विश्वप्रसिद्ध रूसी नाटक "इंस्पेक्टर" ; अंक-4 ; दृश्य-7

दृश्य-7

(ख़्लिस्ताकोव, बोबचिन्स्की आउ दोबचिन्स्की)

बोबचिन्स्की - खुद के परिचय देवे में सम्मानित अनुभव करऽ हिअइ - ई शहर के निवासी, प्योत्र, इवान के पुत्र, बोबचिन्स्की (अर्थात् प्योत्र इवानोविच बोबचिन्स्की) ।

दोबचिन्स्की - जमींदार प्योत्र, इवानोव के पुत्र, दोबचिन्स्की ।

ख़्लिस्ताकोव - ओह, हाँ, हमरा तो अपने से भेंट हो चुकले ह । अपने, लगऽ हइ, तखने गिर गेलथिन हल ? की, अपने के नाक कइसन हइ ?

बोबचिन्स्की - भगमान के किरपा ! चिंता नयँ करथिन, जखम मुरझा चुकले ह, अब बिलकुल मुरझा चुकले ह।

ख़्लिस्ताकोव - ई तो निम्मन बात हइ, कि जखम मुरझा चुकले ह । हमरा ई बात के खुशी हइ ... (अचानक आउ तेजी से) अपने के पास पैसा हइ ?

बोबचिन्स्की - पैसा ? कइसन पैसा ?

ख़्लिस्ताकोव - (उच्च स्वर में आउ तेजी से) उधार कोय एक हजार रूबल ।

बोबचिन्स्की - एतना रकम तो, भगमान कसम, हमरा पास नयँ हइ । आउ अपने के पास हइ, प्योत्र इवानोविच?

दोबचिन्स्की - जी, हमरा पास तो नयँ रहऽ हइ, काहेकि हमर पैसा तो, अगर जाने लगी चाहऽ हथिन, पब्लिक चैरिटी ट्रस्ट के पास जमा हइ ।

ख़्लिस्ताकोव - खैर, अगर हजार नयँ हइ, त लगभग सो रूबल सही ।

बोबचिन्स्की - (जेभी टटोलते) अपने के पास, प्योत्र इवानोविच, सो रूबल हइ ? हमरा पास नोट के रूप में खाली चालीस रूबल हइ ।

दोबचिन्स्की - (अपन बटुआ में चेक करते) कुल्लम पचीस रूबल ।

बोबचिन्स्की - जरी आउ निम्मन से खोजथिन, प्योत्र इवानोविच ! हमरा मालुम हइ, कि अपने के दहिना जेभी में सुराख हइ । हो सकऽ हइ कि सुराख में कइसूँ सरक गेले होत ।

दोबचिन्स्की - नयँ, सचमुच, सुराख में भी नयँ हइ ।

ख़्लिस्ताकोव - खैर, कोय बात नयँ । हम अइसीं पूछ रहलिए हल । ठीक हइ, पैंसठ रूबल ही सही । कोय बात नयँ । (पैसा ले ले हइ ।)

दोबचिन्स्की - हम एगो बहुत नाजुक परिस्थिति के मामले में अपने से निवेदन करे के हिम्मत करऽ हिअइ ।

ख़्लिस्ताकोव - ई कउची हइ ?

दोबचिन्स्की - जी, ई मामला बहुत नाजुक प्रकार के हइ - हमर बड़का लड़का, देखथिन, हमर शादी के पहिले पैदा होले हल ।

ख़्लिस्ताकोव - हाँ ? !

दोबचिन्स्की - मतलब ई खाली अइसे कहे के बात हइ, लेकिन ओकर जन्म हमरा से बिलकुल ओइसीं होलइ, जइसे कि मानूँ शादी में, आउ जइसन चाही, ई सब कुछ के बाद में उचित ढंग से शादी के कानूनी बंधन के साथ पूरा कइलिअइ, श्रीमान । ओहे से, श्रीमान देखथिन, हम चाहऽ हिअइ कि ई अब बिलकुल, मतलब, कानूनन हमर बेटा होबइ आउ एकरा हमरे नियन पुकारल जाय - दोबचिन्स्की ।

ख़्लिस्ताकोव - ठीक हइ, अइसीं पुकारल जाय ! ई संभव हइ ।

दोबचिन्स्की - हम तो अइसे अपने के कष्ट नयँ देतिए हल, लेकिन ओकर प्रतिभा पर तरस आवऽ हइ । बुतरू अइसन हइ ... बड़गो आशा प्रदान करऽ हइ - मुँहजबानी  कविता सुना दे हइ, आउ अगर कहीं ओकरा फोल्डिंग नाइफ़ (penknife) मिल जा हइ, त एतना दक्षतापूर्वक छोटकुन्ना द्रोश्की (घोड़ागाड़ी) उकेर दे हइ, जइसे कि जी, एगो जादूगर । अइकी ई बात प्योत्र इवानोविच भी जानऽ हथिन ।

बोबचिन्स्की - हाँ, ई लड़का के बड़गो प्रतिभा हइ ।

ख़्लिस्ताकोव - ठीक हइ, ठीक हइ ! हम एकरा बारे प्रयास करबइ, हम बतइबइ ... हमरा आशा हइ ... ई सब कुछ हो जइतइ, हाँ, हाँ ... (बोबचिन्स्की दने मुड़के) की अपने के भी हमरा से कुछ कहना हइ ?

बोचिन्स्की - जी, काहे नयँ, एगो अत्यंत नम्र निवेदन हइ ।

ख़्लिस्ताकोव - की, कउची के बारे ?

बोबचिन्स्की - हम तहे दिल से निवेदन करऽ हिअइ, कि जइसीं अपने पितिरबुर्ग पहुँचथिन, त हुआँ बतइथिन कइएक तरह के सब्भे महापुरुष लोग के -  सीनेटर आउ ऐडमिरल लोग (senators and admirals) के, कि महामहिम, फलना-फलना शहर में प्योत्र इवानोविच बोबचिन्स्की रहऽ हथिन । आउ अइसीं बतइथिन - प्योत्र इवानोविच दोबचिन्स्की रहऽ हथिन ।

ख़्लिस्ताकोव - बहुत अच्छा ।

बोबचिन्स्की - आउ अगर अपने तत्रमहान् (His Majesty) से दर्शन होवे के अवसर मिलतइ, त उनको भी बतइथिन, कि अत्र राजकीय महान् (Your Imperial Majesty), फलना-फलना शहर में प्योत्र इवानोविच बोबचिन्स्की रहऽ हइ ।

ख़्लिस्ताकोव - बहुत अच्छा ।

दोबचिन्स्की - अपन उपस्थिति से अपने के अइसे कष्ट देवे लगी हमरा क्षमा करथिन ।

बोबचिन्स्की - अपन उपस्थिति से अपने के अइसे कष्ट देवे लगी हमरा क्षमा करथिन ।

ख़्लिस्ताकोव - कोय बात नयँ, कोय बात नयँ ! हमरा खुशी होलइ । (दुन्नु के बाहर के रस्ता देखावऽ हइ ।)

  

सूची            पिछला                     अगला