6. मगही भासाः मानक मगही आउ वर्तनी

मगही भासाः मानक मगही आउ वर्तनी

लेखक - हरिश्चन्द्र प्रियदर्शी (जन्मः 1-10-1935)

जादेतर बोले में काम आवेवाला मगही के अब बड़ा पैमाना पर लिखे में काम आवे पर ओकर बोली-भिन्नता के बीच एकरूपता के खोज आउ ओकर आधार निश्चित करे के जरूरत हे कि न हे ? अबहिये करे के हे कि बाद में ? छेत्र-विसेस के लेखक अइसन करे तऽ अपन बोली से दूर न जा पड़त ? न कइल जाय तऽ एक्के पुस्तक या पत्रिका में 'भाँत-भाँत के बोली' की ठीक हे ? खासकर अकादमी परकासन, पाठ्यपुस्तक आदि में एक वर्तनी के जरूरत मानल जाय कि नञ ? अबहिये वर्तनी ठीक न करे से छप्पल साहित्य के अम्बार आगे ओकर राह बन्द न कर देत ? अलग-अलग जगह बोलल जा रहल मगही में छेत्रीय भिन्नता रहवे करत तऽ लिखल रूप में एकरूपता लावे के जरूरत आउ औचित्य की हे ? एकरूपता लावल जाय तऽ पूरा कि केन्द्रीकरन के तरफ एगो झुकाव भर ? एकरूपता के आधार की होत ? छेत्र-विसेस के बोली, कि अलग-अलग परयोग में से चुनल विकसित शैली ? छेत्र-विसेस के बोली के मानक मगही मानल जाय तऽ कउन छेत्र के ? ओकरे मानल जाय तऽ काहे ? कोय अलगे शैली विकसित कइल जाय तऽ चुनाव के आधार की रहे ? हिन्दी के अभ्यस्त लिखताहर मगही लिखे में ओकर बोली वाला रूप से अलग जे हिन्दीनुमा मगही गढ़ रहल हे ओही की मगही के नियति हे ? ई नियति से बचे में मगही आधुनिकता-बोधे से तो कटल नञ रह जात ?

शहरी हिन्दी-साहित्यकार मगही लेखन में गाँव के छठ मगही मुहावरा तक पहुँचतन कि नया बोध के वाहक बने ला मगही बोली से अलगे एगो साहित्यिक मगही विकसित होत ?

मगही में संस्कृत के तत्सम सबद के कउन रूप में लेल जाय ? हिन्दी में चल रहल सबद जे मगही में न चल रहल हे ओकरा बदल-बिगाड़ के लेल जाय कि मूल रूप में ? मगही बोली में पहिले से न चल रहल संयुक्ताच्छर, जइसे प्र, श्र, क्ष आदि आउ अच्छर, जइसे श, ष आदि के अब अपना लेल जाय कि नञ अपनावल जाय ? मगही में बिगड़ल रूप में चल रहल सबद ओही रूप में लेल जाय कि सुधरल साहित्यिक रूप में, जइसे रात, रतवा, रतिया आदि ? संस्कृत-हिन्दी के अलावे भासा, जइसे उर्दू, फारसी, अंग्रेजी आदि सबद के कउन रूप लेल जाय, जइसे इस्टीसन, टीसन; इस्कूल, स्कूल आदि ? क्रिया के अलग-अलग रूप में एक्के रूप रक्खल जाय कि सभ्भे ? जइसे, गेलन, गेलथिन, गेलखिन, गेलखुन - ई सभ्भे रूप चले कि एक्के रूप ? एक, तऽ कउन रूप आउ काहे ? जा हे, जा हइ, जा हय; ला, लगी, लेल में से सभ्भे कि एक्के रूप रहे ? एक, तऽ कउन आउ काहे ? जे सबद के अन्त में जोर देल जा हे ओकरा ला भिखारी चिन्ह 'ऽ' देल जाय, कि अ जोड़ देल जाय, कि मूल सबदे छोड़ देल जाय ? जइसे, करऽ , करअ, कि कर ? मगही के अप्पन अलगे लिपि, कैथी इया महाजनी मानल जात कि नागरी लिपि सगरो मानल, सगरो परचलित रहत ?


["मगही", मगध संघ के तिमाही पत्रिका, सम्पादक - हरिश्चन्द्र प्रियदर्शी, बरीस १, अंक १, जनवरी-मार्च १९८६; पृ॰ ७६-७७]

[सम्पादक महोदय "मंच" शीर्षक के अन्तर्गत लेखक आउ पाठक के सामने अप्पन-अप्पन विचार प्रस्तुत करे लगी तीन मुद्दा में से ई पहिला मुख्य मुद्दा उठइलका हल । अन्तरजाल पर के लेखक आउ पाठक सब से भी निवेदन हइ कि मगही के मानक रूप आउ वर्तनी सम्बन्धी ई सब सवाल पर अप्पन-अप्पन विचार प्रस्तुत करथिन । --- नारायण प्रसाद]