विजेट आपके ब्लॉग पर

Friday, June 12, 2020

भूदासत्व से मुक्ति तक - अध्याय 16


16. येलेत्स आउ चुगूयेव में [1]
पिताजी के निधन के खबर हमन्हीं हीं जेनरल यूज़ेफ़ोविच के माध्यम से पहुँचलइ। ऊ जेतमा बन सकलइ, ओतना हमन्हीं के बेचारी मइया के नयका प्रहार के हलका करे के प्रयास कइलथिन। ऊ हमन्हीं के शोक में खुद भी शामिल होलथिन; बोललथिन कि दिवंगत में एगो अपूरणीय सहायक से वंचित हो गेलथिन; उनकर परिवार के पहिलहीं नियन खियाल रखथिन।
पिताजी के निधन के पहिले एगो विचित्र घटना घटलइ। मानवीय जीवन के क्लिष्ट आउ जटिल घटना के बीच अइसनो से पाला पड़ऽ हइ, जे सीधा-सादा लोग में जाने-अनजाने अंधविश्वास के प्रवृत्ति पैदा कर दे हइ। अइसने हमर मइयो के साथ होलइ। पिताजी के मौत के कुछहीं समय पहिले ओकरा सपना अइलइ, जेकरा में ऊ अपन जिनगी के अन्तिम क्षण तक भविष्यसूचक अर्थ देखना बन्द नञ् कइलकइ। आउ वास्तव में, ई आश्चर्यजनक रूप से ओकर जिनगी के आगू के घटना सब से मेल बैठ गेलइ। ओकरा सपना अइलइ कि ऊ पिताजी आउ हमरा साथ कहीं तो जा रहले ह। जगह अनजान हइ। हम ओकर बगल में बैठल हिअइ। पिताजी, कोचवान के सीट पर, घोड़वा के हाँक रहलथिन हँऽ। अचानक आकाश मानुँ चमक उठऽ हइ, हमन्हीं के उपरे बिजली के बहिर कर देवे वला गरज सुनाय दे हइ। पिताजी अचानक गुम हो जा हथिन। भयभीत होल घोड़वा बिदक जा हइ आउ गड़िया उलटे-उलटे पर हो जा हइ। मइया आतंकित हो जा हइ। लेकिन हम लगाम पकड़ ले हिअइ आउ चिल्ला उठऽ हिअइ - "डरऽ मत, हम सब पहुँच जइते जइबइ, जाहाँ हमन्हीं के जाय के हइ - हम हाँकबो।" दू दिन बाद पिताजी के निधन के खबर अइलइ, आउ हमरा वास्तव में अपन अभियो तक दुर्बल हाथ में हमन्हीं के पारिवारिक संसार के प्रबंधन लेवे पड़लइ आउ ओकरा जिनगी के राह में आगू बढ़ावे पड़लइ।
साल 1820 आ गेलइ। जेनरल यूज़ेफ़ोविच के, ड्रगून डिविजन के बजाय, पहिला अश्व-गार्ड डिविजन के कमान सौंपल गेलइ। अश्व-गार्ड डिविजन येलेत्स में पड़ाव डालले हलइ, जाहाँ लगी दिमित्री मिख़ाइलोविच के भी तुरते रवाना होवे पड़लइ। ऊ अपना साथ हमरो बोलावे लगलथिन। एक तरफ तो उनका आउ उनकर बहिन के प्रति लगाव, आउ दोसरा दने - परिवार खातिर लाभ, जेकरा लगी हम एकमात्र भरण-पोषण करे वला हलिअइ, हमरा सहमत होवे लगी बाध्य कर देलकइ। मइया, जेकरा लगी ई नयका वियोग केतनो कष्टकारक काहे नञ् रहे, लेकिन तइयो हमर निर्णय के तर्कपूर्ण आधार समझ लेलकइ आउ हमर प्रस्थान के विरोध नञ् कइलकइ। आउ हम तो कहीं पृथ्वी के अन्तिम छोर पर नञ् जा रहलिए हल! लेकिन हमरा ओस्त्रोगोझ्स्क के मित्र मंडली के छोड़ना असान काम नञ् हलइ। आउ हमरो शक्को नञ् हलइ कि हम ओकन्हीं के नजर में ओतना महत्त्वपूर्ण व्यक्ति हिअइ। ऊ मंडली, जेकरा में हम घूमते-फिरते रहऽ हलिअइ, आउ खास करके हमर शिष्य लोग के माता-पिता परेशान हो गेलथिन। हमरा पर उलाहना के झड़ी लग गेलइ। जेनरल के भी प्राप्त होलइ, ई कारण से कि ऊ हमरा "अपहरण कइलथिन" - लेकिन उनका खाली नजर के पीछू, लेकिन हमरा तो खुल्लल तौर पर शहर के धोखा देवे खातिर डाँटते-फटकारते गेलइ, [*95] जे हमरा हार्दिक रूप से आश्रय देलके हल। हम तो हक्का-बक्का आउ दुखी हो गेलिअइ, हम ऊ वचन के वापिस लेवे के तैयारी कर रहलिए हल, जे हम जेनरल के देलिए हल, लेकिन ऊ मिलिट्री शैली में औडर देलथिन - पल भर में आँधी नियन घर पर अइलथिन आउ हमरा अपना पीछू लेके चल गेलथिन, सोचे के कोय अवसर देले बेगर।
आउ ई तरह हम येलेत्स आ पहुँचलिअइ। जेनरल के एगो उत्तम, बड़गर आवास देल गेलइ - शहर के एगो सबसे धनी व्यापारी, झेलुदकोव, के पूरा घर। येलेत्स ऊ जमाना में जिला स्तर के एगो उत्तम शहर मानल जा हलइ। ई बड़ी निम्मन ढंग से बन्नल हलइ। एकरा में पत्थल के कइएक बिल्डिंग हलइ, प्रसंगवश, बाइस चर्च, आउ ऊ जमाना में लगभग नञ् सुन्नल ठाट-बाट - ई पत्थल के सड़क के गौरव कर सकऽ हलइ। बाहर से देखे में येलेत्स, कहल जा सकऽ हलइ, हमर प्रिय ओस्त्रोगोझ्स्क से कहीं अधिक आकर्षक हलइ, लेकिन तइयो ओतनहीं घटिया हलइ आंतरिक रखरखाव आउ एकरा में जिनगी के तौर-तरीका के मामले में। येलेत्स खाली व्यापार वला शहर हलइ - ई बड़गो पैमाना पर अन्न के आटा के व्यापार करऽ हलइ - कुलीन वर्ग के लोग लगभग नञ् हलइ। स्थानीय अभिजात वर्ग के व्यापारी लोग हलइ, जेकन्हीं के एक्के उद्देश्य हलइ - मुनाफा। ई तरह, ओकन्हीं बीच सब प्रतियोगिता सीमित हलइ एक दोसरा के डींग हाँकना, आउ ई उद्देश्य के पूरा करे खातिर चतुराई आउ ठगी के उत्तम साधन मानते जा हलइ। नौकरशाही ओकन्हीं साथ प्रतियोगिता करऽ हलइ मुनाफा लगी प्रयास करे में, आउ पैसा कमाय के कला में; नौकरशाह लोग बिन कोय अपवाद के घूस ले हलइ आउ राजकोष (treasury) के लुट्टऽ हलइ। हियाँ के प्रवर्तक, जइसन कि अइसन परिस्थिति में होवे के चाही, शहर में पहिला अधिकारी हलइ - मेयर। एगो सेवा-निवृत्त कर्नल, बिन एक गोड़ के, ऊ, जइसन कि कहल जा हइ, जीवित आउ मृत के खाल उधेड़के रख दे हलइ आउ संगत (corresponding) प्रतिष्ठा के लाभ उठावऽ हलइ अपनहीं नियन लोग के बीच। शहर के लोग के रहन-सहन पुरनका रीति के हलइ, बचकाना-गंदा आउ असभ्य - ओकन्हीं में सामाजिक आउ पारिवारिक गुण लगी कोय स्थान नञ् हलइ। हुआँ के औरतियन, अपन ददियन के उदाहरण के अनुकरण करके, अभियो पाउडर आउ सुर्खी (rouge) से खुद के रूप बिगाड़ऽ हलइ।
ई लोग के धर्म निष्ठा घर में कमोबेस प्रतिमा के साथ बनावल प्रतिमा-पेटी (icon-cases) से जादे दूर नञ् जा हलइ, आउ उपवास के अनुपालन, जेकरा में लेकिन चरबीदार स्तेर्लेत मछली (sterlets) आउ कचौड़ी के पेटूपन छोड़ल नञ् जा हलइ। चर्च के पास से गुजरते बखत चाहे कोय मुरदा मिल गेला पर, ओकन्हीं अपन निरार आउ पेट पर क्रॉस के बड़गो संकेत दर्शावऽ हलइ, लेकिन पुरोहित पर नजर पड़ गेला पर, गरमजोशी के साथ थूक दे हलइ।
लेकिन ई सब, कम से कम व्यापारी लोग के बीच, न तो अपन प्रकार के नेकदिली (सुशीलता) आउ न स्लाव लोग के परंपरागत गुण - अतिथि-सत्कार, के वर्जित करऽ हलइ, जे ई असभ्य लोग के विशेष गुण हलइ, जेकर जड़ समाज के प्राचीन पूर्वाग्रह में हलइ। खाली अतिथि-सत्कार ओकन्हीं हीं अपनहीं ढंग के हलइ, ओकन्हीं के अपनहीं ढंग के तौर-तरीका के अनुसार। (मसलन) एगो धनी व्यापारी मेहमान लोग के आमंत्रित करतइ, ओकन्हीं के निम्मन से भोजन करइतइ; आ बाद में घर के दरवाजा बन्द करे के औडर देतइ। पीए के समय चालू होतइ। कोय मेहमान अपन घर नञ् जा सकतइ, आउ जाने-अनजाने, होश खोवे तक पीए पड़तइ। ई तरह से सत्कार नञ् करना चाहे सत्कार स्वीकार नञ् करना अशिष्टता आउ बड़गो अपमान समझल जइतइ।
लेकिन, हियों परी, सगरो नियन, नियम बिन अपवाद के नञ् हलइ। ई सामान्य अनुशासनहीनता आउ स्वेच्छाचारिता से कइएक [*96] व्यापारी परिवार के छूट हलइ, छूट शिक्षा के आधार पर नञ् हलइ, निस्संदेह, जेकर पहुँच ई व्यापारी खोंथा में नञ् हलइ, बल्कि खुद के अप्पन नैसर्गिक, अधिक परिष्कृत रुचि आउ प्रवृत्ति के आधार पर। अइसन लोग में, प्रसंगवश, एगो बहुत धनी सम्मानित नागरिक, कोनोनोव, आउ हमन्हीं के घर के मालिक, झिलुदकोव, के परिवार हलइ। ओकन्हीं के नैतिकता में कुछ तो संयम हलइ, आउ घरेलू वातावरण में - अनुशासन आउ शांति के प्रयास। दुन्नु के उपनगरीय क्षेत्र में दाचा (देहात के बँगला) हलइ, जेकरा में शानदार पार्क आउ उष्णगृह (hothouse, greenhouse) हलइ। हुआँ परी जेनरल के शानदार भोजन देल जा हलइ, जेकरा लगी हमरो उनकर परिवार के साथ आमंत्रित कइल जा हलइ। हियाँ परी, कहे के जरूरत नञ्, न तो रंगरेली हलइ, न कइसनो तरह के अतिशयता (excesses) - सब कुछ शिष्टतापूर्वक सम्पन्न होलइ, "कुलीनतापूर्वक"। लेकिन, हमन्हीं लगी दोसरो घरवन में छूट देल गेलइ। आउ मेहमान आउ मेजबान दुन्नु जेनरल से डरल हलइ, जे ओकन्हीं के सामने शालीनतापूर्वक खुद के संयमित रखलथिन। उनका लगी फाटक पूरा खुल्लल रहऽ हलइ, आउ असली छूट (पार्टी के असली मजा) खाली उनकर प्रस्थान के बादे शुरू होवऽ हलइ।
जेनरल यूज़ेफ़ोविच के घर में हमर जिम्मेवारी अब खाली आन्ना मिख़ाइलोव्ना के बेटी के पढ़ावे तक सीमित नञ् हलइ। हमरा आउ तीन भतीजा के शिक्षा के भार सौंपल गेलइ, जेकन्हीं के येलेत्स में स्थान्तरित होवे से उनकर परिवार बढ़ गेले हल। ई तीनों माशिन्का के भाय हलइ। ओकन्हीं के पिता, जइसन कि पहिलहीं हम बता चुकलिए ह, भ्रमरोग से पीड़ित हलइ, आउ ई दौरान बिलकुल पागल हो चुकले हल आउ जल्दीए मर गेलइ। ई लड़कन में से दू गो में कोय विशेष बात नञ् हलइ, आउ ओकन्हीं साथ सब कब कुछ सहजता से चल रहले हल। लेकिन तेसरका, क्सेनोफ़ोन्त, जे आलसी आउ उच्छृंखल हलइ, कभी-कभी बेकाबू भी हो जा हलइ, हमरा लगी बहुत चिंता पैदा करऽ हलइ। ओकरा पर न तो कड़ाई आउ न दुलार काम करऽ हलइ। अधिक अनुभवी शिक्षक, शायद, ओकरा सँभाल सकते हल, लेकिन हम, जे खुद अभियो लगभग लड़का हलिअइ, ठीक-ठीक नञ् जानऽ हलिअइ कि ओकरा कीऽ कइल जाय।
ई बेचारा क्सेनोफ़ोन्त हमर वर्तमान परिस्थिति के खुशहाल अनुभव के बीच कुछ अवधि लगी एकमात्र काँटा बन्नल रहलइ। सामान्य रूप से येलेत्स में हमर जीवन दू अवधि में वर्गीकृत कइल जा सकऽ हइ। पहिला, जेकरा में सब कुछ निम्मन रहलइ, हमर सबसे निम्मन स्मृति वला सबसे छोटगर अवधि। माशिन्का आउ हमर दिल के दोसर प्रियजन के वियोग के कष्ट गुजर गेलइ; मित्र लोग के हमर विरुद्ध गोस्सा के कारण हमर कष्ट शांत पड़ गेलइ, आउ हम कुछ समय तक खुद के खुशहाल अनुभव कइलिअइ। छोटकन बुतरुअन के साथ हमर माय के, कुछ हद तक, परवरिश हो गेलइ। हम खुद पहिले के अपेक्षा अब अपन पूजा के पात्र के अधिक नगीच हलिअइ। दिमित्री मिख़ाइलोविच ऊ बखत के हमर सब हवाई किला के हीरो हलथिन। ऊ हमरा सब संभव वीरता के प्रतिमूर्ति प्रतीत होवऽ हलथिन। हम बिन कोय संदेह के उनका पर विश्वास करऽ हलिअइ। आउ ऊ हमरा प्रति ई काल में उदार भी हलथिन! येलेत्स में स्थानान्तरित होला पर हम खाली उनकर घरवे में नञ् रहऽ हलिअइ, बल्कि उनकर परिवार के सदस्य हमरा साथ बराबरी के बर्ताव करते जा हलथिन। हमर चारो तरफ संतोष, गरमजोशी आउ लालित्य (warmth and elegance) के वातावरण हलइ, जेकर प्रभाव में बिन कोय बाधा के हमर नैतिक आउ शारीरिक विकास के प्रक्रिया जारी रह सकऽ हलइ। दिमित्री मिख़ाइलोविच लगातार हमरा चर्चा खातिर बोलावऽ हलथिन, आउ प्रतीयमानतः (apparently), हमर अपरिमित स्वप्न से सहानुभूति रक्खऽ हलथिन। त ई अचरज के बात नञ् हइ, अगर हम फूल-फल रहलिए हल, अधिक साहसी आउ निस्संकोच बन रहलिए हल, एक शब्द में, हमर उत्साह उड़ान भर रहले हल - लेकिन लमगर अवधि तक नञ्, आउ खुशहाल आत्म-अनवधानता (self-forgetfulness) के ई पल खातिर हमरा कटुतापूर्वक भुगतान करे पड़लइ। ओहे हाथ, जे हमर उत्साह बढ़इलके हल, अपन नयका शक्ति से ओकरा फेर कुचलियो देलकइ।
[*97] हम पहिलहीं कइएक तुरी अपन लेखकीय आकांक्षा के उल्लेख कर चुकलिए ह। हियाँ, येलेत्स में,जाहाँ परी सब कुछ हमर स्वाभिमान के एतना आनंद प्रदान करऽ हलइ, ई नयका शक्ति के साथ उछल-कूद मचावे लगलइ। हम तो जे॰ जे॰ रूसो के "La Nouvelle Heloïse"[2] के शैली में उपन्यास लिक्खे के निश्चय कर लेलिअइ। हमरा हाल में ई रचना के कोय पोतेमकिन द्वारा कइल खराब अनुवाद पढ़े के अवसर मिलले हल, आउ "एमिल" (Emile) के भी, जे कोय एलिज़ाबेथ देलसाल (Elizabeth Del’salle) द्वारा अनूदित कइल हलइ। दुन्नु रचना के हमरा पर गहरा प्रभाव पड़लइ, आउ हम, कुछ समय तक सोचते, एकरा में से पहिला के अनुकरण के काम हाथ में लेलिअइ। हम बारी-बारी से लिक्खऽ हलिअइ आउ लिखलका के फाड़ दे हलिअइ। हम बहुत्ते कागज पर लिखलिअइ आउ ओतने फाड़ियो देलिअइ। स्पष्टतः, काम ठीक से नञ् हो पा रहले हल। लेकिन हम हार नञ् मनलिअइ आउ कभी-कभी रात भर हम ई बकवास लगी बैठल रहऽ हलिअइ, जे, हम अभी खुशी से कहऽ हिअइ, अइसीं अधूरा रह गेलइ। ई मामले में भी हमर प्रेरक भी ओहे दिमित्री मिख़ाइलोविच हलथिन। ऊ, सच हइ, हमर लिक्खल अभी तक एक्को लाइन नञ् पढ़लथिन हल, लेकिन हमेशे जानऽ हलथिन कि हमर दिमाग में कीऽ चल रहले ह। फुरसत के समय, शाम के चाय के बाद, हमरा से पूछताछ करना पसीन करऽ हलथिन कि हम कीऽ करऽ हिअइ, कीऽ लिक्खऽ हिअइ, हियाँ तक कि कीऽ सोचऽ हिअइ, आउ हमेशे हमर सब्भे इरादा के प्रति अनुमोदन के साथ बर्ताव करऽ हलथिन। आउ अचानक कइसन परिवर्तन! हम विशेष उत्साह से अपन प्लान के बारे विश्वासपूर्वक उनका बतइलिअइ। मूड़ी गोतले जेनरल सुनते रहलथिन। अचानक व्यंग्यात्मक मुसकान उनकर होंठ के विकृत कर देलकइ, आउ ओकरा से, हमेशे नियन शुभकामना के स्थान पर, दाहक टिप्पणी (caustic remark) फूट पड़लइ - "व्यर्थ के", ऊ कहऽ हथिन, "तूँ एतना उँचगर सपना देखऽ हीं, जेकरा लगी तोरा न तो नैतिक आउ न वास्तविक अधिकार हउ।" हमर आँख के आगू तो अन्हेरा छा गेलइ - ई कीऽ हइ, द्वेषपूर्ण मजाक कि कटु सत्य? हमरा गहरा धक्का लगल, लेकिन जादे समय लगी नञ्। अप्रत्याशित प्रहार के तीक्ष्ण पीड़ा, दर्दनाक हिचकिचाहट के रस्ता खोल देलकइ। अचूक (infallible) जेनरल, हमर नजर में, निस्संदेह, सही हलथिन, हम नञ् खाली बिन कानूनी अधिकार के हलिअइ, बल्कि प्रतिभाहीन भी। हमर सब हार्दिक प्रयास आउ स्वप्न - स्वाभिमान के एगो खेल हलइ। ठीके हइ - अब से कोय नञ् वास्तव में हमरा एकरा लगी ताना मारतइ। हम अपन पुस्तक आउ कागज सब के समटलिअइ, लपकल रसोईघर में गेलिअइ आउ एक झोंका में ई सब कुछ के दहक रहल चूल्हा में फेंक देलिअइ, जेकरा से फ्रेंच रसोइया के बड़गो अचरज होलइ।
ई कारनामा कुछ समय खातिर तो मानुँ हमर ऊर्जा खाली कर देलकइ। नैतिक आउ शारीरिक रूप से थकके, हम निर्जीव हो गेलिअइ। लेकिन जेनरल त्वरित गति से हमरा ओकरा से बाहर निकासे लगी अइलथिन। हम बहुत देर तक चुप रहलिअइ आउ अधिकाधिक हमरा अपन नगण्यता के बोध होवे लगलइ। लेकिन दिमित्री मिख़ाइलोविच अधिकाधिक क्रूर आउ विषैला होते गेलथिन। तब हमहूँ कठोर हो गेलिअइ आउ काफी स्पष्ट रूप से टिप्पणी कइलिअइ - "आज के बाद न तो विवेकहीन प्रयास, न कोय अइसन क्रियाकलाप पर हमरा कोय उलाहना देतइ, जे हमरा नञ् फबतइ; हम अपन पुस्तक आउ कागज जला देलिअइ"। जेनरल के हमर शब्द ढीठ लगलइ, आउ व्यवहार मूर्खतापूर्ण, हमरा कठोर फटकार देलथिन आउ चल जाय के औडर देलथिन। अपन कमरा में अकेल्ले हम खुद के बहुत अभागल अनुभव कइलिअइ। आदर्श ऊँचाई से पतन, जाहाँ परी हम अभी तक पूरा जोश के साथ उड़ान भर रहलिए हल, बहुत त्वरित हलइ; ई हमरा स्तब्ध भी कर देलकइ, आउ पुरनका घाव हरा कर देलकइ। कुछ समय बाद हमर स्वाभिमान जाग गेलइ आउ हमरा खुद पर आउ अपन परिस्थिति पर काबू पावे में मदत कइलकइ। लेकिन पहिले तो हम आउ कुछ नञ् सोच पइलिअइ, सिवाय दिमित्री मिख़ाइलोविच के साथ दुखद टकराव के। उनका प्रति पुलकित प्रेम हमर दिल में एगो बुताय लगल आग के अन्तिम धधक नियन [*98] पूरा शक्ति के साथ लहक उठलइ। हम अपन अपमान आउ गोस्सा के भूल गेलिअइ आउ खाली एक्के चीज के कामना करऽ हलिअइ - अपन देवता के साथ समझौता। दोसर दिन के पहिलौके मोलकात के दौरान हम दिमित्री मिख़ाइलोविच के कुछ तो एहे प्रकार के बात बतइलिअइ। ऊ भावशून्य ढंग से हमर बात सुनलथिन आउ हमरा असंतुष्ट रूप में जाय लगी कह देलथिन।
ई समय से उनका आउ हमरा बीच देवाल खड़ी हो गेलइ। जेनरल फेर हमरा साथ समय नञ् गुजारऽ हलथिन आउ हमरा तरफ खाली अपन भतीजवन के केवल शिक्षक के रूप में देखऽ हलथिन। आउ हम खुद के अपने आप में सीमित कर लेलिअइ आउ अपन कर्तव्य के निर्वाह में। हमन्हीं, स्पष्टतः, दुन्नु परस्पर हतोत्साह हलिअइ, आउ हरेक अपन क्षेत्र में वापिस आ गेलिअइ। न तो हम खुद, आउ न आसपास के कोय बता सकऽ हलइ कि कीऽ होलइ। हमरा अभियो नञ् स्पष्ट हइ, अगर ई सब के श्रेय ऊ सख्त बेमारी के पहिलौकन लक्षण के नञ् देल जाय, जे जल्दीए उनका में विकसित होलइ। लेकिन ई खाली एगो अंदाज हइ, आउ दिमित्री मिख़ाइलोविच के हमरा प्रति उदासीनता के, शायद, कोय तो ठोस, लेकिन हमरा लगी अनजान कारण हलइ।
लेकिन हमरा प्रति आन्ना मिख़ाइलोव्ना के व्यवहार पहिलहीं नियन हार्दिक आउ मित्रतापूर्ण रहलइ, हियाँ तक कि, अगर अइसन कहल जाय, नयका गरमजोशी सहित, आउ यूज़ेफ़ोविच के घर में हमर निवास के अंतिम समय तक अइसीं बरकरार रहलइ। लेकिन विशेष बहुमूल्य हलइ हमरा लगी दिमित्री मिख़ाइलोविच से बिलगाव के बाद उनकर पहिलौका क्षण के सहानुभूति, जब हम कइएक तरह के मिश्रित भावना के अस्तव्यस्तता में फँस गेलिए हल। हमरा खुद में, अपन इरादा के सच्चाई आउ वैधता में एतना विश्वास करे लगी मन करऽ हलइ कि हम ओकरा में विश्वास खोवे लगी नञ् चाहऽ हलिअइ, जेकर विचार कल तक हमरा लगी कानून हलइ। धीरे-धीरे ई सब कुछ, निस्संदेह, शांत पड़ गेलइ, नैसर्गिक प्रवृत्ति अपन पथ पर चल पड़लइ आउ हमरा में सर्वशक्तिमान लीवर (lever) - स्वाभिमान - के सहायता से ऊ नैतिक आउ बौद्धिक लीक पर फेर से प्रवेश कइलिअइ, जेकरा पर से हम घसक गेलिए हल। नयकन पुस्तक के आगमन होलइ, फेर से कागज के ढेर लग गेलइ। फेर से हमर कपोल-कल्पना भावी सफलता के मृगतृष्णा के चित्रांकन करे लगलइ, आउ हम पहिलौके नियन युग्म जीवन (double life) जीए लगलिअइ। नञ्, हम सोचलिअइ, हम अशक्तहृदयता से (faintheartedly) अपन सिर नञ् झुकइबइ। जेनरल लोग के पूरी सेना बल्कि काहे नञ् हमरा विरुद्ध हथियार उठा लेय, हम अपन सिद्धान्त पर कायम रहबइ चाहे ... अगर सम्मानपूर्वक जीयल नञ् जा सकइ - त हम मर जइबइ। हमर प्रतिकृति (portrait) के निच्चे, लगऽ हलइ, अब आग्नेय अक्षर (blazing letters)  से हमर मस्तिष्क में अंकित हो गेले हल।
ई सब कुछ हमर मस्तिष्क में भँवर नियर चक्कर मार रहले हल, लेकिन हमर डायरी के पन्ना से बाहर आगू नञ् बढ़ रहले हल। अभी-अभी प्राप्त कइल अनुभव हमरा सावधान कर देलकइ। लेकिन भाग्य, स्पष्टतः, हमरा कठोर नञ् बनावे लगी चाहऽ हलइ - ऊ जल्दीए हमरा लगी एगो नयका दोस्त भेज देलकइ, जेकरा साथ हमर हार्दिक संबंध अभी तक नञ् टूटले ह। मास्को से जेनरल के एगो आउ भतीजा अइलइ - उनकर कइएक भतीजा हलइ - उनकर भाय के बड़का बेटा। ऊ अभी-अभी हुआँ परी मास्को यूनिवर्सिटी के कुलीन वर्ग के आवासीय स्कूल से कोर्स पूरा कइलके हल। ऊ येलेत्स अपन पिता के मौत के कुच्छे समय पहिले पहुँचलइ आउ अपन चाचा के घर पर रह गेलइ, उनकर कमान के अन्तर्गत कोय रेजिमेंट में प्रवेश पावे के इरादा से। ई एगो अल्पवयस्क व्यक्ति हलइ, हमरा से कुच्छे साल बड़गर, लेकिन पढ़ल-लिक्खल, आउ समाज में विशेष हस्ती द्वारा लगावल निम्मन चाल-चलन के ठप्पा (मुहर) सहित। लेकिन ओकर चरित्र में, चेहरा के मुद्रा में आउ अभिव्यक्ति के तरीका में, एगो विशेष प्रकार के [*99] मुँहफटई देखाय दे हलइ, जे दोसरा लोग द्वारा अहंकार आउ घमंड के अर्थ लगावल जा हलइ। कुच्छो आउ अधिक गलत नञ् हो सकऽ हलइ। मिख़ाइलो व्लादीमिरोविच खुद उदारता आउ सरलता के प्रतीक हलइ, आउ ओकर हृदय नञ् खाली उदार हलइ, बल्कि कोमल भी। ओकर काल्पनिक अहंकार आउ कुछ नञ् हलइ, बल्कि जवानी के साहस। ऊ एकरा से ओत-प्रोत हलइ, ऊ अधीर हलइ करामात खातिर, जे तुरतम्मे, बिलकुल जिनगी के दहलीजे पर, ओकरा एगो प्रौढ़ व्यक्ति बना देइ। लेकिन काहाँ परी ऊ अइसन अवसर खोजइ? आउ अइसन आशा में मिख़ाइलो व्लादीमिरोविच खुद के प्रसिद्ध करे लगी अधीर हलइ, कम से कम, द्वन्द्वयुद्ध से। ई मामले में कभी-कभी ओकर उत्साह हास्यजनकता से वंचित नञ् हलइ। आउ एक तुरी तो वास्तव में लगभग द्वन्द्वयुद्ध पर उतर अइलइ। मिख़ाइलो व्लादीमिरोविच के अपन चाचा के बहुत अधिक दृढ़ भक्त हलइ - ऊ तर्कसंगत रूप से उनकर बुद्धि, चरित्र, रैंक आउ मिलिट्री वीरता पर गर्व करऽ हलइ। आउ अचानक ओकरा भिर अफवाह पहुँचऽ हइ कि कोय तो अफसर कभी तो, कहीं तो जेनरल के बारे अनादरपूर्वक बात कइलकइ। गोस्सा से लाल हो जाना आउ साहस भरल चुनौती भेजना एक मिनट के काम हलइ। लेकिन, हाय! लेकिन कोय भी कभियो आदरणीय जेनरल के सम्मान पर ठेस पहुँचावे के प्रयास करे के सोचवो नञ् करऽ हलइ। अफवाह केकरो मनगढ़ंत बात साबित होलइ, आउ नञ् तो मूर्खतापूर्ण मजाक, नवयुवक यूज़ेफ़ोविच के चिढ़ावे के उद्देश्य से। ई तरह casus belli (अर्थात् द्वन्द्वयुद्ध के कारण) खुद्दे गायब हो गेलइ। हथियार डाल देवे पड़लइ, आउ अपन चाचा के खातिर उठ खड़ी होवे के असंभावना से, खुद के ई विचार के सांत्वना देलकइ कि अफसर मंडली के बीच ऊ दृढ़ प्रसिद्धि स्थापित कर लेलके हल। मिख़ाइलो व्लादीमिरोविच बस एहे कइलकइ।
हमन्हीं के दोस्ती लगभग पहिले भेंट से हो गेलइ, आउ समय के साथ आउ गहरा होते गेलइ। हमन्हीं के जोड़लकइ दुन्नु के एक्के तरह के रुचि आउ मानसिक अवस्था में समानता। आदर्शवाद के बेमारी से दुन्नु पीड़ित, हमन्हीं अभी तक आसपास के संसार में आउ खुद में व्यर्थ में अपन अपरिमित आवश्यकता के संतुष्टि खोज रहलिए हल। अब हमन्हीं के लगलइ कि हमन्हीं परस्पर में वांछित आधार बिन्दु खोज लेलिए हल। हमन्हीं समान तौर से प्राचीन आउ नयका संसार के हीरो लोग के प्रति लगाव रक्खऽ हलिअइ, आउ जवानी के धृष्टता आउ अनुभवहीनता से खुद्दे जरी ओकन्हीं नियन बन्ने लगी चाहऽ हलिअइ। हमर आन्तरिक जगत् आउ हमर बाह्य परिस्थिति के बीच विसंगति नवयुवक यूज़ेफ़ोविच के हमरा प्रति सहानुभूति पैदा कइलकइ - बाकी ओकर उत्कट कल्पना भर देलकइ। हमन्हीं के साहित्य के प्रति लगाव भी कम मेल नञ् खा हलइ। केतना मनोहर, आश्चर्यजनक घंटा हमन्हीं साथ-साथ गुजारते गेलिअइ, ई चाहे ऊ रचना पढ़ते आउ ओकर चर्चा करते, जेकरा में "एमिल" आउ "La Nouvelle Heloïse" के भी त्याग नञ् कइलिए हल, जे हमरा फेर से कहीं तो मिल गेले हल। हमन्हीं के अध्ययन आउ मित्रतापूर्ण बातचीत में कोय नञ् बाधा डालऽ हलइ। जेनरल, जइसन कि हम पहिलहीं बता चुकलिए ह, हमरा साथ समय गुजारना बिलकुल बंद कर देलथिन हल। लेकिन, उनका एकरा लगी समय भी नञ् हलइ। ऊ अकसर अपन डिविजन के रेजिमेंट के मुआइना करे लगी चल जा हलथिन, आउ बाकी सब समय कोय तो योजना के मसौदा बनावे में मग्न रहऽ हलथिन। ऊ जब ओस्त्रोगोझ्स्क में हलथिन तभिए से एकरा पर काम कर रहलथिन हल आउ अब जल्दीए सम्राट् के सामने प्रस्तुत करे वला हलथिन। ई तरह, हम आउ नवयुवक यूज़ेफ़ोविच खुद पर आउ अपन दोस्ती के भरोसे रह गेते गेलिए हल। स्वाभिमान एगो खराब चीज हइ! एकरा बेगर खराब लगऽ हइ, आउ एकरा साथ में शोक होवऽ हइ। ई हमन्हीं के दोस्ती में भी उलझ जा हलइ आउ अगर एकरा बरबाद नञ् करऽ हलइ, त खाली हमर दोस्त के असीम उदारता आउ सहिष्णुता के कारण। बात ई हलइ कि हम [*100] बहुत गरीब हलिअइ। हमर थोड़े सुन वेतन पूरा के पूरा हमर माय हीं चल जा हलइ - ई मोसकिल से ओकरा आउ चार-चार छोटकुन्ना बुतरुअन के भरण-पोषण खातिर पूरा पड़ऽ हलइ। लेकिन हम, जेनरल के हियाँ भोजन आउ आवास के सुविधा रहे से, अत्यन्त आवश्यक चीज के कमी कइसहूँ महसूस नञ् करऽ हलिअइ। शुरुआत में हमरा ई बिलकुल जानहूँ नञ् देलकइ, लेकिन धीरे-धीरे हमर पोशाक में नजर आवे लगलइ, आउ आखिर हमर पोशाक बहुत दयनीय स्थिति में आ गेलइ। उपरौला पोशाक तो कइसूँ ठीक-ठाक रहलइ, जे पिताजी द्वारा छोड़ल गेले हल, जे हमरा लोग के बीच रहे में काफी संतोषजनक लगऽ हलइ। लेकिन अन्तरीय (underclothes) भूड़े-भूड़ होल हलइ। हम सूई से काम लेहीं जाय वला हलिअइ कि कइसूँ सी-सा लेबइ चाहे कमीज के दयनीय देखाय देवे वला के मरम्मत (रफू) कर लेबइ। लेकिन जल्दीए ई असंभव लगलइ, आउ हम सूई फेंक देलिअइ। लेकिन, हम एकरा पर बहुत कम ध्यान देलिअइ - शोक कइला से कुछ फयदा नञ् होते हल, ओहे से, एकरा बारे सोचना बेकार हलइ। लेकिन हमरा लगी सोचलकइ दोसर कोय। हमर मिख़ाइलो व्लादीमिरोविच यूज़ेफ़ोविच कइसूँ हमर जरूरत के मालुम कर लेलकइ आउ अपन मदत करे लगी सोचलकइ। ओकर पिता एगो बड़गो छैला हलइ, आउ ओकर मौत के बाद पोशाक आउ फट्टल-पुरान कपड़ा के ढेर रह गेलइ। हमर दोस्त ओकरा में से कुछ चुन लेलकइ आउ हमरा ई सब के इस्तेमाल करे लगी कहलकइ - जे ओकरा खातिर फालतू हलइ। अइसन लग सकऽ हलइ कि ई बेहतर होतइ जबकि हमन्हीं के नगीची रिश्ता हइ। लेकिन हम अपमानित अनुभव करे के फैसला कइलिअइ। हमर गौरव ई उपहार से नाराज हो गेलइ, जेकरा लगी हम कुच्छो बदले में नञ् दे सकऽ हलिअइ। हुआँ कोय दोस्ती नञ् हइ, हम सोचलिअइ, जाहाँ परी एक के दोसरा पर निर्भरता हइ, आउ हमरा ओकरा पर निर्भर होबे पड़तइ, जेकर उपकार हम स्वीकार कइलिअइ। हम अपन गरीबी पूरे उदासीनता से बरदास कइलिअइ, आउ ई हमर नजर में माफी माँगे के बात नञ् हो सकऽ हलइ। सीधे आउ बिन कोय कड़वाहट के हम अस्वीकार कर देलिअइ प्रस्तावित उपहार के। भाग्यवश, यूज़ेफ़ोविच बिलकुल उदार हलइ। ऊ हमर स्थिति समझ गेलइ आउ हलाँकि खेद के साथ, लेकिन बिन दुर्भाव के हमर अस्वीकृति के स्वीकार कर लेलकइ। हमन्हीं के संबंध पर कोय प्रभाव नञ् पड़लइ। हमन्हीं पहिलहीं नियन जारी रखलिअइ हार्दिक रूप से बातचीत, जिनगी आउ मानव पर परस्पर विचार के मामले में विश्वासपात्र बन्नल रहना, पत्रिका में नयका-नयका साहित्यिक रचना पढ़ना, जेकर जेनरल प्रचुर संख्या में ग्राहक रहऽ हलथिन, आउ अधिवक्ता (solicitor)  के बेटी के सौन्दर्य के प्रशंसा करना - जे येलेत्स के नवयुवती के बीच एगो सितारा हलइ।
संयोगवश, ओकर बाप, अधिवक्ता के बारे। ई एगो चतुर व्यवसायी हलइ। ऊ जादेतर सरकारी काम के अपेक्षा प्राइवेट काम में जादे व्यस्त रहऽ हलइ आउ हर तरह के सच आउ झूठ से बहुत धन-सम्पत्ति बना लेलके हल। ओकर दू बेटा मास्को में शिक्षा प्राप्त कइलके हल, यूज़ेफ़ोविच के साथ, यूनिवर्सिटी आवासीय स्कूल में आउ ओकरे साथ येलेत्स में अइले हल। ओकरा में से एगो सीधा-सादा आउ मंदबुद्धि हलइ, दोसरा - बातूनी आउ छैला, सैलोन (salon) के चाल-चलन के आडंबर करऽ हलइ। अधिवक्ता के पत्नी आउ यूज़ेफ़ोविच आउ हमर उत्साह के पात्र के माय प्रादेशिक तौर-तरीका के एगो तेज-तर्रार औरत हलइ। ओकर फीका पड़ रहल सौन्दर्य के बावजूद, जेनरल ओकर उपेक्षा नञ् करऽ हलथिन आउ अपन सर्विस से फुरसत के समय साधारणतः एकान्त में ओकरा साथ बातचीत में गुजारऽ हलथिन। पति अपन प्रिय अर्द्धांगिनी के व्यवहार के अपन अँगुरी के बीच से देखऽ हलइ (अर्थात् नञ् देखे के ढोंग करऽ हलइ), ई आशा करते कि जेनरल के साथ ओकर पत्नी के दोस्ती ओकरो लगी निष्फल नञ् होतइ। ओकर हिसाब सही साबित होलइ। दिमित्री मिख़ाइलोविच ओकर कर्जा में नञ् रहलथिन आउ पत्नी के साथ सुहाना समय गुजारे खातिर पति के सेंट आन्ना, तेसरा दर्जा के पदक से पुरस्कृत कइलथिन। आउ आझ तक हम बिन नफरत के [*101] ओकर हर्षातिरेक आउ ऊ "प्रसिद्ध वरिष्ठ अधिकारी" के प्रति ओकर प्रशंसात्मक आउ कृतज्ञता के स्तोत्र के आद नञ् कर सकऽ हिअइ।
जेनरल यूज़ेफ़ोविच के घर में एक आउ व्यक्तित्व हलइ, जेकरा साथ भी हमर दोस्ताना रिश्ता हलइ। अल्पवयस्क व्यक्ति, बहुत सुंदर, सुसंस्कृत, नम्र आउ उत्तम व्यवहार वला, अलिक्सेय इवानोविच लकोन्ते के हुआँ परी विचित्र स्थिति हलइ आउ साधारणतः ओकर व्यक्तित्व रहस्यमय। ऊ पहिले मिलिट्री में सेवा कइलके हल, हियाँ तक कि फ्रांसीसी लोग के विरुद्ध अभियान में स्वयंसेवक के रूप में भाग लेलके हल, लेकिन कोय दस्तावेज नञ् होवे के कारण ओकरा बिन रैंक के बरखास्त कर देल गेले हल। मोसकिल से ऊ केकरो दुलारा बेटा नञ् हलइ। उपनाम (सरनेम) से फ्रांसीसी आउ परिष्कृत शिष्टाचार एवं चाल-चलन के निपुणता से, ऊ अइसन रूसी  बोलऽ आउ लिक्खऽ हलइ, जइसन ऊ जमाना में हमन्हीं हीं बोलल जा हलइ, लेकिन तइयो बहुत कोय नञ् लिक्खऽ हलइ। ओकर स्वर मधुर हलइ, आउ ऊ अकसर हमन्हीं के फैशनदार रोमांस गाके खुश कर दे हलइ, जे गिटार के मेल से रुचि आउ अभिव्यक्ति के साथ प्रदान करऽ हलइ। ओकर सुंदर चेहरा से कभियो उदासी के भाव नञ् जा हलइ, आउ ई हमरा ओकरा तरफ विशेष रूप से आकृष्ट कइलकइ। ओकर स्थिति के अनिश्चितता आउ खुद जेनरल के संरक्षण, प्रतीयमानतः, ओकरा पर भार हलइ, लेकिन ऊ या तो नञ् चाहऽ हलइ, चाहे नञ् जानऽ हलइ कि एकरा से निकसके आजाद कइसे होल जाय ...
लोग के कहना हलइ कि साधारणतः ई तीन लोग के संबंध में कोय तो रहस्य हइ - जेनरल, आन्ना मिख़ाइलोव्ना आउ लकोन्ते। अइसनो अफवाह हलइ, मानुँ दिमित्री मिख़ाइलोविच, जोशीला व्यक्ति आउ युवावस्था में दुर्जेय, एक समय अपन सहोदर बहिन के तरफ बहुत तीव्र रूप से आकृष्ट होलथिन हल, लेकिन अब ओकरा लगी लकोन्ते के निश्चित कइलथिन हल, जेकरा लगी ई उद्देश्य से घर में आश्रय देलथिन हल। अइसे नञ् तो ओइसे, हरेक तरह से ई सब तरह के अफवाह, कानाफूसी, आउ शायद तोहमत (slander) से कुच्छो समझना असान नञ् हइ। सगरो समाज के अइसनकन अफवाह आउ तोहमत के पसीन करऽ हइ, आउ प्रादेशिक क्षेत्र तो आउ जादे। यूज़ेफ़ोविच परिवार भी अइसनके संसार में बहुत स्पष्ट स्थान पर हलथिन, जाहाँ घुम्मऽ-फिरऽ हलथिन, आउ ओहे से विशेष सजीव कानाफूसी आउ अटकलबाजी के विषय हलथिन। यूज़ेफ़ोविच के घर में हमर निवास के दौरान कोय हमरा उनकन्हीं के रहस्य नञ् बतइते गेलइ, अगर अइसन कोय रहस्य के अस्तित्व हलइ, आउ हमरा कोय शंका नञ् हलइ कि अइसन प्रचंड भावावेश के बीच में रहऽ हिअइ।
दिमित्री मिख़ाइलोविच के हमरा प्रति आकस्मिक भावशून्यता, उनका न्याय देल जाय के चाही, हमर माय तक नञ् फैललइ। ऊ समझऽ हलथिन कि हाल में होल विधवा के अपन बेटा से वियोग केतना कष्टकारक होतइ, आउ ओकरा अपन बेटवा से भेंट करे के अवसर दे हलथिन। ऊ हमर माय के येलेत्स आवे लगी पत्र लिखलथिन आउ यात्रा के खरचा लगी रकम देलथिन, जेकरा में से ऊ कुछ बचा लेवे के मौका खोज लेलकइ ताकि हमर कपड़ा-लत्ता के नवीनीकरण कर सकइ। ओकर प्रस्थान के बखत हम खुद के एगो धनी व्यक्ति समझ सकलिअइ - हमरा पास चार नयका कमीज हलइ।
ऊ कइएक लोग में से, जेकन्हीं साथ हमरा मिल्ले-जुल्ले के ई दौरान अवसर मिलले हल, विशेष सजीवतापूर्वक हमर स्मृति में आकृति अंकित रह गेलइ ऊ बखत के कर्नल लेपार्स्की के। केऽ नञ् अभी जानऽ हइ नाम ई उदार कार्यकर्ता के? साइबेरिया में निर्वासित दिसंबरवादी लोग के गार्ड करे खातिर बोलावल, ऊ अपन कर्तव्यपालन में जरिक्को कोताही नञ् बरतते, ऊ अपन कठिन आउ जटिल कार्यभार निभावे के दौरान कइएक निम्मन आउ मानवीय धर्म के काम कर सकलथिन। अगर सरकार के, उनका ई पद पर नियुक्ति करके, अभागल लोग के भाग्य के थोड़ा हलका करे के उदार [*102] इरादा हलइ, त ऊ ई उद्देश्य (लक्ष्य) के पूरा तरह से प्राप्त कर लेलकइ। येलेत्स में लेपार्स्की अब युवक नञ् हलथिन, लेकिन स्फूर्तिमान आउ ताजा। जेनरल यूज़ेफ़ोविच के नेतृत्व में ऊ नोवगोरद-सेवेर्स्की अश्व-रेंजर रेजिमेंट के कमांडर हलथिन। आउ अधिक आकर्षक व्यक्तित्व के कल्पना करना मोसकिल हइ। ऊ बहुत नेकदिल हलथिन - ई देखाय दे हलइ उनकर लमगर, पूर्ण आकृति में; उनकर चेहरा पर चौड़गर उज्जर मोंछ में चमकऽ हलइ; उनकर नम्र संतुलित बोली में प्रतिध्वनित होवऽ हलइ, जेकर शुद्धहृदय स्वर जाने-अनजाने विश्वास पैदा करऽ हलइ। तइयो ऊ जानल जा हलथिन प्राधिकार के अपन स्थिति के महत्ता (importance of his position of authority) के बरकरार रखते अपन एक प्रकार के विशेष हार्दिक दक्षता के साथ विनम्रता आउ अपन अधीनस्थ लोग के प्रति वास्तविक पैतृक चिंतनशीलता खातिर (अर्थात् अधीनस्थ लोग के अनुशासन में रखते ओकन्हीं के प्रति पैतृक प्रेम भी दर्शावऽ हलथिन)। लेकिन ओकन्हिंयों उनका प्रति आत्मा आउ शरीर दुन्नु से समर्पित (निष्ठावान) हलइ।
एहे दौरान जेनरल के योजना (प्रोजेक्ट) पूरा हो गेले हल आउ पितिरबुर्ग भेजल गेले हल, आउ फेर लेखक के व्यक्तिगत चर्चा खातिर हुआँ बोलावल गेले हल। ई योजना के प्रस्ताव हलइ वोरोनेझ प्रान्त के चुगुयेव बस्ती के तीन जिला में विस्तार - ओस्त्रोगोझ्स्क, स्तारोबेल आउ बिर्यूच। एकरा बारे अस्पष्ट, अनिष्टसूचक अफवाह ओहो बखत प्रचलन में हलइ जब यूज़ेफ़ोविच ओस्त्रोगोझ्स्क में रह रहलथिन हल, जाहाँ परी, वस्तुतः, प्रोजेक्ट बन रहले हल। ई सुंदर क्षेत्र के शांतिप्रिय निवासी ई सब से अत्यन्त परेशान हो उठलइ। ओकन्हीं के मिलिट्री उपनिवेश (military settlements) में अराक्चेयेव व्यवस्था[3] के बारे कइसूँ पता चल गेलइ आउ, मुख्य बात हलइ, चुगुयेव में आतंक के बारे[4]। जेनरल के कीऽ प्रेरित कइलके होत सरकार के अइसन अलोकप्रिय आउ क्रूर कदम के प्रस्ताव रक्खे के? खाली महत्त्वाकांक्षा शायद, जे उनका में लगातार तीव्रतर आउ तीव्रतर होते जा रहले हल आउ अन्त में उनकर दिल आउ दिमाग दुन्नु के धुँधला देलके हल।
चाहे जे होवे, लेकिन यूज़ेफ़ोविच के प्रोजेक्ट के पितिरबुर्ग में अनुकूल स्वागत होलइ। दिमित्री मिख़ाइलोविच के एकर कार्यान्वयन के भार सौंपल गेलइ। प्रोजेक्ट में प्रस्तावित नयकन उपनिवेश के केन्द्र आउ नमूना (प्रतिमान, model) के रूप में चुगुयेव होवे वला हलइ, आउ जेनरल के अपन कमांड में पहिले एकरा (अर्थात् चुगुयेव के) ले लेवे के आदेश मिललइ। ऊ येलेत्स में बिन रुकले, पितिरबुर्ग से सीधे अपन नियुक्ति स्थान पर गेलथिन, आउ परिवार के भी तुरतम्मे यात्रा लगी तैयार होवे आउ हुएँ पहुँचे के औडर देलथिन।
अप्रैल के अन्त में, येलेत्स में हमन्हीं के पुनर्वास के ठीक एक साल बाद, हम सब चुगुयेव लगी रवाना होते गेलिअइ। हम सब धीरे-धीरे यात्रा करब करऽ हलिअइ, अकसर रुक जइते जा हलिअइ, आउ संयोगवश, तीन दिन ओस्त्रोगोझ्स्क में ठहरलिअइ। हम फेर से माय आउ दोस्त लोग के साथ भेंट कइलिअइ, जेकर गोस्सा अब तक शांत हो चुकले हल, आउ हमरा हाथ पसारके गले लगइते गेलइ। ओकर बाद हमन्हीं ख़ार्कोव प्रान्त में जमिंदारिन ज़्विरेवा के हियाँ भेंट करते गेलिअइ, एगो आदरणीय वृद्धा, जेकर बेटी के प्रति, जइसन कि उपरे उल्लेख कइल जा चुकले ह, हमन्हीं के भावावेशी जेनरल भावशून्य नञ् हलथिन, आउ आखिर, चुगुयेव से थोड़े दूर सालतोवा बस्ती में कुछ दिन गुजारते गेलिअइ, जे धनी ख़ोर्वात परिवार के जागीर हलइ।
न तो खुद ख़ोर्वात, आउ न उनकर पत्नी अब ई दुनियाँ में हलथिन, आउ उनकन्हीं के एकलौती बेटी वंश के पूरे बड़गो जायदाद के मालकिन हलइ। ऊ एगो सुन्दरी अल्पवयस्क युवती हलइ। ऊ मौलिक स्थिति में रहऽ हलइ - अकेल्ले, शानदार घर में मालकिन, एगो बूढ़ी गवर्नेस आउ वइसगर पुरोहित के साथ, जे ओकर माता-पिता के दोस्त हलइ, जे ओकरा भगमान के कानून पढ़ावऽ हलइ। सालतोव में ठहराव हमर मस्तिष्क में एगो गुलाबी स्मृति छोड़ गेलइ। हियाँ के बारीक से बारीक विवरण के ठाट-बाट [*103] आउ नफासत (elegance) मेजबान मालकिन के सौन्दर्य के अनुरूप (in keeping with the beauty) हलइ। ओकरा में आउ ओकर नगीच के सब कुछ आँख लगी सुहावना लगऽ हलइ। ऊ आकर्षक रूप से एतना सरल हलइ, ओकर आँख एतना खुल्लल आउ हार्दिक रूप से देखऽ हलइ कि खाली एक नजर ओकरा दने देखला पर आउ कुछ शब्द के आपस में आदान-प्रदान कइला पर, हमरा पर मानुँ अमृत के छींटा मारल जा हलइ। हमर दिल, चाहे बेहतर कहल जाय, कल्पना, बारूद नियन भड़क उट्ठऽ हलइ, हम हर्षातिरेक में आ जा हलिअइ, आउ, जइसन कहल जा हइ, हम बिखर जा हलिअइ। शायद, हमरा पर चोट कइल जा हलइ - बिन रुकले बोलते जा हलिअइ, आउ लोग मन लगाके सुनते रहऽ हलइ। हमर प्यारी मेजबान प्रोत्साहित करऽ हलइ कभी नजर से, त कभी मुसकान से आउ हरेक सुबह गुलाब के ताजा गुलदस्ता भेंट करऽ हलइ, जेकरा खुद्दे सुबह-सुबह बाग में घूमते बखत जामा करऽ हलइ आउ गुच्छा बनावऽ हलइ। आन्ना मिख़ाइलोव्ना एकरा चलते हमरा चिढ़ावऽ हलथिन, लेकिन हम हार नञ् मानऽ हलिअइ।
ई उज्ज्वल दिन तेजी से गुजर गेलइ, आउ हम सब मई के मध्य में चुगुयेव पहुँचलिअइ। सालतोवा से ताजा अनुभव लइला के बाद केतना फीका लगऽ हलइ। एकरा पर उदासी के मुहर आउ अनिवार्य अराक्चेयेव अनुशासन लद्दल हलइ। सब कुछ हियाँ उलटा-पलटा हलइ। सगरो भागदौड़, पुनर्निर्माण आउ नयका भवन के उन्नयन (erection)। नया-नया स्ट्रीट के निर्माण हो रहले हल, पुरनकन के पुनर्निर्माण कइल जा रहले हल; ऊबड़-खाबड़ जमीन के समतल कइल जा रहले हल - पहाड़ी आउ टीला के बारे कुछ कहे के जरूरत नञ्, पूरे पहाड़ी के सर कर देल गेलइ, एक तरफ से बस्ती के बन्द करके। लेकिन ई सब अभियो शुरू कइल गेले हल चाहे आधा काम होले हल।  पूरा तैयार खड़ी हलइ खाली लकड़ी के एगो छोटगर राजमहल, ई सोचके कि हो सकऽ हइ कि कहीं सम्राट् नञ् आ जाथिन। ओकरा में अभी जेनरल बसलथिन हल।
राजमहल चित्रात्मक ऊँचाई (picturesque height) पर अवस्थित हलइ, जेकर दोसरा तरफ से बस्ती के सीमा हलइ। राजमहल से ढालू खुल्लल छत सब (terraces)  निच्चे तरफ स्वच्छ आउ शांत दोन (नदी) तरफ उतरऽ हलइ, आउ ओकर किनारे बाग लगावल जा रहले हल, जे, दक्ष इंजीनियर आउ माली के निरीक्षण में बड़गर स्तर पर कइल जा रहल काम देखके कहल जा सकऽ हलइ कि शानदार होतइ।
लेकिन ई सब के उपरे, जेनरल यूज़ेफ़ोविच के नियुक्ति के कुछ समय पहिले, अराक्चेयेव द्वारा हियाँ परी कइल गेल भयंकर अत्याचार के स्मृति के कार छाया हलइ। चुगुयेव के मुख्य आबादी कज़ाक लोग के हलइ। जब ओकन्हीं बीच ओकन्हीं के मिलिट्री अधिवासी (settlers) में बदले के इरादा के खबर पहुँचलइ, त ओकन्हीं बीच अशांति फैल गेलइ। अराक्चेयेव, जइसन कि जानल-बूझल बात हलइ, मजाक करना पसीन नञ् करऽ हलइ - ई परिस्थिति में ऊ पक्का जल्लाद निकसलइ।  बीस से जादे लोग अइसन हलइ, जेकरा डंडा लेले लोग के दू कतार के बीच से दौड़ा-दौड़ाके पीटके मार देवल गेले हल (killed running the gauntlet)। दोसर लोग के, जेकन्हीं के मार-मारके अधमरू कर देल गेले हल, गिनती नञ् हलइ। खौफनाक सपना नियन आतंक अभागल चुगुयेव के निवासी लोग के अपन चंगुल में दाब लेलके हल।
सालतोवा के मनोहर मध्यांतर के बाद हमरा लगल कि हम पृथ्वी के नरक में आ फँसलूँ हँऽ। आउ यात्रा के दौरान ओस्त्रोगोझ्स्क में तीन दिन के ठहराव हमर पुरनका बेमारी के दूर कर देलक हल - घर के आद, जे येलेत्स में खाली सुषुप्त अवस्था में हल, आउ अब पूरे जोर के साथ जागृत हो गेल हल। शुरुआत में हमरा कइसूँ सांत्वना मिल जा हले अपन निम्मन दोस्त - आन्ना मिख़ाइलोव्ना, लकोन्ते आउ विशेष रूप से मिख़ाइलो व्लादीमिरोविच यूज़ेफ़ोविच - के सहानुभूति में। एकरा अलावे, हमरा नयका मनोहर परिचय भी होल। ई लोग में से हम उल्लेख करबइ - जेनरल के सहायक, जे चुगुयेव में उनकर स्टाफ में योगदान देलके हल, अन्द्रेय फ़्योदोसेयेविच रायेव्स्की के बारे। एगो बहुत पढ़ल-लिक्खल अल्पवयस्क व्यक्ति, कविता के लेखक, जेकर कविता ऊ जमाना के "वेस्तनिक येवरोपी" (यूरोप हेरल्ड) में प्रकाशित होले हल, आउ [*104] मिलिट्री रणनीति के विषय में आर्कदूके कार्ल (Archduke Karl)  के रचना के अनुवादक। आर्कदूके आउ जेनरल झोमिनी (Zhomini)  के ऊ जमाना में मिलिट्री लोग के बीच बड़गो नाम हलइ।
जल्दीए हियाँ परी जेनरल द्वारा बोलावल पितिरबुर्ग से उनकर विशेष ऑफिस के एगो आउ अफसर, फ़्लावित्स्की अइलइ, सेहो बहुत प्रिय आउ शिक्षित व्यक्ति हलइ। हमन्हीं अकसर शाम में मिल्लऽ हलुअइ आउ सजीव वार्तालाप करते जा हलिअइ - सबसे जादे साहत्य के संबंध में। जेनरल दिमित्री मिख़ाइलोविच के हम खाली भोजनालय में आउ चाय के टेबुल भिर देखऽ हलिअइ। ऊ बहुत व्यस्त रहऽ हलथिन आउ लगभग घर से बाहर रहऽ हलथिन। हम पहिलहीं नियन उनकर भगिनी आउ भतिजवन के पढ़ाना जारी रखलिअइ।
लेकिन धीरे-धीरे हमर अध्यापन कार्य आउ दोस्त सब के सहानुभूति हमर मूड पर लाभकारी प्रभाव देखाना बन्द कर देलकइ। भयंकर अवसाद अक्षरशः हमरा खा रहले हल आउ आखिर हमरा पाड़ देलकइ। हम गंभीर रूप से बेमार पड़ गेलिअइ आउ अगर नञ् मरलिअइ, त खाली मिख़ाइलो व्लादीमिरोविच के हमर देखभाल के कारण। लेकिन, शारीरिक रूप से स्वस्थ हो गेलो पर, हम नैतिक अवसाद के स्थिति से उबर नञ् पइलिअइ। हमरा घर अपन लोग तरफ आकृष्ट कर रहले हल। चुगुयेव के हवा हमरा विषैला प्रतीत होवऽ हलइ, आउ हमरा लगऽ हलइ कि खाली मातृभूमि के प्रभाव हमरा बचा सकऽ हलइ। आखिरकार हम जेनरल से निवेदन करे के निर्णय कर लेलिअइ कि ऊ हमरा काम से छुट्टी दे देथिन, जे अब हमरा लगी शक्ति के बाहर हलइ। ऊ गोस्सा हो गेलथिन आउ शुरुआत में हमर प्रस्थान के बारे सुनहूँ लगी नञ् चाहऽ हलथिन, लेकिन बाद में धीरे-धीरे नरम पड़ गेलथिन आउ हमरा मुक्त करे लगी सहमत हो गेलथिन - आउ खाली हाथ नञ्। बड़गो राहत मिलला से हम यात्रा के तैयारी करे लगलिअइ।
एहे दौरान दिमित्री मिख़ाइलोविच के व्यवहार में विचित्र लक्षण देखाय देवे लगलइ। जे उनकर खाली चुगुयेव के जानकार हलइ, ऊ उनकर नैसर्गिक गुण समझते गेलइ। लेकिन ऊ अधिक नगीची लोग भी, जेकर पहिले भी उनका से संबंध हलइ, उनका में अचानक परिवर्तन से घबरा गेते गेलइ। उनकर व्यवहार शुष्क आउ कठोर हो गेलइ आउ लगातार अधिकाधिक अकसर बिन कोय कारण के क्रोध के दौरा पड़े लगलइ। उनकर व्यवहार में क्रमविहीनता (inconsistency) आउ बोली में असंगति देखाय पड़े लगलइ। एतना लमगर अवधि तक ई सब के कारण अतिश्रम (overwork)  आउ चिंता-फिकिर के मानल जा हलइ। विचित्रता आउ असंगति डिविजन के आदेशपत्र में भी घुस जा हलइ, जेकरा पितिरबुर्ग से उनकर लावल प्रिंटिंग प्रेस में मुद्रित कइल जा हलइ। ई सब अत्यन्त आलंकारिक शैली के होवऽ हलइ आउ अकसर विषयवस्तु के सार अंश से मेल नञ् खा हलइ। हमरा ई काल के एगो आदेश के आद पड़ऽ हइ। ई एगो अत्यन्त जूनियर अफसर के अनुशासन के कोय क्षुद्र उल्लंघन के बारे हलइ। "लेफ़्टेनेंट (फलना-फलना)", आदेश में लिक्खल हलइ, "पाप में पड़ गेलइ।" एकर बाद कइसनो तरह के उपदेश हलइ, आउ सब कुछ अन्त होलइ स्पर्शात्मक उपदेश से - "भविष्य में पाप नञ् करे के चाही"। सब कोय के अचरज होलइ, लेकिन समीपस्थ महाविपत्ति के बारे केकरो प्रत्याशा (आशंका) नञ् हलइ।
हम मध्य जून (1821) में प्रस्थान कइलिअइ। घर वापिस जाय के उत्कट अभिलाषा के बावजूद, हम अपन दोस्त लोग से बड़गो उदासी के साथ बिदा होलिअइ - आन्ना मिख़ाइलोव्ना, लकोन्ते आउ युवक यूज़ेफ़ोविच से। पहिलौका दू गो से तो हमेशे लगी बिदा होलिअइ, अन्तिम के साथ पचीस साल बाद भेंट होलइ आउ अपन दोस्ती के नवीनीकरण करते गेलिअइ। ऊ अब कीव (Kiev) के आसपास के स्कूल के सहायक न्यासी (ट्रस्टी) हलइ, आउ हम पितिरबुर्ग में प्रोफेसर, आउ जइसन कि कहल जा हइ, शिक्षा मंत्रालय में एगो प्रभावशाली व्यक्तित्व ...



[1] येलेत्स - मास्को से 353 कि.मी. दक्षिण में अवस्थित शहर।
   चुगूयेव - यूक्रेन में ख़ार्कोव शहर से 28 कि.मी. पश्चिम-उत्तर में अवस्थित शहर।
[2] Julie, or the New Heloise (फ्रेंच: Julie, ou la nouvelle Héloïse), मूल शीर्षक "Lettres de Deux Amans, Habitans d'une petite Ville au pied des Alpes" ("आल्प्स के तराई में अवस्थित एगो छोटका शहर में रहे वलन दू प्रेमी के पत्र") ,  जाँ-याक रूसो (Jean-Jacques Rousseau) के एगो पत्रात्मक उपन्यास हइ, जे एम्स्टर्डम में 1761 में प्रकाशित होले हल।
[3] काउंट अलिक्सेय अन्द्रेयेविच अराक्चेयेव (1769 –1834)- रूसी सम्राट् अलिक्सान्द्र प्रथम (Alexander I) के 1808 में युद्ध मंत्री होले हल। ओकर नाम असह्य निरंकुशता के प्रतीक हो गेले हल। ऊ मिलिट्री उपनिवेश के स्थापना के निरीक्षक हलइ। मिलिट्री उपनिवेश एगो मिलिट्री-कृषि उपनिवेश हलइ जाहाँ बसावल जाय वला लोग के सैनिक आउ कृषक दुन्नु के काम देखे पड़ऽ हलइ। एकर मतलब हलइ कृषक ग्राम सब के मिलिट्री छावनी में परिवर्तन। जे जमींदार लोग के ऊ क्षेत्र में जायदाद हलइ, ओकन्हीं के मुआवजा के रूप में अलगे जायदाद देल गेलइ। व्यापारी अथवा मध्यवर्गीय लोग के आर्थिक मुआवजा देल गेलइ, साधारणतः ओकन्हीं के सम्पत्ति के कीमत से कम। अराक्चेयेव आउ मिलिट्री उपनिवेश के बारे विस्तृत विवरण खातिर दे॰ Hugh Seton-Watson, "The Russian Empire, 1801–1917"; Oxford at the Clarendon Press, 1988; pp.161-162. 
[4] सम्राट् अलिक्सान्द्र प्रथम के मिलिट्री उपनिवेश के स्थापना संबंधी आदेश आउ चुगुयेव जिला के निवासी खातिर घोषणापत्र (चार्टर) के सारांश (19 दिसंबर, 1817) लगी दे॰ George Vernadsky, "A Source Book for Russian History from Early Times to 1917", vol. 2, "Peter the Great to Nicholas I"; New Haven: Yale University Press, 1972; pp. 503–504.

No comments: