अपराध आउ दंड - भाग – 6 ; अध्याय – 5

अपराध आउ दंड

भाग – 6

अध्याय – 5

रस्कोलनिकोव ओकर पीछू-पीछू चल पड़लइ ।

"ई की हइ !" पीछू मुड़के स्विद्रिगाइलोव चिल्लइलइ, "हम तो शायद कहलिए हल ..."

"एकर मतलब ई हइ, कि हम अब अपने के अपन आँख से ओझल नयँ होवे देबइ ।"

"कीऽऽऽ ?"

दुन्नु ठहर गेलइ, आउ दुन्नु एक दोसरा के एक मिनट तक देखते रहलइ, जइसे एक दोसरा के थाह ले रहल होवे ।

"आधा नशा में सुनावल अपने के सब खिस्सा से", तीक्ष्ण रूप से बात काटते रस्कोलनिकोव बोललइ, "हम पक्का तौर पर ई निष्कर्ष पर अइलिए ह, कि नयँ खाली हमर बहिन के सिलसिला में अपन सबसे बुरा इरादा नयँ छोड़लथिन हँ, बल्कि पहिले के अपेक्षा कहीं जादे ओकरा में व्यस्त हथिन । हमरा मालूम हइ, कि आझ सुबह हमर बहिन के कइसनो पत्र मिलले ह । अपने ई पूरे समय अपन जगह पर स्थिर से नयँ बइठलथिन हँ ... मान लेल जाय, कि अपने रस्ता में कोय पत्नी खोज निकसलथिन; लेकिन एकर कोय मतलब नयँ होवऽ हइ । हम व्यक्तिगत रूप से पक्का कर लेवे लगी चाहऽ हिअइ ..."

रस्कोलनिकोव मोसकिल से खुद ठीक-ठीक बता सकऽ हलइ, कि ओकरा वास्तव में अभी की चाही हल आउ व्यक्तिगत रूप से वास्तव में की पक्का करे लगी चाहऽ हलइ ।

"अच्छऽ, त ई बात हइ ! आउ चाहऽ हथिन, कि हम अभी पुलिस के बोलइअइ ?"

"बोलाथिन !"

फेर से ओकन्हीं एक दोसरा के आमने-सामने एक मिनट तक खड़ी रहलइ । आखिरकार, स्विद्रगाइलोव के चेहरा के भाव बदल गेलइ । ई बात से आश्वस्त होके, कि रस्कोलनिकोव धमकी से भयभीत नयँ होलइ, ऊ अचानक बहुत प्रसन्नचित्त आउ मित्रतापूर्ण मुद्रा अपना लेलकइ ।

"त वस्तुतः अइसन व्यक्ति हथिन ! हम जान-बूझके अपने के मामला से संबंधित कोय चर्चा शुरू नयँ कइलिअइ, हलाँकि हमरा, वास्तव में, उत्सुकता यातना देब करऽ हइ । मामला अनोखा हइ । दोसरा तुरी लगी हम एकरा स्थगित कर देलिए हल, लेकिन, सचमुच, अपने तो एगो मुरदा के भी जगा दे सकऽ हथिन ... ठीक हइ, चलथिन, खाली हम पहिलहीं बता दे हिअइ - हम अभी खाली एक मिनट लगी घर जा रहलिए ह, कुछ पइसा लेवे खातिर; फेर फ्लैट में ताला लगा देबइ, एगो गाड़ी लेबइ आउ पूरे साँझ हम द्वीप पर बितइबइ । त की अभियो हमरा पीछू आवे वला हथिन ?"

"हम तो अभी लगी फ्लैट में जा रहलिए ह, लेकिन अपने हियाँ नयँ, बल्कि सोफ़िया सिम्योनोव्ना के हियाँ, ई बात के माफी माँगे खातिर, कि हम अंत्येष्टि के बखत नयँ आ पइलिअइ ।"

"जइसन अपने के मर्जी, सोफ़िया सिम्योनोव्ना घर पर नयँ हका । ऊ सब बुतरुअन के लेके एगो महिला के पास गेला ह, एगो कुलीन घर के वृद्धा महिला के पास, जे हमर पहिले के पुराने समय के परिचित आउ कुछ अनाथालय के संरक्षिका (patroness) हका । हम ई महिला के मोहित कर देलिअइ, कतेरिना इवानोव्ना के तीनो बुतरुअन लगी उनका फीस चुकाके, आउ एकरा अलावे, अनाथालय खातिर कुछ आउ पइसा दान में देलिअइ; आखिरकार, उनका सोफ़िया सिम्योनोव्ना के कहानी सुनइलिअइ, बिन कोय बात छिपइले, पूरे सम्मान के साथ भी । एकर अवर्णनीय प्रभाव पड़लइ । ओहे से सोफ़िया सिम्योनोव्ना के आझे मिल्ले खातिर समय निश्चित कइल गेले ह, सीधे -आया होटल में, जाहाँ कुछ समय खातिर, ई महिला अपन ग्रीष्म भवन (रूसी में 'दाचा', देहाती क्षेत्र में गरमी के समय गुजारे लगी बन्नल बंगला; summer house) के बाद ठहरल हका ।"

"कोय बात नयँ, तइयो हम अइबइ ।"

"जइसन अपने के मर्जी, खाली हम तो अपने के साथ नयँ रहबइ; हमरा लगी की हइ ! अइकी हमन्हीं अब घर पहुँचिए गेलिअइ । बताथिन, हमरा अकीन हइ, कि अपने हमरा ई बात से न शक्का के नजर से देखऽ हथिन, कि हम खुद एतना विनम्रता से व्यवहार कइलिअइ आउ अभी तक अपने के पूछताछ करके परेशान नयँ कइलिअइ ... अपने समझ रहलथिन हँ न ? ई अपने के कुछ असामान्य मामला लगलइ; हम बाजी लगा सकऽ हिअइ, कि अइसन बात हइ ! अच्छऽ, त विनम्र होवे के अइसन परिणाम होवऽ हइ !"

"आउ दरवाजा भिर छिपके दोसर के बात सुनथिन !"

"हूँ, त अपने ई कहे लगी चाहऽ हथिन !" स्विद्रिगाइलोव हँस पड़लइ, "हाँ, हमरा अचरज होते हल, अगर एतना सब कुछ हो गेला के बाद, अपने बिन कोय टिप्पणी के एकरा अइसीं जाय देथिन हल । हा ! हा ! हलाँकि हम कुछ तो ओकरा में से समझलिअइ, जे अपने तहिया ... हुआँ ... शरारत कइलथिन हल आउ सोफ़िया सिम्योनोव्ना के खुद्दे बता रहलथिन हल, लेकिन तइयो, एकर की मतलब हइ ? हम शायद एगो बिलकुल पिछड़ल अदमी हिअइ आउ हम कुछ समझ नयँ सकऽ हिअइ । भगमान के नाम पर, जरी हमरा समझा देथिन, बबुआ ! अद्यतन सिद्धांत के साथ हमर अज्ञान पर प्रकाश डालथिन ।

"अपने कुछ नयँ सुन सकलथिन होत, अपने बिलकुल झूठ बोल रहलथिन हँ !"

"लेकिन हम तो ओकरा बारे नयँ बात कर रहलिए ह, ओकरा बारे नयँ बात कर रहलिए ह (हलाँकि हम कुछ तो सुनवे कइलिए हल), नयँ, हमर कहे के मतलब ई हइ, कि अपने हमेशे 'ओह' आउ 'ओह' करते रहऽ हथिन ! अपने के अंदर जे शिलर (Schiller) हइ, ऊ मिनट-मिनट बेचैन होते रहऽ हइ, आउ अभी बतावल जा हइ, कि दरवाजा बिजुन छिपके दोसर के बात नयँ सुन सकऽ हइ । अगर ई बात हइ, जाथिन आउ प्राधिकारी बिजुन घोषित करथिन, कि अइकी अइसन-अइसन बात हइ, हमरा साथ अइसन दुर्घटना घटलइ - हमर सिद्धांत में एगो छोटगर गलती निकसलइ । अगर अपने के पक्का विश्वास हइ, कि दरवाजा बिजुन छिपके दोसर के बात नयँ सुन्ने के चाही, लेकिन जे हाथ में आल, ओकरा से बुढ़िया के खोपड़ी फोड़ देल जा सकऽ हइ, अपन खुशी से, त जल्दी से जल्दी कहीं अमेरिका चल जाथिन ! भाग जाथिन, नौजवान ! शायद, अभियो कुछ समय हइ । हम दिल से बात कर रहलिए ह । की, पइसा नयँ हइ ? हम रस्ता के खरचा दे देबइ ।"

"हम एकरा बारे बिलकुल नयँ सोच रहलिए ह", घृणापूर्वक बात काटते रस्कोलनिकोव बोललइ ।

"हम समझऽ हिअइ (अपने लेकिन तकल्लुफ नयँ करथिन - अगर चाहऽ हथिन, त जादे नयँ बोलथिन); समझऽ हिअइ, कि अपने के मन में कइसन-कइसन सवाल उठ रहले ह - नैतिक, हइ न ? नागरिक आउ मानव के सवाल? ई सब के अपने बगल में रख देथिन; अभी अपने के ऊ सब के की जरूरत ? हे, हे ! काहेकि, अभियो अपने नागरिक आउ मानव हथिन ? आउ अगर अइसन बात हइ, त एकरा में दखल देवे के जरूरते नयँ हलइ; अइसन मामला के अपन काम के रूप में लेवहीं के नयँ चाही हल । त खुद के गोली मार लेथिन; कि अपने के मने नयँ करऽ हइ ?"

"लगऽ हइ, अपने जान-बूझके हमरा उसकावे लगी चाहऽ हथिन, ताकि हम खाली अपने से दूर हो जइअइ ..."

"ई कइसन विचित्र अदमी हइ ! लेकिन हमन्हीं तो पहुँच चुकलिअइ, त ज़ीना पर अपने के स्वागत हइ । देखथिन, अइकी ई सोफ़िया सिम्योनोव्ना के प्रवेशद्वार हइ; देखथिन, कोय नयँ हइ ! विश्वास नयँ हइ ? कापेरनाउमोव के पुछथिन; ऊ ओकन्हीं के पास कुंजी छोड़के जा हका । अइकी ऊ खुद्दे मादाम द कापेरनाउमोव हका, अयँ ? की ? (ऊ जरी-मनी बहिर हका ।) बाहर गेल हका ? काहाँ ? अच्छऽ, अब तो सुन लेलथिन ? ऊ नयँ हका आउ, शायद, देर रात के बिना ऊ वापस आवे वली नयँ । अच्छऽ, त अब हमरा साथ आथिन । अपने तो वस्तुतः हमरा हीं आवहूँ वला हलथिन न ? त अइकी हमन्हीं दुन्नु घर पहुँच गेते गेलिअइ । मादाम रेश्लिख़ (Resschlich) घर पर नयँ हका । ई औरत हमेशे दौड़-धूप करते रहऽ हइ, लेकिन ऊ एगो निम्मन औरत हइ, अपने के विश्वास देलावऽ हिअइ ... शायद, ऊ अपने के काम आ सकते हल, अगर अपने कुछ आउ समझदारी बरतथिन हल । अच्छऽ, त अपने देखे के किरपा करथिन - हम अनवारी (bureau) में से पाँच प्रतिशत सूद वला नोट निकास रहलिए ह (देखथिन हमरा पास अभियो केतना आउ हकइ !), लेकिन ई आझ भंजावे लगी सराफ के पास जइतइ। अच्छऽ, देखलथिन ? आउ हम समय बरबाद नयँ कर सकऽ हिअइ । अनवारी में ताला लगा रहलिए ह, फ्लैट में ताला लगा रहलिए ह, आउ हमन्हीं फेर से ज़ीना पर हिअइ । अच्छऽ, त अपने गाड़ी में जाय लगी चाहथिन ? देखथिन, हम ई कल्यास्का (घोड़ागाड़ी) के येलागिन द्वीप जाय खातिर ले रहलिए ह । की ? इनकार करऽ हथिन ? अपने के सहन नयँ होलइ ? कोय बात नयँ, सैर लगी चलल जाय । शायद, बारिश हो सकऽ हइ; कोय बात नयँ, ई गाड़ी के छतरी चढ़ा देबइ ..."

स्विद्रिगाइलोव गाड़ी में बइठ चुकले हल । रस्कोलनिकोव ई नतीजा पर पहुँचलइ, कि कम से कम अभी तो ओकरा पर शक्का अनुचित हइ । एक्को शब्द के उत्तर देले बगैर, ऊ मुड़लइ आउ पुआल मंडी के दिशा में वापिस चल पड़लइ । अगर ऊ बल्कि एक्को तुरी पीछू तरफ मूड़ी करके रस्ता पर नजर डालते हल, त ऊ देख सकते हल, कि कइसे स्विद्रिगाइलोव, मोसकिल से सो कदम आगू जाके, कल्यास्का के किराया दे देलकइ आउ खुद सड़क के फुटपाथ पर आ गेलइ । लेकिन ऊ अब कुच्छो नयँ देख सकऽ हलइ आउ ऊ नुक्कड़ पर मुड़ चुकले हल । गहरा घृणा ओकरा स्विद्रिगाइलोव से दूर घींचके ले जा रहले हल । "की एक्को क्षण लगी हमरा अइसन रूक्ष दुर्जन, अइसन कामुक व्यभिचारी आउ नीच से कुच्छो के आशा कइल जा सकऽ हलइ !" ऊ अनिच्छा से चिल्लइलइ । ई सच हइ, कि रस्कोलनिकोव अपन ई मत बहुत जल्दीबाजी आउ लापरवाही में व्यक्त कर देलके हल । स्विद्रिगाइलोव में कोय बात तो अइसन हलइ, जे ओकर व्यक्तित्व में, अगर रहस्यता नयँ, तो कम से कम कुछ तो मौलिकता प्रदान करऽ हलइ । आउ जाहाँ तक ई सब कुछ में ओकर बहिन के संबंध हलइ, त रस्कोलनिकोव के पक्का विश्वास हलइ, कि स्विद्रिगाइलोव ओकरा चैन से नयँ रहे देतइ । लेकिन ई सब कुछ के बारे ओकरा सोचते रहना बहुत भारी आउ असह्य हो रहले हल !

जइसन कि हमेशे अकेल्ले रहला पर होवऽ हलइ, बीस कदम गेला के बाद ऊ गहराई से विचारमग्न हो गेलइ । पुल पर पहुँच गेला के बाद, ऊ जंगला (railing) भिर खड़ी हो गेलइ, आउ पानी तरफ देखे लगलइ । एहे दौरान अवदोत्या रोमानोव्ना ओकर पासे में खड़ी हलइ । पुल शुरू होला के बादे ओकरा से भेंट होले हल, लेकिन ओकरा बिन नोटिस कइले पास से गुजर गेलइ । अभी तक कभियो रोड पर दुनेच्का ओकरा साथ अइसे नयँ मिलले हल आउ डर के हद तक अचंभित हो गेलइ । ऊ रुक गेलइ आउ ओकरा समझ में नयँ आ रहले हल, कि ओकरा पुकारे कि नयँ । अचानक ओकरा पुआल मंडी दने से जल्दी-जल्दी अइते स्विद्रिगाइलोव पर नजर पड़लइ ।

लेकिन ऊ, लगऽ हलइ, चोरी चुपके आउ सवधानी से पास आ रहले हल । ऊ पुल पर नयँ अइलइ, बल्कि बगल में खड़ी हो गेलइ, फुटपाथ पर, आउ पूरा कोशिश कर रहले हल, कि रस्कोलनिकोव ओकरा देख नयँ पावइ । दुन्या के ऊ बहुत पहिलहीं देख चुकले हल आउ ओकरा इशारा करे लगलइ । दुन्या के लगलइ, कि ऊ अपन इशारा से ओकरा अपन भाय के नयँ पुकारे आउ शांति से रहे देवे लगी निवेदन कर रहले हल, आउ ओकरा अपना दने आवे लगी कह रहले हल ।

दुन्या ओइसीं कइलकइ । ऊ चुपचाप अपन भाय से नजर बचइते स्विद्रिगाइलोव के नजीक गेलइ ।

"जल्दी से जल्दी चलल जाय", स्विद्रिगाइलोव ओकरा फुसफुसइलइ, "हम नयँ चाहऽ हिअइ, कि रोदियोन रोमानोविच के हमन्हीं के बीच भेंट के जनकारी होवइ । हम अपने के आगाह करऽ हिअइ, कि हम हियाँ से नजीके उनका साथ बइठल हलिअइ, एगो शराबखाना में, जाहाँ ऊ खुद्दे हमरा खोजते अइला हल, आउ हमरा मोसकिल से उनका से पीछा छोड़इलिअइ । उनका कोय कारणवश अपने के संबोधित कइल हमर पत्र के बारे मालूम हइ आउ कुछ तो उनका शक्का हइ । वस्तुतः कहीं अपने तो उनका नयँ बतइलथिन ? आउ अगर अपने नयँ, त केऽ ?"

"अइकी हमन्हीं अब तो नुक्कड़ से भी मुड़ गेते गेलिअइ", दुन्या बात काटते बोललइ, "अब भाय हमन्हीं के देख नयँ पइता । हम अपने से कह रहलिए ह, कि हम अपने के साथ आउ आगू नयँ जइबइ । हमरा सब कुछ हियाँ परी बता देथिन; ई सब कुछ सड़क पर बतावल जा सकऽ हइ ।"

"पहिला तो ई, कि ई बात सड़क पर नयँ बतावल जा सकऽ हइ; दोसरा, अपने के सोफ़िया सिम्योनोव्ना के बात भी सुन्ने के चाही; तेसरा, हमरा अपने के कुछ दस्तावेज देखावे के हइ ... आउ आखिर, अगर अपने हमरा हीं नयँ आवे लगी तैयार हथिन, त हम कोय सफाई देवे से इनकार करऽ हिअइ आउ तुरतम्मे हम चल जइबइ । आउ एकरा साथ हम अपने से ई बात नयँ भुलाय के निवेदन करऽ हिअइ, कि अपने के प्यारे भाई के बहुत कौतूहलपूर्ण भेद पूरे तरह से हमर हाथ में हइ ।"

दुन्या किंकर्तव्यविमूढ़ होल खड़ी रहलइ आउ तीक्ष्ण दृष्टि से स्विद्रिगाइलोव तरफ देखे लगलइ ।

"अपने कउन बात से भयभीत हथिन ?" ऊ शांत भाव से टिप्पणी कइलकइ, "शहर तो गाँव नयँ हइ । आउ गाँव में हम अपने के जेतना नुकसान पहुँचइलिए हल, ओकरा से कहीं जादे नुकसान अपने हमरा पहुँचइलथिन हल, लेकिन हियाँ ..."

"की अपने सोफ़िया सिम्योनोव्ना के पूर्व सूचना दे देलथिन हँ ?"

"नयँ, हम तो उनका एक्को शब्द नयँ बोललिए ह आउ हमरा एहो बात के निश्चय नयँ हइ, कि ऊ घरे पर हका । तइयो, शायद ऊ घरे पर हका । ऊ आझ अपन रिश्तेदार के दफनइलका ह - ई अइसन दिन नयँ हइ, कि केकरो हीं भेंट करे लगी जाल जाय । फिलहाल हम केकरो ई बात के बारे बतावे लगी नयँ चाहऽ हिअइ, आउ आंशिक रूप से हमरा खेद हइ, कि हम अपने के बता देलिअइ । हियाँ परी जरिक्को सनी के लपरवाही, प्राधिकारी के रिपोर्ट करे के बराबर हइ । हम अइकी हिएँ परी रहऽ हिअइ, अइकी ई घर में, अइकी हमन्हीं पहुँचिए गेलिअइ । अइकी ई हमर घर के दरबान हइ; दरबान हमरा अच्छा से जानऽ हइ; अइकी, ऊ हमरा झुकके सलाम करब करऽ हइ; ऊ देख रहले ह, कि हम एगो महिला के साथ आब करऽ हिअइ, आउ ऊ वास्तव में अपने के चेहरा देख लेलके ह, आउ ई अपने खातिर उपयोगी होतइ, अगर अपने बहुत भयभीत हथिन आउ हमरा पर शक्का करऽ हथिन । माफ करथिन, कि हम एतना रुखाई से बात कर रहलिए ह । हम खुद किरायेदार हीं से कमरा लेके रहऽ हिअइ । सोफ़िया सिम्योनोव्ना हमर घर के देवाल के दोसरा दने रहऽ हका, ओहो किरायेदार के मकान में । ई पूरा मंजिला किरायेदार से भरल हइ । अपने के बुतरू नियन डरे के की बात हइ ? कि हम वस्तुतः बहुत भयावह हिअइ ?"

स्विद्रिगाइलोव के चेहरा एगो तिरस्कार भरल मुसकान में ऐंठ गेलइ; लेकिन ओकर जी मुसकाय के मूड में नयँ हलइ । ओकर दिल धड़धड़ कर रहले हल, आउ ऊ मोसकिल से साँस ले पा रहले हल । ऊ जान-बूझके जोर-जोर से बोल रहले हल, ताकि अपन बढ़ रहल उत्तेजना के छिपा सकइ; लेकिन दुन्या ई विशेष उत्तेजना के नोटिस नयँ कर पइलकइ; ऊ ओकर ई टिप्पणी से बहुत चिढ़ गेले हल, कि ऊ ओकरा से बुतरू नियन भयभीत होल हइ, आउ ऊ ओकरा लगी बहुत भयावह लगऽ हलइ ।

"हलाँकि हम ई जानऽ हिअइ, कि अपने ... बिन प्रतिष्ठा के अदमी हथिन, लेकिन हम अपने से बिलकुल नयँ भयभीत हिअइ । आगू बढ़थिन", ऊ बोललइ, ऊपर-ऊपर तो शांत भाव से, लेकिन ओकर चेहरा बहुत पीयर पड़ गेले हल ।

स्विद्रिगाइलोव सोनिया के फ्लैट भिर रुक गेलइ ।

"हमरा पुच्छे देथिन, कि ऊ घरे हथिन कि नयँ । नयँ । विफलता ! लेकिन हम जानऽ हिअइ, कि शायद ऊ बहुत जल्दीए आ जइता । अगर ऊ बाहर गेला ह, त एगो महिला के छोड़के आउ कधरो नयँ, अपन अनाथ के संबंध में। ओकन्हीं के माय मर गेलइ । हमहूँ एकरा में पड़ गेलिअइ आउ सब प्रबंध कर देलिअइ । अगर सोफ़िया सिम्योनोव्ना दस मिनट में वापिस नयँ आ पावऽ हका, त हम उनका अपने के पास भेज देबइ, अगर चाहथिन, आझे; अच्छऽ, ई हम्मर फ्लैट हइ । अइकी हमर दू कमरा हइ । ई दरवाजा के पीछू हमर मकान-मालकिन, मिसेज़ रेश्लिख़ रहऽ हका । अब एद्धिर देखथिन, हम अपने के अपन मुख्य दस्तावेज देखइबइ - हमर शयनकक्ष से ई दरवाजा से होके दूगो बिलकुल खाली कमरा हइ, जे किराया पर देवे लगी हइ । अइकी ई (दुन्नु कमरा) हइ ... एकरा अपने के कुछ जादे ध्यान से देखे के चाही ..."

स्विद्रिगाइलोव दूगो काफी बड़गर आउ फर्नीचर से सुसज्जित कमरा लेले हलइ । दुन्या शक्का के नजर से चारो तरफ देख रहले हल, लेकिन ओकरा न तो सजावट में कुच्छो विशेष देखाय देलकइ, आउ न तो कमरा के स्थिति में, हलाँकि कुछ तो नोटिस करे लायक हलइ, मसलन, स्विद्रिगाइलोव के फ्लैट के दुन्नु तरफ के फ्लैट लगभग खाली हलइ । ओकर फ्लैट में जाय लगी प्रवेश सीधे बाहर के गलियारा से नयँ हलइ, बल्कि मकान-मालकिन के दूगो कमरा से होके, जे लगभग खाली हलइ । स्विद्रिगाइलोव अपन शयनकक्ष से ताला लगल दरवाजा के खोलके दुनेच्का के एगो आउ खाली फ्लैट देखइलकइ, जे किराया पर देल जाय वला हलइ । दुनेच्का दहलीज पर खड़ी रहलइ, ओकरा समझ में नयँ आ रहले हल, कि ओकरा काहे लगी देखे लगी कहल जा रहले ह, लेकिन स्विद्रिगाइलोव ओकरा जल्दी से समझावे लगलइ -

"अइकी, एन्ने देखथिन, ई दोसरका बड़का कमरा तरफ । ई दरवाजा पर ध्यान देथिन, एकरा में ताला लगल हइ। दरवाजा के नगीच एगो कुरसी हइ, दुन्नु कमरा में कुल्लम एक्के गो कुरसी । एकरा हम अपन फ्लैट से लइलिए हल, ताकि अराम से सुन सकिअइ । अउकी हुआँ दरवजवा के पीछू सोफ़िया सिम्योनोव्ना के टेबुल हइ; हुआँ ऊ बइठल हला आउ रोदियोन रोमानोविच से बतिया रहला हल । आउ हम हियाँ छिपके सुन रहलिए हल, कुरसी पर बइठल, दू-दू शाम लगातार, दुन्नु तुरी लगभग दू घंटा - आउ वस्तुतः, कुछ तो जान सकलिअइ, अपने की सोचऽ हथिन ?"

"त अपने छिपके सुन रहलथिन हल ?"

"हाँ, हम छिपके सुन रहलिए हल; अब हमर फ्लैट में चल्लल जाय; हियाँ बइठे के कहूँ जगह नयँ हइ ।"

ऊ अवदोत्या रोमानोव्ना के वापिस अपन पहिलौका कमरा में ले गेलइ, जे ओकरा लगी स्वागतकक्ष (drawing room) के काम करऽ हलइ, आउ ओकरा एगो कुरसी पर बइठे लगी कहलकइ । ऊ खुद टेबुल के दोसरा छोर पर बइठलइ, कम से कम ओकरा से एक साझेन [1] दूर, लेकिन शायद ओकर आँख ओहे ज्वाला से चमक रहले हल, जे कभी दुनेच्का के एतना भयभीत कर दे हलइ । ऊ चौंक पड़लइ आउ फेर से शक्का के नजर से चारो दने देखे लगलइ । ओकर संकेत (gesture) अनायास हलइ; स्पष्टतया ऊ अपन अविश्वास देखावे लगी नयँ चाहऽ हलइ । लेकिन आखिरकार स्विद्रिगाइलोव के फ्लैट के एकांत स्थिति ओकरा खटकलइ । ओकरा पुच्छे के मन कइलकइ, कि ओकर मकान-मालकिन कम से कम घर पर तो हलइ, लेकिन ऊ नयँ पुछलकइ ... स्वाभिमान के चलते । एकरा अलावे, ओकर दिल में अपन भय के अपेक्षा एगो आउ अमापनीय रूप से (immeasurably) अधिक व्यथा हलइ । ऊ असह्य यातना झेल रहले हल ।

"अइकी अपने के पत्र हइ", ओकरा टेबुल पर रखके ऊ शुरू कइलकइ । "की वास्तव में संभव हइ, जे कुछ अपने लिक्खऽ हथिन ? अपने एगो अइसन अपराध के बारे इशारा करऽ हथिन, जे मानूँ हमर भाय के कइल हइ । अपने बहुत स्पष्ट रूप से इशारा करऽ हथिन, आउ अपने अब एकरा से मुकर नयँ सकऽ हथिन । ई जान लेथिन, कि ई बेसिर-पैर के खिस्सा अपने के बतावे के पहिलहीं सुन चुकलिए ह आउ एकर एक्को शब्द पे हमरा विश्वास नयँ हइ । ई घिनौना आउ हास्यास्पद शंका हइ । हमरा ई सब खिस्सा मालूम हइ आउ एहो कि कइसे आउ काहे एकरा गढ़ल गेले हल । अपने के पास कोय सबूत नयँ हो सकऽ हइ । अपने हमरा सबूत के साथ साबित करे के वादा कइलथिन हल - बोलथिन न ! लेकिन पहिलहीं जान लेथिन, कि हम अपने पर विश्वास नयँ करऽ हिअइ ! नयँ करऽ हिअइ ! ..."

दुनेच्का ई सब बहुत जल्दीबाजी में तेजी से बक गेलइ, आउ एक पल लगी ओकर चेहरा पर लाली दौड़ गेलइ ।

"अगर अपने विश्वास नयँ करथिन हल, त अइसन हो सकऽ हलइ, कि अपने हमरा हीं अकेल्ले आवे के जोखिम उठइथिन हल ? अपने काहे लगी अइलथिन ? की खाली उत्सुकतावश ?"

"हमरा सताथिन नयँ, बोलथिन, बोलथिन !"

"एकरा में कुछ बतावे के जरूरत नयँ हइ, कि अपने बहादुर लड़की हथिन । भगमान कसम, हम सोच रहलिए हल, कि अपने मिस्टर रज़ुमिख़िन के हियाँ अपने के साथ आवे लगी कहथिन । लेकिन ऊ तो अपने साथ नयँ हका, न तो ऊ अपने के कहीं आसपास हला, हम तो चेक कइलिअइ - ई तो साहस के काम हइ, मतलब, अपने के रोदियोन रोमानोविच लगी चिंता हलइ ।

"लेकिन अपने के अंदर सब कुछ ईश्वरीय हइ ... जाहाँ तक अपने के भाय के संबंध हइ, त हम अपने के की कहिअइ ? अपने अभी उनका खुद्दे देखलथिन । की खियाल हइ अपने के उनका बारे ?"

"कहीं एहे एक बात पर अपने बुनियाद तो नयँ बना रहलथिन हँ ?"

"नयँ, ई बात पर नयँ, बल्कि उनकर खुद के कहल शब्द पर ।  हिएँ लगातार दू साँझ ऊ सोफ़िया सिम्योनोव्ना के हियाँ अइला हल । हम अपने के देखइलिअइ, कि ओकन्हीं काहाँ बइठल हला । ऊ उनका अपन पूरा अपराध स्वीकृति (confession) बतइलका हल । ऊ हत्यारा हका । ऊ सरकारी कर्मचारी के विधवा आउ गिरवी रक्खे वली बुढ़िया के हत्या कइलका ह, जेकरा हीं ऊ खुद्दे अपन समान गिरवी पर रखलका हल; आउ लिज़ावेता नाम के ओकर बनियाइन बहिनियो के हत्या कइलका, जे संयोग से अपन बहिन के हत्या के बखत हुआँ आ गेले हल । ऊ ओकन्हीं दुन्नु के एगो कुल्हाड़ी से हत्या कइलका, जे ऊ अपन साथ लइलका हल । ऊ ओकन्हीं के हत्या लुट्टे लगी कइलका, आउ लुटलका; पइसा ले लेलका आउ कुछ चीज भी ... ऊ खुद ई सब कुछ एक-एक शब्द के सोफ़िया सिम्योनोव्ना के बतइलका, जे अकेल्ले ई रहस्य के जानऽ हका, जे हत्या में शामिल नयँ हला - न तो शब्द से, न काम से, बल्कि एकर विपरीत, सुनला पर ऊ ओइसीं आतंकित हो गेला, जइसे कि अपने अभी । चिंता नयँ करथिन, ऊ उनकर भेद केकरो बतावे वली नयँ ।"

"अइसन नयँ हो सकऽ हइ !" पीयर आउ मृतवत् होंठ के साथ दुनेच्का बड़बड़इलइ; ऊ हँफ रहले हल, "नयँ हो सकऽ हइ, अइसन करे के कोय सबसे छोटहूँ कारण नयँ हइ, कोय आधार नयँ हइ ... ई झूठ हइ ! झूठ !"

"ऊ ओकरा लुटलका, एहे कारण हइ । ऊ पइसा आउ चीज लेलका । ई सच हइ, कि अपन खुद के स्वीकृति के अनुसार, ऊ न तो पइसा के प्रयोग कइलका, आउ न कोय वस्तु के, बल्कि ई सब कुछ के ले जाके एगो पत्थल के निच्चे छिपा देलका, जाहाँ अभियो तक ऊ सब पड़ल हइ । लेकिन अइसन ई कारण से होलइ, कि उनका ऊ सब के प्रयोग करे के साहस नयँ हो सकलइ ।"

"लेकिन की ई विश्वास कइल जा सकऽ हइ, कि ऊ चोरी कर सकऽ हका, चाहे डकैती ? की ऊ ई सब के बारे सोचियो सकऽ हला ?" दुन्या चिल्लइलइ आउ कुरसी पर से उछल पड़लइ । "वास्तव में उनका जानऽ हथिन, देखलथिन हँ ? की ऊ वस्तुतः चोर हो सकऽ हका ?"

ऊ मानूँ स्विद्रिगाइलोव से प्रार्थना कर रहले हल; ऊ अपन कुल भय भूल चुकले हल ।

"हियाँ, अवदोत्या रोमानोव्ना, हजारों आउ लाखों समुच्चय आउ श्रेणीकरण (combinations and gradations) हइ । चोर चोरी करऽ हइ, लेकिन ऊ खुद अपन बारे जानऽ हइ, कि ऊ नीच हइ; लेकिन हम एगो इज्जतदार अदमी के खिस्सा सुनलिए ह, जे डाक लुटलके हल; त केऽ ओकरा जानऽ हइ, शायद, ओहो वस्तुतः सोचलके होत, कि ऊ ठीक काम कइलकइ ! जाहिर हइ, हमहूँ खुद विश्वास नयँ करतिए हल, बिलकुल ओइसीं, जइसे कि अपने, अगर हमरा ई खबर तेसर अदमी से मिलते हल । लेकिन हम खुद के कान पर विश्वास कर लेलिअइ । ऊ तो सोफ़िया सिम्योनोव्ना के सब्भे कारण भी समझइलका हल; लेकिन ऊ तो पहिले तुरी अपन कान पर भी विश्वास नयँ कइलका, लेकिन आखिरकार अपन आँख पर विश्वास कइलका, अपन खुद के आँख पर। ऊ वस्तुतः खुद उनका बताब करऽ हला ।"

"आउ कीऽ ... कारण हलइ ?""

"ई एगो लमगर कहानी हइ, अवदोत्या रोमानोव्ना । हियाँ, अपने के कइसे अभिव्यक्त कइल जाय, एगो अप्पन तरह के सिद्धांत हइ, ई ओहे बात हइ, जेकर अनुसार हम पावऽ हिअइ, मसलन, कि एगो एकमात्र दुष्कर्म उचित हइ, अगर मुख्य उद्देश्य निम्मन हइ । एगो एकल (isolated) दुष्कर्म आउ सो गो निम्मन कर्म ! वस्तुतः अमापनीय (immeasurable) स्वाभिमान वला एगो प्रतिभावान नवयुवक लगी ई जानके अफसोस होवऽ हइ, कि अगर, मसलन, खाली करीब तीन हजार रूबल रहइ, त ओकर पूरा जिनगी आउ जिनगी के उद्देश्य के पूरा भविष्य दोसरे तरह के होवइ, लेकिन असल में ई तीन हजार रूबल नयँ हइ । एकरा में जोड़ देथिन - भूख से, तंग फ्लैट से, फट्टल-पुरान कपड़ा से, अपन सामाजिक स्थिति के सौन्दर्य के सजीव बोध से, आउ एकर साथ-साथ बहिन आउ माय के स्थिति से झुंझलाहट के । आउ विशेष रूप से अहंकार, स्वाभिमान आउ अहंकार, लेकिन, भगमान जानऽ हका, शायद, निम्मन प्रवृत्ति (inclinations) होतहूँ ... वस्तुतः हम उनका दोष नयँ दे रहलिए ह, किरपा करके ई नयँ सोचथिन; एकरा से हमरा सरोकारो नयँ हइ । हियाँ उनकर एगो अप्पन छोटगर सिद्धांतो हलइ -  अपने आप में एगो सिद्धांत - जेकर अनुसार लोग के वर्गीकरण कइल जा हइ, देखथिन, सामान्य लोग में आउ विशेष लोग में, मतलब, अइसन लोग में, जेकरा लगी, ओकन्हीं के उच्च स्थिति के चलते, कानून नयँ लिक्खल हइ, लेकिन एकर विपरीत, जे खुद्दे बाकी लोग खातिर कानून बनइते जा हइ, सामान्य लोग खातिर, बिलकुल नीच तबका के लोग खातिर । कोय बात नयँ, अपने आप में एगो छोटगर सिद्धांत; यून तेओरी कॉम यून ओत्र [une théorie comme une autre (फ्रेंच) - कोय दोसर नियन एगो सिद्धांत] । नेपोलियन से ऊ भयंकर रूप से प्रभावित हला, मतलब, असल में उनका ई बात आकृष्ट कइलकइ, कि बहुत सारा प्रतिभाशाली लोग एकल दुष्कर्म पर ध्यान नयँ देते गेला, आउ बिन कुछ सोचले ओकरा लांघके आगू निकस गेते गेला । लगऽ हइ, कि ऊ कल्पना कइलका, कि ओहो प्रतिभाशाली व्यक्ति हका - मतलब, एकरा बारे कुछ समय लगी उनका विश्वास हलइ । ऊ बहुत कष्ट झेललका आउ अभियो कष्ट झेलब करऽ हका, ई विचार से, कि ऊ सिद्धांत तो रच लेलका, लेकिन ऊ बिन कुछ सोचले सीमा के लांघे के स्थिति में नयँ हला, मतलब, ऊ प्रतिभाशाली व्यक्ति नयँ हका । आउ ई स्वाभिमानी नवयुवक लगी अपमानजनक हइ, विशेष करके हमन्हीं के युग में ..."

"आउ अंतःकरण के पश्चात्ताप ? अपने उनका में, मतलब, कइसनो नैतिक भावना से इनकार करऽ हथिन ? की ऊ वास्तव में अइसन हथिन ?"

"आह, अवदोत्या रोमानोव्ना, अभी सब कुछ धुंधला हो चुकले ह, मतलब, ऊ कभियो कोय विशेष क्रम में नयँ हलइ । रूसी लोग सामान्यतः विशाल विचार के होवऽ हका, अवदोत्या रोमानोव्ना, अपन देश नियन विशाल, आउ कल्पनातीत, अस्त-व्यस्त के तरफ अत्यंत प्रवृत्ति वला; लेकिन बिन विशेष प्रतिभा के विशाल विचार के होना अनर्थकारी हइ । आउ अपने के आद पड़ऽ हइ, कि कइसे हमन्हीं दुन्नु अइसने तरह से आउ अइसने विषय पर, हरेक तुरी भोजन के बाद साँझ के, बाग में छत पर बइठल, बहस करते रहऽ हलिअइ ? अपने हमरा ठीक अइसने विशालता पर धिक्कारऽ हलथिन । केऽ जानऽ हइ, शायद, ओहे समय में हमन्हीं बात कर रहलिए हल, जब ऊ हियाँ पड़ल हला आउ अपन विचार में मगन हला । हमन्हीं के शिक्षित समाज में वस्तुतः कोय विशेष पवित्र परंपरा नयँ हइ, अवदोत्या रोमानोव्ना - जब तक कि कोय कइसूँ अपना लगी किताब से कुछ गढ़ नयँ लेय ... चाहे वर्षवृत्तांत (chronicles) से कुछ निकास नयँ लेय । लेकिन ई अधिकतर विद्वान लोग होवऽ हथिन, आउ, जानऽ हथिन, अपन तरह के बिलकुल सीधा-सादा लोग, ओहे से सामान्य लोग के ई शोभा नयँ दे हइ । लेकिन, हमर विचार तो अपने सामान्यतः जानवे करऽ हथिन; हम केकरो दृढ़तापूर्वक दोष नयँ दे हिअइ । हम खुद निकम्मा हिअइ, आउ अइसीं बन्नल रहऽ हिअइ । लेकिन हमन्हीं खुद्दे एकरा बारे पहिलहीं एक तुरी से जादे बतिया चुकलिए ह । हमरा एहो बात के सौभाग्य हलइ, कि हम अपने के मन में अपन विचार से दिलचस्पी पैदा कर सकलिअइ ... अपने के चेहरा बहुत पीयर पड़ गेले ह, अवदोत्या रोमानोव्ना !"

"हमरा उनकर ई सिद्धांत मालूम हइ । हम एगो पत्रिका में अइसन लोग के बारे उनकर लेख पढ़लिए हल, जिनका लगी सब कुछ उचित (permissible) हइ ... रज़ुमिख़िन ई हमरा लगी लइलका हल ..."

"मिस्टर रज़ुमिख़िन ? अपने के भाय के लेख ? पत्रिका में ? हकइ अइसन लेख ? मालूम नयँ हलइ हमरा । त ई तो बहुत दिलचस्प होतइ ! लेकिन कन्ने अपने चल पड़लथिन, अवदोत्या रोमानोव्ना ?"

"हमरा सोफ़िया सिम्योनोव्ना से मिल्ले के हइ", धीमे अवाज में दुनेच्का बोललइ । "उनका हीं कइसे जाय के ? हो सकऽ हइ, ऊ आ गेला होत; हमरा उनका से अभी मिलहीं के हइ । उनका ..."

अवदोत्या रोमानोव्ना अपन बात पूरा नयँ कर पइलकइ; ओकर साँस शाब्दिक रूप से रुक गेलइ ।

"सोफ़िया सिम्योनोव्ना रात होवे के पहिले नयँ वापिस अइता । हम अइसन सोचऽ हिअइ । उनका बहुत जल्दी आ जाय के चाही हल, आउ अगर नयँ, त अब बहुत देर हो चुकला के बाद ..."

"अच्छऽ, त तूँ झूठ बोलऽ ह ! हम देखऽ हिअइ ... तूँ झूठ बोल रहलऽ हल ... तूँ लगातार झूठ बोल रहलऽ हल ! ... हमरा तोरा पर विश्वास नयँ ! नयँ विश्वास !" दुनेच्का मानसिक संतुलन पूरा तरह से खोके वास्तविक क्रोधावेश में चिल्लइलइ ।

लगभग मूर्छित होके ऊ कुरसी पर गिर पड़लइ, जे स्विद्रिगाइलोव जल्दी से ओकरा तरफ बढ़ा देलके हल ।

"अवदोत्या रोमानोव्ना, अपने के की हो गेलइ, होश में आथिन ! अइकी पानी हइ । एका घोंट पी लेथिन ..."

ऊ ओकर चेहरा पर पानी छिड़कलकइ । दुनेच्का चौंक गेलइ आउ होश में आ गेलइ ।

"जोरदार असर होलइ !" नाक भौं सिकोड़के स्विद्रिगाइलोव अपने आप से बड़बड़इलइ । "अवदोत्या रोमानोव्ना, शांत हो जाथिन ! ई जान लेथिन, कि उनका कइएक दोस्त हकइ । हमन्हीं उनका बचा लेबइ, मदत करबइ । की चाहऽ हथिन, कि हम उनका लेके विदेश चल जइअइ ? हमरा पास पइसा हइ; तीन दिन में हमरा टिकट मिल जा सकऽ हइ । आउ जाहाँ तक ई बात के संबंध हइ, कि ऊ हत्या कइलका ह, त ऊ अभियो बहुत सन निम्मन काम कर सकऽ हका, आउ ई सब के क्षतिपूर्ति हो जइतइ; शांत हो जाथिन । ऊ अभियो महान व्यक्ति बन सकऽ हथिन । अच्छऽ, अभी कइसन हथिन ? अपने के कइसन लग रहले ह ?"

"नीच अदमी ! ऊ अभियो मजाक उड़ा रहले ह । हमरा छोड़ देथिन ... "

"कन्ने जा रहलथिन हँ अपने ? कन्ने जा रहलथिन हँ ?"

"उनका पास । ऊ काहाँ हथिन ? अपने जानऽ हथिन ? ई दरवाजा काहे बन हइ ? हमन्हीं ई दरवाजा से अंदर अइलिए हल, लेकिन अभी एकरा में ताला लगल हइ । कखने अपने एकरा में ताला लगा पइलथिन ?"

"सब्भे कमरा में ई बारे हम नयँ चिल्ला सकऽ हलिअइ, कि हमन्हीं हियाँ की बतियाब करऽ हिअइ । हम मजाक बिलकुल नयँ कर रहलिए ह; हम खाली अइसन भाषा में बात करते-करते तंग हो चुकलिए ह । अब अइसन हालत में जइथिन काहाँ ? कि अपने ओकर भेद खोल देवे लगी चाहऽ हथिन ? अपने ओकरा क्रोधावेश में पहुँचा देथिन, आउ ऊ खुद अपन भेद खोल देता । ई बात जान लेथिन, कि उनका पर निगरानी रक्खल जा रहले ह, आउ उनकर पीछा कइल जाना चालू हो चुकले ह । अपने खाली उनकर भेद खोल देथिन । इंतजार करथिन; हम उनका देखलिए ह आउ अभी बातो कइलिए ह; अभियो उनका बचावल जा सकऽ हइ । थोड़े सन इंतजार करथिन, बइठ जाथिन, साथ में मिल-जुलके कोय उपाय सोचते जइबइ । एकरे लगी हम अपने के बोलइलिअइ, कि एकांत में एकरा बारे बात करिअइ आउ अच्छा से एकरा बारे सोचिअइ । बइठ तो जाथिन !"

"कइसन तरीका से उनका अपने बचइथिन ? की उनका बचावल जा सकऽ हइ ?"

दुन्या बइठ गेलइ । स्विद्रिगाइलोव ओकर बगल में बइठ गेलइ ।

"ई सब कुछ अपने ऊपर निर्भर हइ, अपने ऊपर, खाली अपने ऊपर", ऊ चमकते आँख से शुरू कइलकइ, लगभग फुसफुसाहट में, भ्रमित होल आउ उत्तेजना के कारण कुछ शब्द के ठीक से बिन उच्चारण कइले ।

डर के मारे दुन्या ओकरा से जरी दूर हट गेलइ । ऊ पूरे शरीर से कँप रहले हल ।

"अपने ... अपने के बस एक शब्द, आउ ऊ बच गेला ! हम ... हम उनका बचइबइ । हमरा पास पइसा हइ आउ कइएक दोस्त । हम तुरतम्मे उनका बाहर भेज देबइ, आउ खुद हम पासपोर्ट बनवा देबइ, दू पासपोर्ट । एगो उनकर, दोसर अप्पन । हमरा दोस्त लोग हइ; हमरा पास काम के लोग हइ ... चाहऽ हथिन ? हम अपने लगी भी पासपोर्ट बनवा देबइ ... अपने के माय लगी भी ... अपने के रज़ुमिख़िन काहे लगी चाही ? हम अपने के ओतने प्यार करऽ हिअइ ... हम अपने के अत्यंत प्यार करऽ हिअइ । अपन पोशाक के कोर हमरा चूम लेवे देथिन, देथिन ! देथिन ! हमरा ओकर सरसराहट सुन्नल पार नयँ लगऽ हइ । हमरा बताथिन - ई करऽ, आउ हम कर देबइ ! हम सब कुछ कर देबइ । हम असंभव के भी कर देखइबइ । अपने जे कुछ पर विश्वास करथिन, ओकरे पर हमहूँ विश्वास करबइ । हम सब कुछ, सब कुछ करबइ ! नयँ देखथिन, हमरा दने अइसे नयँ देखथिन ! जानऽ हथिन, कि अपने हमरा जान मार रहलथिन हँ ..."

ऊ पागल के तरह बकहूँ लगले हल । ओकरा अचानक कुछ हो गेले हल, जइसे ओकर सिर में अचानक कुछ घुस गेल होवे । दुन्या उछल पड़लइ आउ दरवाजा तरफ भागलइ ।

"खोलऽ ! खोलऽ !" केकरो मदत लगी पुकारते आउ हाथ से दरवाजा के झकझोरते दुन्या अंदर से चिल्ला रहले हल । "खोलऽ तो ! ओन्ने कोय नयँ हकऽ ?"

स्विद्रिगाइलोव उठ गेलइ आउ खुद के सँभाल लेलकइ । अभियो तक कँप रहल ओकर होंठ पर धीरे-धीरे द्वेषपूर्ण आउ उपहासपूर्ण मुसकान उभर अइलइ ।

"हुआँ कोय घर पर नयँ हइ", ऊ शांत स्वर में आउ रुक-रुकके बोललइ, "मकान-मालकिन बाहर गेला ह, आउ अइसे चिल्लाना बेकार के मेहनत हइ - खाली खुद के बेकार में परेशान कर रहलथिन हँ ।"

"कुंजी काहाँ हइ ? दरवाजा अभी खोल, अभी, नीच कहीं के !"

"हमर कुंजी हेरा गेल ह आउ हमरा मिल नयँ रहल ह ।"

"आह ! ई कइसन जबरदस्ती हइ !" दुन्या चिल्लइलइ, मौत नियन पीयर पड़ गेलइ आउ भागके कोना में चल गेलइ, जाहाँ परी एगो छोटका टेबुल से खुद के आड़ कर लेलकइ, जे संयोगवश हुआँ परी पास में हलइ । ऊ चिल्लइलइ नयँ; बल्कि ऊ अपन सतावे वला पर नजर जमइले रहलइ आउ तीक्ष्णदृष्टि से ओकर एक-एक हरक्कत पर निगाह रखले रहलइ । स्विद्रिगाइलोव भी अपन जगह से नयँ हिललइ आउ ओकरा सामने मुँह कइले कमरा के दोसरा छोर पर खड़ी रहलइ । ऊ खुद पर काबू पा लेलके हल, कम से कम बाहर से देखे में तो अइसीं लगऽ हलइ । लेकिन ओकर चेहरा पहिलहीं नियन पीयर पड़ल हलइ । उपहासपूर्ण मुसकान ओकरा नयँ छोड़लके हल।  "अपने अभी 'जबरदस्ती' के उल्लेख कइलथिन, अवदोत्या रोमानोव्ना । अगर जबरदस्ती हइ, त अपने खुद निर्णय कर सकऽ हथिन, कि हम उचित कदम उठा लेलिए होत । सोफ़िया सिम्योनोव्ना घर पर नयँ; कापेरनाउमोव लोग बहुत दूर हइ, ताला से बन पाँच कमरा दूर । आउ आखिर, हम अपने से कम से कम दोगना ताकतवर हिअइ, आउ एकरा अलावे, हमरा लगी डरे के कोय बात नयँ हइ, काहेकि अपने बादो में शिकायत नयँ कर सकऽ हथिन -  अपने तो वस्तुतः अपन भाय के भेद नयँ खोले लगी चाहथिन, हइ न ? आउ, अपने पर कोय विश्वासो नयँ करतइ - आखिर कोय लड़की अकेल्ले एगो अकेल्ले अदमी के फ्लैट में काहे लगी गेलइ ? अपने अगर अपन भाय के भी कुर्बान कर देथिन, तइयो अपने कुछ नयँ साबित कर पइथिन - बलात्कार के साबित करना बहुत मोसकिल हइ, अवदोत्या रोमानोव्ना ।

"नीच !" गोस्सा में दुन्या फुसफुसइलइ ।

"जइसन अपने के मर्जी, लेकिन ई बात के ध्यान रखथिन, कि हम खाली सलाह के रूप में बात कर रहलिए हल। हमर व्यक्तिगत धारणा के अनुसार, अपने बिलकुल सही हथिन - बलात्कार नीच हरक्कत हइ । हम खाली ई बात कहे के कोशिश कर रहलिए हल, कि अपने के अंतःकरण में बिलकुल कुछ नयँ रहतइ, अगर ... अगर अपने स्वेच्छा से भी अपन भाय के बचावे लगी चाहथिन, जइसन हमर सुझाव हइ । एकर मतलब होतइ, कि अपने खाली परिस्थिति से लचार होके आत्मसमर्पण कइलथिन होत, आउ आखिर जबरदस्ती के चलते, अगर ई शब्द के बिना काम नयँ चलइ । एकरा बारे जरी सोचथिन; अपने के भाय आउ माय के भाग्य के फैसला अपने के हाथ में हइ । हम अपने के गुलाम रहबइ ... जिनगी भर ... हम हिएँ अपने के फैसला के इंतजार करबइ ..."

स्विद्रिगाइलोव दुन्या से लगभग आठ कदम के दूरी पर सोफा पर बइठ गेलइ । दुन्या के ओकर अटल फैसला के बारे जरिक्को सनी शक्का नयँ रह गेले हल । एकरा अलावे, ऊ ओकरा जानऽ हलइ ...

अचानक ऊ अपन जेभी से रिवॉल्वर निकसलकइ, ओकर घोड़ा चढ़इलकइ आउ जे हाथ में रिवॉल्वर हलइ ओकरा निच्चे करके छोटकुन्ना टेबुल पर टिका देलकइ । स्विद्रिगाइलोव अपन जगह से उछलके खड़ी हो गेलइ ।

"आहा ! त ई बात हइ !" अचरज से ऊ चिल्लइलइ, लेकिन द्वेषपूर्ण मुसकान के साथ, "त, ई आगू के परिस्थिति के बिलकुल बदल दे हइ ! अपने तो खुद्दे हमरा लगी सब कुछ बहुत असान बना रहलथिन हँ, अवदोत्या रोमानोव्ना ! आउ ई रिवॉल्वर अपने के काहाँ से मिललइ ? कहीं ई मिस्टर रज़ुमिख़िन तो नयँ (देलकइ) ? अरे, ई रिवॉल्वर तो हम्मर हइ ! हमर पुरनका परिचित ! आउ हम एकरा तखने केतना खोजब करऽ हलिअइ ! ... मतलब, गाँव में अपने के गोली चलावे के अभ्यास, जे अपने के करावे के हमरा प्रतिष्ठा मिलले हल, आखिर बेकार नयँ गेलइ ।"

"ई तोर रिवॉल्वर नयँ हउ, बल्कि मार्फ़ा पित्रोव्ना के, जिनकर तूँ हत्या कर देलहीं, बदमाश ! उनकर घर में तोर कुच्छो नयँ हलउ । हम एकरा ओहे बखत ले लेलिए हल, जब हमरा शक्का होवे लगलउ कि तूँ की कर सकऽ हीं । अगर तूँ एक्को कदम आगू बढ़इलँऽ, त कसम से, हम तोरा मार देबउ !"

दुन्या क्रोधावेश में हलइ । रिवॉल्वर के ऊ तैयार करके पकड़ले हलइ ।

"अच्छऽ, लेकिन भाय? हम उत्सुकतावश पूछ रहलिए ह ।" लगातार अपन जगह पर स्थिर होल स्विद्रिगाइलोव पुछलकइ ।

"रिपोर्ट कर दे, अगर जी चाहउ ! जगह से हिलिहँ नयँ ! हिलिहँ नयँ ! हम गोली चला देबउ ! तूँ अपन घरवली के जहर दे देलहीं हल, हम जानऽ हिअउ, तूँ खुद्दे हत्यारा हकहीं ! ..."

"आउ अपने के पक्का विश्वास हइ, कि हम मार्फ़ा पित्रोव्ना के जहर दे देलिए हल ?"

"तूँहीं ! तूँ हमरा खुद्दे संकेत कइलहीं हल; तूँ हमरा जहर के बारे बोललहीं हल ... हम जानऽ हिअउ, तूँ एकरा लावे खातिर गेलहीं हल ... ऊ तोरा पास तैयार हलउ ... पक्का तूँहीं हलहीं ... नीच कहीं के !"

"अगर एहो बात सच होतइ, तइयो ई तोरे कारण ... तइयो तूँहीं कारण होमहीं ।"

"झूठ बोलऽ हीं ! हम तो तोरा हमेशे घृणा करऽ हलिअउ, हमेशे ..."

"ओहो, अवदोत्या रोमानोव्ना ! स्पष्ट रूप से अपने भूल गेलथिन, कि कइसे सिखावे के जोश में अपने नरम पड़े आउ पिघले लगलथिन हल ... हमरा अपने के आँख में देखाय दे रहले हल; आद हइ, सँझिया के, चाँदनी में, जब बुलबुल गा रहले हल ?"

"झूठ बोलऽ हीं ! (दुन्या के आँख में क्रोध चमके लगलइ) झूठ बोलऽ हीं, चुगलखोर !"

"झूठ बोलऽ हिअइ ? अच्छऽ, शायद, हम झूठे बोलऽ हिअइ । झूठ बोललिअइ । औरतियन के ई सब छोटगर-छोटगर बात के आद देलावे के जरूरत नयँ । (ऊ  हलके से मुसकइलइ ।) जानऽ हिअउ, कि तूँ गोली चलइम्हीं, सुत्थर छोटगर जनावर । ठीक हउ, चलाव गोली !"

दूरी के अंदाज लगइते आउ ओकरा तरफ से पहिला हरक्कत के इंतजार करते, आखिर फैसला करके, दुन्या रिवॉल्वर उठइलकइ, आउ मौत नियन पीयर होल, उज्जर होल निचला कँपते होंठ, आग के समान चमकते बड़गर कार-कार आँख के साथ ओकरा तरफ देखते रहलइ । पहिले कभियो ऊ ओकरा एतना सुंदर नयँ देखलके हल । ऊ क्षण दुन्या के आँख से चमकत आग, जब ऊ रिवॉल्वर उठइलकइ, मानूँ ओकरा झुलसा देलकइ, आउ ओकर दिल पीड़ा से सिकुड़े लगलइ । स्विद्रिगाइलोव एक कदम आगू बढ़इलकइ, आउ गोली चल्ले के अवाज सुनाय देलकइ । गोली ओकर सिर के केश के छूते पीछू के देवाल में लगलइ । ऊ रुक गेलइ आउ धीरे से हँस पड़लइ –

"बिर्हनी हमरा बिन्ह लेलकइ ! आउ निशाना सीधे सिर पर लगइले हइ ... ई की हइ ? खून !" ऊ एगो रूमाल निकसलकइ, ताकि दहिना कनपट्टी पर से बह रहल खून के पतरा धार के पोंछ सकइ; गोली ओकर खोपड़ी के खाल के छूते निकस गेले होत । दुन्या रिवॉल्वर निच्चे कर लेलकइ आउ स्विद्रिगाइलोव तरफ, भय से नयँ, बल्कि एक तरह के वहशी हैरानी (wild perplexity) से देखे लगलइ । ओकरा मानूँ खुद्दे समझ में नयँ आ रहले हल, कि ऊ की कर देलकइ आउ की हो रहले ह !

"खैर, निशाना तो चूक गेलइ ! आउ गोली चलइथिन, हम इंतजार कर रहलिए ह !" शांत स्वर से स्विद्रिगाइलोव बोललइ, लगातार हलके मुसकइते, लेकिन कइसूँ उदास होल, "अइसे तो हमरा अपने के धर लेवे के मौका मिल जइतइ, एकर पहिले कि अपने रिवॉल्वर के घोड़ा चढ़ाथिन !"

दुनेच्का चौंक गेलइ, तेजी से घोड़ा चढ़इलकइ आउ फेर से रिवॉल्वर उठइलकइ ।

"हमरा छोड़ देथिन !" उदासी में ऊ बोललइ, "कसम से, हम फेर से गोली चला देबइ ... हम ... अपने के मार देबइ ! ..."

"त देरी कउन बात के ... तीन कदम के दूरी से तो अइसन नयँ हो सकऽ हइ, कि जान नयँ मारल जा सकऽ हइ । लेकिन अगर नयँ मार पइथिन ... तब ...", ओकर आँख चमक उठलइ आउ ऊ दू कदम आउ आगू बढ़लइ ।

दुनेच्का घोड़ा दबइलकइ, गोली चल नयँ पइलइ !

"कारतूस ठीक से भरलथिन नयँ । कोय बात नयँ ! अपने के रिवॉल्वर में एक गोली आउ हइ । ठीक से तैयार कर लेथिन, हम इंतजार करबइ ।"

ऊ दुन्या के सामने बस दू कदम के दूरी पर हलइ, इंतजार कर रहले हल आउ ओकरा तरफ भयंकर दृढ़संकल्प, उद्दीप्त कामुक आउ उदास दृष्टि से घूर रहले हल । दुन्या समझ गेलइ, कि ऊ मर जइतइ, लेकिन ओकरा छोड़तइ नयँ । "आउ ... आउ निस्संदेह, अब ऊ ओकरा मार डालतइ, दू कदम के दूरी पर से ! ..."

अचानक ऊ रिवॉल्वर फेंक देलकइ ।

"फेंक देलकइ !" अचंभित होके स्विद्रिगाइलोव बोललइ आउ गहरा साँस लेलकइ । कुछ तो मानूँ एक्के तुरी ओकर दिल से हट गेलइ, आउ, शायद, मौत के भय के बोझ तो नयँ हलइ; काहेकि मोसकिल से ऊ बखत, ऊ एकरा महसूस कर रहले हल । ई कोय दोसर, अधिक दुखद आउ उदास भावना से छुटकारा हलइ, जेकरा ऊ खुद्दे कइसनो जोर लगइला पर निश्चित नयँ कर पइलकइ ।

ऊ दुन्या भिर गेलइ आउ बड़ी नरमी से ओकर कमर के अपन बाँह में लपेट लेलकइ । ऊ विरोध नयँ कइलकइ, लेकिन पत्ता नियन पूरा कँपते, ओकरा तरफ विनती भरल दृष्टि से देखे लगलइ । स्विद्रिगाइलोव कुछ तो कहे लगी चहलकइ, लेकिन खाली ओकर होंठ ऐंठ गेलइ, आउ ऊ कुछ नयँ बोल पइलकइ ।

"हमरा छोड़ दे !" दुन्या निवेदन करते कहलकइ ।

स्विद्रिगाइलोव चौंक गेलइ - ई 'तूँ' के प्रयोग कइसूँ ऊ तरह से नयँ कइल गेले हल, जइसे कि पहिले ।

"मतलब हमरा प्यार नयँ करऽ हीं ?" शांत स्वर में ऊ पुछलकइ ।

दुन्या नकारात्मक रूप से सिर हिलइलकइ ।

"आउ ... करियो नयँ सकऽ हीं ? ... कभियो नयँ ?" निराश होके ऊ फुसफुसइलइ ।

"कभियो नयँ !" दुन्या फुसफुसइलइ ।

स्विद्रिगाइलोव के अंतःकरण में भयंकर, मूक संघर्ष के क्षण गुजरलइ । ऊ अनिर्वचनीय दृष्टि (inexpressible look) से ओकरा दने देखलकइ । अचानक ऊ अपन बाँह घींच लेलकइ, मुड़ गेलइ, तेजी से खिड़की भिर गेलइ आउ ओकरा सामने खड़ी हो गेलइ । एक पल आउ गुजर गेलइ ।

"अइकी कुंजी हइ !" (ऊ एकरा अपन कोट के बामा जेभी से निकसलकइ आउ अपन पीछू के टेबुल पर रख देलकइ, दुन्या के तरफ बिन मुड़ले आउ बिन देखले ।) ले लेथिन; जल्दी से चल जाथिन ! ... "

ऊ एकटक खिड़की के बाहर देखते रहलइ ।

दुन्या टेबुल भिर कुंजी लेवे खातिर गेलइ ।

"जल्दी ! जल्दी !" स्विद्रिगाइलोव दोहरइलकइ, अभियो बिन हिलले-डुलले आउ बिन मुड़ले । लेकिन ई 'जल्दी' में, स्पष्टतया, एक प्रकार के भयानक तान (टोन) ध्वनित होलइ ।

दुन्या एकरा समझ गेलइ, कुंजी पकड़लकइ, दरवाजा दने भागके गेलइ, तेजी से ताला खोललकइ आउ कमरा से तेजी से बाहर निकस गेलइ । एक मिनट के बाद, पागल नियन, अपने आप के बिन कुछ आद कइले, दौड़ते नहर भिर पहुँच गेलइ आउ – [2] पुल के दिशा में दौड़ पड़लइ ।

स्विद्रिगाइलोव खिड़की बिजुन लगभग तीन मिनट तक खड़ी रहलइ; आखिर धीरे से मुड़लइ, चारो दने नजर डललकइ आउ धीरे से निरार पर हाथ फेरलकइ । विचित्र मुसकान से ओकर चेहरा विकृत हो गेलइ, दयनीय, उदास, क्षीण मुसकान, निराशा भरल मुसकान । सूख रहल खून से ओकर हाथ में धब्बा पड़ गेलइ; ऊ खून के घृणापूर्वक देखलकइ; फेर एगो तौलिया के पानी से भिंगइलकइ आउ अपन कनपट्टी पोंछ लेलकइ । दुन्या के फेंकल रिवॉल्वर, जे छिटकके दरवाजा भिर चल गेले हल, अचानक ओकर नजर में अइलइ । ऊ एकरा उठा लेलकइ आउ जँचलकइ । ई एगो छोटगर, तीन गोली वला, पॉकेट रिवॉल्वर हलइ, पुरनका ढंग के; ओकरा में अभियो दू गोली आउ एगो गोली दागे वला टोपी (cap) बच्चल हलइ । एक तुरी आउ गोली दागल जा सकऽ हलइ । ऊ थोड़े देर सोचलकइ, रिवॉल्वर के अपन जेभी में रखलकइ, हैट उठइलकइ आउ बाहर निकस गेलइ ।

सूची            पिछला                     अगला