रूसी उपन्यास - "कप्तान के बिटिया" ; अध्याय-14

अध्याय - 14

मोकदमा

संसार के अफवाह - समुद्र के लहर (जइसन) । [अर्थात् अफवाह दावानल नियन फैलऽ हइ ।]

--- कहावत

हमरा पक्का विश्वास हलइ कि हमर जे कुछ दोष हलइ ऊ ओरेनबुर्ग से स्वेच्छानुसार हमर अनुपस्थिति हलइ । हम असानी से अपन सफाई पेश कर सकऽ हलिअइ - घुड़सवार सैनिक के दुश्मन पर अचानक धावा बोलना (sally, sortie) नयँ खाली कभियो नयँ प्रतिबंधित कइल गेले हल, बल्कि एकर विपरीत आउ जोरदार ढंग से एकरा प्रोत्साहित कइल गेले हल । हमरा पर कुछ जादहीं उत्साह देखावे के दोष लगावल जा सकऽ हलइ, लेकिन अनुशासन भंग के नयँ । लेकिन पुगाचोव के साथ हमर मित्रतापूर्ण संबंध कइएक गोवाह द्वारा साबित कइल जा सकऽ हलइ आउ कम से कम बहुत संदेहजनक लग सकऽ हलइ । पूरे रस्ता भर अपेक्षित पूछताछ पर विचार करते रहलिअइ, आउ अपन उत्तर के बारे सोचते रहलिअइ आउ अदालत के सामने सब कुछ सच-सच बता देवे के निर्णय कइलिअइ, अपन सफाई के एहे तरीका सबसे सरल आउ साथ-साथ सबसे विश्वसनीय मानके ।

हम कज़ान पहुँचलिअइ, जे बरबाद आउ जलाके खाक कइल हलइ । गलियन में घर के स्थान पर राख आउ जल्लल वस्तु सब के ढेर हलइ आउ बिन छत आउ खिड़की के धुआँ से कार होल देवाल खड़ी हलइ । अइसन निशान हलइ पुगाचोव के छोड़ल ! हमरा एगो किला में लावल गेलइ, जे जलके खाक होल शहर के बीच पूरा सुरक्षित बच्चल हलइ । हुस्सार लोग हमरा गार्ड अफसर के सौंप देते गेलइ । ऊ एगो लोहार के बोलावे के औडर देलकइ । हमर गोड़ में बेड़ी डाल देल गेलइ आउ कीलक (rivet) से निम्मन से कस देल गेलइ । फेर हमरा जेल ले जाल गेलइ आउ एगो सकेत आउ अन्हार कोठरी में छोड़ देवल गेलइ, जेकरा में खाली देवाल आउ लोहा के जंगला लग्गल एगो छोटगर खिड़की हलइ ।

अइसन प्रारंभ हमरा लगी कइसनो निम्मन बात के पूर्वसूचना नयँ हलइ । लेकिन तइयो हम न तो साहस खोलिअइ आउ न आशा । हम सब दुखी लोग के सांत्वना (के मार्ग) के आश्रय लेलिअइ, आउ एगो पवित्र किंतु सतावल हृदय से पहिले तुरी प्रार्थना के माधुर्य के रसास्वादन करके, चैन के नीन सुत गेलिअइ, एकर बिन चिंता कइले कि हमरा साथ की होतइ ।

दोसरा दिन जेल के गार्ड हमरा जगइलकइ आउ बतइलकइ कि अन्वेषण आयोग में बोलावल गेले ह । दू सैनिक हमरा प्रांगण से होते कमांडर के घर ले गेलइ, प्रवेश-कक्ष में रुक गेते गेलइ आउ हमरा अकेल्ले कमरा के अंदर जाय देलकइ ।

हम एगो काफी बड़गर हॉल में प्रवेश कइलिअइ । कागज से ढँक्कल टेबुल के पीछू दू अदमी बैठल हलइ - एगो बुजुर्ग जेनरल, जे देखे में कठोर आउ रूखा लगऽ हलइ, आउ एगो नवयुवक कप्तान, करीब अठाइस बरिस के, देखे में बहुत मनोहर, व्यवहार में कुशल आउ निस्संकोच । खिड़की भिर एगो विशिष्ट टेबुल के पीछू एगो मुंशी बैठल हलइ, कान के पीछू कलम रखले, कागज पर झुक्कल आउ हमर बयान लिक्खे लगी तैयार । पूछताछ शुरू होलइ । हमर नाम आउ रैंक पुच्छल गेलइ । जेनरल पुछलकइ कि हम अन्द्रेय पित्रोविच ग्रिनेव के पुत्र तो नयँ हिअइ ? आउ हमर उत्तर पर कठोरता से कहलकइ - "अफसोस के बात हइ कि अइसन सम्माननीय व्यक्ति के अइसन नालायक बेटा हइ !" हम शांति से उत्तर देलिअइ कि हमरा पर कइसनो आरोप काहे नयँ लगावल गेले होत, हमरा आशा हइ कि सच्चाई के निश्छल व्याख्या से ओकरा गलत साबित कर देबइ । हमर आत्मविश्वास ओकरा पसीन नयँ पड़लइ । "तूँ तो, भाय, तेज हकऽ", नाक-भौं सिकोड़ते ऊ हमरा कहलकइ, "लेकिन हमन्हीं तोरा से जादे तेज लोग के देखलिए ह !"

तब नवयुवक हमरा पुछलकइ - कइसन परिस्थिति में आउ कब हम पुगाचोव के नौकरी कइलिअइ आउ कइसन काम ऊ हमरा सौंपलके हल ?

हम गोस्सा से उत्तर देलिअइ कि हम एगो अफसर आउ कुलीन होवे के हैसियत से पुगाचोव के कइसनो नौकरी नयँ कर सकऽ हलिअइ आउ ओकरा से कइसनो काम स्वीकार नयँ कर सकऽ हलिअइ ।

"त फेर कइसे", हमर प्रश्नकर्ता एतराज कइलकइ, "खाली एगो कुलीन आउ अफसर के नकली सम्राट् द्वारा बकस देल गेलइ, जबकि ओकर सब्भे साथी के निर्दयतापूर्वक हत्या कर देल गेलइ ? कइसे एहे अफसर आउ कुलीन विद्रोही लोग के साथ दावत उड़ावऽ हइ, बदमाश लोग के सरदार से फ़रकोट, घोड़ा आउ पचास कोपेक के उपहार स्वीकार करऽ हइ ? कइसे अइसन विचित्र मित्रता होलइ आउ कउची पर आधारित हलइ, अगर गद्दारी चाहे कम से कम कमीना आउ आपराधिक कायरता पर नयँ हलइ त ?"

गार्ड अफसर के शब्द से हमर दिल के बड़गो ठेस लगलइ आउ जोश के साथ अपन स्पष्टीकरण चालू कइलिअइ। हम बतइलिअइ कि बरफीला तूफान के बखत कइसे स्तेप में पुगाचोव के साथ हमर परिचय शुरू होलइ; कइसे बेलागोर्स्क किला के कब्जा कइला पर ऊ हमरा पछान लेलकइ आउ हमर जान बकस देलकइ । हम कहलिअइ कि ई सच हइ कि नकली सम्राट् से तुलूप आउ घोड़ा स्वीकार करे में हम लज्जा अनुभव नयँ कइलिअइ; लेकिन हम अंतिम हद तक दुष्ट के विरुद्ध किला के रक्षा कइलिअइ । आखिरकार हम अपन जेनरल के भी संदर्भ देलिअइ, जे ओरेनबुर्ग के विपत्तिजनक किलाबंदी के समय हमर उत्साह के गोवाही दे सकऽ हलथिन ।

कठोर बुजुर्ग टेबुल पर से खुल्लल पत्र उठा लेलकइ आउ ओकरा उच्च स्वर में पढ़े लगलइ –

"महामहिम के लेफ़्टेनेंट ग्रिनेव संबंधी पूछताछ के मामले में, जे मानूँ हाल के विद्रोह में शामिल हलइ आउ दुष्ट के साथ संबंध स्थापित कइलकइ, जे सैनिक सेवा में अनुचित आउ कर्तव्य शपथ के विरुद्ध हइ, हम सादर स्पष्ट करऽ हिअइ कि उपर्युक्त लेफ़्टेनेंट ग्रिनेव पिछले साल 1773 के अक्तूबर के प्रारंभ से वर्तमान वर्ष के 24 फरवरी तक ओरेनबुर्ग में सैनिक सेवा में हलइ, आउ ई तारीख के शहर से चल गेलइ आउ ऊ बखत से हमर कमांड में अभी तक ड्यूटी पर नयँ अइले ह । आउ भगोड़ा लोग से सुन्ने में अइले ह कि ऊ पुगाचोव के साथ बस्ती में हलइ आउ ओकरा साथ बेलागोर्स्क किला के यात्रा कइलकइ, जाहाँ परी ऊ पहिले सैनिक सेवा में रहले हल; जाहाँ तक ओकर आचरण के बात हइ, त हम कह सकऽ हिअइ कि ..."

हियाँ परी ऊ पत्र पढ़ना रोक देलकइ आउ हमरा कठोरतापूर्वक कहलकइ - "अब तोरा की कहना हको अपन सफाई में ?"

हम जइसे शुरू कइलिए हल ओइसीं बात जारी रक्खे जा रहलिए हल, आउ मारिया इवानोव्ना के साथ अपन संबंध के बारे ओइसीं निष्कपटता के साथ स्पष्ट करे जा रहलिए हल, जइसे कि बाकी सब । लेकिन अचानक हम अदम्य घृणा अनुभव कइलिअइ । हमर दिमाग में विचार अइलइ कि अगर ओकर नाम ले हिअइ, त आयोग ओकरा उत्तर देवे लगी बोलावे के माँग करतइ; आउ दुष्ट लोग के घटिया लांछन के साथ ओकर नाम जोड़े आउ खुद ओकरा ओकन्हीं के सामना करे लगी लावे के विचार - ई भयंकर विचार हमरा एतना सन्न कर देलकइ कि हम असमंजस आउ उलझन में पड़ गेलिअइ ।

हमर जज लोग, जे लगऽ हलइ कि हमर उत्तर के कुछ अनुकूल भाव के अनुसार सुन्ने लगी शुरुआत करते गेलथिन हल, अब हमर घबराहट देखके फेर से हमर विरुद्ध पूर्वाग्रहग्रस्त हो गेते गेलथिन । गार्ड अफसर माँग कइलकइ कि हमरा मुख्य रिपोर्टर (सूचना देवे वला, informer) के आमने-सामने खड़ी कइल जाय । जेनरल कल के दुष्ट के बोलावे के आज्ञा देलकइ । हम अपन अभियोक्ता (accuser) के प्रकट होवे के प्रतीक्षा में उत्सुकता से दरवाजा दने देखे लगलिअइ । कुछ मिनट के बाद बेड़ी खनखनइलइ, दरवाजा खुललइ, आउ अंदर अइलइ - श्वाब्रिन । हम ओकर बदलाव देखके अचंभित हो गेलिअइ । ऊ भयंकर रूप से दुबराल आउ पीयर पड़ल हलइ। ओकर केश, जे हाल तक राल नियन कार हलइ, अब एकदम उज्जर हो गेले हल; लमगर दाढ़ी ओझराल हलइ। ऊ अपन दोषारोपण (अभियोग) क्षीण, किंतु दृढ़ स्वर में दोहरइलकइ । ओकर कथनानुसार, हम पुगाचोव द्वारा ओरेनबुर्ग एगो गुप्तचर के रूप में भेजल गेलिए हल; रोज दिन हम अचानक धावा करऽ हलिअइ ताकि जे कुछ शहर में हो रहले हल ओकर लिखित रूप में सब समाचार दिअइ; कि आखिरकार हम खुलके नकली सम्राट् के तरफ हो गेलिअइ, ओकरा साथ हम एक किला से दोसरा किला जाय लगलिअइ, अपन साथी-गद्दार लोग के हर तरह से बरबाद करे के प्रयास करते ताकि ओकन्हीं के स्थान पर खुद आसीन हो जइअइ आउ नकली सम्राट् द्वारा देल गेल पुरस्कार के फयदा उठा सकिअइ । हम चुपचाप ओकर बयान सुनलिअइ आउ एक बात से खुश हलिअइ - ई कमीना दुष्ट मारिया इवानोव्ना के नाम नयँ लेलके हल, शायद ई कारण से कि ओकर आत्माभिमान के ओकरा बारे विचार से ठेस लगलइ, जे ओकरा तिरस्कारपूर्वक अस्वीकार कर देलके हल; चाहे ई कारण से कि ओकर दिल में ओहे भावना के चिनगारी छिप्पल हलइ, जे हमरो चुप रहे लगी बाध्य कर देलके हल - कारण चाहे जे रहइ, बेलागोर्स्क के किला के कमांडर के बेटी के नाम आयोग के सामने नयँ लेल गेलइ । हम अपन इरादा में आउ अधिक दृढ़ हो गेलिअइ, आउ जब जज लोग पुछलथिन कि हम श्वाब्रिन के बयान के कइसे खंडन कर सकऽ हिअइ, हम उत्तर देलिअइ कि  हम पहिलौका देल स्पष्टीकरण पर कायम हिअइ आउ अपन सफाई में आउ कुछ नयँ कह सकऽ हिअइ । जेनरल हमन्हीं के ले जाय के औडर देलकइ । हमन्हीं दुन्नु साथे निकसलिअइ । हम शांति से श्वाब्रिन पर नजर डललिअइ, लेकिन ओकरा से एक्को शब्द नयँ बोललिअइ । ऊ द्वेष भरल मुसकान मुसकइलइ आउ अपन बेड़ी उठाके हमरा से आगू बढ़ गेलइ आउ अपन कदम के गति तेज कर देलकइ । हमरा फेर से जेल में ले जाल गेलइ आउ तखने से फेर कोय पूछताछ खातिर नयँ बोलावल गेलइ।

हम ऊ सब घटना के साक्षी नयँ हलिअइ, जेकरा बारे हमरा पाठक के बतावे के बाकी हइ; लेकिन हम एतना अकसर एकरा बारे कइएक कहानी सुनलिए ह कि छोटगर से छोटगर विवरण हमर स्मृतिपटल पर अंकित हो गेलइ आउ हमरा लगऽ हइ, जइसे अगोचर रूप से ई सब घटना के हम साक्षी हलिअइ ।

मारिया इवानोव्ना के हमर माता-पिता ओइसने हार्दिक स्वागत कइलथिन, जे पुरनका जमाना में लोग के विशिष्ट लक्षण हलइ । उनका एकरा में भगमान के आशीर्वाद देखाय देलकइ कि उनका एगो बेचारी अनाथ के शरण आउ स्नेह देवे के अवसर मिललइ । जल्दीए उनकर ओकरा प्रति हृदय से लगाव हो गेलइ, काहेकि ई संभव नयँ हलइ कि ओकरा जानला-पछानला के बाद ओकरा से प्यार नयँ कइल जाय । हमर प्यार अब पिताजी के खाली एगो सनक मात्र नयँ लगऽ हलइ; आउ माय तो खाली एहे चाहऽ हलइ कि ओकर पित्रुशा कप्तान के प्रिय बेटी से शादी कर लेइ ।

हमर गिरफ्तारी के खबर हमर पूरे परिवार के हैरत में डाल देलकइ । मारिया इवानोव्ना पुगाचोव के साथ हमर विचित्र परिचय के बारे हमर माता-पिता के अइसन सरल तरीका से बतइलकइ कि एकरा से उनका नयँ खाली कोय चिंता नयँ होलइ, बल्कि अकसर उनका तहे दिल से हँस्से लगी भी मजबूर कर देलकइ । पिताजी ई बात के विश्वास नयँ करे लगी चाहऽ हलथिन कि हमरा ऊ नीचतापूर्ण विद्रोह से कुछ लेना-देना हलइ, जेकर उद्देश्य हलइ राजसिंहासन के तख्तापलट करे आउ कुलीन लोग के नाश करे के । ऊ कड़ाई से सावेलिच से पूछताछ कइलथिन । हमर प्राथमिक शिक्षक ई बात के नयँ छिपइलकइ कि छोटे मालिक इमिल्यान पुगाचोव के हियाँ अतिथि के रूप में भेंट कइलथिन हल आउ दुष्ट उनका वास्तव में स्वागत कइलके हल; लेकिन कसम खइलकइ कि ऊ कइसनो गद्दारी के बारे में नयँ सुनलके हल । वृद्ध लोग (माता-पिता) शांत हो गेलथिन आउ अधीरतापूर्वक कोय निम्मन समाचार सुन्ने के इंतजार करे लगलथिन । मारिया इवानोव्ना अत्यंत चिंतित हलइ, लेकिन चुप हलइ, काहेकि ओकरा में नम्रता आउ सावधानी के चरम सीमा तक गुणसंपन्नता हलइ ।

कुछ सप्ताह गुजर गेलइ ... अचानक पिताजी के पितिरबुर्ग से हमन्हीं के रिश्तेदार राजुकमार बी॰॰ से एगो पत्र मिललइ । राजकुमार उनका हमरा बारे लिखलथिन हल । सामान्य भूमिका के बाद ऊ उनका सूचित कइलथिन कि विद्रोही लोग के प्लान में हमर सहभागिता से संबंधित संशय, दुर्भाग्यवश, बहुत ठोस सिद्ध होलइ, आउ उदाहरणात्मक दंड हमरा देल जाय के चाही हल, लेकिन साम्राज्ञी, पिता के सेवा आउ बुढ़ापा के सम्मान के कारण, अपराधी पुत्र पर दया करे, आउ ओकर शरमनाक दंड देवे के बजाय खाली साइबेरिया के दूरस्थ क्षेत्र में स्थायी प्रवास पर भेजे के निर्णय कइलथिन हँ ।

ई अप्रत्याशित आघात हमर पिताजी के तो लगभग प्राणे ले लेलकइ । ऊ अपन सामान्य दृढ़ता खो देलथिन, आउ उनकर शोक (सामान्यतः मूक) कटु शिकायत सब में फूट पड़इ । "की !" ऊ अपन आपा खोके दोहराथिन, "हमर बेटा पुगाचोव के प्लान में भाग लेलकइ ! हे भगमान, की देखे लगी हम एतना दिन तक जीलूँ ! साम्राज्ञी ओकरा प्राणदंड से बचावऽ हथिन ! की एकरा से हमर दुख कम हो जा हइ ? प्राणदंड भयानक नयँ हइ - हमर एक पूर्वज टिकठी पर मर गेलथिन, ऊ चीज के रक्षा करते जेकरा उनकर अंतःकरण पवित्र मानऽ हलइ; हमर पिताजी वोलिन्स्की आउ ख़्रुश्शेव [60] के साथे-साथ शहीद हो गेलथिन हल । लेकिन कुलीन अपन शपथ के तोड़ दे; डाकू, हत्यारा, भगोड़ा भूदास लोग के साथ मिल जाय ! ... ई तो हमन्हीं के कुल के लज्जा आउ बदनामी के बात हइ !" पिताजी के हताशा से भयभीत माय उनकर सामने रोवे के हिम्मत नयँ कर पावऽ हलइ आउ ई कहके कि अफवाह झूठ हइ, लोग के विचार चंचल हइ, उनकर हौसला वापिस लावे के प्रयास करऽ हलइ । लेकिन हमर पिताजी के चैन नयँ मिललइ ।

मारिया इवानोव्ना सबसे जादे यातना सह रहले हल । ई बात से आश्वस्त होल, कि हम जब कभी चाहिअइ, खुद के निर्दोष सिद्ध कर सकऽ हलिअइ, ऊ सच्चाई के अनुमान लगा रहले हल आउ खुद के हमर दुर्भाग्य के दोषी मान रहले हल । ऊ सबसे अपन आँसू आउ तकलीफ के छिपावइ आउ एहे दौरान हमरा बचावे लगी लगातार उपाय सोचते रहइ ।

एक दिन साँझ के पिताजी सोफा पर बैठल कोर्ट कैलेंडर के पन्ना उलटब करऽ हलथिन; लेकिन उनकर विचार दूर के चक्कर काटब करऽ हलइ, आउ ई कैलेंडर के पढ़ते बखत उनका पर हमेशे नियन के प्रभाव नयँ उत्पन्न हो रहले हल । ऊ सेना के कूच करे वला एगो पुराना धुन पर सीटी बजाब करऽ हलथिन । माय चुपचाप एगो ऊनी स्वेटर बुन रहले हल, आउ कभी-कभार आँसू के बूँद ओकरा (स्वेटर) पर टपक पड़ऽ हलइ । अचानक मारिया इवानोव्ना, जे ओज्जी परी अपन काम में बैठल हलइ, ई घोषणा कइलकइ कि एगो आवश्यक काम ओकरा पितिरबुर्ग जाय लगी बाध्य करऽ हइ आउ प्रस्थान करे के साधन के ओकरा लगी व्यवस्था करे खातिर निवेदन करऽ हइ । माय बहुत दुखी हो गेलइ । "की जरूरत हको तोरा पितिरबुर्ग जाय के ?" ऊ कहलकइ । "कहीं ई बात तो नयँ, मारिया इवानोव्ना कि तूहूँ हमन्हीं के त्याग देवे लगी चाहऽ हकऽ ?" मारिया इवानोव्ना उत्तर देलकइ कि ओकर पूरा भावी जीवन ई यात्रा पर निर्भर हइ, कि अपन निष्ठा के खातिर शहीद होल एगो व्यक्ति के बेटी होवे के हैसियत से ऊ प्रभावशाली लोग के संरक्षण आउ सहायता प्राप्त करे लगी जाब करऽ हइ।

हमर पिताजी सिर झुका लेलथिन - बेटा के सही मान लेल गेल (supposed) अपराध के आद देलावे वला हरेक शब्द उनका पर भारी हलइ आउ तीक्ष्ण तिरस्कार प्रतीत होवऽ हलइ । "जा, दुलारी !" आह भरते ऊ ओकरा कहलथिन । "हम सब तोर खुशी में बाधा नयँ डाले लगी चाहऽ हियो । भगमान तोरा पति के रूप में एगो निम्मन व्यक्ति दे, कोय बदनाम गद्दार नयँ ।" ऊ खड़ी हो गेलथिन आउ कमरा के बाहर हो गेलथिन ।

मारिया इवानोव्ना, माय के साथ अकेल्ले रह गेला पर, आंशिक रूप से ओकरा अपन प्लान समझइलकइ । माय अश्रु बहइते ओकरा गले से लगा लेलकइ आउ ओकर प्लान के अनुकूल परिणाम खातिर भगमान से प्रार्थना कइलकइ । मारिया इवानोव्ना के यात्रा के तैयारी कइल गेलइ आउ कुछ दिन के बाद विश्वसनीय पलाशा आउ विश्वसनीय सावेलिच के साथ, जे हमरा से बलपूर्वक अलग कइल, कम से कम ई बात से खुद के तसल्ली दे हलइ कि हमर भावी पत्नी के सेवा करब करऽ हइ, प्रस्थान कर गेलइ ।

मारिया इवानोव्ना सकुशल सोफ़िया पहुँच गेलइ, आउ डाक स्टेशन में ई जानकारी पाके कि ऊ बखत कोर्ट त्सार्स्कए सेलो [61] में हलइ, हुएँ ठहर जाय के निर्णय कइलकइ । ओकरा परदा (partition) के पीछू एक कोना ठहरे लगी दे देल गेलइ । स्टेशन मास्टर के पत्नी तुरतम्मे ओकरा साथ बतियाय लगलइ, आउ बतइलकइ कि ऊ दरबार (कोर्ट) के स्टोकर (आगवाला) के भतीजी हइ, आउ ऊ ओकरा कोर्ट के जीवन के सब रहस्य के जानकारी दे देलकइ । ऊ बतइलकइ कि केतना बजे साम्राज्ञी साधारणतः जागऽ हलथिन, कॉफी पीयऽ हलथिन, टहले लगी जा हलथिन; कइसन दरबारी लोग तखने उनका साथ रहऽ हलइ; पिछले दिन भोजन के मेज पर ऊ की-की बोललथिन हल, शाम के केकरा से भेंट कइलथिन हल - एक शब्द में, आन्ना व्लास्येव्ना के बातचीत ऐतिहासिक संस्मरण के कइएक पृष्ठ के बराबर हलइ आउ भावी पीढ़ी लगी बहुमूल्य हलइ । मारिया इवानोव्ना ओकर बात ध्यान से सुनलकइ । ओकन्हीं बाग में गेते गेलइ । आन्ना व्लास्येव्ना हरेक वीथि (alley) आउ हरेक छोटकुन्ना पुल के इतिहास बतइलकइ, आउ जी भरके टहल लेला के बाद ओकन्हीं एक दोसरा से बहुत प्रसन्न होल वापिस स्टेशन आ गेते गेलइ ।

दोसरा दिन मारिया इवानोव्ना जल्दीए सुबह जग गेलइ, पोशाक पेन्हलकइ आउ शांतिपूर्वक बाग में चल गेलइ। सुबह बहुत सुहावना हलइ, सूरज पतझड़ के ताजा साँस से पीयर पड़ चुकल लिंडेन (लाइम) वृक्ष सब के फुलंगी धूप में चमक रहले हल । चौड़गर झील निश्चल चमचमा रहले हल । जाग चुकल हंस सब, तट के उपरे लटकल झाड़ी सब के निच्चे से शान से पैर रहले हल । मारिया इवानोव्ना ऊ मनोहर चारागाह के आसपास टहल रहले हल, जाहाँ परी काउंट प्योत्र अलिक्सांद्रोविच रुम्यान्त्सेव के हाल के विजय [62] के सम्मान में अभी-अभी स्मारक स्थापित कइल गेले हल । अचानक अंग्रेजी नस्ल के एगो उज्जर कुत्ता भुँक्के लगलइ आउ ओकरा दने दौड़ते अइलइ । मारिया इवानोव्ना डर गेलइ आउ रुक गेलइ । ठीक एहे समय एगो महिला के मधुर स्वर सुनाय पड़लइ - "डरथिन नयँ, ई नयँ काटतइ ।" आउ मारिया इवानोव्ना के एगो महिला पर नजर पड़लइ, जे स्मारक के सामने एगो बेंच पर बैठल हलइ । मारिया इवानोव्ना बेंच के दोसरा किनारा पर बैठ गेलइ । महिला ओकरा दने एकटक देखब करऽ हलइ; आउ मारिया इवानोव्ना अपना तरफ से कनखियाके कुछ नजर डालके ओकरा आपादमस्तक निम्मन से देख लेलकइ । ऊ उज्जर प्रातःकालीन पोशाक, रात्रि टोपी आउ जैकेट धारण कइले हलइ । ओकर उमर कोय चालीस साल के लग रहले हल । ओकर उभरल (plump) आउ लाल-लाल चेहरा पर रोब आउ शांति व्यक्त हो रहले हल, आउ नीला-नीला आँख आउ मंद-मंद मुसकान में अनिर्वचनीय (inexpressible) आकर्षण शक्ति हलइ । महिला चुप्पी के पहिले तोड़लकइ ।

"अपने, शायद, हियाँ के नयँ हथिन ?" ऊ कहलकइ ।

"जी, बिलकुल सही । हम कल्हिएँ प्रान्त से अइलिए ह ।"

"अपने अपन माता-पिता के साथे अइलथिन हँ ?"

"जी नयँ । हम अकेल्ले अइलिए ह ।"

"अकेल्ले ! लेकिन अपने तो अभियो एतना कम उमर के हथिन ।"

"हमरा न तो पिता हथिन, न माता ।"

"अपने हियाँ, निस्संदेह, कोय तो काम से अइलथिन होत ?"

"जी, बिलकुल सही । हम साम्राज्ञी के याचिका दायर करे लगी अइलिए ह ।"

"अपने अनाथ हथिन । शायद अपने अन्याय आउ अपमान के विरुद्ध शिकायत करे लगी चाहऽ हथिन ?"

"जी नयँ । हम दया लगी निवेदन करे अइलिए ह, न्याय लगी नयँ ।"

"की हम पूछ सकऽ हिअइ कि अपने केऽ हथिन ?"

"हम कप्तान मिरोनोव के बेटी हिअइ ।"

"कप्तान मिरोनोव के ? ओहे मिरोनोव के, जे ओरेनबुर्ग के एक किला के कमांडर हलथिन ?"

"जी, बिलकुल सही ।"

महिला, लगलइ, कि द्रवित हो उठले हल ।

"हमरा क्षमा करथिन", ऊ हमरा आउ अधिक मधुर स्वर में कहलथिन, "अगर हम अपने के मामले में दखल देब करऽ हिअइ; लेकिन हम कोर्ट में अइते-जइते रहऽ हिअइ; हमरा स्पष्ट करथिन कि अपने के याचिका कउची से संबंधित हइ, आउ संभव हइ, कि हमरा अपने के सहायता करे में सफलता मिल जाय ।"

मारिया इवानोव्ना खड़ी हो गेलइ आउ ओकरा आदरपूर्वक धन्यवाद देलकइ । ई अनजान महिला के सब कुछ ओकर हृदय के सहज भाव से (spontaneously) आकृष्ट कर ले हलइ आउ विश्वास पैदा करऽ हलइ । मारिया इवानोव्ना अपन जेब से तह कइल कागज निकसलकइ आउ ऊ अनजान अपन संरक्षिका के सौंप देलकइ, जे मने-मन ओकरा पढ़े लगलइ ।

शुरू-शुरू में ऊ ध्यान आउ सहानुभूति भरल मुद्रा में पढ़ रहले हल, लेकिन अचानक ओकर चेहरा के रंगत बदल गेलइ - आउ मारिया इवानोव्ना, जे ओकर सब्भे भाव-भंगिमा के देख रहले हल, ई चेहरा के कठोर भाव से भयभीत हो गेलइ, जे कुछ कुछ देर पहिले एतना मनोहर आउ शांत हलइ ।

"त अपने ग्रिनेव लगी याचिका दायर करे लगी चाहऽ हथिन ?" महिला भावशून्य मुद्रा में कहलकइ । "साम्राज्ञी ओकरा क्षमा नयँ कर सकऽ हथिन । ऊ अज्ञानता आउ भोलापन से नकली सम्राट् के साथ नयँ देलकइ, बल्कि एगो अनैतिक आउ हानिकारक दुष्ट नियन ।"

"ओह, ई सच नयँ हइ !" मारिया इवानोव्ना चीख उठलइ ।

"ई कइसे सच नयँ हइ !" पूरा तमतमाल महिला एतराज कइलकइ ।

"ई सच नयँ हइ, भगमान कसम, ई सच नयँ हइ ! हमरा सब कुछ मालुम हइ, हम सब कुछ अपने के बतइबइ। ऊ खाली हमरा खातिर सब कुछ भुगतलथिन, जे कुछ विपत्ति उनका पर अइलइ । आउ अगर जज लोग के सामने सफाई नयँ देलथिन, त वास्तव में खाली ई चलते, कि ऊ हमरा ई मामले में फँसावे लगी नयँ चाहऽ हलथिन ।" हियाँ परी ऊ उत्साह के साथ सब कुछ बतइलकइ, जे हमर पाठक के पहिलहीं से मालुम हइ ।

महिला ओकर बात ध्यान से सुनलकइ । "काहाँ अपने ठहरलथिन हँ ?" ऊ बाद में पुछलकइ; आउ ई सुनके कि आन्ना व्लास्येव्ना के हियाँ, त मुसकइते आगू बोललइ - "अच्छऽ, हमरा मालुम हइ । अलविदा, केकरो हमन्हीं के ई भेंट के बारे नयँ बतइथिन । हमरा आशा हइ, कि अपने के अपन पत्र के उत्तर लगी जादे देर प्रतीक्षा नयँ करे पड़तइ ।"

एतना कहके ऊ उठ गेलइ आउ आच्छादित वीथि (covered alley) में प्रवेश कर गेलइ, आउ मारिया इवानोव्ना खुशी भरल आशा के साथ आन्ना व्लास्येव्ना के हियाँ वापिस आ गेलइ ।

ओकर मकान मालकिन (hostess) ओकरा पतझड़ (autumn) में एतना जल्दी टहले लगी जाय खातिर बात सुनइलकइ, जे ओकर शब्द के अनुसार, एगो जवान लड़की के स्वास्थ्य लगी हानिकारक हलइ । ऊ समोवार ले अइलइ आउ चाय के चुस्की लेते कोर्ट के बारे अपन अंतहीन किस्सा-कहानी चालू करहीं वली हलइ कि अचानक एगो कोर्ट के करेता (घोड़ागाड़ी) ड्योढ़ी पर आके रुकलइ, आउ शाही नौकर प्रवेश करके सूचित कइलकइ कि साम्राज्ञी अपन पास सुश्री मिरोनोवा के आमंत्रित करे के किरपा कइलथिन हँ । आन्ना व्लास्येव्ना आश्चर्चकित हो गेलइ आउ दौड़-धूप करे लगलइ । "हे भगमान !" ऊ चिल्ला उठलइ । "साम्राज्ञी अपने के कोर्ट में बोलाब करऽ हथिन । कइसे उनका अपने के बारे पता चललइ ? लेकिन कइसे अपने, दुलारी, साम्राज्ञी के सामने जइथिन? अपने के तो, हमरा लगऽ हइ, दरबारी शिष्टाचार भी नयँ मालुम ... की हम अपने के साथे चलिअइ? तइयो हम अपने के कम से कम कोय चीज के बारे आगाह तो कर सकऽ हिअइ । आउ अपने यात्रा के पोशाक में कइसे जइथिन ? की दाई (midwife) के हियाँ से पियरका रोब्रौँद [robe ronde - (फ्रेंच) औरतानी पोशाक जेकरा में क्रिनोलिन (crinoline - कड़ा कइल चाहे छल्लेदार पेटिकोट जे पेन्हला पर बाहर दने लमगर स्कर्ट बन जा हइ) लगावल रहऽ हइ] नयँ मँगवा लेल जाय ?" शाही नौकर बतइलकइ कि साम्राज्ञी के इच्छा हलइ कि मारिया इवानोव्ना अकेल्ले आउ जे पोशाक में हथिन ओकरे में चलथिन । कुछ नयँ कइल जा सकऽ हलइ - मारिया इवानोव्ना करेता में बैठ गेलइ आउ आन्ना व्लास्येव्ना के सलाह आउ आशीर्वाद के साथ राजमहल लगी प्रस्थान कर गेलइ ।

मारिया इवानोव्ना के हमन्हीं के भाग्य के निर्णय के पूर्वाभास हो रहले हल; ओकर दिल कभी जोर से धक्-धक् करइ त कभी बैठ जाय । कुछ मिनट के बाद करेता राजमहल के पास खड़ी होलइ । मारिया इवानोव्ना कँपते ज़ीना चढ़े लगलइ । ओकर सामने के दरवाजा पूरा खुल गेलइ । ऊ खाली आउ शानदार कमरा सब के एगो लमगर कतार से होके गुजरलइ; शाही नौकर रस्ता देखइते जा हलइ । आखिरकार, एगो बंद दरवाजा भिर पहुँचला पर ऊ बतइलकइ कि अभी अंदर जाके उनकर आवे के रिपोर्ट करतइ आउ ओकरा अकेल्ले छोड़ देलकइ।

साम्राज्ञी के आमने-सामने देखे के विचार ओकरा एतना भयभीत कर रहले हल कि ऊ मोसकिल से अपन गोड़ पर खड़ी हो पा रहले हल । एक मिनट के बाद दरवाजा खुललइ, आउ ऊ साम्राज्ञी के शृंगार-कक्ष में प्रवेश कइलकइ ।

साम्राज्ञी अपन शृंगार के टेबुल भिर बैठल हलथिन । कइएक दरबारी लोग उनका घेरले हलइ आउ आदरपूर्वक मारिया इवानोव्ना के रस्ता दे देते गेलइ । साम्राज्ञी ओकरा प्यार से संबोधित कइलथिन, आउ मारिया इवानोव्ना ऊ महिला के पछान लेलकइ जेकरा सामने एतना खुलके कुछ समय पहिले अपन बात रखलके हल । साम्राज्ञी ओकरा आउ पास बोलइलथिन आउ मुसकइते कहलथिन - "हमरा ई बात के खुशी हइ कि हम अपने के देल वचन के पालन कर सकलिअइ  आउ अपने के याचिका के पूरा कइलिअइ । अपने के मामला के निपटारा हो गेलइ । हमरा अपने के मंगेतर के निर्दोषता पर पक्का विश्वास हइ । अइकी ई पत्र हइ, जेकरा खुद्दे अपन भावी श्वसुर तक पहुँचावे के कष्ट करथिन ।"

मारिया इवानोव्ना अपन काँपते हाथ से पत्र ले लेलकइ, आउ रोते-रोते साम्राज्ञी के गोड़ पर गिर पड़लइ, जे ओकरा उठाके चूम लेलथिन । साम्राज्ञी ओकरा साथ बातचीत करे लगलथिन । "हम जानऽ हिअइ कि अपने धनी नयँ हथिन", ऊ कहलथिन, "लेकिन हम कप्तान मिरोनोव के बेटी के सामने कर्जदार हिअइ । अपन भविष्य के चिंता नयँ करथिन । हम अपने के कल्याण के भार अपन उपरे ले हिअइ ।"

बेचारी अनाथ लड़की के दुलारके साम्राज्ञी ओकरा विदा कइलथिन । मारिया इवानोव्ना ओहे करेता में सवार होके रवाना होलइ । आन्ना व्लास्येव्ना, जे ओकर लौटे के अधीरतापूर्वक प्रतीक्षा कर रहले हल, ओकरा पर प्रश्न के झड़ी लगा देलकइ, जेकर मारिया इवानोव्ना कइसूँ उत्तर देलकइ । आन्ना व्लास्येव्ना ओकर अइसन विस्मरणशीलता से हलाँकि असंतुष्ट हलइ, ऊ एकरा प्रांतीय संकोच मानके उदारतापूर्वक क्षमा कर देलकइ । ओहे दिन मारिया इवानोव्ना, पितिरबुर्ग देखे लगी बिन कोय उत्सुकता के, वापिस गाँव रवाना हो गेलइ ...

*** *** *** *** *** ***  *** *** *** *** *** ***  *** *** *** *** *** *** ***

हियाँ परी प्योत्र अन्द्रेयेविच ग्रिनेव के संस्मरण समाप्त हो जा हइ । पारिवारिक परंपरा से ई पता चलऽ हइ कि सन् 1774 के अंत तक शाही आदेश के अनुसार ओकरा जेल से मुक्त कर देल गेलइ; कि ऊ पुगाचोव के प्राणदंड के बखत उपस्थित हलइ, जे ओकरा भीड़ में पछान लेलकइ आउ ओकरा दने अपन सिर हिलइलकइ, जेकरा एक मिनट बाद मरल आउ खून से लथपथ हालत में लोग के सामने देखावल गेलइ । बाद में जल्दीए प्योत्र अन्द्रेइच मारिया इवानोव्ना के साथ शादी कर लेलकइ । ओकन्हीं के वंशज सिम्बिर्स्क प्रांत में फल-फूल रहले ह । *** से तीस विर्स्ता दूर एगो गाँव हइ, जेकर दस जमींदार लोग मालिक हइ । हुआँ हवेली के एक विंग में एकातेरिना द्वितीय (Catherine-II) के हाथ के लिक्खल, काँच आउ फ्रेम में जड़ल, पत्र रक्खल हइ । ई पत्र प्योत्र अन्द्रेयेविच के पिता के नाम हइ आउ एकरा में उनकर पुत्र के दोषमुक्ति के बात हइ आउ कप्तान मिरोनोव के बेटी के बुद्धि आउ साहस के प्रशंसा हइ । प्योत्र अन्द्रेयेविच ग्रिनेव के पांडुलिपि हमरा ओकर एक पौत्र से प्राप्त होले हल, जेकरा मालुम चललइ कि हम ऊ जमाना के शोध-कार्य में व्यस्त हिअइ, जेकर चर्चा उनकर बाबा (दादा) कइलथिन हँ । रिश्तेदार लोग के अनुमति से हम, हरेक अध्याय खातिर उचित आदर्श वाक्य खोजके आउ कुछ व्यक्तिवाचक नाम के परिवर्तन करे के स्वतंत्रता लेके, एकरा पृथक् रूप से प्रकाशित करे के निर्णय कइलिअइ।

प्रकाशक

19 अक्तूबर 1836

सूची               पिछला             अगला