रूसी उपन्यास "आझकल के हीरो" ; भाग-2 ; 2. राजकुमारी मेरी - अध्याय-11

रूसी उपन्यास – “आझकल के हीरो”

भाग-2

2. राजकुमारी मेरी - अध्याय-11

6 जून

आझ सुबहे वेरा अपन पति के साथ किस्लोवोद्स्क चल गेलइ । हमरा उनकन्हीं के करेता देखाय देलकइ, जब हम राजकुमारी लिगोव्स्काया हीं (पैदल) जा रहलिए हल । ऊ (वेरा) हमरा देखके सिर हिलइलकइ - ओकर निगाह में उलाहना हलइ ।

केऽ दोषी हइ ? काहे ऊ हमरा अपना से एकांत में भेंट करे लगी अवसर देवे ल नयँ चाहऽ हइ ? प्रेम, अग्नि नियन, बिन ईंधन के बुत जा हइ । शायद डाह ऊ कर देतइ, जे हमर मिन्नत नयँ कर पइलकइ ।

हम बड़की राजकुमारी भिर पक्का एक घंटा बैठलिअइ । राजकुमारी मेरी बहरसी नयँ होलथिन - बेमार हथिन । शाम के ऊ बुलवार में नयँ हलथिन । नयका निर्मित गिरोह, लॉर्नेत से सज्जित, वास्तव में एगो भयंकर रूप धारण कर लेलके ह । हमरा ई बात के खुशी हइ, कि छोटकी राजकुमारी बेमार हथिन । ओकन्हीं उनका पर कुछ तो ढिठाई कर बैठते हल । ग्रुशनित्स्की के बाल ओझराल हलइ आउ चेहरा उदास हलइ । ऊ, लगऽ हइ, वास्तव में व्यथित हइ, विशेष करके ओकर स्वाभिमान के ठेस पहुँचले ह । लेकिन अइसन लोग हकइ, जेकरा में निराशा भी हास्यास्पद होवऽ हइ ! ...

घर वापिस अइला पर, हम नोटिस कइलिअइ, कि कुछ तो कमी हइ । हम उनका नयँ देख पइलिअइ ! ऊ बेमार हथिन ! कहीं हम वास्तव में उनकर प्रेम में तो नयँ पड़ गेलिअइ ? ... धत्, कइसन बकवास हइ !

अनूदित साहित्य             सूची            पिछला                     अगला