विजेट आपके ब्लॉग पर

Sunday, July 14, 2019

पितिरबुर्ग से मास्को के यात्रा ; अध्याय 8. नोवगोरद


[*99]                                                                नोवगोरद
 गौरवान्वित हो, शहर के अभिमानी संस्थापक लोग; गौरवान्वित हो, राज्य के संस्थापक लोग; सपना देखते जा कि तोहन्हीं के नाम के यश शाश्वत रहे; पत्थल पर पत्थल के ढेर लगावऽ बादर तक; अपन उपलब्धि के पत्थल पर उत्कीर्ण करावऽ, आउ शिलालेख तोहन्हीं के काम के उद्घोषणा करे। अपरिवर्तनीय कानून के रूप में सरकार के दृढ़ नींव डालऽ। समय अपन तेज दाँत के समूह से तोर मिथ्याभिमान पर हँसतो। सोलोन[1] आउ लिकुर्गुस[2] (Solon and Lycurgus) के विवेकपूर्ण कानून हइ जे एथेंस आउ स्पार्टा के स्वतंत्रता के स्थापित कइलकइ? पुस्तक में। आउ ऊ सब जगह में, जाहाँ परी ऊ सब लिक्खल गेलइ, राजदंड (sceptre) के दास लोग के चरावल जा हइ। ऊ भव्य ट्राय काहाँ हइ, कार्ताज[3] काहाँ हइ? मोसकिल से ऊ जगह देखाय दे हइ जाहाँ परी कभी ऊ शान से खड़ी हलइ। की प्राचीन मिस्र के प्रसिद्ध मन्दिर में सर्वशक्तिमान के देल गेल अनश्वर बलि रहस्यपूर्वक धुआँ निकासऽ हइ? ओकर भव्य खंडहर[4] मध्याह्न के गरमी के बखत मिमिअइते जानवर लगी आश्रयस्थल के काम दे हइ। [*100] ओकन्हीं सर्वशक्तिमान पिता के कृतज्ञता के आनन्दाश्रु से सिंचित नञ् होले ह, बल्कि जानवर के बदबूदार मल से। ओ स्वाभिमान! ओ मानव अभिमान, एकर अवलोकन के आउ देख कि तूँ केतना हद तक पतित हो गेलँऽ हँ!
अइसन विचार में मग्न हम नोवगोरद के यात्रा कर रहलूँ हल आउ ओकर चारो दने अवस्थित कइएक मठ के देख रहलूँ हल।
कहल जा हइ कि ई सब मठ, शहर से पनरह विर्स्ता दूरो पर वला, एकर भाग हलइ; कि एकर देवाल से लगभग एक लाख सैनिक बाहर निकस सकऽ हलइ। वर्षवृत्तान्त से मालुम पड़ऽ हइ कि नोवगोरद में लोकतंत्र हलइ। हलाँकि ओकन्हीं हीं राजकुमार होते जा हलइ, लेकिन अधिकार बहुत कम रहऽ हलइ। सरकार के पूरा अधिकार केन्द्रित रहऽ हलइ पसादनिक[5] आउ तिस्यात्स्की[6] में । लोग अपन असेम्बली, वेचे (Veche), में असली राजा होवऽ हलइ। नोवगोरद के क्षेत्र (territory) [*101] उत्तर में वोल्गा से भी पार तक फैलल हलइ। ई स्वतंत्र राज्य हानसिएटिक लीग[7] (Hanseatic League) के हलइ। प्राचीन कहावत "भगमान आउ महान नोवगोरद के विरुद्ध के ठहर सकऽ हइ?" ओकर प्रभुत्व के प्रमाण हो सकऽ हइ। व्यापार एकर विकास के कारण हलइ। आन्तरिक मतभेद आउ लालची पड़ोसी ओकर पतन के कारण[8] बनलइ।
पुल पर हम किबित्का से बाहर निकस गेलूँ ताकि हम वोलख़ोव नदी के बहाव के दृश्य के मजा ले सकूँ। असंभव हलइ कि ई अवसर पर नोवगोरद के कब्जा कइला पर हमरा सम्राट् इवान वसिल्येविच के कार्य आद नञ् आवइ। ई गणतंत्र के विरोध से आग-बबूला होल ई अभिमानी, हैवान, लेकिन चलाँक शासक, ओकर समूल नाश करे लगी चहलकइ[9]। हमरा ऊ  खड़ी देखाय दे हइ पुल पर कुल्हाड़ा के हत्था (butt) पकड़ले, जइसन कि कुछ लोग रिपोर्ट करते जा हइ, आउ नोवगोरद के बुजुर्ग आउ प्रधान लोग के अपन क्रोध के शिकार करते। लेकिन अइसन क्रूरता देखावे के ओकर की अधिकार हलइ; नोवगोरद के कब्जा करे के ओकर [*102] की अधिकार हलइ? की ई बात हइ कि पहिलौकन रूसी महान राजकुमार एहे शहर में रहते गेले हल? कि ऊ पूरे रूस के खुद के सम्राट् समझ लेलके हल? कि नोवगोरद के लोग स्लाव जनजाति के हलइ? लेकिन अधिकार के की बात कइल जाय जब जेक्कर लाठी ओक्कर भैंस होवऽ हइ? की एकर अस्तित्व हो सकऽ हइ जब फैसला लोग के खून से अंकित कइल रहतइ? की अधिकार के अस्तित्व हो सकऽ हइ जब एकर कार्यान्वयन लगी कोय शक्ति नञ् हइ? राष्ट्र के अधिकार के बारे बहुत कुछ लिक्खल गेले ह; एकर अकसर उल्लेख कइल जा हइ; लेकिन कानून के शिक्षक लोग कभी ई नञ् विचार करते गेलथिन कि कीऽ अनेक देश के बीच कोय जज हो सकऽ हइ। जब अनेक देश के बीच शत्रुता उत्पन्न होवऽ हइ, जब द्वेष चाहे लालच एक दोसरा पर आक्रमण करऽ हइ, तब ओकन्हीं बीच जज तलवार होवऽ हइ। जे पराजित चाहे निःशस्त्र कर देल जा हइ, ओहे दोषी कहलावऽ हइ; ऊ निर्विवाद रूप से ई फैसला के मान ले हइ, आउ एकर कोय अपील नञ् होवऽ हइ। ओहे से नोवगोरद सम्राट् इवान वसिल्येविच के हो गेलइ। [*103] ओहे कारण से ऊ एकरा बरबाद कर देलकइ आउ एकर धुअइँते खंडहर पर कब्जा कर लेलकइ। आवश्यकता, सुरक्षा आउ बचाव के कामना राज्य के निर्माण करऽ हइ; ओकर सर्वनाश करऽ हइ फूट, चालबाजी आउ बल। फेर राष्ट्र के कानून की हइ? कानून के विद्वान लोग के कहना हइ कि राष्ट्र सब में एक दोसरा के साथ ओहे संबंध होवऽ हइ जइसन एक मनुष्य के दोसरा के साथ प्राकृतिक दशा में होवऽ हइ। प्रश्न - प्राकृतिक दशा में एक मनुष्य के की अधिकार होवऽ हइ? उत्तर - ओकरा दने देख। ऊ नंगा हइ, भुक्खल, पियासल हइ।  अपन आवश्यकता के संतुष्टि खातिर ऊ सब कुछ हथिया ले सकऽ हइ। अगर कोय ओकरा लगी बाधा बने लगी चाहतइ, त ऊ बाधा के दूर कर लेतइ, ओकरा बरबाद कर देतइ, आउ अपन वांछित ले ले हइ। प्रश्न - अगर अपन आवश्यकता के संतुष्टि के रस्ता में अपने नियन कोय दोसरा से पाला पड़इ, मसलन अगर दू गो भुक्खल एक्के गो उपलब्ध टुकरी से अपन-अपन भूख मिटावे लगी चाहइ; [*104] त दुन्नु में से ऊ टुकरी पर केकर जादे हक हइ? उत्तर - ऊ जे टुकरी ले ले हइ। प्रश्न - लेकिन टुकरी केऽ लेतइ? उत्तर - जे जादे बरियार हइ। की वास्तव में ई प्राकृतिक अधिकार हइ, की ई लोग के अधिकार के आधार हइ! सब समय के उदाहरण ई बात के साक्षी हइ कि बिन शक्ति के अधिकार, कार्यान्वयन के समय में, हमेशे एगो अर्थहीन शब्द रहले ह। प्रश्न - सिविल अधिकार की हइ? उत्तर - जे डाकगाड़ी से यात्रा करऽ हइ, ऊ बकवास पर ध्यान नञ् दे हइ, आउ खाली एहे बात के चिंता करऽ हइ कि कइसे जल्दी से जल्दी घोड़ा मिल जाय।

नोवगोरद के वर्षवृत्तान्त (chronicle) से
नोवगोरद के लोग महान राजकुमार यारोस्लाव यारोस्लाविच के साथ युद्ध छेड़ देते गेलइ, आउ आखिर एगो लिखित शान्ति समझौता करते गेलइ।
नोवगोरद के लोग अपन स्वतंत्रता के रक्षा खातिर एगो अधिकारपत्र (charter) बनइते गेलइ आउ एकरा अनठामन मुहर (सील) से पुष्टि कइलकइ।
नोवगोरद के लोग तातार द्वारा टकसाल में ढालल प्रचलित सिक्का के अपन क्षेत्र में प्रचलन पर रोक लगा देते गेलइ।
[*105] नोवगोरद सन् 1420 ई॰ में खुद के सिक्का बनावे लगलइ।
नोवगोरद हानसिएटिक लीग से जुड़ गेलइ।
नोवगोरद में घंटा हलइ जेकर नाद से लोग वेचे में सार्वजनिक कार्य (public affairs) खातिर बात-विचार लगी एकत्र होते जा हलइ ।
सम्राट् इवान समझौता आउ घंटा नोवगोरद से छीन लेलकइ।
फेर सन् 1500 में - सन् 1600 में - सन् 1700 में - सन् - में, सन् - में, नोवगोरद अपन पहिलौके स्थान पर रहलइ।[10]
लेकिन हमेशे प्राचीन काल के बारे नञ् सोचल जा सकऽ हइ, आउ न हमेशे कल (भविष्य) के बारे सोचल जा सकऽ हइ। अगर हम एकटक आसमान दने निहारते रहिअइ, बिन ई देखले कि गोड़वा के निच्चे की हइ, त जल्दीए हम ठोकर खाके कादो में गिरबइ ... हम सोचब करऽ हलिअइ। तूँ बल्कि केतनो चिंता करहो, नोवगोरद के पहिले नियन नञ् बसावल जा सकऽ हइ। भविष्य तो भगमान के हाथ में हइ। अब रात के भोजन के समय हो चुकल ह। कार्प देमेन्त्यिच के घर जाम।
"अरे! अरे! अरे! स्वागत! कने से भूल पड़लऽ?" हमर दोस्त कार्प देमेन्त्यिच हमरा से बोलला। ऊ पहिले तेसर श्रेणी के व्यापारी हला, अभी एगो आदरणीय नागरिक[11]
जइसन कि कहावत हइ, [*106] भाग्यशाली पहुँचऽ हइ ठीक भोजन के समय पर। "कृपया बैठल जाय।"
"लेकिन तोरा हीं ई भोज कउन खुशी में?"
"हमर उपकारक, कल्हे हम अपन बेटा के विवाह कइलिअइ।"
"तोर उपकारक", हम सोचलिअइ, "बिन कारण ऊ हमरा एतना आदर नञ् करऽ हइ।" हम आउ कुछ आउ लोग ओकरा आदरणीय नागरिक में नाम दर्ज करवावे में मदत कइलिअइ। सन् 1737 में हमर बाबा (दादा) 1000 रूबल के भुगतान करे के वचनपत्र (promissory note) देलथिन हल; केकरा, हमरा नञ् मालुम। सन् 1780 में देमेन्त्यिच कहीं तो ऊ वचनपत्र के खरीद लेलकइ आउ ओकरा में विरोधपत्र जड़ देलकइ। ऊ हमरा भिर एगो कुशल प्रतिवक्ता (solicitor) के साथ अइलइ आउ ऊ बखत कृपापूर्वक हमरा हीं से पचास बरिस तक खाली सूद लेते गेलइ आउ पूरा मूलधन हमरा पास रहे देलकइ। कार्प देमेन्त्यिच कृतज्ञ व्यक्ति हइ।
"बहू, अप्रत्याशित अतिथि खातिर कुछ वोदका।"
"हम तो वोदका नञ् पीयऽ हिअइ।"
"लेकिन एक घूँट तो जरी चख लऽ।"
"नयका वर-वधू के स्वास्थ्य के नाम पर ..." आउ हम सब भोजन खातिर बैठते गेलिअइ।
हमर एक बगली मेजबान के बेटा बैठलइ, आउ दोसरा दने कार्प देमेन्त्यिच अपन नयकी बहू के बैठइलकइ।
[*107] ... (प्रिय) पाठक, ई कहानी के अभी रोके देल जाय। हमरा एगो पेंसिल दऽ आउ कागज के एगो पुरजा। हम तोहर मनोरंजन खातिर पूरे आदरणीय मंडली के चित्रण करबइ; आउ एकरा साथ तोहरा विवाह भोज के एगो सहभागी बनइबइ, चाहे बल्कि तूँ अलेउत द्वीप समूह[12] में ऊदबिलाव पकड़ रहल होबऽ। अगर हम ठीक-ठीक रूपचित्र (exact portraits) चित्रित नञ् कर पइअइ, त हम ओकर छायाचित्र (silhouettes) से संतुष्टि कर लेम। लावातेर[13] भी ओकर सहायता से ई जाने लगी सिखावऽ हइ कि केऽ चलाँक हइ आउ केऽ मूर्ख।
कार्प देमेन्त्यिच के दाढ़ी पक्कल हइ, जे निचला ठुड्डी से आठ विर्शोक लम्मा हइ। नाक गरुड़ के चोंच नियन टेढ़, आँख धँस्सल, भौं अलकतरा नियन कार, हस्तांदोलन (handshake) से हरेक कोय के अभिवादन करऽ हका, दाढ़ी पर हाथ फेरऽ हका, सबके आदरपूर्वक संबोधित करऽ हका - "हमर उपकारक"। अक्सिन्या परफ़ेन्त्येव्ना उनकर प्रिय पत्नी हथिन। साठ साल के उमर वली ऊ बरफ नियन उज्जर आउ खसखस नियन लाल हथिन, हमेशे अपन होंठ के सिकोड़के अँगूठी नियन गोल कर ले हथिन; राईन शराब नञ् पीयऽ हथिन, दुपहर के भोजन के पहिले अतिथि के साथ देवे खातिर खाली आधा कप, आउ भंडार कक्ष (pantry)  में एक गिलास वोदका। उनकर पति के क्लर्क अपन मालिक के खाता-बही देखावऽ हइ ... [*108] अकसिन्या परफ़ेन्त्येव्ना के औडर पर साल भर के स्टॉक खरीदल गेले ह - र्झेव[14] से 3 पूद[15] फ़ेस पावडर आउ 30 पौंड पत्तेदार सुर्खी (rouge) ... उनकर पति के क्लर्क लोग अकसिन्या के कामेर्डिनर[16] हइ। अलिक्सेय कार्पोविच भोजन के टेबुल भिर हमर पड़ोसी हइ। ओकरा अभी न तो मोंछ हइ न दाढ़ी, लेकिन नाक किरमिजी (crimson) हो चुकले ह, भौं मिचकावऽ हइ, केश गोलगंटा काटल हइ, सिर हिलइते आउ अपन केश सँवारते हंस नियन झुकके अभिवादन करऽ हइ। पितिरबुर्ग में एक दोकान में सहायक (shop assistant)  हलइ। जब ऊ एक अर्शीन[17] नापऽ हइ त एक विर्शोक[18] कम कर दे हइ; ओहे से ओकर बाप ओकरा खुद के नियन प्यार करऽ हइ; जब ऊ पनरह साल के हलइ, त अपन मइया के कान उमेठ (ऐंठ) देलके हल। परस्कोव्या देनिसोव्ना ओकर नयकी बियाहल पत्नी हइ, गोर आउ किरमिजी। ओकर दाँत कोयला नियन (कार) हइ[19]। भौं पतरा हइ, कारिख से भी जादे कार। मंडली के बीच आँख निच्चे कइले बैठऽ हइ, लेकिन दिन भर ऊ खिड़की नञ् छोड़ऽ हइ आउ हरेक मरद के एकटक देखते रहऽ हइ। साँझ के ऊ दरीचा (wicket gate) भिर खड़ी रहऽ हइ। ओकर एक आँख पर नील डालल हइ (अर्थात् कार होल हइ) - ई ओकर प्रिय पति के पहिला दिन के उपहार हइ; [*109] आउ जे प्रत्युत्पन्नमति हइ, ऊ जान ले हइ कि काहे।
लेकिन प्रिय पाठक, तूँ तो झुक (ऊँघ) रहलऽ ह। अब छायाचित्र बनाना काफी हो गेलो। तोर कहना सही हको; दोसर कुछ नञ् होतो, सिवाय नाक पर नाक, ठोर पर ठोर के। हमरा तो ई नञ् समझ में आवऽ हको कि तूँ छायाचित्र में उजरका पावडर आउ किरमिजी रंग में फरक कइसे करबऽ।
"कार्प देमेन्त्यिच, तूँ अभी कउची के व्यापार करऽ ह? तूँ पितिरबुर्ग नञ् जा ह, तीसी (अलसी) नञ् लावऽ ह, आउ न तो चीनी, न कॉफी, न रंजक (dyes)। हमरा लगऽ हको कि कहीं तोरा व्यापार में घाटा तो नञ् लग गेलो ह।"
"हम तो एकरा से लगभग बरबाद हो गेलियो हल। लेकिन भगमान कइसूँ बचा लेलथुन। एक साल काफी नफा कमाके घरवली लगी हियाँ परी घर बनवइलियो। अगले साल तीसी के फसल निम्मन नञ् होलो आउ हम जे करार कइलिए हल ऊ दे नञ् पइलिअइ। ओहे से व्यापार करना बंद कर देलियो।"
"हमरा आद हको, कार्प देमेन्त्येविच, कि तीस हजार रूबल अग्रिम (advance) लेल खातिर तूँ एक हजार पूद कर्जदार लोग के [*110] आपस में बाँट लेवे लगी भेजलहो हल।"
"एकरा से जादे हमरा से बन नञ् पइलइ, हमर अंतःकरण पर विश्वास करऽ।"
"वास्तव में ऊ साल विदेशी माल के कमी हलइ। तूँ अग्रिम बीस हजार लेलहो हल ... हाँ, हमरा आद पड़ऽ हइ; ओकरा से तोरा सिरदर्द होलो।"
"वास्तव में, हमर उपकारक, हमर सिर में एतना दरद हल कि ई फटते-फटते बच्चल। हमर कर्जदार लोग कइसे शिकायत कर सकते जा हइ? हम ओकन्हीं के अपन सब सम्पत्ति दे देलिअइ।"
"रूबल पर तीन कोपेक।"
"बिलकुल नञ्, पनरह के हिसाब से।"
"आउ पत्नी के घर?"
"एकरा हम कइसे स्पर्श कर सकऽ हलिअइ; ई हम्मर नञ् हइ।"
"त हमरा बतावऽ, तूँ कउची के व्यापार करऽ ह?"
"कोय चीज के नञ्, कुच्छो के नञ्। जब से हम दिवालिया बन गेलूँ, हमर लड़का व्यापार करऽ हको। इमसाल गरमी में, भगमान के किरपा से, बीस हजार रूबल के तीसी के सप्लाय कइलकइ।"
"अगला साल, वास्तव में, पचास हजार के करार करतो, आधा रकम के अग्रिम लेतो, आउ लड़का अपन पत्नी खातिर घर बनवइतो ...।" अलिक्सेय कार्पोविच खाली मुसका हइ।
"हमर उपकारक, तूँ पुरनका जोकर हकऽ। [*111] काफी बकवास हो गेलइ; अब काम पर लगल जाय[20]।"
"हम पीयऽ ही नञ्, तूँ जानऽ हो।"
"तइयो एकाध घूँट तो लऽ।"
"एक घूँट लऽ, एक घूँट लऽ", हमरा लगलइ कि हमर गाल लाल होवे लगल, आउ भोज के आखिर में बाकी लोग नियन हमहूँ नीसा में धुत्त हो जइतिए हल। लेकिन भाग्यवश, हमेशे टेबुल भिर त नञ् बैठल जा सकऽ हइ, जइसे कि हमेशे चलाँक बन्नल रहना असंभव हइ। आउ बिलकुल ओहे कारण से, जेकरा से कभी-कभी हम बेवकूफ बन जा हिअइ आउ बकवास करऽ हिअइ, विवाह के भोज में हम अमत्त (sober) रहलिअइ।
 अपन मित्र कार्प देमेन्त्यिच के हियाँ से प्रस्थान कइला के बाद हम विचारमग्न हो गेलिअइ। सगरो स्थापित कइल विनिमय कानून (exchange law), अर्थात् व्यापारिक देयता (trade liabilities) के कठोर आउ त्वरित वसूली के अब तक हम अइसन कानून के रूप में मानऽ हलिअइ जे विश्वास बनइले रक्खऽ हइ; व्यापार के त्वरित प्रोत्साहन खातिर नयका जमाना के आनंदायक खोज मानऽ हलिअइ, जे प्राचीन काल के लोग के दिमाग में नञ् अइले हल। लेकिन काहे भुगतान के वचनपत्र देवे वला व्यक्ति जब बेईमान होवऽ हइ, [*112] त ई (वचनपत्र) खाली एगो रद्दी कागज के पुरजा रह जा हइ? अगर भुगतान के वचनपत्र के अनुसार कठोर वसूली अस्तित्व में नञ् रहइ, त की व्यापार समाप्त हो जाय? की उत्तमर्ण (ऋणदाता, creditor) के अधमर्ण (ऋणी, कर्जदार, debtor) के बारे जाने के नञ् चाही, जेकरा पर ऊ विश्वास करऽ हइ? कानून के केकरा बारे जादे खियाल रक्खे के चाही - उत्तमर्ण के, कि अधमर्ण के? मानवता के दृष्टि में केऽ अधिक आदर के योग्य हइ - अपन मूलधन गमावे वला उत्तमर्ण, ई कारण से कि ऊ जेकरा पर विश्वास कइलकइ ओकरा नञ् जानऽ हलइ, कि हथकड़ी-बेड़ी में आउ जेल में पड़ल अधमर्ण? एक दने सहज विश्वास, त दोसरा दने लगभग चोरी। ऊ विश्वास कइलकइ कानून के कठोरता पर, जबकि ई ... आउ अगर भुगतान के वचनपत्र के अनुसार वसूली ओतना कठोर नञ् होते हल त? त सहज विश्वास के स्थान नञ् रहते हल, त शायद वचनपत्र के मामले में धोखा नञ् होते हल ... हम फेर से सोचे लगलिअइ, पहिलौका पद्धति भाड़ में गेलइ, आउ हम चिन्तामुक्त होल सुत गेलूँ।



[1] सोलोन (Solon) - (लगभग 630 - 560 ई.पू.) एथेंस के राजनीतिज्ञ, कानून निर्माणकर्ता, आउ कवि। प्राचीन एथेंस में राजनीतिक, आर्थिक आउ नैतिक पतन के विरुद्ध कानून बनावे के प्रयास खातिर विशेष रूप से आद कइल जा हथिन। एथेंस में प्रजातंत्र के नींव स्थापित कइलथिन।
[2] लिकुर्गुस (Licurgus) - लगभग नौमी-आठमी शताब्दी ई॰पू॰ में स्पार्टा के अर्द्ध-पौराणिक (semi-legendary) कानून-निर्माता।
[3] कार्ताज (Carthage, Carthago) - उत्तरी अफ्रिका में प्राचीन कार्ताज सभ्यता के केन्द्र या राजधानी शहर, जे प्राचीन रोम के प्रतिस्पर्द्धी हलइ। कार्ताज के तीन युद्ध में रोम विजयी होलइ आउ कार्ताज पृथ्वी पर से मिट गेलइ।
[4] प्राचीन मिस्र, जे 18 वीं शताब्दी में तुर्की साम्राज्य के एगो प्रान्त हलइ, निर्जन खंडहर बन गेलइ।
[5] पसादनिक - निर्वाचित अधिकारी, जे नोवगोरद में सिविल सरकार के प्रभारी होवऽ हलइ, जेकर तुलना शहर के मेयर से कइल जा सकऽ हइ।
[6] तिस्यात्स्की - निर्वाचित अधिकारी, जे सेना के कमांडर होवऽ हलइ आउ नोवगोरद के पुलिस जेकर अधीन में काम करऽ हलइ।
[7] नोवगोरद वस्तुतः हानसिएटिक लीग के सदस्य नञ् हलइ, लेकिन एकरा साथ नगीची व्यावसायिक संबंध कायम बनइले रहऽ हलइ। लीग के नोवगोरद में एगो स्थायी व्यापारिक केन्द्र (ट्रेडिंग स्टेशन) हलइ।
[8] नोवगोरद में सामन्ती संबंध के विकास, सामन्ती विरोधी वर्ग-संघर्ष (class struggle) के प्रोत्सान देलकइ। 12मी-15मी शताब्दी के बीच नोवगोरद में 80 बड़गो उपद्रव होलइ। 15मी शताब्दी के उत्तरार्द्ध में, जब नोवगोरद गणतंत्र, रूस के सामन्ती विखंडन (feudal fragmentation) के उन्मूलन में एगो ब्रेक हो गेलइ, त मास्को के साथ मिल जाय के समर्थक लोग आउ लिथुआनिया के ग्रैंड प्रिस के नागरिकता में परिवर्तन के प्रस्तावक लोग के बीच गृहयुद्ध बन्द नञ् होलइ। एकरा एगो सुन्दर अवसर देखके इवान तृतीय (1440-1505), जे मास्को के ग्रैंड प्रिंस (1462-1505) आउ समग्र रूस के ग्रैंड प्रिंस कहला हलइ, नोवगोरद के साथ युद्ध छेड़ देलकइ। सन् 1471 में मास्को के सेना नोवगोरद के लोग के शेलोन नदी पर के युद्ध में परास्त कर देलकइ, आउ 1477-1478 के अभियान के फलस्वरूप नोवगोरद गणतंत्र के अस्तित्व समाप्त हो गेलइ।
[9] इवान वसिल्येविच - इवान तृतीय (1440-1505), "इवान महान" से भी प्रसिद्ध; दे॰ उपर्युक्त नोट 54. नोवगोरद के अतिरिक्त, यारोस्लाव्ल, रोस्तोव, त्वेर आउ प्स्कोव के अपन अधिकार-क्षेत्र में मिला लेलकइ। रूसी अधिनायकतंत्र के सबसे महत्त्वपूर्ण निर्माणकर्ता  में ऊ एक हलइ।
[10] ई सब नोवगोरद के वर्षवृत्तान्त से मुक्त अनुवाद कइल उद्धरण हइ । नोवगोरद के वर्षवृत्तान्त के पहिले तुरी मास्को से सन् 1781 में प्रकाशन होले हल। एकर वैज्ञानिक संस्करण ए.एन. ननोसोव के संपादन में "नोवगोरोद्स्कयऽ पेर्वयऽ लेतोपिस" (नोवगोरद के पहिला वर्षवृत्तान्त) शीर्षक से मास्को-लेनिनग्राद से 1950 में प्रकाशित होलइ। बाद में एकर संशोधित संस्करण (संपादक बी.एम. क्लोस) मास्को से सन् 2000 में निकसलइ। 
[11] तेसर श्रेणी के व्यापारी ऊ लोग हलइ जेकर पूँजी 500 से 1000 रूबल होवऽ हलइ। शासनपत्र (चार्टर) द्वारा शहर सब में स्थापित कइल "आदरणीय नागरिक" श्रेणी के लोग शारीरिक दंड से मुक्त हलइ आउ एकरा कइएक तरह के दोसर-दोसर विशेषाधिकार प्राप्त हलइ। दे॰ 21 अप्रैल 1785 के कानून, "पोल्नए सब्रानिये ज़कोनव रसिस्कय इम्पेरिइ, स् 1649 गोदा" (सन् 1649 से रूसी साम्राज्य के कानून के सम्पूर्ण संग्रह), पितिरबुर्ग, 1830; XXII, 358-384, No.16188.(हियाँ से आगू PSZ संक्षिप्त रूप से निर्दिष्ट)।
[12] अलेउत द्वीप समूह (Aleutian Islands) - बेरिंग समुद्र आउ प्रशांत महासागर के बीच अवस्थित (अक्षांश 51 से 55 डिग्री उत्तर, देशांतर 172 डिग्री पूरब आउ 163 डिग्री पश्चिम) अलेउत द्वीप समूह ऊ समय रूसी साम्राज्य के अंश हलइ। अलेउत द्वीप समूह 1867 के पहिले कैथेरिन द्वीप समूह के नाम से जानल जा हलइ। एकरा में 14 बड़गर ज्वालामुखीय द्वीप आउ 55 छोटगर द्वीप हइ, जे संयुक्त राज्य के अलास्का राज्य आउ रूस के कमचात्का क्राय - ई दुन्नु के अधिकार क्षेत्र में हइ।
[13] लावातेर - योहान कास्पार लावातेर (1741-1801), स्विस कवि, लेखक, दार्शनिक, आकृतिविज्ञानी आउ धर्मविज्ञानी (theologian); पुस्तक "Physiognomische Fragmente zur Beförderung der Menschebkenntnis und Menschenliebe" (मानव ज्ञान आउ मानव प्रेम के उन्नयन खातिर आकृतिविज्ञान के अंश), 4 खंड, (लाइप्त्सिग, 1775-1778) के लेखक, जेकरा में ऊ दावा कइलथिन कि चेहरा के विशेषता आउ खोपड़ी के आकार से मनुष्य के चरित्र आउ ओकर प्रवृत्ति के अंदाज लगावल जा सकऽ हइ।
[14] र्झेव (Rzhev) - मास्को से लगभग 229 कि.मी. पश्चिम एगो शहर।
[15] पूद - प्राचीन रूस में मात्रा के एगो ईकाई; 1 पूद = 16.38 किलोग्राम।
[16] कामेर्डिनर [Kammerdiener (जर्मन)] - घर के कमरा में काम करे वला निजी नौकर, valet.
[17] अर्शीन - प्राचीन रूस में लम्बाई के एगो ईकाई; 1 अर्शीन = 71.12 cm सें.मी.।
[18] विर्शोक - प्राचीन रूस में लम्बाई के एगो ईकाई; 1 अर्शीन = 4.445 सें.मी.।
[19] सतरहमी आउ अठारहमी शताब्दी के रूसी चोंचलेबाज के बीच सौन्दर्य के आदर्श लगी दाँत के काला करना एगो फैशन हलइ।
[20] हियाँ परी बोरोज़दिन, लापशिन आउ षिवोलेव द्वारा संपादित "यात्रा" के संस्करण (1907), पृ॰93 में एक पंक्ति हइ, जे पहिला संस्करण (1790) में नञ् हइ - "निवेस्त्का व्स्तान दा पदनिसी गोस्त्याम।" - अर्थात् "बहू, उठहो आउ अतिथि लोग लगी पेश करहो।"

No comments: