विश्वप्रसिद्ध रूसी नाटक "इंस्पेक्टर" ; अंक-1 ; दृश्य-3

दृश्य-3

(ओहे सब, बोबचिन्स्की आउ दोबचिन्स्की, दुन्नु हँफते अंदर आवऽ हइ ।)

बोबचिन्स्की - एगो असाधारण घटना !

दोबचिन्स्की - एगो अप्रत्याशित समाचार !

सब लोग - की, की बात हइ !

दोबचिन्स्की - अदृष्टपूर्व मामला - सराय में आवऽ हिअइ ...

बोबचिन्स्की - (बीच में टोकते) प्योत्र इवानोविच के साथ सराय में आवऽ हिअइ ...

दोबचिन्स्की - (बीच में टोकते) ए, हमरा इजाजत द, प्योत्र इवानोविच, हम बतावऽ हिअइ ।

बोबचिन्स्की - ए, नयँ, हमरा इजाजत द ... इजाजत द, इजाजत द ... तोर शैली ओतना निम्मन नयँ हको ...

दोबचिन्स्की - आउ तूँ घिच-पिच कर देबहो आउ सब कुछ आद नयँ कर पइबहो ।

बोबचिन्स्की - आद रहतइ, भगमान कसम, आद रहतइ । खाली बीच में टोकऽ नयँ, हमरा कहे द, टोकऽ नयँ ! भद्रजन, मेहरबानी करके प्योत्र इवानिच के कहथिन कि बीच में टोकथिन नयँ ।

मेयर - अच्छऽ, भगमान के खातिर बोलऽ, की बात हइ ? हमर करेजा तो मुँह में आ गेल ह । बैठ जाथिन, भद्रजन ! कुरसी ले लेथिन ! प्योत्र इवानोविच, अइकी तोहरा खातिर कुरसी हको । (सब कोय दुन्नु प्योत्र इवानोविच के चारो दने बैठ जा हइ ।) अच्छऽ, की, की बात हइ ?

बोबचिन्स्की - इजाजत देथिन, इजाजत देथिन, हम सब कुछ व्यवस्थित ढंग से सूचित करबइ । जइसीं हम, जी, अपने भिर से बिदा होलिअइ, ऊ घटना के बाद, जब प्राप्त कइल पत्र से, जी, अपने बेचैन हो गेलथिन हल, जी हाँ - ओइसीं हम तखनिएँ दौड़ते बाहर चल पड़लिअइ ... ओह, प्योत्र इवानोविच, मेहरबानी करके बीच में टाँग नयँ अड़ावऽ ! हम सब, सब, सब कुछ जानऽ हिअइ, जी । जरी ध्यान देवे के मेहरबानी करथिन, ओइसीं हम कोरोबकिन के हियाँ दौड़ल गेलिअइ । आउ कोरोबकिन के घर पर नयँ देखके, हम रस्तकोब्स्की के हियाँ चल पड़लिअइ, आउ रस्तकोब्स्की के नयँ पाके, इवान कुज़मिच हीं गेलिअइ, अपने द्वारा प्राप्त समाचार के बारे सूचित करे लगी; आउ हाँ, हुआँ से जइते बखत हमरा प्योत्र इवानोविच से भेंट हो गेलइ ...

दोबचिन्स्की - (बीच में टोकते) स्टॉल बिजुन, जाहाँ परी पकौड़ी बिक्कऽ हइ ।

बोबचिन्स्की - स्टॉल बिजुन, जाहाँ परी पकौड़ी बिक्कऽ हइ । हाँ, प्योत्र इवानोविच से भेंट होला पर हम उनका बोलऽ हिअइ - "की तूँ ऊ समाचार सुनलहो, जे अन्तोन अंतोनोविच के विश्वसनीय पत्र से मिलले हल ?" आउ प्योत्र इवानोविच पहिलहीं एकरा बारे अपने के नौकरानी अवदोत्या से सुन चुकला हल, जेकरा, नयँ मालूम, कइसनो काम से, फ़िलिप अन्तोनोविच पोचेचुयेव के हियाँ भेजल गेले हल ।

दोबचिन्स्की - (बीच में टोकते) फ्रेंच वोदका के बोतल खातिर ।

बोबचिन्स्की - (ओकरा हाथ से अलगे करते) फ्रेंच वोदका के बोतल खातिर । त हम प्योत्र इवानोविच के साथ पोचेचुयेव के हियाँ रवाना होलिअइ ... तूँ, प्योत्र इवानोविच ... एकरा में ... टाँग नयँ अड़ावऽ, मेहरबानी करके, टाँग नयँ अड़ावऽ ! ... त हमन्हीं पोचेचुएव के हियाँ रवाना होते गेलिअइ, आउ रस्ता में प्योत्र इवानोविच बोलऽ हका, "सराय में रुक्कल जाय । हमर पेट में तो ... सुबहे से हम कुछ नयँ खइलूँ हँ, ओहे से हमर पेट में तो चूहा कूद रहल ह ..."  - जी हाँ, प्योत्र इवानोविच के पेट में तो ... "आउ सराय में तो", ऊ बोलऽ हका, "ताजा सालमन (एक प्रकार के मछली) लावल गेले ह, त एकर स्वाद लेल जाय ।" जइसीं हमन्हीं सराय में घुसते गेलिअइ, कि अचानक एगो नवयुवक ...

दोबचिन्स्की - (बीच में टोकते) देखे में खराब नयँ, आउ सिविल पोशाक में ...

बोबचिन्स्की - देखे में खराब नयँ, आउ सिविल पोशाक में, कमरा में चहलकदमी करब करऽ हइ, आउ चेहरा पर अइसन मुद्रा ... शारीरिक आकृति ... व्यवहार, आउ हियाँ परी (अपन हाथ निरार के चारो दने लहरावऽ हइ) बहुत, सब कुछ बहुत । हमरा मानूँ आगरूम होलइ आउ प्योत्र इवानोविच के कहऽ हिअइ, "हियाँ कुछ तो बात हइ, जी ।" हाँ । आउ प्योत्र इवानोविच तो अँगुरी से इशारा करके सराय के मालिक के बोलइलका, सराय के मालिक व्लास के । ओकर घरवली के तीन सप्ताह पहिले बुतरू होलइ, आउ अइसन तेज बुतरू, कि ई अपन बापे नियन सराय चलइतइ । व्लास के बोलाके प्योत्र इवानोविच ओकरा धीरे से पुच्छऽ हका, "ई नौजवान केऽ हइ ?" आउ व्लास एकरा पर उत्तर दे हइ - "ई ...", ए, बीच में बाधा नयँ डालऽ, प्योत्र इवानोविच, मेहरबानी करके बीच में बाधा नयँ डालऽ; तूँ नयँ बता पइबऽ, भगमान कसम, नयँ बता पइबऽ - तूँ जरी तोतराऽ हकहो; हम जानऽ हियो, कि तोर मुँह में एक दाँत से सीटी के अवाज आवऽ हको ... हाँ, तो व्लास बोलऽ हइ - "ई नवयुवक एगो सरकारी अफसर हइ - जी हाँ - जे पितिरबुर्ग से अइले ह, आउ ओकर नाम हइ", व्लास बोलऽ हइ, "जी, इवान अलिक्सांद्रोविच ख्लिस्ताकोव, आउ ऊ जा रहले ह", बोलऽ हइ, "सरातोव प्रांत, आउ", बोलऽ हइ, "ओकर व्यवहार बहुत विचित्र हइ - हियाँ आवल दुसरा सप्ताह चल रहले ह, लेकिन सराय से जाय के नाम नयँ ले हइ, सब हिसाब अपन नाम से ले हइ आउ एक्को पैसा चुकावे लगी नयँ चाहऽ हइ ।" जइसीं ऊ हमरा ई बात बतइलकइ, ओइसीं हमर दिमाग में विचार अइलइ । "ओ !" हम प्योत्र इवानोविच के कहऽ हिअइ ...

दोबचिन्स्की - नयँ, प्योत्र इवानोविच, हम्मे कहलिअइ "ओ !"

बोबचिन्स्की - पहिले तूँ कहलहो, आउ फेर हमहूँ कहलिअइ । "ओ !" प्योत्र इवानोविच आउ हम कहलिअइ । "त ऊ हियाँ काहे लगी बैठल हइ, जब ओकरा सरातोव प्रांत जाय के हइ ?" जी हाँ । त ओहे हइ ई सरकारी अफसर ।

मेयर - केऽ, कइसन अफसर ?

बोबचिन्स्की - ओहे सरकारी अफसर, जेकरा बारे, जी, अपने के नोटिस मिललइ - इंस्पेक्टर ।

मेयर - (भय से) हे भगमान ! ई की कहऽ हो ? ई ऊ नयँ हो सकऽ हइ ।

दोबचिन्स्की - ओहे ! ऊ न पैसा चुकावऽ हइ आउ न जा हइ । त ई ओकरा छोड़के आउ केऽ हो सकऽ हइ ? आउ ओकरा पास सरातोव के यात्रा के दस्तावेज [5] हइ ।

बोबचिन्स्की - ओहे, ओहे, हे भगमान, ओहे हइ ... कइसन प्रेक्षक (observant) हइ - सब कुछ नोटिस कर लेलकइ । देखलकइ, कि प्योत्र इवानोविच आउ हम सालमन (मछली) खा रहलिए ह - खास करके ई कारण से, कि प्योत्र इवानोविच अपन पेट के मामले में ... हाँ, ऊ हमन्हीं के प्लेट दने कइसे घूरे लगलइ । हम तो बहुत डर गेलिअइ ।

मेयर - हे भगमान ! हमन्हीं पपियहवन सब पर दया करथिन ! हुआँ ऊ काहाँ परी रहऽ हइ ?

दोबचिन्स्की - कमरा नंबर पाँच में, ज़ीना (staircase) के निच्चे ।

बोबचिन्स्की - ओहे कमरा में, जाहाँ परी पिछले साल दू गो यात्रा कर रहल अफसर के बीच झगड़ा होले हल।

मेयर - आउ ऊ बहुत दिन से हियाँ परी हइ ?

दोबचिन्स्की - करीब दू सप्ताह गुजर चुकले ह । मिस्र के संत वसिली (St. Vasili the Egyptian) दिवस [6] के अइले हल ।

मेयर - दू सप्ताह से ! (बगल में) हे पितरगण आउ संतजन ! रक्षा करथिन ! ई दू सप्ताह में सर्जेंट के पत्नी के कोड़ा लगावल गेलइ ! कैदी लोग के खाना नयँ देल गेलइ ! गल्ली-गल्ली कलाली हइ, गंदगी हइ ! शरम आउ बदनामी ! (अपन सिर दबोच ले हइ ।)

अनुदान संस्था के न्यासी - की कहऽ हथिन, अन्तोन अन्तोनोविच ? सराय में औपचारिक भेंट देल जाय ?

जज - नयँ, नयँ ! पहिले नगर-प्रमुख, पादरीगण, व्यापारी लोग के भेजल जाय के चाही; अइकी "जॉन मेसन के नियम" [7] पुस्तक में ...

मेयर - नयँ, नयँ, हमरा खुद्दे ई परिस्थिति से निपटे देल जाय । जिनगी में कइएक तुरी कठिन परिस्थिति अइलइ, आउ चल गेलइ, आउ बल्कि हमरा धन्यवादो मिललइ । शायद भगमान अभियो बेड़ा पार लगइथिन। (बोबचिन्स्की दने मुड़के) तोहरा कहना हइ, कि ऊ नवयुवक हइ, हइ न ?

बोबचिन्स्की - नवयुवक, कोय तेइस-चोबीस साल के, चाहे जरी मनी जादे के ।

मेयर - त आउ निम्मन हइ - नवयुवक के आउ जल्दी से समझल जा सकऽ हइ । अगर बुड्ढा शैतान से पाला पड़े, त आफत होवऽ हइ, लेकिन नवयुवक में सब कुछ उपरहीं से देखाय दे हइ । अपने सब, भद्रजन, अप्पन-अप्पन विभाग के अनुसार तैयारी करते जाथिन, आउ हम खुद रवाना होवऽ हिअइ, चाहे बल्कि अइकी प्योत्र इवानोविच के साथ, निजी रूप से, टहलते-बुलते, आउ ई मालूम करे लगी कि यात्रीगण के कोय परेशानी तो नयँ होवऽ हइ। ए, स्विस्तुनोव !

स्विस्तुनोव - जी ?

मेयर - अभिए जो, आउ पुलिस चीफ़ के बोलाके लाव; चाहे नयँ, तोर हमरा जरूरत हउ । हुआँ केकरो बता दे, कि जेतना जल्दी हो सकइ, हमरा पास पुलिस चीफ़ के बोलाके लावे, आउ तूँ हियाँ परी आ जो ।

(पुलिस के सिपाही तेजी से दौड़के जा हइ ।)

अनुदान संस्था के न्यासी - चल्लल जाय, चल्लल जाय, आम्मोस फ़्योदोरोविच ! वास्तव में कोय मुसीबत हो सकऽ हइ ।

जज - अपने के भयभीत होवे के की बात हइ ? रोगी सब के साफ-सुथरा टोपी पेन्हा देवल जाय, बस मामला खतम ।

अनुदान संस्था के न्यासी - टोपी के की बात हइ ! रोगी लोग के जई के शोरबा (oatmeal porridge) देवे लगी औडर देल गेले ह, आउ हमरा हीं सब्भे गलियारा (corridors) में बंदागोभी के अइसन दुर्गंध आवऽ हइ, कि नाक बचावे परऽ हइ ।

जज - आउ हम ई मामले में बेफिकिर हिअइ । वस्तुतः, जिला कोर्ट में केऽ अइतइ ? आउ अगर कइसनो कागजो-पत्तर जाँचतइ, त चिढ़ जइतइ । अइकी हम पनरह साल से जज के कुरसी पर बइठल हिअइ - आउ जइसीं हम कोय रिपोर्ट पर नजर डालऽ हिअइ, कि आह ! हम बस अपन हाथ उपरे कर दे हिअइ । खुद हजरत सुलेमान भी ई फैसला नयँ कर पइता, कि ओकरा में की सच हइ आउ की झूठ ।

(जज, अनुदान संस्था के न्यासी, स्कूल इंस्पेक्टर, आउ पोस्टमास्टर बाहर निकसते जा हका आउ दरवाजा पर वापिस आ रहल पुलिस के सिपाही से टकरा जा हका ।)

सूची            पिछला                     अगला