पितिरबुर्ग से मास्को के यात्रा ; अध्याय 10. ज़ाय्त्सोवो - भाग 1

[*119]                                                             ज़ाय्त्सोवो

ज़ाय्त्सोवो के डाक स्टेशन में हमर मोलकात अपन पुरनका मित्र मि॰ क्रिस्त्यानकिन से होल। हम उनका से बचपने से परिचित हलिअइ। विरले हमन्हीं एक्के शहर में रहऽ हलिअइ; लेकिन हमन्हीं के बातचीत अकसर नञ् होलो पर ओकरा में स्पष्टवादिता होवऽ हलइ। मि॰ क्रिस्त्यानकिन लमगर अवधि तक सेना में रहलथिन हल, आउ एकरा में क्रूरता से, विशेष रूप से युद्ध के समय, जब युद्ध के नाम पर बड़गो हिंसा न्यायसंगत समझल जा हइ, ऊबके सिविल सेवा में खुद स्थानांतरित हो गेलथिन हल। दुर्भाग्यवश उनका सिविल सेवा में भी ओकरा से बच नञ् सकलथिन, जेकरा चलते सैन्य सेवा छोड़के दूर होवे लगी चहलथिन। उनकर आत्मा भावुक हलइ आउ हृदय मानवप्रेमी। उनकर अशंकनीय अइसन उत्तम गुण उनका आपराधिक न्यायालय (फौजदारी अदालत) में जज के स्थान देला देलकइ। पहिले ऊ ई पद स्वीकार करे लगी नञ् चाहऽ हलथिन, लेकिन कुछ समय सोचला के बाद हमरा से [*120] कहलथिन – “हमर मित्र, केतना विशाल क्षेत्र हमर आत्मा के सबसे प्रिय प्रवृत्ति के संतुष्टि खातिर खुल्लल हइ! नम्रहृदय खातिर कइसन अभ्यास हइ! निर्दयता के राजदंड (scepter) के हम सब तोड़ देबइ, जे एतना अकसर निर्दोष के कन्हा पर गिरऽ हइ; जेलखाना सब खाली कर देल जाय, आउ ओकरा भ्रान्तिपूर्ण दुर्बलता, असावधान अनुभवहीनता ओकरा नञ् देखे, आउ यादृच्छिक घटना (random incident) के अपराध कभी नञ् घोषित कइल जाय। ओ हमर मित्र! अपन कर्तव्यपालन से बुतरुअन के मामले में ओकन्हीं के माता-पिता के आँसू ढरका देबइ, दंपती सब के आह निकसवा देबइ; लेकिन ई आँसू कल्याण खातिर नवीनीकरण होतइ; लेकिन कष्ट झेल रहल निर्दोष आउ सरलहृदय लोग के आँसू सूख जइतइ। ई विचार हमरा केतना भावविह्वल कर दे हइ! चलऽ, हमर प्रस्थान खातिर जल्दी कइल जाय। शायद, हुआँ हमर त्वरित उपस्थिति के आवश्यकता हइ। देरी कइला से हम हत्यारा हो जा सकऽ हिअइ, अगर हम कारावास चाहे अभियोग के मामले में क्षमा के पूर्वाभास नञ् कर पइअइ, चाहे बेड़ी से मुक्ति के।"

[*121] अइसन विचार के साथ हमर मित्र अपन स्थान लगी रवाना हो गेला। केतना अचरज हमरा होल जब हम उनका से जनलिअइ कि ऊ सेवा से इस्तीफा (त्यागपत्र) दे देलथिन आउ हमेशे लगी निवृत्त जीवन बितावे के इरादा कर लेलथिन।

"हम सोचलिए हल, हमर मित्र", मि॰ क्रिस्त्यानकिन हमरा से बोललथिन, "कि अपन कर्तव्य पालन में हमरा आनन्दायक तर्क आउ प्रचुर मात्रा में फसल (सुंदर परिणाम) मिलत। लेकिन एकर बदले हम ओकरा में पित्त (चिड़चिड़ापन) आउ काँटेदार झाड़ी (कष्ट) पइलूँ। अब ओकरा से ऊब चुकलूँ हँ, अब कल्याण के काम करे के शक्ति नञ् हके, ई पद के हम वास्तविक हिंसक पशु लगी छोड़ देलूँ हँ। थोड़हीं समय में लंबित मामला के त्वरित निर्णय के कारण ऊ प्रशंसा के पात्र हो गेलथिन; आउ हम दीर्घसूत्री समझल गेलिअइ। कुछ लोग हमरा कभी-कभी घूसखोर समझते जा हलइ, ई कारण से कि हम ऊ अभागल लोग के भाग्य पर भार डाले लगी कोय जल्दी नञ् करऽ हलिअइ, जे अकसर अनिच्छा से अपराध कर बैठले हल। सिविल सेवा में प्रवेश के पहिले हमरा लगी एगो सम्मानसूचक नाम, मानवप्रेमी कमांडर (philanthropic commander), मिल गेले हल। अब बिलकुल ओहे गुण के, जेकरा पर [*122] हमर हृदय एतना गौरव करऽ हलइ, लोग कमजोरी या अनुचित अनुग्रह (inadmissible indulgence) समझऽ हइ। हम अपन निर्णय के बिलकुल ओकरे लगी हास्यास्पद देखऽ हलिअइ, जे ओकरा सुन्दर बनावऽ हलइ; हम ओकरा अप्रभावी बन्नल देखऽ हलिअइ। घृणा सहित हम देखलिअइ कि वास्तविक अपराधी आउ समाज के खतरनाक सदस्य के मुक्त करे खातिर, चाहे काल्पनिक अपराध खातिर जायदाद, प्रतिष्ठा आउ जीवन से वंचित करे खातिर हमर वरिष्ठ अधिकारी हमरा से अवैध रूप से अपराध से मुक्ति देलावे, चाहे कोय निर्दोष पर अभियोग लगवावे खातिर हमरा झुकावे के स्थिति में नञ् हलइ, त ऊ हमर सहकर्मी (colleagues) के अइसन काम लगी झुका दे हलइ, आउ अकसर हम अपन कल्याणकारी प्रवृत्ति (well-intentioned dispositions) के हवा में धुआँ नियन गायब होते देखऽ हलिअइ। आउ ओकन्हीं (हमर सहकर्मी) अपन शरमनाक आज्ञापालन खातिर पुरस्कार के रूप में प्रतिष्ठा प्राप्त कइलकइ, जे हमर दृष्टि में ओतने चमक से हीन हलइ, जेतना अपन चमक से ओकन्हीं के लुभावऽ हलइ। अकसर कठिन परिस्थिति में, जब अभियुक्त अपराधी के निर्दोषता में विश्वास [*123] हमरा में दया उत्पन्न करऽ हलइ, त हम कानून के आश्रय ले हलिअइ ताकि ओकरा में हम अनिश्चितता के सहारा खोज सकूँ; लेकिन अकसर ओकरा में मानवप्रेम के स्थान पर निर्दयता मिल्लऽ हल, जेकर उत्पत्ति कानून में नञ्, बल्कि ओकर पुरानापन (obsoleteness) में हलइ। दंड के अपराध से वैषम्य अकसर हमरा आँख में आँसू ला दे हल। हम देखऽ हलिअइ (आउ कीऽ ई आउ तरह के हो सकऽ हलइ?) कि कानून कर्म देखके निर्णय ले हइ, बिन एकर कारण पर विचार कइले, जे ओकरा पैदा कइलकइ। आउ अइसन कर्म से संबंधित अन्तिम घटना हमरा सेवा से त्यागपत्र देवे लगी बाध्य कर देलक। काहेकि हम ऊ अभियुक्त लोग के बचावे में अशक्त होल, जे शक्तिशाली भाग्य के हाथ से अपराध में घसीटल गेले हल, हम ओकन्हीं के दंड में भागीदार नञ् होवे लगी चाहऽ हलूँ। ओकन्हीं के भाग्य के हलका करे में अशक्त होल हम अपन हाथ अपन निर्दोषता में धो लेलूँ आउ क्रूरता से दूर हट गेलूँ।

हमर गुबेर्निया (प्रान्त) में एगो संभ्रान्त व्यक्ति (nobleman) रहऽ हलथिन, जे कुछ साल पहिलहीं [*124] सेवा से त्यागपत्र दे चुकलथिन हल। अइकी उनकर सर्विस रेकर्ड हइ। ऊ कोर्ट में अपन सेवा स्टोकर (आगवाला) के रूप में शुरू कइलथिन हल, उनकर प्रोन्नति होलइ लैकी (lackey, टहलुआ) में,  वरिष्ठ लैकी में, फेर मुन्दशेन्क [Mundschenk (जर्मन) - कोर्ट में पेय के जनकारी वला सेवक] में; कोर्ट सर्विस[1] में ई सब चरण में प्रोन्नति लगी कइसन गुण के आवश्यकता होवऽ हइ, हमरा नञ् मालुम। लेकिन हमरा ई मालुम हइ कि ओकरा शराब हद से जादे पसीन हलइ। 15 बरिस तक मुन्दशेन्क रहला पर ओकरा रैंक स्थापित करे खातिर हेराल्ड कॉलेज भेजल गेलइ। लेकिन काम में अयोग्य अनुभव करके ऊ सेवानिवृत्ति के आवेदन कइलकइ, आउ ओकरा कॉलेजिएट असेसर[2] के रैंक मिललइ; जेकरा साथ ऊ अपन जन्म स्थान में आ गेलइ, मतलब हमन्हीं के गुबेर्निया में छो बरिस पहिले। अपन जन्मभूमि से विशेष लगाव के स्रोत अकसर अहंकार में होवऽ हइ। छोटगर हस्ती के अदमी, जे प्रतिष्ठा प्राप्त कर चुकले ह, चाहे एगो निर्धन व्यक्ति, जे सम्पत्ति अर्जित कर चुकले ह, लज्जा के संकोचशीलता, जे गुण के अंतिम आउ दुर्बलतम [*125] जड़ हइ, ओकरा झाड़के अपन जन्मभूमि में अपन तड़क-भड़क आउ अहंकार के देखावा करे के प्राथमिकता दे हइ। हुआँ परी असेसर के एगो गाम खरीदे के अवसर मिललइ[3], जाहाँ ऊ अपन काफी बड़गर परिवार के साथ बस गेलइ। अगर हमन्हीं हीं एगो होगार्थ[4] (Hogarth) पैदा होते हल त ओकरा मि॰ असेसर के परिवार में अपन व्यंग्य-चित्र (caricatures) खातिर उपजाऊ जमीन मिल जइते हल। लेकिन हम एगो खराब पेंटर ही; अगर हम मानव के चेहरा-मोहरा में लावातेर[5] के सूक्ष्मदृष्टि के साथ अन्दरूनी विचार पढ़ सकतिए हल, त हमरा ऊ बखत असेसर के परिवार के ध्यान आकृष्ट करे लायक चित्र बना सकतिए हल। चूँकि हमरा में अइसन गुण नञ् हके, ओहे से हम ओकन्हीं के क्रिया-कलाप के हीं बोले दे हिअइ, जे हमेशे सच आत्मिक विकास के विशिष्टता होवऽ हइ।

मि॰ असेसर खुद निम्न वर्ग में जन्म लेला से खुद के अप्पन नियन सैकड़ो के मालिक समझऽ हलइ। ई बात ओकर सिर चकरा दे हलइ। ऊ अकेल्ले नञ् हइ जे शिकायत कर सकऽ हइ कि शक्ति के उपलब्धि ओकर सिर चकरावऽ हइ। [*126] ऊ खुद के उँचगर रैंक के समझऽ हलइ, किसान लोग के जानवर समझऽ हलइ, जे ओकरा देल गेले हल (ऊ लगभग एहे समझऽ हलइ कि ओकन्हीं पर ओकर प्रभुत्व भगमान से अइले ह) आउ ओकन्हीं के इस्तेमाल काम में अपन मन-मरजी से करऽ हइ। ऊ स्वार्थलोलुप हलइ, पैसा के संग्रह करऽ हलइ, स्वभाव से निर्दय, आशुक्रोधी (चिड़चिड़ा), नीच हलइ, आउ ओहे से खुद से बहुत कमजोर लोग के उपरे अभिमान दर्शावऽ हलइ। एकरा से कल्पना कर सकऽ हो कि ऊ कृषक लोग से कइसन व्यवहार करऽ हलइ। ओकन्हीं अपन पहिलौका मालिक के मुक्ति-कर (commutation tax) चुकइलके हल, लेकिन ऊ ओकन्हीं के अपन खेत में काम करे लगी लगा देलके हल; ओकन्हीं हीं से सब जमीन छीन लेलके हल, ओकन्हीं हीं से सब जानवर खरीद लेलके हल, अइसन कीमत पर जे ऊ खुद निश्चित कइलके हल, पूरे सप्ताह अपने लगी काम करे लगी बाध्य कर देलके हल, आउ ओकन्हीं भूख से कहीं मर नञ् जाय, ई लगी अपन कोठी के प्रांगण में ओकन्हीं के खिलावऽ हलइ, आउ ओहो, दिन में एक्के तुरी, आउ कुछ लोग के अनुग्रहपूर्वक मेसिचिना[6] दे हलइ। अगर कोय ओकरा आलसी देखाय दे हलइ, त आलस्य के कोटि (degree ) के अनुसार, बेंत के छड़ी, चाभुक, डंडा, चाहे रस्सा के चाभुक (cat-o'-nine-tails) से पिट्टऽ हलइ; जाहाँ तक वास्तविक [*127] अपराध के मामला हइ, जइसे चोरी, ओकर घर में नञ् बल्कि दोसर केकरो हियाँ, त ऊ एक्को शब्द नञ् बोलऽ हलइ। लगऽ हलइ मानूँ ऊ अपन गाम में प्राचीन काल के रिवाज लाकेदेमोन[7] (Lacedaemon) चाहे ज़पोरोझियन सेच[8] (Zaporozhian Setch) के पुनर्जीवित करे लगी चाहऽ हलइ। अइसन भी होवऽ हलइ कि ओकर मुझीक (कृषक) लोग भोजन खातिर रस्ता में कोय राहगीर के लूट ले हलइ आउ केकरो जान मार दे हलइ। ओकरा लगी ऊ ओकन्हीं के मोकदमा में नञ् फँसावऽ हलइ, बल्कि ओकन्हीं के अपना हीं छिपा ले हलइ आउ सरकार के घोषित कर दे हलइ कि ओकन्हीं भाग गेते गेलइ; ई समझके कि अइसन कइला से ओकरा कोय फयदा नञ् होतइ, अगर ओकर कृषक के चाभुक लगावल जइतइ आउ अपराध के चलते दंडस्वरूप कठिन काम पर भेज देवल जइतइ। अगर ओकर कोय कृषक ओकरा हीं कुछ चोरा ले हलइ, त ऊ ओकरा आलस्य के नाम पर नियन, चाहे साहस या तीव्रबुद्धि वला उत्तर लगी नियन पिट्टऽ हलइ, आउ एकरा अलावे पैर में कुंदा, बेड़ी, आउ गरदन में जुआ डाल दे हलइ। हम तोरा ओकर कइएक तरह के चतुर व्यवस्था के बारे बता सकऽ हियो; लेकिन हमर हीरो के जनकारी लगी एतना काफी हको। ओकर घरवली के गाम के औरतयिन पर पूरा धाक हलइ। ओकर आदेश के पालन खातिर [*128] ओकर बेटवन आउ बेटियन सहायता करऽ हलइ, ठीक ओइसीं जइसे ओकर पति। काहेकि ओकन्हीं खुद लगी एगो नियम बना लेते गेले हल कि कउनो कारण से कृषक लोग के मन काम से विचलित नञ् होवे। प्रांगण में (नौकर) लोग के बीच एगो लड़का हलइ, जेकरा ओकन्हीं मास्को में खरदलके हल, बेटियन खातिर एगो हेअर ड्रेसर; आउ एगो बुढ़िया रसोइया। ओकनन्हीं के न तो कोय ड्राइवर हलइ आउ न घोड़ा; (मालिक) हमेशे खेत जोते वला घोड़वन से आवऽ जा हलइ। चाभुक चाहे रस्सा के चाभुक से कृषक लोग के खुद बेटवन पिट्टऽ हलइ। औरतियन आउ लड़कियन के गाल पर मारऽ हलइ, चाहे ओकन्हीं के केश तीरऽ हलइ बेटियन। बेटवन अवकाश के समय गाम में घुम्मऽ हलइ चाहे खेत पर लड़कियन आउ औरतियन के साथ खेले आउ हुल्लड़बाजी करे लगी जा हलइ, आउ कोय ओकन्हीं के बलात्कार से बच नञ् पावऽ हलइ। बेटियन, जेकरा लगी कोय प्रेमी नञ् हलइ, अपन ऊबाहट दूर करऽ हलइ कताई करे वली औरतियन के ऊपर, जेकन्हीं में से कइएक लोग के अपंग कर दे हलइ। तूँ हीं बताहो, कइसन नतीजा अइसन व्यवहार के हो सकऽ हलइ? हम कइएक उदाहरण से नोटिस कइलिए ह कि रूसी लोग बहुत धैर्यवान होवऽ हइ, आउ बिलकुल हद तक बरदास करऽ हइ; [*129] लेकिन जब बरदास से बाहर हो जा हइ, त ओकन्हीं के क्रूरता पर उतारू होवे से कुछ नञ् रोक सकऽ हइ। ठीके एहे बात असेसर के साथ होलइ। ई घटना के अवसर देलकइ ओकर एक बेटा के बेलगाम आउ दुराचारी, चाहे बेहतर कहल जाय, वहशी व्यवहार।

---

[1] सिविल सर्विस आउ मिलिट्री सर्विस के साथ-साथ कोर्ट सर्विस के भी रैंक स्थापित कइल गेले हल। दे॰ -

http://marksrussianmilitaryhistory.info/Ranks.html

[2] कोय व्यक्ति जे कॉलेजिएट असेसर (रैंक 8) के रैंक तक पहुँच जा हलइ ऊ कुलीन वर्ग (gentry) में आ जा हलइ।

[3] कुलीन वर्ग (gentry) के कोय भी व्यक्ति भूदास (serfs) वला गाम खरीद सकऽ हलइ।

[4] विलियम होगार्थ [William Hogarth (1697-1764)] - अंग्रेज पेंटर आउ उत्कीर्णक (engraver) जे अपन जमाना के समाज के चित्रांकण (caricatured) कइलथिन हल। अन्य वस्तु के अतिरिक्त सैमुएल बटलर के उपन्यास "हुडिब्रास" के चित्रित (illustrated) कइलथिन हल।.

[5] लावातेर - दे॰ "नोवगोरद" के अंतर्गत, नोट 13.

[6] मेसिचिना - खाद्य पदार्थ के निश्चित परिमाण, जे जमींदार लोग महिन्ना में भूमिहीन कृषक लोग के देते जा हलइ।

[7] लाकेदेमोन  (Lacedaemon) - स्पार्टा, प्राचीन यूनानी राज्य लैकोनिया के राजधानी। स्पार्टा परवरिश के मुख्य कार्य बुतरुअन के शारीरिक विकास हलइ, आउ हियाँ तक कि निपुणता विकसित करे खातिर चोरी के भी अनुमति देल गेले हल।

[8] ज़पोरोझियन सेच (Zaporozhian Setch) - सोलहमी से अठारहमी शताब्दी में कज़ाक लोग के अर्द्ध-स्वायत्त आउ आदिमतम राज्य हलइ, जे आझकल के काख़ोव्का जलाशय के आसपास केन्द्रित हलइ आउ यूक्रेन के द्नियेपर (Dnieper) नदी के निचला भाग तक फैलल हलइ। सन् 1775 में एकरा समाप्त करके रूसी साम्राज्य में मिला लेवल गेलइ।