विजेट आपके ब्लॉग पर

Friday, January 17, 2020

भूदासत्व से मुक्ति तक - अध्याय 2

अध्याय-2. हमर माता-पिता
हमर पिताजी के बचपन के पहिलौका साल के कुछ जानकारी हमरा तक पहुँचलइ। जब ऊ एगारह या बारह साल के हलथिन, त अलिक्सेयेव्का में काउंट शेरेमेतेव के एगो बराहिल (ऐजेंट) पहुँचलइ, गिरजाघर में गायक मंडली खातिर लड़कन के चयन लगी। पिताजी के उच्च स्वर (treble, descant, soprano voice) बहुत निम्मन हलइ, आउ उनका मास्को [*5] भेज देल गेलइ, काउंट के गिरजाघर के गायक मंडली (choir) में प्रवेश खातिर, जे तखनियों अपन कलाकारी लगी प्रसिद्ध हलइ।
ऊ जमाना के काउंट शेरेमेतेव, निकोलाय पित्रोविच, शानदार आउ ठाट-बाट के जिनगी जीयऽ हलइ, साम्राज्ञी एकातेरिना II के शासनकाल में एगो वास्तविक विशिष्ट व्यक्ति नियन। ऊ खाली एतने के योग्य हलइ। ई प्रसिद्ध युग के एक्को महत्त्वपूर्ण घटना में ओकर नाम नञ् मिल्लऽ हइ। समकालिक लोग के स्मृति में खाली एक भव्य उत्सव रह गेलइ, जे मास्को के उपनगरीय क्षेत्र में अवस्थित एगो पैतृक जागीर में ऊ दरबार खातिर आयोजित कइलके हल, जब ई (दरबार) मास्को में भेंट देलके हल। ऊ चीफ़-चैम्बरलेन (chief chamberlain, मुख्य शाही गृह-प्रबंधक) हलइ, लेकिन जे ओकरा न तो नैतिक आउ न बौद्धिक महत्त्व देलकइ - ऊ हमेशे खाली एगो शानदार आउ नगण्य दरबारी रहलइ। अपन जागीरदार (vassals) लोग के बीच ऊ एगो बरबाद आउ मनमौजी निरंकुश मालिक हलइ, स्वभाव से क्रूर तो नञ्, लेकिन अपन धन-दौलत से अत्यधिक भ्रष्ट। ऐशो-आराम में डुब्बल, ऊ कइसनो कानून नञ् जानऽ हलइ, सिवाय अपन सनक के। अतितृप्ति, आखिर, ओकरा हियाँ तक पहुँचा देलकइ कि ऊ खुद से नफरत करे लगलइ आउ खुद लगी ओइसने भार बन गेलइ, जइसन ऊ दोसरा लगी हलइ। ओकर विशाल धन-दौलत में एक्को चीज अइसन नञ् हलइ, जे ओकरा खुशी दे सकऽ हलइ। सब कुछ ओकर मन में खाली नफरत पैदा करऽ हलइ - महँगा भोजन, पेय, कला के वस्तु, अनगिनत नौकर-चाकर के चाटुकारिता, जे आतुर रहऽ हलइ ओकर इच्छा के आभास लगी - कि कहीं आउ कुछ तो उनका (मालिक के) नञ् चाही। आउ आखिर में, प्रकृति ओकरा अपन सबसे बहुमूल्य वरदान (आशीर्वाद) से वंचित कर देलके हल, नीन, जेकरा लगी, जइसन कि ऊ खुद्दे कहऽ हलइ, ऊ करोड़ो देवे लगी तैयार हलइ, हियाँ तक कि अपन समुच्चे जागीर के आधा भी।
अपन मौत के पाँच या छो साल पहिले ऊ एगो लड़की के प्यार में पड़ गेलइ, जे ओकर खुद के घरेलू थियेटर के अभिनेत्री हलइ, जे हलाँकि ओतना विशेष सुन्दर तो नञ् हलइ, तइयो एतना चलाँक हलइ कि ओकरा खुद से शादी करे लगी बाध्य करे में सफल हो गेलइ। कहल जा हइ कि ऊ बहुत दयालु भी हलइ आउ ऊ खाली ई दयनीय पागल के शांत आउ नियंत्रित कर सकऽ हलइ, जे खुद के कइएक हजार आत्मा के मालिक समझऽ हलइ, लेकिन खुद सँभार नञ् पावऽ हलइ। पत्नी के मौत पर, शायद, पूरा पागल हो गेलइ, कहूँ बाहर नञ् निकसऽ हलइ आउ परिचित लोग में से केकरो से नञ् मिल्लऽ हलइ। ओकरा बाद ओकर एगो बहुत कम उमर के बेटा रह गेलइ, काउंट द्मित्री (Dmitry)। एकर लालन-पालन में सक्रिय भाग लेलथिन त्सारिना  मारिया फ़्योदोरोव्ना।[1] लेकिन प्रकृति, दोसर मामले में ओकरा प्रति उदार रहलो पर, ओकरा विशेष योग्यता से वंचित कर देलकइ, आउ ओकरा बारे सब तरह के ध्यान देल गेला पर भी, ऊ न तो अपन अध्ययन में आउ न सामान्य विकास में आगू बढ़ पइलइ।


ई तरह से हमर पिताजी गिरजाघर के गायक मंडली (choir) में भरती हो गेलथिन (जब ज्येष्ठ शेरेमेतेव उनकर मालिक हलइ)। ई गिरजाघर (chapel) में एगो स्कूल हलइ, जाहाँ परी, संगीत के अलावे, अल्पवयस्क गायक लोग के पढ़े-लिक्खे लगी सिखावल जा हलइ। पिताजी असाधारण प्रतिभा प्रदर्शित कइलथिन ऊ सब चीज में, जे उनका पढ़ावल गेलइ। स्कूल आउ गायन के अतिरिक्त समय में ऊ बहुत पढ़ऽ हलथिन आउ विभिन्न तरह के ज्ञान अर्जित कइलथिन, अपन हैसियत से बहुत उँचगर। एकरा अलावे ऊ फ्रेंच भी सिखलथिन। उनका सब कोय मानऽ हलइ, नञ् खाली बुद्धि आउ प्रतिभा के कारण, बल्कि उदारता, सजीव आउ मनोहर आचरण के कारण भी। जल्दीए ऊ अपन साथी लोग के बीच प्रथम हो गेलथिन आउ काउंट शेरेमेतेव के जानकारी में भी आ गेलथिन।
भावपूर्ण आवेश में आउ कृतज्ञतापूर्वक बाद में ध्यान आउ दुलार लगी ऊ आद करऽ हलथिन, जे उनका प्रसिद्ध आउ अभागल देग्त्यारेव्सकी दे हलइ, [*6] जे कुछ समय बाद मर गेलइ, अत्यन्त कष्ट में, जेकरा कोय न तो समझलकइ आउ न बँटलकइ। ऊ पृथ्वी पर के अइसन भयंकर परिस्थिति के एगो शिकार हलइ, जब प्राकृतिक वरदान आउ आत्मिक श्रेष्ठता कोय व्यक्ति के भाग्य में मानुँ खाली उपहास आउ अपयश लगी मिल्लऽ हइ। प्रतिभा आउ दासता देग्त्यारेव्स्की के बरबाद कर देलकइ। ऊ पैदा होले हल कला के प्रति दृढ़ प्रवृत्ति के साथ - ऊ जन्मजात संगीतकार हलइ। ओकर असाधारण प्रतिभा जल्दीए विशेषज्ञ लोग के ध्यान ओकरा दने आकृष्ट कइलकइ, आउ ओकर मालिक, काउंट शेरेमेतेव, ओकर शिक्षा-दीक्षा के खरचा-बरचा देलकइ।  उत्तम शिक्षक लोग देग्त्यारेव्स्की के संगीत सिखइलकइ। आउ बेहतर प्रशिक्षण खातिर ओकरा इटली भेजल गेलइ। ओकर संगीत के रचना हुआँ परी ओकरा बहुत प्रसिद्धि देलकइ। लेकिन, पितृभूमि में लौटला पर, ओकरा कठोर जालिम से पाला पड़लइ, जे प्रति व्यक्ति कर (per capita tax) लगी कइल गेल संशोधित जनगणना के अनुसार प्रतिभाशाली व्यक्ति के आत्मा पर कानूनी अधिकार जताके, बिन कोय शर्त के ओकर रचनात्मक प्रतिभा के भी हथियाऽ लेवे लगी चहलकइ - ऊ ओकरा पर अपन लौह हस्त (iron hand) डाल देलकइ (अर्थात् काउंट अपन दास-संगीतज्ञ पर बहुत कड़ाई से पेश आवे लगलइ)।
देग्त्यारेव्सकी कइएक सुन्दर नाटक लिखलकइ, मुख्य रूप से आध्यात्मिक गायन खातिर। ऊ सोचऽ हलइ कि एकरा से ओकरा स्वतंत्रता मिल जइतइ। ऊ तरसऽ हलइ, ऊ खाली स्वतंत्रता लगी निवेदन करऽ हलइ, लेकिन ई नञ् मिलला से, शराब में अपन दुख के भुलावा खोजे लगलइ। ऊ बहुत पीअइ आउ अकसर, ओकरा अपमानजनक दंड देल जाय, फेर से पीअइ। आउ आखिर मर गेलइ, जब ऊ सामूहिक गायन खातिर हृदयस्पर्शी प्रार्थना लिख रहले हल। ओकर रचनावली में से कुछ तो चर्च संगीत के प्रेमी के बीच अभियो तक प्रसिद्ध हइ।
ई दौरान हमर पिताजी के गला के अवाज बदल गेलइ। ऊ सतरह बरिस के हो गेलथिन हल, जब काउंट के प्रशासनिक प्रथा के अनुसार, उनका एक जागीर में क्लर्क के काम खातिर भेज देवे के निर्णय कइल गेलइ। उनका उनकर मातृभूमि भेजल गेलइ, आउ चूँकि योग्यता आउ आचरण के अनुसार उनका उत्कृष्ट लोग में गिनल जा हलइ, ओहे से उनकर उमर कम होवे के बावजूद, उनका अलिक्सेयेव्का में हेड क्लर्क के मुख्य पद देल गेलइ।
अलिक्सेयेव्का एगो बड़गो आउ घना अबादी वला बस्ती हलइ। हुआँ लगभग सात हजार लोग रहऽ हलइ।
एकरा अलावे, लगभग नब्बे विभिन्न छोट्टे-बड़गो गाम एकर हिस्सा मानल जा हलइ, जेकरा से कुल अबादी बढ़के बीस हजार से कुछ जादहीं हो जा हलइ। ई बस्ती में दोहरा प्रशासन हलइ। कुछ के नियुक्ति काउंट द्वारा कइल जा हलइ, अर्थात् - प्रबन्धक (मैनेजर), हेड क्लर्क आउ मुखतार (एटॉर्नी)। बाकी ओब्षिना (कम्यून) द्वारा निर्वाचित होवऽ हलइ जेकरा अतऽमान कहल जा हलइ। ई दुन्नु समूह के समुच्चे स्टाफ, तथाकथित वोतचिना प्रशासन, अथवा ज़ेम्स्की या ज़ेम्स्त्वो (Zemstvo), के स्टाफ होवऽ हलइ, जेकरा में हेड क्लर्क, सब तरह के मामला के हाकिम रहऽ हलइ। आखिर में, एगो आउ प्राधिकारी वर्ग होवऽ हलइ - कम्यून असेंबली, जेकरा रूसी में मीर (Mir), वेचे (Veche) अथवा लघु रूसी (Little Russian, White Russian, or Ukrainian) में ग्रोमादा (Gromada, Assembly) कहल जा हलइ। एकर जिम्मेदारी रहऽ हलइ समुच्चे वोतचिना  के कल्याण आउ व्यवस्था से संबंधित समस्या पर निर्णय करना - वित्तीय मामला, मिलिट्री सेवा में रंगरूट के भरती आदि।
अइसन कार्य खातिर प्रशासन स्थापित कइल हलइ, लेकिन व्यवहार में ई दोसरे तरह के हलइ। सब तरह के प्रशासनिक शक्ति काउंट के बराहिल (ऐजेंट या प्रबन्धक, steward) के हाथ में केन्द्रित हलइ, आउ सामाजिक झरना आउ वस्तु सब के चलावे वला शक्ति हलइ धनी निवासी, तथाकथित मिषाने (मध्यमवर्गीय लोग)  के हाथ में। ई मिषाने लोग मुख्य रूप से व्यापारी हलइ, आउ ओकन्हीं में से कइएक लोग के पास बहुत पैसा हलइ, दू लाख या एकरो से जादे रूबल। ओकन्हीं के व्यापार के वस्तु हलइ अनाज, चर्बी आउ चमड़ा। ओकन्हीं के स्वभाव [*7] निम्मन नञ् होवऽ हलइ। ई सब पतित लघु रूसी लोग हलइ, चाहे, जइसन कि ओकन्हीं के व्यंग्य में कहल जा हलइ, पिरिव्योर्तकी (पूर्णतः बदलल, कायापलट होल), जे मस्काल[2] लोग से खाली बुराई अपनइलके हल। अपन धन से फुल्लल, ओकन्हीं खुद से निच्चे के लोग, अर्थात् खुद के अपेक्षा जादे गरीब लोग, के घृणा करऽ हलइ, बहुत जादे ठगी के काम करऽ हलइ आउ अपन समृद्धि लगी ठगी के ऋणी हलइ। ओकन्हीं ठाट-बाट के जिनगी जीयऽ हलइ, शहरी लोग के नकल करे के प्रयास करते, भव्य झुपान[3] धारण करऽ हलइ, लघु रूसी आउ रूसी कट के मिश्रण करके; अकसर शराब के महफिल आयोजित करऽ हलइ, अपन घर के अलंकृत करऽ हलइ, लेकिन फीका होवऽ हलइ। ओकन्हीं के पत्नी आउ बेटी धारण करऽ हलइ हद से जादे फैशनदार महीन कपड़ा के कुन्तूश[4], स्वर्ण के कशीदाकारी कइल ओचिपोक (टोपी), बाह्यवस्त्र के रूप में घंघरा, विशेष करके नमिस्तो (हार, कंठहार), जे बेशकीमती बड़गर मूँगा (प्रवाल) के साथ चानी आउ सोना के क्रॉस आउ अशरफ़ी (ducats) से जइसे-तइसे मिश्रित रहऽ हलइ।
वास्तविक लघु रूसी ढंग के आदमी, रिवाज, प्रथा आउ रहे-सहे के तरीका लगभग खास करके (अलिक्सेयेव्का के बाहर) फार्म में पावल जा हलइ। हुआँ परी रीति-रिवाज के वास्तविक होमरी [Homeric, अर्थात् आदिम] सरलता देखल जा सकऽ हलइ - नेकदिली, ईमानदारी आउ निःस्वार्थ आतिथ्य, जेकरा लगी लघु रूसी लोग हमेशे से प्रसिद्ध रहले ह। चोरी, धोखा, मास्को के साहस, मक्कारी - ई सब ओकन्हीं लगी अनसुन्नल चीज हलइ। मस्काल, ओकन्हीं के समझ के मोताबिक, खुद में ई सब विशेषता एगो गारी वला शब्द हलइ।
ई सब देहाती कृषक, अपन पितृसत्तात्मक (patriarchal) सरलता में, सभ्य समाज के बुराई से अनजान, अपन माँग में संतुलित (moderate) ,  संसार में बहुत निम्मन जमीन के मालिक होल आउ जमींदार के छोटगर ओब्रोक (कर, टैक्स) देके, बिलकुल खुशहाल जिनगी जीते हल, अगर ओकन्हीं के धनी मिषाने अर्थात् मध्यवर्गीय लोग नञ् दबइते हल। दुर्भाग्यवश, हियों परी, जइसन कि अकसर होवऽ हइ, धन-दौलत के मतलब शक्ति हलइ, जे कुछ लोग लगी दोसरा के सतावे खातिर काम आवऽ हलइ। मिषाने कइएक तरह से कृषक लोग के अपमानित करऽ हलइ - ओकन्हीं कभी अपन शक्ति से कृषक लोग के अधीन करे के प्रयास करऽ हलइ, त कभी ओकन्हीं के उपजाऊ जमीन के प्लॉट चाहे जंगल हथियाऽ ले हलइ, त कभी सामाजिक भार ओकन्हीं पर थोप दे हलइ, जेकरा खुद्दे नञ् ढोवे लगी चाहऽ हलइ। ई सब कुछ बिना सजा के होवऽ हलइ। काउंट के बराहिल सब खाली एहे सोचऽ हलइ कि कइसे जादे से जादे पैसा बनामूँ, आउ लोग में से निर्वाचित सब, यानी ग्रोमादा (कम्यून असेंबली) में ओहे मिषाने में से रहऽ हलइ, जे ग्रोमादा में चुनाव आउ वोट दुन्नु के व्यवस्था करऽ हलइ।
बस्ती में एगो आउ विशेष आउ बहुसंख्यक वर्ग के लोग रहऽ हलइ - शिल्पकार वर्ग - दर्जी, मोची, पीपा या बैरेल बनावे वला (coopers), लोहार इत्यादि। ओकन्हीं अब खेती नञ् करऽ हलइ, लेकिन अपन बनावल सामान के गाम आउ शहर के मेला में सप्लाई करऽ हलइ। ई सब औद्योगिक भ्रमण के दौरान ओकन्हीं के मस्काल लोग से पाला पड़ जा हलइ, ओकन्हीं मस्काल लोग के निडरता से संक्रमित हो गेते गेलइ आउ अधिकतर एक नम्बर के धूर्त बन गेलइ।
त अइसन हलइ समाज जेकर बीच रहके काम करे लगी पिताजी के पहिले तुरी बोलावल गेलइ। ध अलिक्सेयेव्का, शायद, सन् 1800 या 1801 में पहुँचलथिन। उनका तखने अभी-अभी अठारह बरिस के उमर होले हल। मिषाने उनकर दुर्भावपूर्ण स्वागत कइलकइ। अल्पवयस्कता के कारण उनका ओकन्हीं घृणा करऽ हलइ आउ उनका ओबषिना (कम्यून) के प्रशासन में भाग लेवे के योग्य नञ् समझऽ हलइ। लेकिन ओकन्हीं जल्दीए शांत हो गेलइ, ई समझके, कि ओकन्हीं लगी ओकरा में एगो नम्र औजार मिल जइतइ। लेकिन पिताजी के दिमाग में आउ कुछ हलइ। प्रतिभा के साथ-साथ प्रकृति उनका उत्साही, परोपकारी आउ भावुक हृदय देलके हल। [*8] ऊ अइसन व्यक्तित्व में से एक हलथिन, जेकन्हीं के सारी जिनगी अपन चारो तरफ के अव्यवस्था से संघर्ष करे आउ अन्त में एकर शिकार होवे के भाग्य में बद्दल रहऽ हइ। जइसन कि हम पहिलहीं ल्लेख कइलिअइ, ऊ बहुत कुछ स्वाध्याय से शिक्षा प्राप्त कइलथिन, लेकिन दुर्भाग्यवश, बौद्धिक आउ नैतिक रूप से ऊ लोग से बिलकुल अलग हलथिन, जेकन्हीं साथ उनका रहे पड़लइ आउ जेकन्हीं पर उनका निर्भर रहे पड़लइ। उनकर शिक्षा अनियमित हलइ, बिन कोय सिस्टम के आउ उनकर पेशा से मोसकिल से संबंधित। व्यावहारिक अर्थ से वंचित, ई खाली उनकर कल्पना के प्रज्वलित करऽ हलइ, सिर के विचार से भर दे हलइ, जे आसपास के वास्तविकता से मेल नञ् खा हलइ, आउ ओहे से, जे गर्त आउ गंदगी से उनका गुजरे के भाग्य में बद्दल हलइ ओकरा में ऊ मार्गदर्शन नञ् कर पइलकइ। उनकर शिक्षा उत्तम आउ अप्रत्याशित, लेकिन उनकर भाग्य के हानिकारक वरीयता (advantage) हलइ।
हमर पिताजी के अपन परिस्थिति के समझ बिलकुल नञ् हलइ। हियाँ तक कि देग्त्यारेव्स्की के उदाहरण से भी ऊ कुछ नञ् सीख पइलथिन। ऊ खाली इतिहास आउ उपन्यास के हीरो से परिचित हलथिन, आउ अपन जगत् के जीवन आउ कार्यकर्ता से नञ्। ऊ महत्त्व दे हलथिन खाली ओकरा, जे या तो वास्तविकता के उँचगर क्षेत्र में पावल जा हलइ, चाहे ओकरा प्रति अपन काल्पनिक आउ विचित्र पूरक में। अपन जिनगी के पहिलहीं कदम से ओइसन वीरता के भूत के गले लगावे लगी लपकलथिन, जेकर नामो नञ् खाली काउंट के वोतचिना (पैतृक जागीर) में अनजान हलइ, बल्कि रूसी जमीन के दोसर, बहुत अधिक आदरणीय स्थान में भी। अपन पदभार ग्रहण कइला पर, उनका तुरतम पक्का विश्वास हो गेलइ कि पाशविक बल (brute force) आउ धन, न कि मानवता आउ न्याय, लोग के मामला आउ किस्मत के फैसला करऽ हइ। तखने ऊ कल्पना कइलथिन कि विधाता उनका अपन मातृभूमि के नयका सामाजिक व्यवस्था लगी चुनलके ह, विशेष सुविधा प्राप्त (privileged) आउ निर्धन लोग के बीच संतुलन स्थापित करे लगी आउ अइसन व्यवस्था स्थापित करे लगी, जेकरा में निर्धन लोग हमेशे विशेष सुविधा प्राप्त लोग के सनक आउ स्वेच्छाचार के विरुद्ध खुद के सुरक्षा कर पावइ, अर्थात् ऊ अइसन काम हाथ में लेलथिन, जेकरा संसार में केकरो निपटावे में सफलता नञ् मिलले हल। ई विचार उनकर दिमाग में अइसन हावी हो गेलइ कि ऊ कइसनो तरह के सावधानी आउ बुराई से संघर्ष करे खातिर संसाधन के अपर्याप्ति के बारे भूल गेलथिन। 
काउंट के गुप्त ऐजेंट होवे के आशंका से धनी मिषाने लोग तो शुरू में उदास हो गेते गेलइ, लेकिन जल्दीए ई देखके ओकन्हीं के बेचैनी दूर हो गेलइ कि कइसूँ ओकन्हीं के तो गरममिजाज आउ अनुभवहीन लड़का से पाला पड़ले ह, जेकरा सँभारना असान होतइ - खाली ओकर उत्साह के जरी उग्र होवे देल जाय के चाही आउ धीरज धरके उचित अवसर के प्रतीक्षा करे के चाही। शुरुआत में स्थानीय अभिजात लोग (aristocrats) तइयो ई अवांछनीय सुधारक के दोसर शांतिपूर्ण तरीका से नियंत्रित करे के बारे आशान्वित हलइ। ओकन्हीं अपन बिरादरी में से केकरो से ओकर विवाह कर देवे लगी चहलकइ, ताकि ओकरा रिश्तेदारी आउ पारिवारिक मामला में उलझाके ओकरा अधिक दबैल बना देल जाय। लेकिन हियों परी पिताजी ई सब के विरोध कइलथिन। वस्तुतः ऊ विवाह करे में जल्दी कइलथिन, लेकिन अपन मन मोताबिक, दोसर के नञ्।
ई घटना अइसे घटलइ। एक दिन साँझ के ऊ सोस्ना नदी पर के पुल पर से गुजर रहलथिन हल। गाय-भेड़ के झुंड रात लगी चारागाह से वापिस आब करऽ हलइ। हमेशे नियन, गाम से औरतियन के एगो भीड़ ओकरा दने उमड़ पड़लइ जेकरा बीच एगो नवयुवती हलइ। ओकर मनोहर सूरत आउ सरल आकृति पिताजी के ध्यान आकृष्ट कइलकइ। अपन दोस्त से ओकर नाम पता कइलथिन आउ जनलथिन कि ऊ एगो सामान्य हैसियत के एगो दर्जी के बेटी हइ, जे भेड़ के खाल के कोट [*9] बनावऽ हइ आउ ओकर नाम याग्न्यूक हइ। पिताजी के भाग्य के निर्णय हो गेलइ - ऊ लड़की के मनोहारी चेहरा उनका पर पूरा तरह से हावी हो गेलइ। तीन दिन के बाद ऊ ओकर माता-पिता के बतइलथिन कि ऊ ओकरा से शादी करे लगी चाहऽ हथिन। हमर मम्मा (दादी) तो हक्का-बक्का रह गेलइ, जब ऊ जनलकइ कि ओकर बेटा के चुन्नल लड़की कोय धनगर मध्यवर्गीय के बेटी नञ् हइ, बल्कि एगो गरीब साधारण दर्जी के बेटी हइ। बस्ती में पिताजी एगो बड़गो हस्ती हलथिन, पहिला, अपन प्रशासनिक पद के कारण, आउ दोसर, अपन प्रतिभा के कारण। मास्को के शिक्षा उनका एगो वास्तविक कुलीन (gentleman) बना देलके हल। ई सब कुछ उनकर माय के उनकर विवाह लगी बहुत अधिक लाभप्रद गणना के एगो आधार देलकइ। दुलहन खातिर ऊ आशा कइलके हल कि बस्ती के प्रथम श्रेणी के कउनो धनी के बेटी होत। नवयुवक के बेमेल विवाह से विचलित करे लगी यथासंभव हर तरह के मदद लेल गेलइ - तर्क, विनती, नसीहत। लेकिन सब व्यर्थ। रोमांचक भेंट, लड़की के सौन्दर्य, आउ खास ओकर गरीबी पिताजी के अपन निर्णय पर दृढ़ रहे लगी बाध्य कर देलकइ। लेकिन ऊ अपन निर्णय में भी (लघु रूसी के) रीति-रिवाज के अनुसरण नञ् कइलथिन। दुलहिन के माता-पिता के पास घटक (बरेखिया, matchmakers) भेजे के बदले, ऊ खुद्दे उनका हीं हाजिर होलथिन। उनकन्हीं पुरनका विचार के लघु रूसी हलथिन, जेकन्हीं में अभियो पहिलौका यूक्रेनियन के भावना नञ् मरले हल। ईमानदार आउ नेकदिल उनकन्हीं में मध्यवर्गीय आउ शिल्पकार वर्ग के पतित जगत् से कुच्छो समानता नञ् हलइ। उनकन्हीं के मुख्य पेशा खेती करना हलइ, लेकिन हमर नाना युवावस्था में भेड़ के खाल के कोट सीये लगी सीख लेलथिन आउ अभियो दर्जी के रूप में कुछ अतिरिक्त कमा ले हलथिन। उनकर परिवार के ई तरह से कोय खास कमी के अनुभव नञ् होवऽ हलइ।
उनकन्हीं सोस्ना नदी के किनारे, एगो छोटगर, छप्पर डालल, लेकिन पुताई कइल (whitewashed) झोपड़ी में रहऽ हलथिन, जेकर पिछुआनी में, ठीक नद्दी भिर ढालू पर, शाक वाटिका (kitchen garden) में पतगोबी, मटर, चुकंदर, मकई आउ कइएक तरह के फूल के क्यारी हलइ। हियाँ परी गुलाबी रंग के शानदार कार्नेशन फूल आउ विशाल सूरजमुखी शोभऽ हलइ, कइएक रंग के खसखस रंग बिखेरऽ हलइ, कनूपर[5] सुगंध बिखेरऽ हलइ, दरी पर नियन फैलल हलइ गेंदा, ब्लूबेल[6], ज़िन्ज़िवर आउ - कब्र के सजावट - कॉर्नफ़्लावर। बाद में हमर आक्रमण से ई शाक वाटिका के बड़गो बरबादी किस्मत में बद्दल हलइ, खास करके ऊ हिस्सा में, जाहाँ परी मिठगर मटर लचीला आउ लमगर पुंकेसर (stamens) के चारो तरफ लहरा रहले हल। नदी के पार, शाक वाटिका के ठीक सामने, चेरी के बाग हलइ - हमर नानी के स्वर्ग, जब ऊ अल्पवयस्क हलइ, बाद में ओकर बेटियन के, आउ अन्त में हमरो। हुआँ परी झमेठगर सेब, चेरी आउ नाशपाती के पेड़ हलइ, जे गरमी आउ शरद् ऋतु में फल से लद्दल रहऽ हलइ - हमर बचपन के आनन्द। लेकिन एकरा बारे बाद में।
वृद्ध माता-पिता तो हक्का-बक्का हो गेलथिन, जब जनलथिन, कि काहे लगी उनकन्हीं भिर एगो प्रसिद्ध अतिथि, हेड क्लर्क - हमर भावी पिता - अइलथिन हँ। "अइसन कइसे हो सकऽ ह", बूढ़ी माय बोललइ, "कि हमर कात्र्या तोर पत्नी होतो? ई तोर कइसन जोड़ी होतो? हम सब गरीब आउ सीधा-सादा लोग, आउ तूँ तो पढ़ल-लिक्खल, कुलीन, आउ ओकरो में एतना सुन्दर। कात्र्या के तो कुछ नञ् हइ, सिवाय कुछ स्कर्ट, समीज, आउ सिर पर के दुपट्टा के।"
हमर पिताजी तो ई बात पर एगो कइसनो आवेशपूर्ण भाषण झाड़ देलथिन, जे बूढ़ी के, जाहिर हइ, कुछ नञ् समझ में अइलइ। लेकिन आखिर में कात्र्या के बोलावे के फैसला कइल गेलइ आउ ओकरा पुच्छल गेलइ कि कीऽ ओकरा हेड क्लर्क, वसीली मिख़ाइलोविच, से शादी करना मंजूर हइ। हक्का-बक्का होल लड़किया, काँपते आउ लजइते, उत्तर देलकइ कि जइसन माता-पिता औडर देथिन ओइसीं करतइ।
[*10] तीन सप्ताह बाद विवाह सम्पन्न होलइ - जे दुलहा के माय खातिर गुप्त रूप से नराजगी के कारण होलइ आउ जेकरा से अलिक्सेयेव्का के अभिजात वर्ग अचरज होलइ, जे तखने से आखिर बहिष्कृत के घृणा करे लगलइ आउ उनका बरबाद करे लगी अपन इरादा में आउ दृढ़ हो गेलइ। हमरा अपन माय के शब्दचित्र खींचना (sketch a portrait) एगो कठिन कार्य हइ, किंवदन्ती से हमरा तक आवल ओकर नवयौवन के कहानी से ओकरा जोड़के, जे ओकर आउ अधिक प्रौढ़ावस्था से हमर खुद के स्मृति में अंकित रह गेले ह। ऊ अपन आप में एगो असाधारण व्यक्तित्व हलइ। जिनगी ओकरा तकलीफ के अलावे आउ कुछ नञ् देलकइ, लेकिन ऊ असाधारण गौरव के साथ अपन दुखद रास्ता तय कइलकइ आउ एगो सत्यनिष्ठ महिला के प्रभा मंडल (halo) के साथ कब्र तक गेलइ।
अपन नवयौवन में ऊ एगो सुन्दरी के रूप में जानल जा हलइ, आउ हमरो स्मृति में ओइसने चित्र अभियो तक प्रकट होवऽ हइ। ओकर सूक्ष्म, सुघड़ नाक-नक्शा अनन्त नम्रता अभिव्यक्त करऽ हलइ, आउ समय के साथ ओकर व्यवहार विशेष मनोहरता आउ तेजस्विता प्राप्त करते गेलइ। ऊ औसत से अधिक उँचगर आउ छरहरा बदन के हलइ। कार केश के कोमल लट ओकर उँचगर निरार के चारो तरफ आच्छादित हलइ। लेकिन सबसे उत्तम ओकर गहरा भूरा रंग के आँख हलइ - ओकरा में बहुत कोमलता आउ दया चमकऽ हलइ। जे कोय ओकरा देखऽ हलइ, ऊ निश्चित रूप से ओकरा प्रति प्रेम आउ आदर अनुभव करऽ हलइ। बिन कोय शिक्षा-दीक्षा के, ऊ अइसन निम्मन योग्यता वली हलइ जेकरा से एगो औरत दोसर अधिक परिष्कृत सामाजिक वर्ग के प्रथा, रीति-रिवाज आउ विचारधारा में खुद के ढाल ले हइ। हमर पिताजी बौद्धिक विकास में ओकरा से उपरे हलथिन। ऊ ई बात के समझऽ हलइ आउ ऊ उनका सामने श्रद्धा से झुक जा हलइ, हमेशे मन से उनकर विचार में प्रवेश करके ओकरा से सहमत हो जा हलइ, अगर रोमांचक आवेश आउ उनकर सनक के खेल से नञ्, त उनकर उच्च आकांक्षा से, जे उनकर चरित्र के बुनियाद में हलइ। ओकर प्राकृतिक बुद्धि असीम हलइ, जे समय के साथ विकसित आउ दृढ़ होवे में विफल नञ् होलइ। ई बुद्धि हलइ आश्चर्यजनक रूप से विश्वसनीय आउ सन्तुलित, बिन लेशमात्र के अहंकार के आउ बिन कोय नखरेबाजी के कुशाग्र। एकरा में ओकरा हमेशे स्थायी आधार मिल्लऽ हलइ हुआँ परी, जाहाँ ओकर पति के अधिक साहसी, लेकिन कमती लचीला बुद्धि लगी असानी से गोड़ के निच्चे से जमीन घिसके लगऽ हलइ।
ऊ सब घटना, जेकरा से हमर पिताजी के जिनगी भरल हलइ, वास्तविक लहर नियन, जब न तब उनकर नाजुक नाव के एक किनारा से दोसरा दने उछाल दे हलइ। ऊ भाग्य के एगो अत्यन्त विचित्र खिलौना हलथिन, अइसन भाग्य जे अन्तर्विरोध आउ कटु निराशा से भरल हलइ। एक तरफ तो मानुँ ऊ अपन स्वतंत्र आउ प्रतिष्ठापूर्ण पद के लाभ आउ विशेषाधिकार के उपयोग करऽ हलथिन, त दोसरा तरफ एगो कीड़ा नियन कुचल देल जा सकऽ हलथिन। हलाँकि विशाल बुद्धि आउ प्रतिभा के आधार पर, आउ ऊ गौरव के आधार पर, जेकरा से अपन मानवीय सम्मान के रक्षा करऽ हलथिन, भूमिका के आधार पर, जे उनका अपन जिनगी में अदा करे पड़ले हल, ऊ एगो दयनीय अभिनेता हलथिन। लोग के साथ संपर्क या मेल-जोल में कम अन्तर्विरोध नञ् हलइ - संयोग लगातार उनका अइसन लोग के संपर्क में लइलकइ, जे सामाजिक हैसियत आउ औपचारिक शिक्षा में उनका से बहुत ऊपर हलथिन। लेकिन उनकन्हीं उनका साथ नञ् खाली मन से बराबर के दर्जा के रूप में व्यवहार कइलथिन, बल्कि उनकन्हीं में से कइएक उनकर नगीची दोस्त भी हो गेलथिन। हमरा पास पिताजी के पत्राचार के कुछ भाग हइ, जे ई सब व्यक्तित्व के इनका प्रति आदर आउ सहानुभूति प्रमाणित करऽ हइ।
त अइसन वातावरण में हमर माय प्रवेश कइलकइ, ओकरा लगी खाली उत्तम हृदय, अप्रबुद्ध, लेकिन [*11] स्वस्थ बुद्धि आउ स्त्रीसुलभ स्वाभाविक प्रवृत्ति (female instinct)। ऊ अपन अनजान माहौल में खुद के ढाले में आउ असाधारण परिस्थिति के माँग सहित अपन स्त्री वर्ग के जिमेवारी के कठोर अनुपालन में मेल बैठावे में सफल हो गेलइ। हमेशे रसोई घर में, चरखा के पीछू, सूई के पीछू, ऊ एगो उत्साही कर्मी, रसोइया, दर्जिन, आउ अपन बुतरुअन लगी धाय हलइ। आउ ओकरे लोग देखलकइ गंभीरतापूर्वक, विनयपूर्वक, लेकिन सहज रूप से शहर के नामी-गिरामी लोग के साथ बातचीत करते, मानुँ ओकन्हीं साथ ऊ शताब्दी तक अपन जिनगी गुजरलके हल। ऊ साधारणतः सब कुछ सहज ढंग से आउ समय पर करऽ हलइ। ऊ धाराप्रवाह तो बातचीत नञ् कर पावऽ हलइ, लेकिन सहज आउ रोचक ढंग से बोलऽ हलइ, अकसर अपन बात में मौलिक लघु रूसी परिहास (humour) के छौंक लगाके।
लेकिन हमर माय के मुख्य शक्ति ओकर हृदय आउ चरित्र में हलइ। ऊ खुद दया आउ आत्म-बलिदान के मूर्तरूप हलइ। वस्तुतः ऊ जानऽ हलइ कि दुनियाँ में बुराई हइ - ऊ खुद ओकरा से बहुत कुछ सहन कइलके हल, लेकिन ओकरा पक्का समझ में नञ् अइलइ कि बुराई कइसे कइल जा हइ आउ दुनियाँ में भलाई के सिवाय दोसर चीज कइसे कइल जा सकऽ हइ। कोय ओकरा साथ सहनशक्ति आउ साहस के तुलना नञ् कर सकलइ, जेकरा से ऊ भाग्य के प्रहार के सहन कइलकइ। जे कुछ जिनगी के विषैला बना सकऽ हइ, ऊ सब्भे अनुभव कइलकइ - मानसिक पीड़ा, गरीबी, सब संभव कमी, सबसे प्रचंड आउ अप्रत्याशित विशेषता वला उत्पीड़न आउ सदमा। विपत्ति आउ दुर्भाग्य, लगऽ हलइ, ई बात के बहस करऽ हलइ कि ओकरा में से कउन आखिर ई औरत के सुन्दर, दयालु हृदय के पराजित कर सकतइ, जेकर दोष खाली एतने हलइ कि ऊ जी रहले हल। लेकिन केऽ देखऽ हलइ कि ओकर दुख-तकलीफ केतना गहरा दर्दनाक हइ? शायद खाली भगमान, जेकर सामने ऊ अपन हृदय के शांत आउ नम्र प्रार्थना में प्रकट करऽ हलइ, बिन ई पूछले कि कउन कानून के तहत ओकरा पर एतना भारी जूआ लादल गेले ह। प्रतिकूल परिस्थिति समय के साथ हमर पिताजी के चरित्र में परिवर्तन उत्पन्न कइलकइ। वास्तव में ऊ ओहे रहलथिन, लेकिन लोग के मामले में अधिक अविश्वासी (distrustful)  हो गेलथिन। जिनगी के उनकर विचार अधिक संशयालु (skeptical) हो गेलइ, आउ अपन भाग्य पर अधिक नैराश्यपूर्ण आउ चिंताजनक। उनकर अर्धांगिनी के चरित्र, एकर विपरीत, लगातार सुधरते रहलइ आउ विपत्ति के दबाव में खाली जादे बरियार होते गेलइ आउ, अइसन कहल जाय कि अंतिम रूप ले लेलकइ। ई एगो अद्भुत बात हइ कि सीधा-साद आउ अशिक्षित लोग के बीच पलल-बढ़ल, ऊ अपन धार्मिक विश्वास के मामले में अंधविश्वास आउ पूर्वाग्रह के विरोधी हलइ, जबकि जेकरा लोग एतना अकसर धर्म के अंश मान लेते जा हइ। ओकर स्वस्थ मन (बुद्धि) प्रत्येक निष्ठापूर्ण आउ विवेकपूर्ण वास्तविक माँग के कृत्रिम आउ खाली देखावटी से ठीक-ठीक भेद करऽ हलइ। ऊ परम्परा के आदर नञ् करऽ हलइ, बल्कि सदाचार के आउ खाली ओकरे महत्त्व दे हलइ।
लेकिन हमर पिताजी के, उनकर बाकी सब कुछ नियन, धार्मिक विश्वास में, विशिष्टता हलइ आउ अन्तर्विरोध से भरल हलइ। उदाहरणस्वरूप, ऊ वोल्टायर के बहुत प्रशंसा करऽ हलथिन आउ ओकर संशयवादी विचारधारा (sceptical views) से जरिक्को नञ् सकुचा हलथिन। तइयो, खुद धार्मिक विचार के हलथिन,  आउ "दैवी चीज" के बारे खाली आदरपूर्वक बात करऽ हलथिन, कभियो चर्च अनुष्ठान के उपेक्षा नञ् करऽ हलथिन। घर के कोय भी महत्त्वपूर्ण घटना के बखत, ऊ हमेशे पुरोहित के प्रार्थना सेवा खातिर आमंत्रित करऽ हलथिन, यद्यपि एकरा लगी अकसर भुगतान करना असान नञ् रहऽ हलइ। प्रार्थना के बखत ऊ हमेशे श्रद्धापूर्वक प्रार्थना करऽ हलथिन, आउ एकर बाद ऊ फेर से वोल्टायर के धर्मविरुद्ध प्रहार खातिर दिल से उपहास करऽ हलथिन, विशेष रूप से पुरोहित (पोप) आउ संन्यासी (monks) के ऊपर ओकर उपहास पर।



[1] Tsarina Mariya Fyodorovna, wife of Paul I, assumed the role of chief guardian. See ch.5.
[2] मस्काल (Moscal)- (निदात्मक अर्थ में प्रयुक्त) मास्कोवासी।
[3] झुपान - पॉलिश आउ यूक्रेनियन द्वारा पेन्हल जाय वला एक प्रकार के मिरजई।
[4] कुन्तूश - कफ़्तान के रूप में प्राचीन यूक्रेनियन आउ पॉलिश, चौड़गर आस्तीन सहित बाह्यवस्त्र (outerwear)।
[5] कनूपर (tansy) - उपरे तरफ समतल पीयर रंग के बोताम नियन, सुगंधित पत्ता वला एगो सदाबहार यूरोपीय फूल।
[6] ब्लूबेल (bluebell) - घंटानुमा एक प्रकार के नीला फूल।

No comments: