विश्वप्रसिद्ध रूसी नाटक "इंस्पेक्टर" ; अंक-4 ; दृश्य-6

दृश्य-6

(ख़्लिस्ताकोव आउ अरतेमी फ़िलिप्पोविच)

अरतेमी फ़िलिप्पोविच - (तनके सावधान मुद्रा में खड़ी आउ हाथ में तलवार लेले प्रवेश) खुद के परिचय देवे में सम्मानित अनुभव करऽ हिअइ - अनुदान संस्था के न्यासी, कोर्ट काउंसिलर ज़िम्ल्यानिका ।

ख़्लिस्ताकोव - अपने के निम्मन स्वास्थ्य के कामना करऽ हिअइ । हार्दिक निवेदन हइ कि अपने बैठ जाथिन ।

अरतेमी फ़िलिप्पोविच - हमरा अपने के साथ देवे आउ हमर अधीक्षण के अंतर्गत अनुदान संस्था में व्यक्तिगत रूप से स्वागत करे के सम्मान मिललइ ।

ख़्लिस्ताकोव - ओ, हाँ ! आद हइ । अपने बहुत निम्मन मध्याह्न भोजन करइलथिन हल ।

अरतेमी फ़िलिप्पोविच - पितृभूमि के सेवा हेतु प्रयास करना हमरा लगी खुशी के बात हइ ।

ख़्लिस्ताकोव - हम, स्वीकार करऽ हिअइ, ई हमर कमजोरी हइ कि हमरा निम्मन भोजन पसीन पड़ऽ हइ । किरपा करके बताथिन, हमरा लगऽ हइ कि जइसे कल्हे अपने कद में जरी छोटगर लगऽ हलथिन, सच हइ न?

अरतेमी फ़िलिप्पोविच - बहुत संभव हइ । (थोड़े देर चुप रहला के बाद) हम कह सकऽ हिअइ, कि हम कोय कसर नयँ छोड़ऽ हिअइ आउ उत्साह से अपन कर्तव्य के पालन करऽ हिअइ । (अपन कुरसी के साथ आउ नगीच आवऽ हइ आउ आधा फुसफुसाहट में बोलऽ हइ) हियाँ के पोस्टमास्टर बिलकुल कुछ नयँ करऽ हइ, सब काम में बड़गो लापरवाही होवऽ हइ, पैकेट सब रोकके रक्खल रहऽ हइ ... ई बात के खुद जाँच कर लेथिन । जज भी, जे अभी-अभी हमरा आवे के पहिले हाजिर होला हल, खाली खरगोश के पीछू-पीछू घूमते रहऽ हका, ऑफिस में कुत्ता रक्खऽ हका, आउ अगर हमरा अपने के सामने स्वीकार करे के चाही, जे वस्तुतः पितृभूमि के हित में हमरा अइसन करना कर्तव्य हइ, त हलाँकि ई हमर रिश्तेदार आउ दोस्त हथिन, हम कहबइ कि इनकर व्यवहार अत्यंत निंदनीय हइ । हियाँ एगो जमींदार हका, दोबचिन्स्की, जिनका से अपने मिल चुकलथिन हँ; आउ जइसीं दोबचिन्स्की घर से कधरो बाहर निकसऽ हका, कि ऊ (जज) उनकर बीवी के साथ बैठ जा हका, हम (ई मामले में) कसम खाय लगी तैयार हिअइ ... आउ बस खाली उनकर बुतरुअन तरफ देखथिन - ओकन्हीं में से एक्को गो के शकल दोबचिन्स्की से नयँ मिल्लऽ हइ, हियाँ तक कि, सबसे छोटकी बेटिया के शकल बिलकुल जज से मिल्लऽ-जुल्लऽ हइ ।

ख़्लिस्ताकोव - की कहऽ हथिन ! आउ हम तो अइसन बिलकुल नयँ सोचऽ हलिअइ ।

अरतेमी फ़िलिप्पोविच - आउ अइकी हियाँ के स्कूल इंस्पेक्टर ... हमरा तो समझ में नयँ आवऽ हइ कि प्राधिकारी द्वारा कइसे ओकरा अइसन पद देल गेलइ - ऊ तो याकोबिन (Jacobin) [23] से भी बत्तर हइ, आउ युवा वर्ग के मस्तिष्क में अवांछित विचार पैदा करऽ हइ, जेकरा अभिव्यक्त करना भी कठिन हइ । की अपने चाहथिन कि बेहतर हम ई सब कुछ लिखित रूप में दे दिअइ ?

ख़्लिस्ताकोव - ठीक हइ, लिखित में हीं सही । हमरा बड़ी खुशी होतइ । जानऽ हथिन, हमरा केतना पसीन पड़ऽ हइ ऊबाहट के बखत कुछ मनोरंजक चीज पढ़ना ... अपने के पारिवारिक नाम की हइ ? हम हमेशे भूल जा हिअइ ।

अरतेमी फ़िलिप्पोविच - ज़िमल्यानिका ।

ख़्लिस्ताकोव - ओ हाँ ! ज़िमल्यानिका । आउ किरपा करके बताथिन, की अपने के बाल-बुतरू हइ ?

अरतेमी फ़िलिप्पोविच - जी, पाँच गो हइ; दू गो जवान हो चुकले ह ।

ख़्लिस्ताकोव - की कहऽ हथिन, जवान ! आउ ओकन्हीं कइसे ... कइसे ओकन्हीं के ... ?

अरतेमी फ़िलिप्पोविच - मतलब अपने पुच्छे लगी चाहऽ हथिन, ओकन्हीं के की नाम हइ ?

ख़्लिस्ताकोव - हाँ, ओकन्हीं के नाम की हइ ?

अरतेमी फ़िलिप्पोविच - निकोलाय, इवान, एलिज़ावेता, मारिया आउ पिरिपेतुआ ।

ख़्लिस्ताकोव - निम्मन नाम हइ ।

अरतेमी फ़िलिप्पोविच - हम अपन उपस्थिति से अपने के कष्ट देवे के हिम्मत कइले बेगर, पवित्र कर्तव्य लगी अपने के सुनिश्चित समय लेवे लगी नयँ चाहऽ हिअइ ... (बाहर जाय के मंशा से आदरार्थ झुक जा हइ ।)

ख़्लिस्ताकोव - (दरवाजा तक साथ जइते) नयँ, कोय बात नयँ । अपने जे कुछ बोललथिन, बड़ी मजेदार हलइ। किरपा करके दोसरो बखत भेंट देथिन ... हमरा ई बहुत पसीन हइ । (लौट जा हइ आउ दरवाजा खोलके ओकर पीछू चिल्ला हइ) अजी ! अपने के की ? हम अपने के नाम आउ पैतृक नाम हमेशे भूल जा हिअइ ।

अरतेमी फ़िलिप्पोविच - अरतेमी फ़िलिप्पोविच ।

ख़्लिस्ताकोव - हमरा पर अनुग्रह करथिन, अरतेमी फ़िलिप्पोविच । हमरा साथ एगो विचित्र घटना हो गेलइ - रस्ता में हमर जेभी बिलकुल खाली हो गेलइ । की अपने के पास उधार देवे लगी पैसा होतइ - एहे कोय चार सो रूबल ?

अरतेमी फ़िलिप्पोविच - जी, हइ ।

ख़्लिस्ताकोव - कहथिन, कइसन संयोग हइ । हार्दिक धन्यवाद ।

  

सूची            पिछला                     अगला