष चिंताशीलता के साथ टेबुल के पार एगो बहिर बुढ़उ के बारे जोर से पुछलकइ - "की ओकरा आउ दमपुख्त (stew, roasted meat) चाही, आउ की ओकरा लिस्बन शराब देल गेलइ ?" बुढ़उ कुछ जवाब नयँ देलकइ आउ देर तक ओकरा कुछ नयँ समझ में अइलइ, कि कउची के बारे ओकरा से पुच्छल जाब करऽ हइ, हलाँकि ओकर पड़ोसी सब मजाक में हुरकुच्चे आउ झंझोड़े लगलइ । ऊ खाली चारो तरफ मुँह खुल्ला कइले तकते रहलइ, जेकरा चलते सामान्य रूप से लोग के मजा में आउ बढ़ावा मिललइ ।

"कइसन बेवकूफ हकइ ! देखहो, देखहो ! काहे लगी ओकरा लावल गेलइ ? जाहाँ तक प्योत्र पित्रोविच के बात हइ, त हम हमेशे उनका बारे आश्वस्त हलिअइ", कतेरिना इवानोव्ना रस्कोलनिकोव के बताना जारी रखलकइ, "आउ जाहिर हइ, ऊ अइसन नयँ हथिन ...", आकस्मिक रूप से आउ जोर से, आउ बेहद कठोर मुद्रा में ऊ अमालिया इवानोव्ना के संबोधित कइलकइ, जेकरा से ऊ सकपकाइयो गेलइ, "तोहर जइसे-तइसे देखावा कपड़ा पेन्हले पुछल्लेदार घँघरा लहरइते जइसन नियन नयँ, जेकरा हमर पापा अपन भनसा घर में रसोइया के रूप में भी नयँ घुस्से देथिन हल, आउ हमर स्वर्गीय पति, जाहिर हइ, ओकन्हीं के स्वागत करके सम्मान देथिन हल, आउ सेहो खाली अपन असीम दया के कारण ।"

"जी हाँ, ऊ पीना बहुत पसीन करऽ हला जी; उनका बहुत लगाव हलइ जी, पीयऽ हलथिन जी !" वोदका के बरहमा गिलास खाली करते, सेवा-निवृत्त आपूर्ति अफसर अचानक चिल्लइलइ ।

"हमर स्वर्गीय पति के वास्तव में ई कमजोरी हलइ, आउ ई सबके मालूम हइ", कतेरिना इवानोव्ना बिलकुल अचानक ओकर बात के पकड़के आगू बोललइ, "लेकिन ई व्यक्ति दयालु आउ उदार हला, अपन परिवार के प्यार आउ आदर करऽ हला; बस एक्के खराबी हलइ, कि अपन दयालुता के चलते हर तरह के दुराचारी लोग में विश्वास कर ले हला, आउ भगमाने जानऽ हइ, ऊ केकरा साथ नयँ पीलका, ओइसनको के साथ, जे उनकर जुत्ता के तलवा के बराबर भी नयँ हलइ ! कल्पना करथिन, रोदियोन रोमानोविच, उनकर जेभी से मुरगा के अकार के केक (cake) मिलले हल - ऊ मृतवत्-पीयल घूम रहला हल, लेकिन बुतरुअन के बारे सोच रहला हल ।"

"मु-र-गा ? अपने की कहलथिन - मु-र-गा ?" आपूर्ति भलमानुस चिल्लइलइ ।
कतेरिना इवानोव्ना ओकर उत्तर देवे के कृपा नयँ कइलकइ । ऊ कोय विचार में मग्न हो गेलइ आउ आह भरलकइ।

"अइकी अपने सब जरूर सोचऽ हथिन, जइसे कि सब कोय, कि हम उनका साथ बहुत कठोर बर्ताव करऽ हलिअइ", रस्कोलनिकोव के संबोधित करते ऊ बात जारी रखलकइ । "लेकिन वास्तव में बात ई नयँ हइ । ऊ हमरा इज्जत करऽ हला, ऊ हमरा बहुत, बहुत इज्जत करऽ हला ! ऊ नेकदिल अदमी हला ! आउ कभी-कभी तो हमरा उनका पर तरस आवऽ हलइ ! ऊ बइठल कोनमा से हमरा देखते रहऽ हला, हमरा एतना तरस आवऽ हलइ, नरमी के साथ बर्ताव करे के मन करऽ हलइ, लेकिन बाद में तुरते अपन मन में सोचिअइ - 'नरमी बरतऽ, आउ ऊ फेर से पी-पाके अइता', खाली सख्ती से कुछ तो नियंत्रित कइल जा सकऽ हलइ ।"

"हाँ जी, बाल के खिंचाई तो होवऽ हलइ जी, अइसन तो जी कइएक तुरी होलइ जी", आपूर्तिकर्ता फेर से गरजलइ आउ फेर से वोदका के एक गिलास चढ़इलकइ ।
"खाली बाल के खिंचाइए नयँ, बल्कि कुछ बेवकूफ के झाड़ू के साथ उपयोगी इलाज कइल जा सकऽ हइ । हम अभी स्वर्गीय पति के बारे नयँ बोलब करऽ हिअइ !" कतेरिना इवानोव्ना आपूर्तिकर्ता के तड़ाक से उत्तर देलकइ ।

लाल चित्ती ओकर गाल पर लगातार आउ गहरा होल जा रहले हल, ओकर छाती धौंकनी नियन चल्ले लगलइ। एक्को मिनट हो जाय, आउ ऊ कहानी चालू करे लगी तैयार । कइएक लोग तो खिखिअइलइ, आउ कइएक लोग के ई मजेदार लगलइ । लोग आपूर्तिकर्ता के हुरकुच्चे लगलइ आउ ओकरा कुछ तो फुसफुसाके कहे लगलइ । ई साफ लग रहले हल, कि लोग ओकन्हीं के आपस में लड़े लगी उसकावे ल चाह रहले हल ।

"आ जरी पुच्छे के इजाजत देथिन, ई अपने केकरा बारे ...", आपूर्तिकर्ता शुरू कइलकइ, "मतलब केकर ... नेक हिसाब-किताब पर ... अपने अभी मेहरबानी करके ... खैर, जरूरत नयँ ! बकवास हइ ! विधवा हइ ! बेचारी विधवा ! हम माफ कर दे हिअइ ... पास !" आउ ऊ फेर से वोदका गटक गेलइ ।

रस्कोलनिकोव चुपचाप बइठल अरुचि से सुन रहले हल । ऊ खा रहले हल, लेकिन खाली शिष्टाचार के नाते; कतेरिना इवानोव्ना जे कुछ मिनट-मिनट पर ओकर प्लेट में डाल रहले हल, ओकरा बस खाली चख भर ले हलइ, ओहो खाली ई वास्ते, कि ओकरा बुरा नयँ लगइ । ऊ सोनिया के तरफ एकटक देख रहले हल । लेकिन सोनिया आउ अधिक चिंतित आउ परेशान हो गेलइ; ओकरो आशंका होलइ, कि मृतक भोज शांति से समाप्त नयँ होत, आउ भयभीत होके कतेरिना इवानोव्ना के बढ़ते चिड़चिड़ाहट तरफ ध्यान रखले हलइ । ओकरा अइसहीं मालूम हलइ, कि मुख्य कारण, जेकरा चलते दुन्नु आगंतुक महिला एतना घृणापूर्वक कतेरिना इवानोव्ना के निमंत्रण के बारे बुरा व्यवहार करते गेलइ, ऊ खुद सोनिये, हलइ । ऊ खुद अमालिया इवानोव्ना से सुनलके हल, कि निमंत्रण से मइयो बुरा मान गेले हल आउ प्रश्न कइलके हल - "कइसे हम अइसन लड़की के साथ अपन बेटी के बइठा सकऽ ही ?" सोनिया के आशंका हलइ, कि कतेरिना इवानोव्ना के कइसूँ ई बात मालूम हकइ, आउ ई अपमान कतेरिना इवानोव्ना लगी ओकरा, अर्थात्, सोनिया के प्रति, ओकर व्यक्तिगत, ओकर बुतरुअन, ओकर प्यारे पिता, के अपमान से कहीं अधिक महसूस होवऽ हलइ; एक शब्द में, ई मृत्युतुल्य अपमान हलइ, आउ सोनिया जानऽ हलइ, कि कतेरिना इवानोव्ना के अब शांति नयँ मिलतइ, "जब तक कि ऊ, ई पुछल्लेदार घँघरा लहरावे वली के साबित नयँ कर देतइ, कि ओकन्हीं दुन्नु ...", इत्यादि, इत्यादि । मानूँ सोद्देश्य, कोय तो टेबुल के दोसरा छोर से सोनिया लगी एगो प्लेट में, कार डबल रोटी के दूगो दिल के आकार में काटके आउ ओकरा में एगो तीर भोंकल, भेजलकइ । कतेरिना इवानोव्ना भड़क गेलइ आउ तुरतम्मे जोर से टेबुल के पार तरफ टिप्पणी कइलकइ, कि जे कोय ई भेजलकइ, ऊ वास्तव में "पीयल गदहा" हकइ ! अमालिया इवानोव्ना भी कुछ तो गड़बड़ी के आशंका करते, आउ साथे-साथ कतेरिना इवानोव्ना के अहंकार भरल बात से दिल में गहरा चोटिल होल, दोसरा तरफ के लोग के खराब मनोदशा के मोड़ देवे खातिर, आउ प्रसंगवश, लोग के नजर में खुद के बारे राय के उँचगर उठावे खातिर, बिन कोय कारण चाहे आधार या प्रसंग के, (टुट्टल-फुट्टल रूसी भाषा में) सुनावे लगी चालू कइलकइ, कि कोय तो ओकर परिचित "दवा के दोकान में काम करे वला कार्ल" एगो किराया के गाड़ी में सफर कर रहले हल, आउ "कोचवान ओकरा जान से मार देवे लगी चहलकइ, आउ कार्ल ओकरा बहुत, बहुत आरजू-मिनती कइलकइ कि ओकरा जान से नयँ मारइ, आउ कन्ने लगलइ, आउ हाथ जोड़ देलकइ, आउ ओकर दिल में डर समा गेलइ ।" कतेरिना इवानोव्ना हलाँकि मुसकइलइ, लेकिन तुरतम्मे टिप्पणी कइलकइ, कि अमालिया इवानोव्ना के रूसी भाषा में अनोखा घटना नयँ सुनावे के चाही । एकरा पर ऊ आउ बुरा मान गेलइ आउ एतराज कइलकइ, (आउ टुट्टल-फुट्टल जर्मन मिश्रित रूसी में बोललइ) कि ओक्कर "पिता बेर्लिन में एगो बहुत बहुत महत्त्वपूर्ण अदमी हला आउ हमेशे अपन हाथ जेभी में डालके घुम्मऽ हला" । हँसमुख कतेरिना इवानोव्ना के बरदास नयँ होलइ आउ भयंकर रूप से अइसन ठठाके हँस पड़लइ, कि अमालिया इवानोव्ना अपन आखिरी धैर्य भी खोवे लगलइ आउ मोसकिल से खुद के नियंत्रित कर पइलकइ ।

"यऽ देखऽ उल्लू के !", लगभग खुश होके, तुरतम्मे फेर से कतेरिना इवानोव्ना रस्कोलनिकोव के कान में फुसफुसइलकइ, "कहे लगी चाहऽ हलइ - ऊ अपन हाथ जेब में रक्खऽ हलइ, लेकिन जे कुछ कहलकइ ओकर मतलब निकसलइ, कि ऊ दोसर लोग के जेब में हाथ डालऽ हलइ, खि-खि ! आउ ई बात नोटिस कइलथिन हँ, रोदियोन रोमानोविच, एक्के तुरी हमेशे लगी, कि सब्भे ई पितिरबुर्गवासी विदेशी लोग, मतलब, मुख्य रूप से जर्मन लोग, जे कहीं से तो हमन्हीं हीं आ जइते जा हइ, हमन्हीं से जादे बेवकूफ होवऽ हइ ! अच्छऽ, ई बात से अपने सहमत होथिन, कि कोय अइसन बात कह सकऽ हइ, कि ‘दवा के दोकान में काम करे वला कार्ल के दिल में डर समा गेलइ ?’, कि ऊ (दुधपीलुआ !), कोचवान के बान्हके पिट्टे के बजाय, ‘हाथ जोड़लकइ आउ कन्ने लगलइ, आउ बहुत आरजू-मिनती कइलकइ ?’ अरे, बेवकूफ कहीं के ! आउ तइयो ऊ सोचऽ हइ, कि ई घटना बड़ी मर्मस्पर्शी हइ, आउ ओकरा शक्को नयँ होवऽ हइ, कि ऊ कइसन बेवकूफ हकइ ! हमर विचार में, ई पियक्कड़ आपूर्तिकर्ता ओकरा से कहीं जादे बुद्धिमान हइ; कम से कम ई तो देखाय दे हइ, कि ई लफंगा अपन अंतिम बुद्धि तक पी चुकले ह, लेकिन वस्तुतः सब्भे ई लोग एतना शिष्टाचारी, गंभीर हइ ... देखहो, बइठल हइ, अँखिया फाड़के देखब करऽ हइ । गोसा रहले ह ! गोसा रहले ह ! हा-हा-हा ! खि-खि-खि !  

खुशी के मूड में आ गेला पर, कतेरिना इवानोव्ना तुरतम्मे कइएक तरह के विवरण के भावना में बह गेलइ आउ अचानक ई बात के बारे बतावे लगलइ, कि कइसे पेंशन पा लेला के बाद ऊ निश्चित रूप से अपन जन्मभूमि के शहर त- में एगो फ़िनिशिंग स्कूल (एगो निजी कॉलेज जेकरा में लड़कियन के फैशनदार समाज में प्रवेश खातिर तैयार कइल जा हइ) खोलतइ । एकरा बारे खुद कतेरिना इवानोव्ना अभियो तक रस्कोलनिकोव के कुछ नयँ सूचित कइलके हल, आउ ऊ तुरतम्मे  भावना में बहके बहुत आकर्षक ढंग से विवरण देवे लगलइ । नयँ मालूम कइसे अचानक ओकर हाथ में बिलकुल ओहे "प्रशंसापत्र" देखाय देवे लगलइ, जेकरा बारे पहिलहीं स्वर्गीय मरमेलादोव कलाली (शराबखाना) में समझइते रस्कोलनिकोव के बतइलके हल, कि ओकर घरवली कतेरिना इवानोव्ना इंस्टिच्यूट से ग्रेजुएशन समाप्ति समारोह में "गवर्नर आउ दोसर हस्ती के सामने" शाल के साथ नृत्य कइलके हल । ई प्रशंसापत्र स्पष्टतः अब कतेरिना इवानोव्ना के फ़िनिशिंग स्कूल खोले के अधिकार लगी एगो प्रमाण के काम करे वला हलइ; लेकिन मुख्य रूप से एकरा तैयार करके ई उद्देश्य से रक्खल गेले हल, कि आखिरकार अगर संयोगवश "दुन्नु पुछल्लेदार लहँगा लहरावे वली !" मृतक भोज में अइलइ, त ओकन्हीं के बात के काटल जा सकइ, आउ ओकन्हीं के स्पष्ट रूप से प्रमाणित कइल जा सकइ, कि कतेरिना इवानोव्ना बड़गो कुलीन घराना से, आउ "एहो कहल जा सकइ, कि पुश्तैनी रईसी खनदान से, कर्नल के बेटी हलइ, आउ कहीं बेहतर हलइ ऊ अइसन जाँबाज औरतियन से, जे हाल में कइएक गुना बढ़ गेले ह" । "प्रशंसापत्र" हाथोहाथ नशा में चूर मेहमान सब के पास से गुजरलइ, जेकरा कतेरिना इवानोव्ना नयँ रोकलकइ, काहेकि ओकरा में वास्तव में "en toutes lettres" [आँ तूत लेत्र (फ्रेंच) = लिखित रूप में, साफ-साफ शब्द में] उल्लेख कइल हलइ, कि ऊ कोर्ट काउंसिलर आउ नाइट (knight) के बेटी हलइ, आउ ओहे से वास्तव में लगभग एगो कर्नल के बेटी हलइ । उत्तेजना से जलते, कतेरिना इवानोव्ना तुरतम्मे विस्तार से बतइलकइ - शहर त- में भावी उत्तम आउ शांतिमय जीवन के सब्भे विवरण के बारे; स्कूल-शिक्षक सब के बारे, जिनका सब के ऊ अपन फ़िनिशिंग स्कूल में अध्यापन कार्य लगी आमंत्रित करतइ; एगो आदरणीय वृद्ध, फ्रेंच माँगो (Mangot), के बारे, जे इंस्टिच्यूट में कतेरिना इवानोव्ने के फ्रेंच पढ़इलके हल, आउ जे अभियो तक त- में  रह रहले ह ..., आउ निस्संदेह ओकरा पास बिलकुल उचित वेतन पर अध्यापन काम करे लगी अइतइ । आखिरकार सोनियो के बात उठलइ, "जे कतेरिना इवानोव्ना के साथ त- जइतइ आउ ओकरा सब कुछ में मदत करतइ" । लेकिन हियाँ परी अचानक कोय तो टेबुल के अंतिम तरफ से खिखिअइलइ । कतेरिना इवानोव्ना हलाँकि तुरतम्मे अइसन देखावा कइलकइ, कि अनवधानतावश टेबुल के अंतिम छोर से निकसल खिखियाहट पर ओकर ध्यान नयँ गेलइ, लेकिन तुरतहीं, जान-बूझके अपन अवाज उँचगर करके, गरमजोशी के साथ बोले लगलइ - अपन सहायिका के रूप में सोफ़िया सिम्योनोव्ना के शंकाहीन क्षमता के बारे, "ओकर सीधापन, सहनशीलता, आत्म-बलिदान, उदारता आउ शिक्षा के बारे", आउ सोनिया के गाल थपथपइलकइ, आउ जरी उठके ओकरा दू तुरी चुमलकइ । सोनिया के चेहरा लाल हो गेलइ, आउ कतेरिना इवानोव्ना के आँख में अचानक लोर आ गेलइ, हिएँ परी अपने आप के बारे टिप्पणी कइलकइ, कि "ऊ अतिभावुक मूर्ख हइ, कि ऊ बहुत परेशान हइ, कि अब समाप्त करे के समय आ गेले ह, आउ चूँकि भोजन समाप्त हो चुकले ह, त अब चाय परसल जा सकऽ हइ" । बिलकुल एहे क्षण अमालिया इवानोव्ना, जे ई बात से बेहद अपमानित महसूस कइलकइ, कि ऊ ई बातचीत में कोय जरिक्को सुनी हिस्सा नयँ ले पइलके हल, कि ओकर कोय बात नयँ सुन रहले ह, अचानक एगो अंतिम कोशिश करे के जोखिम उठइलकइ, आउ अपन तकलीफ के अपने अंदर छिपइले, कतेरिना इवानोव्ना के एगो बहुत व्यावहारिक आउ गंभीर टिप्पणी से ई बात के बारे सूचित करे के साहस कइलकइ, कि भावी फ़िनिशिंग स्कूल में लड़कियन के साफ-सुथरा छालटी (die Wàsche) पर विशेष ध्यान देवे के चाही, कि "अइसन एगो निम्मन महिला (die Dame) जरूर होवे के चाही, जे छालटी के अच्छा से देखभाल करइ", आउ दोसर बात ई, कि "सब्भे नवयुवती रात के चोरी-चुपके उपन्यास नयँ पढ़ पावइ" । कतेरिना इवानोव्ना, जे वास्तव में परेशान आउ बहुत थक्कल हलइ, आउ मृतक भोज से बिलकुल ऊब चुकले हल, तुरतहीं अमालिया इवानोव्ना के "बात काट देलकइ", कि ऊ "बकवास करब करऽ हइ" आउ कुच्छो नयँ समझऽ हइ; कि die Wàsche [दी वाशऽ (जर्मन) = छालटी] के देखभाल छालटी प्रबंधिका के काम हइ, आउ उँचगर श्रेणी के फ़िनिशिंग स्कूल के निदेशिका के काम नयँ हइ; कि जाहाँ तक उपन्यास पढ़े के संबंध हइ, त ई बस अशिष्टाचारो हइ, आउ ऊ ओकरा ई बात लगी चुप रहे लगी निवेदन करऽ हइ । अमालिया इवानोव्ना के चेहरा गोस्सा से तमतमा गेलइ, टिप्पणी कइलकइ, कि ऊ खाली "भलाय चाहऽ हलइ" आउ ऊ "ओकरा लगी बहुत भलाय चाहऽ हलइ", कि ऊ ओकरा "फ्लैट के किराया के रूप में लम्मा समय से सोना (Geld) नयँ चुकइलके हल" । कतेरिना इवानोव्ना तुरतहीं ओकरा ई कहके ओकरा "निच्चे कर देलकइ", कि ऊ झूठ बोलऽ हइ, कि ऊ "ओकर भलाय चाहऽ हलइ", काहेकि कल्हिंएँ, जबकि ओकर स्वर्गीय पति टेबुलवे पर पड़ल हला [4], त ऊ ओकरा फ्लैट के बारे सताब करऽ हलइ । ई बात पर अमालिया इवानोव्ना सिलसिलेवार ढंग से टिप्पणी कइलकइ, कि ऊ "ओइसनकन महिला के निमंत्रित कइलकइ, लेकिन ऊ महिला नयँ अइते गेला, काहेकि उनकन्हीं कुलीन घराना के हका आउ अकुलीन घराना में अपन भेंट नयँ दे सकऽ हका" । कतेरिना इवानोव्ना तुरतम्मे ओकरा ई बात "जोर देके बता देलकइ", कि चूँकि ऊ खुद्दे छिनार हइ, ओहे से ऊ ई नयँ निर्णय कर सकऽ हइ, कि वास्तव में कुलीनता की होवऽ हइ । अमालिया इवानोव्ना के ई बात बरदास नयँ होलइ आउ तुरतहीं टुट्टल-फुट्टल जर्मन मिश्रित रूसी में एलान कइलकइ, कि ओकर "Vater aus Berlin [फ़ाटेर आउस बेर्लिन (जर्मन) - बेर्लिन निवासी पिता] एगो बहुत बहुत महत्त्वपूर्ण व्यक्ति हला आउ अपन दुन्नु हाथ जेभी में रखके चल्लऽ हला आउ लगातार "पूफ़ ! पूफ़ !" करऽ हला, आउ अपन Vater [फ़ाटेर (जर्मन) - पिता] के आउ अधिक वास्तविक चित्र उपस्थित करे खातिर, अमालिया इवानोव्ना अपन कुरसी से उछल पड़लइ, अपन दुन्नु हाथ अपन जेभी में घुसा लेलकइ, अपन गाल फुला लेलकइ आउ मुँह से "पूफ़ ! पूफ़ !" जइसन अस्पष्ट ध्वनि निकासे लगलइ, जेकरा से सब्भे किरायेदार जोर से खिखिआय लगलइ, जे ओकन्हीं दुन्नु के बीच हाथापाई के आशंका करके जान-बूझके अपन अनुमोदन के साथ अमालिया इवानोव्ना के प्रेरित करे लगलइ । लेकिन कतेरिना इवानोव्ना के ई बात बरदास नयँ हो सकलइ आउ तुरतम्मे, सबके सुनाके "साफ-साफ बोललइ", कि अमालिया इवानोव्ना के, शायद, कभी कोय Vater (फ़ाटेर) तो हइए नयँ हलइ, कि अमालिया इवानोव्ना बस पितिरबुर्ग में रहे वली फ़िनलैंड के एगो पियक्कड़ औरत हलइ, आउ शायद, पहिले कहीं भनसा घर में काम करे वली नौकरानी के रूप में रहऽ हलइ, आउ शायद, एकरो से बत्तर हालत में । अमेलिया इवानोव्ना के चेहरा इचना मछली नियन लाल हो गेलइ, आउ चिल्लइलइ, कि ई कतेरिना इवानोव्ना के, शायद, "बिलकुल कोय Vater (फ़ाटेर) नयँ हलइ; लेकिन ओकरा तो बेर्लिन में फ़ाटेर हला, आउ एतना लम्मा फ़्रॉक कोट पहनऽ हला, आउ हमेशे करऽ हला - पूफ़, पूफ़, पूफ़ !" कतेरिना इवानोव्ना तिरस्कारपूर्वक टिप्पणी कइलकइ, कि ओकर उत्पत्ति के बारे सब कोय के मालूम हइ, कि ई प्रशंसापत्रे में छप्पल शब्द में उल्लेख कइल हइ, कि ओकर पिता कर्नल हलइ; आउ अमालिया इवानोव्ना के बाप (अगर कोय बाप हइयो हलइ तब), शायद, पितिरबुर्ग में रहे वला कोय फ़िनलैंड के अदमी हलइ, आउ दूध बेचऽ हलइ; लेकिन सबसे जादे संभावना ई हइ, कि कोय बाप हइए नयँ हलइ, काहेकि अभियो तक ई मालूम नयँ हइ, कि अमेलिया इवानोव्ना के पैतृक नाम की हइ - इवानोव्ना, कि लूदविगोव्ना [लुडविग (Ludwig) के बेटी] ? हियाँ परी अमालिया इवानोव्ना बहुत जादहीं क्रोधित हो गेलइ आउ टेबुल पर मुक्का मारते चिल्लाय लगलइ, कि ऊ अमाल-इवान हइ, न कि लूदविगोव्ना, कि ओकर फ़ाटेर के "नाम योहान (Johann) हलइ आउ ऊ बुर्गोमाइस्टर [5] हला", कि कतेरिना इवानोव्ना के बाप "कभियो बुर्गोमाइस्टर नयँ हलइ" । कतेरिना इवानोव्ना कुरसी पर से उठ गेलइ आउ कठोरतापूर्वक, प्रत्यक्ष रूप से शांत स्वर में (हलाँकि ओकरा पूरा चेहरा पीयर पड़ गेले हल आउ ओकर दम पूरा तरह से फूल रहले हल), ओकरा टिप्पणी कइलकइ, कि अगर ऊ एक्को तुरी आउ "अपन दू कौड़ी के बाप के ओकर प्रिय पिता के साथ एक्के स्तर पर रक्खे के साहस कइलकइ, त ऊ, कतेरिना इवानोव्ना, ओकर टोपिया के नोच-खसोट के अपन गोड़वा से रौंद देतइ" । एतना सुनके, अमालिया इवानोव्ना, कमरा में एन्ने-ओन्ने दौड़े लगलइ, अपन पूरा जोर लगाके चीखते-चिल्लइते, कि ऊ मकान-मालकिन हकइ आउ कतेरिना इवानोव्ना के "ओहे पल फ्लैट छोड़के चल जाय के चाही"; फेर ऊ कोय कारणवश टेबुल पर के चानी के चम्मच जामा करे लगी लपकलइ । हंगामा खड़ी हो गेलइ आउ शोर-गुल मच गेलइ; बुतरुअन कन्ने लगलइ । सोनिया कतेरिना इवानोव्ना के रोके लगी लपकके गेलइ; लेकिन जब अमालिया इवानोव्ना कुछ तो पीला पास के बारे अचानक चिल्लइलइ, त कतेरिना इवानोव्ना सोनिया के ढकेलके अलगे कर देलकइ आउ अमालिया इवानोव्ना तरफ बढ़लइ, ताकि टोपिया के बारे देल गेल धमकी के क्रियान्वित कर सकइ। ओहे क्षण दरवाजा खुललइ, आउ कमरा के दहलीज पे अचानक प्योत्र पित्रोविच लूझिन के सूरत देखाय देलकइ। ऊ खड़ी हलइ, आउ कठोर आउ सतर्क दृष्टि से समुच्चे मंडली तरफ देखब करऽ हलइ । कतेरिना इवानोव्ना ओकरा तरफ लपकलइ ।

सूची            पिछला                     अगला


No comments: