6. मगही विडियो-कैसेट के लोकार्पण

मगही क्षेत्र के चर्चित संस्था 'मगही विकास मंच, जहानाबाद' के तरफ से मगही कवि-सम्मेलन के विडियो-कैसेट जारी करल गेल । शहर के राजा बाजार स्थित मगही विकास मंच कार्यालय में एकर लोकार्पण 4 जनवरी 2008 के कैल गेल । कवि-सम्मेलन के तीन कैसेट क्रमशः 'बिहान', 'खोईंछा' आउ 'फुहार' के लोकार्पण मगही के प्रसिद्ध कवि राम विनय शर्मा 'विनय' के हाथ से होएल । तीनों कैसेट में आठ-आठ गो कवि के जनप्रिय कविता के शामिल करल गेल हे । ई कैसेट के निर्माता अरविंद कुमार मिश्र, सह-निर्माता अमर अलंकृत आउ निर्देशक विनीत कुमार मिश्र 'अकेला' हथ । एम॰व्ही॰एम॰ (मगही विकास मंच) प्रोडक्शन से जारी कैसेट के विशेषता ई हे कि अगर देखेओला लोग एक्को गो कैसेट के देखतन त उनका कैसेट पूरा लगत । समसामयिक, हास्य-व्यंग्य, विरह आउ शृंगार से ओतप्रोत कविता रहे से दर्शक पूरा कैसेट देखते रह जएतन आउ पतो न चलत कि कइसे समय बीत गेल । एकर पहिले भी मगही विकास मंच के तरफ से 'हथिया-हथिया शोर कएलऽ' (बिआह गीत) आउ 'चढ़ल सवनवाँ' (काँवर गीत) जारी करल गेल हल । कवि सम्मेलन के कैसेट के दाम पचीस रुपइया (प्रति कैसेट) रक्खल गेल हे । ई एगो सराहनीय कदम हे ।

--- अजीत कुमार मिश्र 'अविनाश', अलका मागधी, अप्रैल 2008, पृ॰ 4