विजेट आपके ब्लॉग पर

Tuesday, June 27, 2017

विश्वप्रसिद्ध रूसी नाटक "इंस्पेक्टर" ; अंक-5 ; दृश्य-7

दृश्य-7
(ओहे सब, पुलिस चीफ़ आउ पुलिस के सिपाही)
पुलिस चीफ़ - अपने के बधाई देवे में आउ अनेक वर्ष के समृद्धि के शुभकामना देवे में, तत्रभवान् उच्चकुलीन, हम सम्मानित अनुभव करऽ हिअइ !
मेयर- धन्यवाद, धन्यवाद ! बैठ जाय लगी निवेदन करऽ हिअइ, भद्रजन !
(अतिथि लोग बैठ जा हका ।)
आम्मोस फ़्योदरोविच - लेकिन किरपा करके बताथिन, अंतोन अंतोनोविच, कइसे ई सब शुरू होलइ, सब कुछ, मतलब ई घटनाचक्र (course of the affair) । 
मेयर - घटनाचक्र विलक्षण हलइ - ऊ खुद्दे व्यक्तिगत रूप से प्रस्ताव रखलथिन ।
आन्ना अंद्रेयेव्ना - बहुत सम्मानजनक आउ अत्यंत परिष्कृत रूप में । सब कुछ अत्यंत सुंदर ढंग से बोललथिन । बोलऽ हथिन - "हम, आन्ना अंद्रेयेव्ना, बस खाली अपने के गुण के सम्मान के चलते ई करऽ हिअइ ..." आउ अत्यंत उदार सिद्धांत के एतना उत्तम, शिष्ट व्यक्ति ! "की अपने विश्वास करथिन, आन्ना अंद्रेयव्ना, हमर जीवन एक कोपेक (कौड़ी) के नयँ हइ; हम खाली ई कारण से ई सब करऽ हिअइ कि हम अपने के दुर्लभ गुण के आदर करऽ हिअइ ।"
मारिया अंतोनोव्ना - ओह, माय ! ई तो ऊ हमरा से बोल रहलथिन हल ।
आन्ना अंद्रेयेव्ना - रुक, तोरा कुच्छो नयँ मालुम हउ आउ जेकरा से तोरा लेना-देना नयँ हउ ओकरा में टाँग नयँ अड़ाऽ ! "हम, आन्ना अंद्रेयेव्ना, आश्चर्यचकित हिअइ ..." ऊ अइसन खुशामद भरल शब्द के झड़ी लगा देलथिन ... आउ जब हम कहे लगी चहलिअइ - "हम अइसन सम्मान के आशा करे के साहस नयँ कर सकऽ हिअइ" - त ऊ अचानक अपन टेहुना के बल गिर गेलथिन आउ अत्यंत उदार ढंग से बोललथिन – "आन्ना अंद्रेयेव्ना, हमरा सबसे अभागल नयँ बनाथिन ! हमर भावना के उत्तर देवे लगी सहमत हो जाथिन, नयँ तो हम अपन जीवन के मौत से अंत कर लेबइ ।"
मारिया अंतोनोव्ना - सचमुच, माय, ऊ हमरा बारे एहे बात कहलथिन हल ।
आन्ना अंद्रेयेव्ना - हाँ, सचमुच ... तोरो बारे होतउ, हम ई बात के अस्वीकार नयँ करऽ हिअउ ।
मेयर - आउ ई तरह हमन्हीं के भयभीत भी कर देलथिन - बोललथिन, कि ऊ खुद के गोली मार लेथिन । "खुद के गोली मार लेबइ, खुद के गोली मार लेबइ !" - बोललथिन ।
कइएक दर्शक - की कहऽ हथिन ?!
आम्मोस फ़्योदरोविच (जज) - अरे बाप !
लुका लुकीच (अनुदान संस्था के न्यासी) - ई तो बस भाग्य के खेल हलइ ।
अरतेमी फ़िलिप्पोविच - भाग्य नयँ, प्यारे, भाग्य - ई तो पेरू पक्षी हइ; हमर सेवा के कारण अइसन फल मिललइ । (स्वगत) एकरा नियन सूअर हमेशे अपन मुँह से भाग्य के बात करऽ हइ !
आम्मोस फ़्योदरोविच - अगर अपने चाहथिन, अंतोन अंतोनोविच, त हम अपने के ऊ कुत्ता बेचे लगी तैयार हिअइ, जे अपने खरदे लगी चाहऽ हलथिन ।
मेयर - नयँ, हमरा अभी कुत्ता से कोय मतलब नयँ ।
आम्मोस फ़्योदरोविच - अच्छऽ, ऊ नयँ चाहऽ हथिन, त दोसर कुत्ता के बारे हमन्हीं सहमत हो सकऽ हिअइ ।
कोरोब्किन के पत्नी - आह, आन्ना अंद्रेयेव्ना, हम अपने के सौभाग्य पर केतना खुश हिअइ ! अपने कल्पना नयँ कर सकऽ हथिन ।
कोरोब्किन - की हम जान सकऽ हिअइ, कि अभी विशिष्ट अतिथि काहाँ हथिन ? हमरा सुन्ने में अइलइ, कि ऊ कोय कारण से प्रस्थान कर चुकलथिन हँ ।
मेयर - हाँ, ऊ एक दिन लगी बहुत महत्त्वपूर्ण काम से प्रस्थान कइलथिन ।
आन्ना अंद्रेयेव्ना - अपन चाचा के पास, आशीर्वाद लेवे खातिर ।
मेयर - आशीर्वाद लेवे खातिर; लेकिन कल्हिंएँ ... (छींक दे हका)
(एक स्वर में "शतं जीवऽ" निकस जा हइ ।)
 बहुत आभारी ! लेकिन कल्हिंएँ वापिस ... (छींक आ जा हइ) ।
(फेर से "शतं जीवऽ" के समवेत स्वर; सामान्य शोरगुल के अपेक्षा आउ अलग अवाज जादे निम्मन से सुनाय पड़ऽ हइ :)
पुलिस चीफ़ के (अवाज) - तत्रभवान् उच्चकुलीन के निम्मन स्वास्थ्य के कामना !
बोबचिन्स्की के - सो बरस आउ बोरा भर सोना के सिक्का !
दोबचिन्स्की के - भगमान एकरा बढ़ाके चालीस के चालीस गुना कर दे !
अरतेमी फ़िलिप्पोविच के - (स्वगत) तोर सत्यानाश होवउ !
कोरोब्किन के पत्नी के - (स्वगत) तोरा शैतान पकड़उ !
मेयर - हार्दिक धन्यवाद ! आउ अपनहूँ सब खातिर हमरा तरफ से ओहे कामना !
आन्ना अंद्रेयेव्ना - हमन्हीं के अब पितिरबुर्ग में रहे के इरादा हइ । आउ हियाँ परी, स्वीकार करऽ हिअइ, हावा ... बहुत गँवारू हइ ! ... स्वीकार करऽ हिअइ, बहुत अप्रिय हइ ... आउ अइकी हमर पति भी ... ऊ हुआँ जेनरल के रैंक प्राप्त करथिन ।
मेयर - हाँ, हम स्वीकार करऽ हिअइ, भद्रजन, शैतान पकड़े, हमरा जेनरल बन्ने के बहुत मन करऽ हइ ।
लुका लुकीच - आउ भगमान ई प्राप्त करे दे !
रस्ताकोव्स्की - इंसान से असंभव हइ, लेकिन भगमान के तरफ से संभव हइ ।
आम्मोस फ़्योदरोविच - बड़गर जहाज लगी जादे गहरा पानी के जरूरत होवऽ हइ ।
अरतेमी फ़िलिप्पोविच - आउ सेवा के अनुसार सम्मान ।
आम्मोस फ़्योदरोविच - (स्वगत) ई तो विचित्र बात होतइ, जब वास्तव में इनका जेनरल बना देवल जइतइ! इनका तो जेनरल बनावल जाना गाय पर जीन रक्खे के समान होतइ ! खैर, भाय, हियाँ तक पहुँचना अभियो दूर के गीत हको । हियाँ तो तोरा से जादे योग्य लोग हथिन, लेकिन अभियो तक जेनरल नयँ बन पइलथिन ।
अरतेमी फ़िलिप्पोविच - (स्वगत) शैतान पकड़इ, ई तो अभिए से जेनरल बन्ने लगी तैयार हइ ! आउ केऽ जानऽ हइ, हो सकऽ हइ, बनियो जाय । वास्तव में एकरा तो काफी ऐंठी हइ, एकरा तो शैतान भी नयँ पकड़तइ । (ओकरा दने मुखातिब होते) तब, अंतोन अंतोनोविच, हमन्हिंयों के नयँ भुलाथिन ।
आम्मोस फ़्योदोरोविच - आउ अगर कुछ हो जाय, मसलन कोय मामले में जरूरत, त हमन्हीं के सुरक्षा से इनकार नयँ करथिन !
कोरोब्किन - अगले साल अपन बेटवा के सरकारी सेवा लगी रजधानी ले जइबइ, त अनुग्रह करथिन, ओकरा अपन संरक्षण में रखथिन, अनाथ खातिर एगो पिता नियन बरताव करथिन ।
मेयर - हम अपन तरफ से तैयार हिअइ, प्रयास करबइ ।
आन्ना अंद्रेयरव्ना - तूँ, अन्तोशा, हमेशे वादा करे लगी तैयार रहऽ हो । सबसे पहिले तो ई बात के बारे सोचे के फुरसत नयँ मिलतो । आउ ई कइसे संभव हइ आउ काहे लगी खुद पर अइसन वादा के बोझ लेवे के चाही ?
मेयर - काहे, प्रिये ? कभी-कभी तो संभव हइ ।
आन्ना अंद्रेयेव्ना - वास्तव में संभव हको तोहरा लगी, लेकिन हरेक ऐरा गैरा नत्थू खैरा लगी तो अपन संरक्षण प्रदान नयँ कर सकऽ हो ।
कोरोब्किना के पत्नी - सुनते गेलथिन, हमन्हीं के साथ कइसन व्यवहार करऽ हथिन ?
एगो महिला अतिथि - हाँ, ऊ हमेशे अइसने हलथिन; हम उनका जानऽ हिअइ - टेबुल भिर मुझीक (देहाती/ किसान) के बैठाहो, त ऊ अपन गोड़ एकरा पर रख देतो ...

  
सूची            पिछला                     अगला

Sunday, June 25, 2017

विश्वप्रसिद्ध रूसी नाटक "इंस्पेक्टर" ; अंक-5 ; दृश्य-6

दृश्य-6
(आउ कइएक अतिथि हाथ भिर अइते । पत्नी के साथ लुका लुकीच ।)
लुका लुकीच - हमर सम्मान के बात हइ ...
लुका लुकीच के पत्नी - (आगू दौड़के) हम अपने के बधाई दे हिअइ, आन्ना अंद्रेयेव्ना ।
(दुन्नु एक दोसरा के चुंबन ले हइ ।)
हम सचमुच केतना खुश होलिअइ । हमरा लोग बोलते जा हइ - "आन्ना अंद्रेयेव्ना अपन बेटी के विवाह कर रहलथिन हँ ।" "हे भगमान !" - हम सोचऽ हिअइ, आउ एतना खुश होलिअइ, कि अपन पति के बोलऽ हिअइ - "सुनहो, लुकानचिक, आन्ना अंद्रेयेव्ना के कइसन सौभाग्य हइ !" हम सोचऽ हिअइ - "खैर, भगमान के किरपा!" आउ उनका बोलऽ हिअइ - "हम एतना खुश हिअइ, कि अधीरता से जल्लब करऽ हिअइ, व्यक्तिगत रूप से आन्ना अंद्रेयेव्ना के अभिव्यक्त करे खातिर ..." "हे भगमान !", हम सोचऽ हिअइ, "आन्ना अंद्रेयेव्ना अपन बेटी लगी एगो निम्मन जोड़ी के आशा कर रहला हल, आउ अइकी अब अइसन सौभाग्य - ओइसने होलइ, जइसन ऊ चाहऽ हला" - आउ सचमुच हमरा एतना खुशी होलइ, कि हम अभिव्यक्त नयँ कर पइलिअइ । हम कन्नऽ हिअइ, कन्नऽ हिअइ, बस सिसकऽ हिअइ । लुका लुकीच तो कहवो करऽ हका, "नास्तेन्का (अनस्तासिया के ऊनार्थक रूप), तूँ सिसकऽ हीं काहे लगी ?" - हम बोलऽ हिअइ, "लुकानचिक, हमरा खुद्दे नयँ मालुम, आँसू तो अइसीं नद्दी के धारा नियन बहब करऽ हइ ।"
मेयर - हम हृदय से निवेदन करऽ हिअइ कि बैठ जइते जाथिन, भद्रजन ! ए मिश्का, हियाँ परी कुछ आउ कुरसी लाना ।
(अतिथि लोग बैठ जा हका ।)

  
सूची            पिछला                     अगला

Saturday, June 24, 2017

विश्वप्रसिद्ध रूसी नाटक "इंस्पेक्टर" ; अंक-5 ; दृश्य-5

दृश्य-5
अतिथि के बड़गो भीड़ टेलकोट आउ फ़्रॉककोट में पहिले आन्ना अंद्रेयेव्ना के हाथ के पास, "आन्ना अंद्रेयेव्ना !" कहते आवऽ हइ - फेर मारिया अंतोनोव्ना भिर, "मारिया अंतोनोव्ना !" कहते । बोबचिन्स्की आउ दोबचिन्स्की भीड़ के चीरते आवऽ हइ ।
बोबचिन्स्की - अपने के बधाई देवे के हमरा सम्मान प्राप्त होलइ !
दोबचिन्स्की - अंतोन अंतोनोविच ! अपने के बधाई देवे के हमरा सम्मान प्राप्त होलइ !
बोबचिन्स्की - आनंददायक घटना लगी बधाई !
दोबचिन्स्की - आन्ना अंद्रेयेव्ना !
बोबचिन्स्की - आन्ना अंद्रेयेव्ना !
(दुन्नु एक्के साथ पास आवऽ हइ आउ एक दोसरा से निरार पर टकरा जइते जा हइ ।)
दोबचिन्स्की - मारिया अंतोनोव्ना ! (हाथ भिर जा हइ ।) अपने के बधाई देवे के हमरा सम्मान प्राप्त होलइ । अपने के बड़गो, बड़गो खुशी मिलतइ, आउ सोना के पोशाक में होथिन आउ अपने के कइएक तरह के स्वादिष्ट शोरबा (सूप) पीए लगी मिलतइ; अपने के समय बहुत मनोरंजन में गुजरतइ ।
बोबचिन्स्की - (बीच में टोकते) मारिया अंतोनोव्ना, अपने के बधाई देवे के सम्मान प्राप्त होलइ ! भगमान अपने के हर तरह के संपत्ति, स्वर्ण आउ एतना छोटगर बेटा दे, अइकी एतवड़ गो, मिस (हाथ से देखावऽ हइ), ताकि ओकरा अपन हथेली पर रख सकथिन, जी हाँ ! आउ छोटकुन्ना बुतरू लगातार चिल्लइतइ – हुआँ ! हुआँ ! हुआँ! ...

  
सूची            पिछला                     अगला

विश्वप्रसिद्ध रूसी नाटक "इंस्पेक्टर" ; अंक-5 ; दृश्य-4

दृश्य-4
(ओहे सब, पत्नी के साथ कोरोबकिन, ल्युल्युकोव)
कोरोबकिन - बधाई देवे के हमरा सम्मान प्राप्त होलइ अंतोन अंतोनोविच ! आन्ना अंद्रेयेव्ना ! (आन्ना अंद्रेयेव्ना के हाथ भिर जा हइ ।) मारिया अंतोनोव्ना (ओकर हाथ भिर जा हइ ।)
कोरोबकिन के पत्नी - नयका सौभाग्य लगी हम तहे दिल से अपने के बधाई दे हिअइ, आन्ना अंद्रेयेव्ना ।
ल्यल्युकोव - बधाई देवे के हमरा सम्मान प्राप्त होलइ, आन्ना अंद्रेयेव्ना ! (हाथ भिर जा हइ आउ बाद में दर्शक लोग दने मुड़के निडरता के मुद्रा में अपन जीभ चटकावऽ हइ ।) मारिया अंतोनोव्ना ! बधाई देवे के हमरा सम्मान प्राप्त होलइ । (ओकर हाथ भिर जा हइ आउ दर्शक दने ओइसने निडरता के भाव से मुड़ऽ हइ ।)

  
सूची            पिछला                     अगला

विश्वप्रसिद्ध रूसी नाटक "इंस्पेक्टर" ; अंक-5 ; दृश्य-3

दृश्य-3
(ओहे सब, आउ आम्मोस फ़्योदरोविच, अरतेमी फ़िलिप्पोविच, बाद में रस्ताकोव्स्की ।)
आम्मोस फ़्योदरोविच (जज) - (दरवजवे पर से) की ई अफवाह पर विश्वास कइल जाय, अंतोन अंतोनोविच? कि अपने के असाधारण सौभाग्य प्राप्त होले ह ?
अरतेमी फ़िलिप्पोविच (अनुदान संस्था के न्यासी) - अपने के असाधारण सौभाग्य लगी अपने के बधाई देवे के हमरा सम्मान प्राप्त होलइ । हम तहे दिल से खुश होलिअइ, जब हम ई बात सुनलिअइ । (आन्ना अंद्रेयेव्ना के हाथ भिर जा हइ ।) आन्ना अंद्रेयेव्ना ! (मारिया अंतोनोव्ना के हाथ भिर जाके) मारिया अंतोनोव्ना !
रस्ताकोव्स्की - (प्रवेश करके) अंतोन अंतोनोविच के बधाई । भगमान अपने के आउ नयका जोड़ी के लमगर जिनगी दे आउ अपने के भावी पीढ़ी के कइएक नाती-पोता आउ परनाती-परपोता दे ! आन्ना अंद्रेयेव्ना ! (आन्ना अंद्रेयेव्ना के हाथ भिर जा हइ ।) मारिया अंतोनोव्ना ! (मारिया अंतोनोव्ना के हाथ भिर जा हइ ।)

  
सूची            पिछला                     अगला

Friday, June 23, 2017

विश्वप्रसिद्ध रूसी नाटक "इंस्पेक्टर" ; अंक-5 ; दृश्य-2

दृश्य-2
(ओहे सब आउ व्यापारी लोग)
मेयर - ओह ! निम्मन स्वास्थ्य के कामना, प्यारे बाज !
व्यापारी सब - (झुकते) निम्मन स्वास्थ्य के कामना, महोदय !
मेयर - की प्यारे, की हालचाल हको ? तोहन्हीं सब के व्यापार कइसन चल रहलो ह ? समोवार आउ कपड़ा के व्यापारी लोग, कइसन शिकायत हलो ? एक नंबर के धोखेबाज, महाधूर्त्त, सांसारिक ठग ! शिकायत हलो? आउ एकरा चलते बहुत कुछ मिल गेलो ? त सोचऽ हलहो कि हमरा जेल में ठूँस देल जइतइ ! ... की तोहन्हीं के मालुम हको, सात शैतान आउ एक डायन तोहन्हीं के दाँत में, कि ...
आन्ना अंद्रेयेव्ना - हे भगमान, कइसन-कइसन शब्द तूँ मुँह से निकासऽ ह, अंतोशा !
मेयर - (नराज होके) अभी हमर भाषा पर ध्यान नयँ द ! तोहन्हीं सब के मालुम हको, कि ओहे अफसर, जेकरा से शिकायत करते गेलहो, अब हमर बेटी के साथ शादी करे वला हथिन ? की ? ऐं ? अभी की कहते जइबहो? अब हम तोहन्हीं के ... हूँ ! ... लोग के ठग्गऽ हो ... सरकार से ठेका लेबहो, लेकिन सड़ल कपड़ा के सप्लाय करके एकरा एक लाख के चूना लगइबहो, आउ बाद में बीस अर्शीन (1 अर्शीन = 28 इंच) के दान करभो आउ एकरा लगी पुरस्कारो चाहभो ? अगर ओकन्हीं के मालुम चल गेलो त तोरा ... आउ पेट आगू निकासऽ हइ - ऊ व्यापरी हइ, ओकरा स्पर्श नयँ करहीं । बोलऽ हइ, "हम सब तो भद्रजन के सामने भी नयँ झुक्कऽ हिअइ ।" आउ भद्रजन ... ओह, मोटगर थोपड़ा ! - भद्रजन शिक्षित होवऽ हइ - ओकरा बल्कि स्कूल में पिटम्मस भी कइल जा हइ, त कोय कारण से, ताकि ऊ उपयोगी बात सीख सकइ । लेकिन तूँ ? - धोखेबाजी से शुरू करऽ हीं; तोरा मालिक ई लगी पिट्टऽ हउ कि तूँ ठीक से धोखा नयँ दे पावऽ हीं । तूँ अभियो बुतरू हकँऽ, "हमर पिता" के नयँ जानऽ हीं, तौले बखत कोती मारऽ हीं; आउ जइसीं मोटाऽ जाहीं आउ जेभी भर जा हउ, ओइसीं ऐंठी देखावे लगऽ हीं ! कइसन अचरज के बात हइ ! त एक दिन में सोल्लह समोवार (के चाय) गड़क जा हीं, आउ सोचऽ हीं कि ऐंठ सकऽ हीं ? हम तोर सिर पर आउ तोर ऐंठन पर थुक्कऽ हिअउ !
व्यापारी सब - (झुकते) हमन्हीं सब दोषी हिअइ, अंतोन अंतोनोविच !
मेयर - शिकायत करते जइम्हीं ? आउ ऊ केऽ हलइ जे तोरा धोखा देवे में मदत कइलकउ, जब तूँ पुल बनाब करऽ हलहीं आउ लकड़ी के नाम बीस हजार रूबल चढ़ा देलहीं, जबकि ओकर कीमत सोवो रूबल नयँ हलइ? हम तोरा मदत कइलियो हल, बकड़-दाढ़ी ! तूँ ई बात भूल गेलहीं ? ई बात के खोलके तोरा साइबेरिया भेजवा दे सकऽ हलिअउ । की कहऽ हीं ? ऐं ?
एक व्यापारी - भगमान कसम, हमन्हीं सब दोषी हिअइ, अंतोन अंतोनोविच ! शैतान हमन्हीं के भटका देलके हल । आउ कसम से इंदे कभी नयँ शिकायत करते जइबइ । अपन मर्जी के मोातबिक संतुष्टि कर लेथिन, लेकिन खाली गोस्सा नयँ करथिन !
मेयर - "गोस्सा नयँ करथिन !" अखने हमर गोड़ रगड़ते जा हीं । काहे लगी ? - ई लगी, कि हमर पलड़ा भारी हो गेलइ; आउ जरिक्को सुनी तोहन्हीं के पलड़ा भारी होतो हल, त हमरा तो, सूअर कहीं के, सीधे कादो में सौन देतहीं हल, ओकरो पर उपरे से लकड़ी के लट्ठा के ढेर डाल देतहीं हल ।
व्यापारी सब - (गोड़ तक झुकके) हमन्हीं के बरबाद नयँ करथिन, अंतोन अंतोनोविच !
मेयर - "बरबाद नयँ करथिन !" अभी - "बरबाद नयँ करथिन !" आउ पहिले की हलइ ? हम तोहन्हीं के ... (हाथ लहराके) अच्छऽ, भगमान माफ करथुन ! बहुत हो गेलउ ! हम गुर्रह नयँ रक्खे वला हिअउ; खाली अब सवधान रहिहँऽ ! हम कोय साधारण भद्रजन के अपन लड़की नयँ देब करऽ हिअइ - (ओहे से अइसन बेशकीमती उपहार होवे के चाही कि) शाबासी मिल्ले ... समझलहीं ? कहीं ई न समझिहँऽ कि कइसनो मसालेदार मछली चाहे बन (sugarloaves) से छुटकारा मिल जइतउ ... अच्छऽ, अब दफा हो जइते जो !
(व्यापारी सब के प्रस्थान ।)

  
सूची            पिछला                     अगला

Wednesday, June 21, 2017

विश्वप्रसिद्ध रूसी नाटक "इंस्पेक्टर" ; अंक-5 ; दृश्य-1

अंक -5
(मेयर के घर के ओहे कमरा)
दृश्य-1
(मेयर, आन्ना अंद्रेयेव्ना आउ मारिया अंतोनोव्ना)
मेयर - की आन्ना अंद्रेयेव्ना ? ऐं ? कभी एकरा बारे सोचवो कइलहो हल ? एतना धनगर पुरस्कार, धुरफनई ! अच्छऽ, साफ दिल से स्वीकार करऽ - तोरा सपनो में नयँ सुझलो होत - खाली एगो कइसनो मेयर के बीवी आउ अचानक ... ओह, धुरफनई ! ... कइसन शैतान के साथ तोर रिश्तेदारी हो गेलो !
आन्ना अंद्रेयेव्ना - बिलकुल नयँ । हमरा बहुत पहिलहीं से ई मालुम हले । ई तोहरा लगी अचरज हको, काहेकि तूँ एगो सीधा-सादा व्यक्ति हकऽ, कभियो भद्रजन से भेंट-मोलकात नयँ होलो ह ।
मेयर - हम खुद, प्रिये, एगो भद्रजन हकूँ । लेकिन, ई बात सच हइ, जइसन कि सोचऽ हो आन्ना अंद्रेयेव्ना, कि हमन्हीं दुन्नु अभी कइसन पक्षी के जोड़ी हिअइ ! हइ न आन्ना अंद्रेयेव्ना ? उँचगर उड़ान के, शैतान पकड़े ! जरी ठहरऽ, अब ई सब शिकायत आउ रिपोर्ट करे वलन के फटकारऽ हिअइ । ए, ओज्जा केऽ हँ ?
(सिपाही स्विस्तुनोव के प्रवेश ।)
ओह, तूँ हँ, इवान कार्पोविच ! व्यापारी सब के बोलाके ले आव, भाय ! अइकी हम ओकन्हीं धूर्त्त सब के ! हमरा बारे शिकायत करते गेले हल ! अच्छऽ, देख अभिशप्त यहूदी लोग ! ठहरते जा, प्यारे ! पहिले हम तोहन्हीं के खाली मोंछ पकड़लियो हल, लेकिन अब दाढ़ी तक आ जइबउ । ऊ सब के नाम लिख ले, जे खाली हमरा विरुद्ध शिकायत करे लगी अइले हल, आउ खास करके ऊ सब के, जे ओकन्हीं लगी याचिका गढ़ते गेलइ (concocted the petitions) । आउ सब के घोषणा कर देहीं, ताकि ओकन्हीं जान लेइ - कि कइसन सम्मान भगमान मेयर लगी भेजलथिन हँ - जे अपन बेटी के शादी कइसनो साधारण अदमी से नयँ करतइ, बल्कि अइसन व्यक्ति के साथ, जइसन ई दुनियाँ भी तक नयँ देखलके ह, जे सब कुछ कर सकऽ हइ, सब कुछ, सब कुछ, सब कुछ ! सब के घोषणा कर देहीं, ताकि सब कोय जान लेइ । सब लोग के बीच चिल्लाके बता देहीं, घंटा बजाहीं, शैतान पकड़े ! जब विजयोत्सव हइ, त विजयोत्सव हइ !
(सिपाही के प्रस्थान ।)
त आन्ना अंद्रेयेव्ना ? अब हमन्हीं कइसे, काहाँ रहते जइबइ ? हियाँ कि पितिरबुर्ग में ?
आन्ना अंद्रेयेव्ना - निस्संदेह पितिरबुर्ग में । हियाँ कइसे रहल जा सकऽ हइ !
मेयर - अच्छऽ, पितिरबुर्ग में त पितिरबुर्ग में, लेकिन हियों तो निमने होतइ । वस्तुतः हमरा लगऽ हइ, मेयर के काम भाड़ में जाय, हइ न आन्ना अंद्रेयेव्ना ?
आन्ना अंद्रेयेव्ना - निस्संदेह, मेयर के काम में की रक्खल हइ !
मेयर - तोर की विचार हको, आन्ना अंद्रेयेव्ना, हो सकऽ हइ कि हमरा एगो बड़गो रैंक मिल जाय, काहेकि सब मंत्री के साथ उनका मेलजोल हइ आउ उनका राजमहल आना-जाना रहऽ हइ, ओहे से हमर प्रोन्नति के जोगाड़ लगा सकऽ हथिन, आउ समय के साथ जेनरल (सेनापति) के रैंक तक पहुँच जा सकऽ हिअइ । तोर की सोच हको, आन्ना अंद्रेयेव्ना - की जेनरल के रैंक तक पहुँच सकऽ हिअइ ?
आन्ना अंद्रेयेव्ना - निस्संदेह ! वास्तव में संभव हइ ।
मेयर - ओहो, शैतान पकड़े, जेनरल बनना तो सम्मान के बात हइ ! कन्हा से रिब्बन लटकावल जइतइ । आउ कइसन रिब्बन बेहतर हइ, आन्ना अंद्रेयेव्ना - लाल कि नीला ? [27]
आन्ना अंद्रेयेव्ना - निस्संदेह नीला बेहतर हइ ।
मेयर - ऐं ? देखऽ, कइसन सपना देखऽ हका ! लाल वला भी निम्मन हइ । वास्तव में जेनरल बन्ने के काहे मन करऽ हइ ? - काहेकि कभी कहीं यात्रा पर जाय के होवऽ हइ, त कुरियर आउ सहायक (adjutants) सगरो सबसे आगू सरपट जा हइ सूचित करे लगी - "घोड़ा !" (अर्थात् जेनरल साहब पधार रहलथिन हँ, उनका लगी सबसे उम्दा घोड़ा चाही ।) आउ हुआँ डाक स्टेशन में आउ केकरो घोड़ा नयँ देल जा हइ, सब कोय इंतजार करते जा हइ - ई सब्भे टिट्युलर काउंसिलर, कप्तान, मेयर, आउ तूँ कुच्छो पर ध्यान नयँ दे हो । कहीं पर तो गवर्नर के साथ भोज पर बैठल रहऽ, आउ हुआँ - ठहरऽ, मेयर इंतजार करऽ ! हे, हे, हे ! (हँसी से लोटपोट हो जा हइ आउ ओकर आँख में लोर ढरक जा हइ ।) त ई हइ धुरफनई, मोहक !
आन्ना अंद्रेयेव्ना - तोरा हमेशे अइसन बेहूदा बात पसीन आवऽ हको । तोरा आद रक्खे के चाही, कि जिनगी अब बिलकुल बदले के चाही, कि तोहर परिचित में से कोय कुत्ता-प्रेमी जज नियन नयँ होवे के चाही, जेकरा साथ तूँ खरहा के शिकार पर जा हो, चाहे कोय ज़िमल्यान्का नियन; एकर विपरीत, तोहर परिचित बिलकुल शिष्ट व्यवहार वला होवे के चाही - काउंट आउ सब उच्च समाज के लोग ... खाली हमरा, सचमुच, तोरा लगी चिंता हको - तोहर मुँह से कभी-कभी अइसन शब्द निकस जा हको, जे सभ्य समाज में कभियो नयँ सुन्ने में अइतो ।
मेयर - त एकरा से की ? शब्द तो कोय हानि नयँ पहुँचावऽ हइ ।
आन्ना अंद्रेयेव्ना - ई तभिए तक ठीक हलो, जब तक तूँ मेयर हलऽ । लेकिन हुआँ के जिनगी बिलकुल दोसर तरह के हइ ।
मेयर - हाँ, कहल जा हइ कि हुआँ दू तरह के मछली होवऽ हइ - रियापुश्का (मीठा पानी में पावल जाय वला सालमन प्रजाति के एगो छोटगर मछली, cisco) आउ कोर्युश्का (smelt, एक प्रकार के छोटगर मछली) , अइसन कि जइसीं खाय लगी शुरू करबऽ कि तोर मुँह में पानी आवे लगतो ।
आन्ना अंद्रेयेव्ना - इनका तो बस खाली मछलिए सुज्झऽ हइ ! हम बस एहे चाहऽ ही, कि हमर घर रजधानी में एक नंबर के होवे आउ हमर कमरा में अइसन सुगंध होवे कि अंदर आना असंभव होवे आउ बस खाली अइसे आँख मिचकावे पड़े । (आँख मिचकावऽ हइ आउ सुँग्घऽ हइ ।) आह, केतना निम्मन हइ !

  
सूची            पिछला                     अगला

Sunday, June 18, 2017

विश्वप्रसिद्ध रूसी नाटक "इंस्पेक्टर" ; अंक-4 ; दृश्य-16

दृश्य-16
(ओहे सब आउ ओसिप)
ओसिप - घोड़ा तैयार हइ ।
ख़्लिस्ताकोव - अच्छऽ, ठीक हउ ... अभी आवऽ हिअउ ।
मेयर - जी, ई कइसे ? अपने के कहे के मतलब हइ कि अपने जा रहलथिन हँ ?
ख़्लिस्ताकोव - हाँ, जाब करऽ हिअइ ।
मेयर - लेकिन कखने, मतलब ... अपने खुद, लगऽ हइ, शादी के बारे इशारा कइलथिन हल ?
ख़्लिस्ताकोव - लेकिन ई ... खाली एक मिनट ... एक दिन चाचा, जे एगो धनाढ्य वृद्ध हथिन, के हियाँ; आउ दोसरे दिन वापिस ।
मेयर - अपने के सुरक्षित वापसी के आशा में हम कइसूँ अपने के रोके के हिम्मत नयँ करऽ हिअइ ।
ख़्लिस्ताकोव - हाँ, हाँ, हम तुरतम्मे वापिस अइबइ । अलविदा, हमर प्रेम ... नयँ, हम बस अभिव्यक्त नयँ कर पावऽ हिअइ ! अलविदा, प्रिये ! (ओकर हाथ चुम्मऽ हइ ।)
मेयर - अच्छऽ, अपने के रस्ता लगी कुच्छो के जरूरत हइ ? लगऽ हइ, अपने पैसा के जरूरत के बात कइलथिन हल ?
ख़्लिस्ताकोव - ओ नयँ, ई काहे लगी ? (कुछ सोचके) अच्छऽ, ठीक हइ ।
मेयर - अपने के केतना जरूरत हइ ?
ख़्लिस्ताकोव - तखने हमरा दू सो देलथिन हल, मतलब दू सो नयँ, बल्कि चार सो - हम अपने के गलती से नजायज फयदा नयँ उठावे लगी चाहऽ हिअइ - त अगर अपने के ठीक लगइ त अभियो ओतने रहे देथिन, ताकि कुल्लम आठ सो हो जाय ।
मेयर - बस अभी ! (अपन बटुआ से पैसा निकालऽ हका ।) आउ, भाग्यवश, बिलकुल नयका नोट में ।
ख़्लिस्ताकोव - ओ हाँ ! (नोट ले ले हइ आउ जाँचऽ हइ ।) बहुत अच्छा । वस्तुतः कहल जा हइ कि नयका नोट नाया खुशी लावऽ हइ ।
मेयर - जी, बिलकुल सही ।
ख़्लिस्ताकोव - अलविदा, अंतोन अंतोनोविच ! अपने के अतिथि सत्कार खातिर बहुत आभारी हिअइ । हम बिलकुल हृदय से ई स्वीकार करऽ हिअइ - हमरा कहूँ अइसन उत्तम स्वागत नयँ मिल्लल हल । अलविदा, आन्ना अंद्रेयेव्ना ! अलविदा, हमर प्रिये मारिया अंतोनोव्ना !
(सब के प्रस्थान ।)
नेपथ्य से:
ख़्लिस्ताकोव के अवाज - अलविदा, हमर आत्मा के देवदूत मारिया अंतोनोव्ना !
मेयर के अवाज - ई की ? अपने की साधारण डाकगाड़ी से यात्रा करथिन ?
ख़्लिस्ताकोव के अवाज - हाँ, हमरा अब अइसीं यात्रा करे के आदत पड़ चुकले ह । स्प्रिंग वला गाड़ी से हमर सिर दरद करऽ हइ ।
कोचवान के अवाज - ठहर ! ...
मेयर के अवाज - कम से कम बिछावे लगी दरी ले लेल जाय । हम दरी लावे के हुकुम दे दिअइ ?
ख़्लिस्ताकोव के अवाज - नयँ, काहे लगी ? ई साधारण बात हइ । लेकिन खैर, धन्यवाद, दरी देवे देल जाय ।
मेयर के अवाज - ए अवदोत्या ! स्टोर में जो, आउ सबसे निम्मन एगो दरी लेके आव - नीला वला, फारसी दरी । जल्दी !
कोचवान के अवाज - ठहर ! ...
मेयर के अवाज - कब अपने के वापिस आवे के आशा कइल जाय ?
ख़्लिस्ताकोव के अवाज - कल चाहे परसुन ।
ओसिप के अवाज - ओ, ई दरी हइ ? एद्धिर लाव, अइसे बिछा दे ! अब ई बगल में डाले खातिर कुछ पोवार (पुआल) ला दे ।
कोचवान के अवाज - ठहर ! ...
ओसिप के अवाज - अइकी एन्ने ! एद्धिर ! आउ ! निम्मन । बस ठीक होतइ । (दरी पर हाथ थपथपावऽ हइ ।) अब बैठथिन, उच्चकुलीन !
ख़्लिस्ताकोव के अवाज - अलविदा, अंतोन अंतोनोविच !
मेयर के अवाज - अलविदा, महामहिम !
औरत लोग के अवाज - अलविदा, इवान अलिक्सांद्रोविच !
ख़्लिस्ताकोव के अवाज - अलविदा, प्यारी माँ !
कोचवान के अवाज - चल, पहलवान !
(घोड़ागाड़ी के घंटी बज्जऽ हइ । परदा गिर जा हइ ।)

  
सूची            पिछला                     अगला

विश्वप्रसिद्ध रूसी नाटक "इंस्पेक्टर" ; अंक-4 ; दृश्य-15

दृश्य-15
(ओहे सब, आउ मेयर)
मेयर - (जल्दीबाजी में, हँफते प्रवेश) महामहिम ! हमरा बरबाद नयँ करथिन ! बरबाद नयँ करथिन !
ख़्लिस्ताकोव - की बात हइ ?
मेयर - व्यापारी सब महामहिम से शिकायत करते गेलइ । मान-सम्मान के साथ हम विश्वास देलावऽ हिअइ कि जे ओकन्हीं कहऽ हइ ओकरा में आधो सच नयँ हइ । ओकन्हीं खुद्दे लोग के धोखा देते जा हइ आउ तौल में कमती देते जा हइ । सर्जेंट के पत्नी अपने के सामने झूठ बोललइ, कि हम्मे ओकरा पर कोड़ा बरसइलिअइ । ऊ झूठ बोलऽ हइ, भगमान कसम, झूठ बोलऽ हइ । ऊ खुद के कोड़ा लगइलकइ ।
ख़्लिस्ताकोव - भाड़ में जाय सर्जेंट के घरवली - हमरा ओकरा से कुछ लेना-देना नयँ !
मेयर - नयँ विश्वास करथिन, नयँ विश्वास करथिन ! ई लोग अइसन मक्कार हइ ...ओकन्हीं पर तो एतना बड़गर बुतरुओ नयँ विश्वास करऽ हइ । ओकन्हीं के तो ई पूरा शहर जानऽ हइ कि झूठा हइ । आउ मक्कारी के बारे तो हम ई कहे के जुर्रत करऽ हिअइ कि ई सब अइसन मक्कार हइ कि जइसन ई दुनियाँ भर में नयँ होतइ ।
आन्ना अंद्रेयेव्ना - की तोहरा मालुम हको कि इवान अलिक्सांद्रोविच हमन्हीं के कइसन सम्मान देब करऽ हथिन? ऊ हमन्हीं के बेटी के हाथ माँगब करऽ हथिन ।
मेयर - की ! की ! ... तूँ होश में नयँ हकऽ, प्यारी माँ ! नराज नयँ होथिन, महामहिम - ई दिमाग से जरी कमजोर हइ, अइसने एकर मइयो हलथिन ।
ख़्लिस्ताकोव - हाँ, सच में हम हाथ माँगब करऽ हिअइ । हम प्रेमासक्त हो गेलिए ह ।
मेयर - हमरा तो विश्वास नयँ होवऽ हइ, महामहिम !
आन्ना अंद्रेयेव्ना - लेकिन जब ऊ तोहरा कह रहलथिन हँ ?
ख़्लिस्ताकोव - हम अपने साथ मजाक में नयँ बात करब करऽ हिअइ ... हम प्यार में पागल हो जा सकऽ हिअइ।
मेयर - हमरा तो विश्वास करे के हिम्मत नयँ होवऽ हइ, अइसन सम्मान के हम लायक नयँ हिअइ ।
ख़्लिस्ताकोव - लेकिन अपने अगर मारिया अंतोनोव्ना के हाथ देवे लगी सहमत नयँ होवऽ हथिन, त शैताने के मालुम कि हम की कर बैठबइ ...
मेयर - हमरा तो विश्वास नयँ होवऽ हइ । हमरा साथ महामहिम मजाक करब करऽ हथिन !
आन्ना अंद्रेयेव्ना - ओह, वास्तव में कइसन बेवकूफी हको ई ! लेकिन जब तोहरा समझा रहलथिन हँ तइयो ?
मेयर - हमरा विश्वास नयँ होब करऽ हके ।
ख़्लिस्ताकोब - हमरा दे देथिन, दे देथिन ! हम हताश व्यक्ति हिअइ, हम कुछ भी करे के फैसला कर सकऽ हिअइ - जब खुद के गोली मार लेबइ, त अपने के कोर्ट में घसीटल जइतइ ।
मेयर - ओह, हे भगमान ! हम तो, भगमान कसम, न तो आत्मा से आउ न शरीर से दोषी हिअइ । कृपया नराज नयँ होथिन ! अपने के जइसन मर्जी हइ, ओहे करथिन ! हमरा तो, सचमुच, अभी सिर में ... हमरा तो खुद्दे नयँ मालुम, कि कीऽ होब करऽ हइ । अभी तो हम अइसन बेवकूफ बन्नल हिअइ, जइसन कभियो नयँ हलिअइ।
आन्ना अंद्रेयेव्ना - अच्छऽ, त आशीर्वाद देहो !
(ख़्लिस्ताकोव आउ मारिया अंतोनोव्ना पास अइते जा हइ ।)
मेयर - दुन्नु के तो भगमान आशीर्वाद देथुन, आउ हम तो दोषी नयँ ।
(ख़्लिस्ताकोव मारिया अंतोनोव्ना के चुंबन ले हइ ।)
मेयर – (ओकन्हीं दने तक्कऽ हका ।) हे शैतान ! ई तो वास्तव में! (अपन आँख पोंछऽ हका ।) दुन्नु एक दोसरा के चुंबन ले रहला ह ! ओह भगमान, दुन्नु एक दोसरा के चुंबन ले रहला ह ! सचमुच के वागदत्त ! (खुशी से उछलते चीख पड़ऽ हका ।) ए अंतोन ! ए अंतोन ! ए मेयर ! देख, की हो रहलो ह !

  
सूची            पिछला                     अगला

Saturday, June 17, 2017

विश्वप्रसिद्ध रूसी नाटक "इंस्पेक्टर" ; अंक-4 ; दृश्य-14

दृश्य-14
(ओहे सब, आउ मारिया अंतोनोव्ना अचानक दौड़ते अंदर आवऽ हइ ।)
        मारिया अंतोनोव्ना - माय, बाऊ जी कहलथिन, कि तूँ ... (ख़्लिस्ताकोव के टेहुना के बल गिरल देखके चीख उट्ठऽ हइ ।) आह, ई हम की देखऽ हिअइ !
आन्ना अंद्रेयेव्ना - की हो गेलो ह ? काहे लगी ? कइसे ? कइसन सिरफिरा नियन लगऽ हँ ! एगो जल गेल बिलाय नियन अचानक दौड़ल अइलँऽ । तोरा कउची एतना अचरज भरल लगलउ ? तोर दिमाग में कइसन विचार अइलउ ? सचमुच, एगो तीन साल के बुतरू नियन । बिलकुल, बिलकुल, बिलकुल नयँ लगऽ हँ कि अठारह साल के लड़की हकँऽ । हमरा समझ में नयँ आवऽ हउ, कहिना तूँ आउ समझदार होमँऽ, कहिना ठीक से व्यवहार करमँऽ, एगो निम्मन से पालल-पोसल लड़की नियन; कब तूँ जानमँऽ, कि कइसे निम्मन ढंग से आउ शालीनतापूर्वक व्यवहार कइल जा हइ ।
मारिया अंतोनोव्ना - (आँख में लोर भरले) सचमुच माय, हमरा मालुम नयँ हले ...
आन्ना अंद्रेयेव्ना - तोर सिर में हमेशे कइसनो हावा के झोंका बहते रहऽ हउ । तूँ ल्यापकिन-त्यापकिन के बेटियन के उदाहरण ले हँ । ओकन्हीं दने तक्के लगी की हउ ? ओकन्हीं दने तक्के के (अर्थात् नक्कल करे के) तोरा कोय जरूरत नयँ हउ । तोरा लगी दोसर-दोसर उदाहरण हउ - तोरा सामने तोर माय हउ । अइसने उदाहरण के तोरा अनुसरण करे के चाही ।
ख़्लिस्ताकोव - (बेटी के हाथ पकड़ते) आन्ना अंद्रेयेव्ना, हमन्हीं के खुशी में बाधा नयँ बनथिन ! हमन्हीं के शाश्वत प्रेम के आशीर्वाद देथिन !
आन्ना अंद्रेयेव्ना - (अचरज से) त अपने एकरा से ? ...
ख़्लिस्ताकोव - फैसला कर लेथिन - जिनगी कि मौत ?
आन्ना अंद्रेयेव्ना - त अइकी देखहीं, बेवकूफ, त अइकी देखहीं - तोरा चलते, तोरा नियन बेवकूफ के चलते, हमन्हीं के अतिथि टेहुना के बल गिरे पर अमादा हो गेलथिन; आउ तूँ अचानक पागल नियन अंदर दौड़ल अइलहीं । त अइकी सचमुच एहे ठीक होतउ कि हम जानबूझके इनकार कर दिअउ - तूँ अइसन खुशी के लायक नयँ हकँऽ ।
मारिया अंतोनोव्ना - हम फेर अइसन नयँ करबउ माय । सचमुच हम फेर अइसन नयँ करबउ ।

  
सूची            पिछला                     अगला

विश्वप्रसिद्ध रूसी नाटक "इंस्पेक्टर" ; अंक-4 ; दृश्य-13

दृश्य-13
(ओहे सब आउ आन्ना अंद्रेयेव्ना)

आन्ना अंद्रेयेव्ना - (ख़्लिस्ताकोव के टेहुना के बल गिरल देखके) आह, ई हम की देखब करऽ हिअइ !
ख़्लिस्ताकोव - (उठते) ओह, शैतान पकड़े !
आन्ना अंद्रेयेव्ना - (बेटी के) एकर की मतलब हइ, मिस ! ई कइसन हरक्कत हइ ?
मारिया अंतोनोव्ना - हम तो माय ...
आन्ना अंद्रेयेव्ना - चल, निकस हियाँ से सीधे ! सुन्नऽ हीं - सीधे निकस, सीधे ! आउ हमर नजर के सामने आवे के साहस नयँ करिहँऽ ।
(मारिया अंतोनोव्ना लोर भरल आँख से बाहर हो जा हइ ।)
आन्ना अंद्रेयेव्ना - क्षमा करथिन, हम स्वीकार करऽ हिअइ, ई सब देखके हम आश्चर्यचकित हिअइ ...
ख़्लिस्ताकोव - (स्वगत) एहो तो बहुत लजीज हइ, बहुत निम्मन हइ । (टेहुना के बल गिर जा हइ ।) मैडम, अपने देखऽ हथिन, हम प्रेम में जल्लल जाब करऽ हिअइ ।
आन्ना अंद्रेयेव्ना - अपने टेहुना के बल ? आह, उठ जाथिन, उठ जाथिन ! हियाँ परी फर्श बिलकुल गंदा हइ ।
ख़्लिस्ताकोव - नयँ, टेहुना के बल, पक्का टेहुना के बल ! हम जाने लगी चाहऽ हूँ कि हमर भाग्य में की लिक्खल हके - जीवन कि मृत्यु ।
आन्ना अंद्रेयेव्ना - लेकिन क्षमा करथिन, हमरा अभियो अपने के शब्द के अर्थ नयँ समझ में आ रहल ह । अगर हमरा कोय गलतफहमी नयँ हइ, त अपने हमर बेटी के संबंध में कोय घोषणा कर रहलथिन हँ ?
ख़्लिस्ताकोव - नयँ, हमरा अपने के साथ प्रेम हो गेले ह । हमर जिनगी तो एगो केश से लटकल हइ । अगर अपने हमर शाश्वत प्रेम के प्रतिदान नयँ करथिन, त हम पृथ्वी पर जीए के लायक नयँ रहबइ । छाती में ज्वाला के साथ हम अपने के हाथ माँगऽ हिअइ ।
आन्ना अंद्रेयेव्ना - लेकिन हमरा ई बतावे के अनुमति देथिन कि एक प्रकार से ... हम विवाहित हिअइ ।
ख़्लिस्ताकोव - एकरा से कुछ हरज नयँ ! प्रेम लगी कोय अंतर नयँ पड़ऽ हइ; आउ करमज़ीन कहलथिन हल - "कानून निंदा करऽ हइ" [26] । हमन्हीं दूर के कोय झरना के छाया में भाग चलते चलबइ ... अपने के हाथ, हाथ माँगऽ हिअइ!

सूची            पिछला                     अगला