विजेट आपके ब्लॉग पर

Monday, July 29, 2019

पितिरबुर्ग से मास्को के यात्रा ; अध्याय 10. ज़ाय्त्सोवो - भाग 4

ई दिन हमर यात्रा खराब रहल; घोड़वन खराब हल, मिनटे-मिनटे बदले पड़ल; आखिर एगो छोटगर पहाड़ी से निच्चे उतरते बखत किबित्का के धुरा (axle) टूट गेल आउ हम आगू के यात्रा गाड़ी से नञ् कर पइलूँ। पैदल चल्ले के हमर आदत हले। छड़ी उठाके हम डाक स्टेशन तरफ आगू बढ़लूँ। लेकिन पितिरबुर्ग वासी लगी उच्च पथ (राजमार्ग, highway) पर सैर करना बहुत मनोरम नञ् होवऽ हइ, कम से कम ग्रीष्म उद्यान चाहे बाबा[1] में चहलकदमी नियन तो नञ्, जल्दीए हम एकरा से थक गेलूँ, आउ बैठ जाय लगी लचार हो गेलूँ।
[*148] दौरान जब हम पत्थल पर बैठल बालू पर कभी-कभी विभिन्न प्रकार के वक्राकार तिरछा आउ कोनाहा आकृति बनाब करऽ हलिअइ, आउ सोचब करऽ हलिअइ कि हमरा भिर से एगो कल्यास्का (घोड़ागाड़ी) गुजरऽ हइ। ओकरा में बैठल व्यक्ति हमरा देखके गाड़ी रोके के आदेश देलकइ आउ ओकरा में हम अपन एगो परिचित के पछनलिअइ।
"तूँ कीऽ कर रहलऽ हऽ?" हमरा पुछलकइ।
"बस सोचब करऽ हियो। सोचे लगी हमरा पास बहुत समय हइ; गाड़ी के धुरा टूट गेले हऽ।"
"कोय नावा खबर?"
"ओहे पुरनका कचरा। हवा के बदलाव के अनुसार मौसम, कभी पाँका (बारिश), कभी सुहाना मौसम। ओह! ... अइकी नयका खबर, दुरिन्दिन[2] शादी कर लेलकइ।"
"झूठ। ऊ तो अस्सी बरिस के हो चुकले ह।"
"बिलकुल सही। अइकी तोरा लगी एगो चिट्ठी हको ... अराम से पढ़ऽ, लेकिन हमरा तो जल्दी हको। अलविदा।" आउ हमन्हीं अलग हो गेते गेलिअइ।
ई चिट्ठी हमर एगो प्रिय मित्र से हलइ। सब तरह के समाचार के शौकीन ऊ हमरा वचन देलका हल कि हमर अनुपस्थिति में एकरा से सूचित करते रहता आउ ऊ अपन वचन पर कायम रहला। एहे दौरान हमर किबित्का में नयका धुरा लगा देवल गेले हल, जे भाग्यवश, अतिरिक्त (spare) में हलइ। यात्रा के दौरान हम पढ़लिअइ –
[*149]                                                                                                             पितिरबुर्ग
प्रिय मित्र!
हाल में हियाँ परी 78 साल के युवक आउ 62 साल के युवती के बीच शादी होलइ। एतना देरी के जोड़ी बनावे के कारण जानना तोरा लगी जरी मोसकिल होतो, अगर हम तोरा नञ् बतइबो। कान जरी खोलके रक्खऽ, हमर दोस्त, आउ सुन्नऽ। अभी 62 साल के मिसेज़ श... अपन तरह के अन्तिम हीरोइन नञ् हइ, 25 साल के उमर से विधवा हलइ। ऊ एगो व्यापारी के साथ बियाहल हलइ, जेकर व्यापार सफल नञ् हो पइले हल; ओकर चेहरा सुन्दर हलइ; पति के मौत के बाद गरीब अनाथ होल अपन पति के सहयोगी लोग के क्रूरहृदयता के बारे जानते ओकन्हीं से अपमानजनक भीख लगी निवेदन करे लगी नञ् चहलकइ, बल्कि अपन मेहनत से अपन पेट भरना उचित समझलकइ। जब तक जवानी के सुन्दरता ओकर चेहरा पर रहलइ, ऊ हमेशे अपन काम में लगल रहलइ आउ अपन प्रेमी लोग से उदार अदायगी पइते रहलइ। लेकिन जइसीं ऊ नोटिस कइलकइ कि ओकर सुन्दरता अब [*150] कम होवे लगले ह आउ ओकर कामुक कर्तव्य अब उबाऊ एकाकीपन के जगह दे रहले ह, त ऊ सोच में पड़ गेलइ आउ अपन पुरनका सौन्दर्य के अब कोय खरीदार नञ् पाके दोसरकन के साथ व्यापार करे लगी शुरू कइलकइ, जेकरा में अगर हमेशे सौन्दर्य के गुण नञ् रहऽ हलइ, तइयो कम से कम नयापन के गुण तो रहऽ हलइ। ई तरह से खुद लगी कुछ हजार (रूबल) जामा कर लेला पर, ऊ कुटनी (procuress) के घृणास्पद समाज से इज्जत के साथ बाहर निकस गेलइ आउ ऊ पैसा के सूद पर लगावे लगलइ, जे ऊ अप्पन आउ दोसर के निर्लज्जता से अर्जित कइलके हल। समय के साथ ओकर पहिलौका पेशा भुला देवल गेलइ; आउ भूतपूर्व कुटनी, बदचलन लोग के समाज में एगो अनिवार्य जीव हो गेलइ। 62 साल तक शांतिपूर्वक जीवन गुजारला पर ओकरा शैतान शादी करे के सलाह देलकइ। ओकर सब परिचित लोग के अचरज होवऽ हइ। ओकर सबसे नजदीकी सहेली N. ... ओकरा हीं मिल्ले लगी अइलइ।
"अफवाह हको, हमर प्रिये", ऊ उज्जर केश वली दुलहिन से बोलऽ हइ, "कि तूँ शादी करे लगी चाहऽ हकहो। हमरा लगऽ हको कि ई झूठ हइ। कोय जोकर (विदूषक) ई परीकथा के आविष्कार कइलको ह।" [*151]
श॰ - बिलकुल सही हको। कल मंगनी हको, हमन्हीं साथ दावत उड़ावे लगी आवऽ।
न॰ - तूँ पगला गेलऽ ह। कीऽ तोर बुढ़ाल खून गरमा गेलो ह; कीऽ कोय दुधपिलुआ तोरा भिर शरण में अइलो ह?
श॰ - आह, माय हमर! की तूँ समझऽ हीं कि हम एगो बुतरू नियन हवाई किला बनावऽ हिअइ? हम अपना लगी एगो योग्य वर चुन्ने वली हकिअइ ...
न॰ - हाँ, ई तो हम जन्नऽ हियो कि ऊ तोरा लगी योग्य वर हको। लेकिन आद रक्खऽ कि हमन्हीं नियन के अब कोय प्यार नञ् करे वला, सिवाय पैसा के खातिर।
श॰ - हम अइसन के नञ् लेवे वली जे हमरा धोखा दे। हमर दुलहा हमरा से 16 साल जादे उमर के हइ।
न॰ - तूँ मजाक करऽ ह!
श॰ - हमर बात पर विश्वास करऽ, ई सही हइ; बैरन (Baron) दुरिन्दिन।
न॰ - अइसन नञ् हो सकऽ हइ!
श॰ - बिहान शाम के तो आवऽ; तूँ देखबऽ कि हमरा झूठ पसीन नञ्। [*152]
न॰ - आउ अगर अइसन बात हइ, त पक्का ऊ तोरा से बियाह नञ् करतो, बल्कि तोर पैसा के चलते।
श॰ - लेकिन केऽ ओकरा ऊ देतइ? हमर दिमाग नञ् खराब होले ह कि पहिलौके रात ओकरा अपन पूरा संपत्ति दे देबइ; ओइसन समय कब के गुजर चुकले ह। सोना के नासदानी (snuffbox) , चानी के कुछ बकसुआ (buckles) आउ अइसनके कूड़ा, जे हमरा पास गिरवी रक्खल हइ, जेकरा छोड़ावल नञ् जा सकऽ हइ। त अइकी एतने दहेज हइ जे हमर प्रिय दुलहा के मिलतइ। आउ अगर ऊ खर्राटा भरके सोतइ, त ओकरा बिस्तर पर से भगा देबइ।
न॰ - ओकरा तो कम से कम नासदानी मिलतइ, लेकिन तोरा कीऽ मिलतो?
श॰ - अइसे कइसे, माय? एकरा अलावे आझकल के समय में एगो निम्मन उपाधि मिलना भी खराब नञ् हइ, कि हमरा लोग बोलतइ - "उच्च कुलोत्पन्ना!" (You Highborn), आउ जे जादे मूरख होतइ ऊ बोलतइ - "महामहिम!" (Your Excellency); लेकिन अइसन कोय तो होतइ, जेकरा साथ लमगर जाड़ा के शाम में कइसूँ अंट-संट में समय गुजारे लगी मिलतइ। लेकिन अभी तो हमेशे अकेल्ले बैठल रहऽ, बैठल रहऽ; आउ एहो खुशी के पल [*153] नञ् मिल्लऽ हके कि जब छींक आवे त कोय कहे - "छतन जी!" (शतं जीवऽ!) आउ जब अपन पति होत, त हमरा कभियो सरदी काहे नञ् धरे, हमेशे हमरा सुन्ने लगी मिल्लत - "छतन जी! हमर प्रिये, छतन जी! हमर डार्लिंग ..."
न॰ - अलविदा, प्रिये।
श॰ - बिहान मंगनी, आउ दू सप्ताह के बाद बियाह।
न॰ - (बाहर चल जा हइ।)
श॰ - (छिंक्कऽ हइ।) शायद वापिस नञ् अइतइ। केतना बेहतर होत, जब हमर पति साथ होत!
हैरान नञ् होवऽ, हमर दोस्त! ई संसार में सब कुछ पहिया नियन घुम्मऽ हइ। आझ समझदार, त कल मूर्ख नियन फैशन में होवऽ हइ। आशा करऽ हियो कि तूहूँ कइएक दुरिन्दिन के देखभो। अगर शादी से हमेशे ओकन्हीं के नाम नञ् होतइ त आउ कुछ से। बिन दुरिन्दिन के ई दुनियाँ तीनों दिन नञ् चलतइ।



[1] राजकुमार नरिश्किन के पारिवारिक ग्रीष्म निवास के इंग्लिश उद्यान, जे पितिरबुर्ग से तीन मील दूर, फ़िनलैंड खाड़ी के नगीच, पितिरबुर्ग-पितिरगोफ़ रोड पर पड़ऽ हइ। ई उद्यान रविवार के सब लोग लगी खुल्लल रहऽ हलइ। ई एतना सुन्दर हलइ कि लोग एकर प्रशंसा में चिल्ला हलइ - "बा! बा!"
[2] दुरिन्दिन - ई नाम "दुरिन्दा" शब्द से बनावल हइ। "दुरिन्दा", रूसी शब्द "दुराक" (मूर्ख) से दीर्घाकार अर्थ में व्युत्पन्न एगो शब्द हइ, अर्थात् दुरिन्दा - महामूर्ख।

No comments: