रूसी उपन्यास “आझकल के हीरो”; भाग-1 ; बेला - अध्याय-4

रूसी उपन्यास – “आझकल के हीरो”

भाग-1

1. बेला - अध्याय-4

"आउ काज़बिच के की होलइ ?" हम लगन-उताहुल होल (अधीरतापूर्वक) स्टाफ-कप्तान के पुछलिअइ ।

"अइसनकन लोग के साथ की हो सकऽ हइ !" ऊ उत्तर देलकइ, चाय के गिलास खतम करते, "वास्तव में ऊ निकस भागलइ !"

"आउ घायल नयँ होलइ ?" हम पुछलिअइ ।

"ई तो भगमाने जानऽ हथिन ! जीवनशक्तिसंपन्न, डाकू ! हम तो जी, मसलन, कुछ अइसन सक्रिय लोग के देखलिए ह - ओकर देह कट-कूटके चलनी (छलनी) होल हइ, आउ तइयो अपन तलवार लगातार भाँज रहले ह ।"

स्टाफ-कप्तान कुछ देर चुप रहला के बाद बात जारी रखलकइ, गोड़ जमीन पर पटकते -

"कभियो हम खुद के माफ नयँ करबइ - किला में अइला पर शैतान हमरा प्रेरित कइलक ग्रिगोरी अलिक्सांद्रविच के ऊ सब कुछ बता देवे के, जे हम बाड़ा के पीछू में बैठल सुन लेलिए हल; ऊ मुसकइलइ - एतना धूर्त अदमी ! - आउ खुद कुछ तो योजना (प्लान) बनाब करऽ हलइ ।"

"की बात हलइ ? किरपा करके बताथिन ।"

"अब तो कुछ नयँ कइल जा सकऽ हइ ! कहे लगी शुरू कर देलिअइ, त बात जारी रखहीं पड़तइ । करीब चार दिन बाद अज़मात किला में आवऽ हइ । पहिलहीं नियन, ऊ ग्रिगोरी अलिक्सांद्रविच के पास रुकलइ, जे ओकरा हमेशे स्वादिष्ट भोजन करावऽ हलइ । हम हुएँ हलिअइ । घोड़ा के बारे बातचीत मुड़ गेलइ, आउ पिचोरिन काज़बिच के घोड़वा के बारे प्रशंसा करे लगलइ - ई तो अइसन फुरतीला, सुत्थर, बिलकुल पहाड़ी हिरन नियन हइ - आउ ओकर शब्द के मोताबिक, बस अइसनका घोड़ा तो समुच्चे दुनियाँ में नयँ हइ ।"

“तातार छोकरा के आँख चमक उठलइ, लेकिन पिचोरिन जइसे एकरा नयँ नोटिस करऽ हइ; हम कुछ दोसर विषय पर बात करे लगी चहलिअइ, लेकिन ऊ, देखहो, तुरतम्मे बातचीत के वापिस काज़बिच के घोड़वा पर ले अइलइ । ई कहानी हरेक तुरी चालू रहलइ, जब कभी अज़मात अइलइ । करीब तीन सप्ताह के बाद हम नोटिस करे लगलिअइ, कि अज़मात के चेहरा पीला पड़ रहले ह आउ क्षीण हो रहले ह, जइसे कि प्यार के कारण, जी, उपन्यास में होवऽ हइ । केतना विचित्र बात हइ ! ...”

अइकी देखथिन, ई सब कहानी के बारे हमरा बाद में पता चललइ - ग्रिगोरी अलिक्सांद्रविच एतना हद तक ओकरा उत्तेजित कइलकइ, कि ऊ कुच्छो करे लगी तैयार हो गेलइ । एक तुरी ऊ ओकरा कह बैठलइ - "हम देखऽ हिअउ, अज़मात, कि ई घोड़ा तोरा पागलपन के हद तक पसीन पड़ गेलो ह; लेकिन ओकरा तूँ अपन सिर के पिछलौका हिस्सा नियन देख नयँ सकऽ हीं ! अच्छऽ, बताव, तूँ ओकरा की देमहीं, जे तोरा ऊ लाके भेंट में दे देतउ ? ..."

"ऊ सब कुछ, जे ऊ चाहइ", अज़मात जवाब देलकइ ।

"ओइसन हालत में हम ओकरा लाके देबउ, खाली एगो शर्त के साथ ... कसम खो, कि तूँ ओकरा पूरा करम्हीं ... "

"हम कसम खा हिअउ ... लेकिन तूँहूँ कसम खो !"

"ठीक हउ ! कसम खा हिअउ, तोरा ऊ घोड़ा मिल जइतउ; खाली ओकरा बदले तोरा अपन बहिन बेला के हमरा सुपुर्द करे पड़तउ - कराग्योज़ तोरा लगी कालिम [1] होतउ । आशा हउ, कि ई सौदा तोरा लगी फायदेमंद हकउ।"

अज़मात चुप रहलइ ।

"नयँ चाही ? खैर, जइसन तोर मर्जी ! हम सोचलियो हल, कि तूँ अदमी हकँऽ, लेकिन तूँ अभियो बुतरू हकँऽ - अभियो तोरा लगी घुड़सवारी करना जरी जल्दी हउ ..."

अज़मात भड़क गेलइ ।

"लेकिन हमर बाऊ जी ?" ऊ बोललइ ।

"की वास्तव में ऊ कहीं बाहर नयँ जा हथुन ?"

"सही हइ, जा हथिन ..."

"त कबूल हकउ ? ..."

"कबूल हउ", मौत नियन पीयर होल अज़मात फुसफुसइलइ । "कखने ?"

"पहिले तुरी, जब काज़बिच हियाँ अइतउ; ऊ दस गो भेंड़ हाँकले लावे के हमरा वचन देलके ह - बाकी - हमरा पर छोड़ दे । देखते रह, अज़मात !"

त ई तरह ओकन्हीं ई सौदा पक्का करते गेलइ ... सच कहल जाय तो, ई एगो खराब सौदा हलइ ! हम ई बारे बाद में पिचोरिन के कहवो कइलिअइ, लेकिन खाली ऊ हमरा जवाब देलकइ, कि जंगली चेर्केस लड़की के ओकरा नियन प्यारा शौहर पाके खुश होवे के चाही, काहेकि, ओकन्हीं के नजर में ऊ कइसूँ ओकर शौहर हइ, आउ काज़बिच एगो डाकू हइ, जेकरा दंडित करे के चाही हल । खुद्दे सोचथिन, हम एकर विरुद्ध की जवाब दे सकऽ हलिअइ ? ... लेकिन ऊ बखत ओकन्हीं के षड्यंत्र के बारे हम कुछ नयँ जानऽ हलिअइ । त अइकी एक तुरी काज़बिच अइलइ आउ पुच्छऽ हइ, की भेंड़ आउ मध चाही; हम ओकरा दोसर दिन लावे के औडर देलिअइ ।

"अज़मात !" ग्रिगोरी अलिक्सांद्रविच कहलकइ, "बिहान कराग्योज़ हमर हाथ में होतउ; अगर आझ रात बेला हियाँ नयँ होतउ, त तूँ घोड़वा के नयँ देख पइमँऽ ..."

"ठीक हउ !" अज़मात कहलकइ आउ सरपट आउल चल गेलइ ।

साँझ के ग्रिगोरी अलिक्सांद्रविच हथियार से लैस हो गेलइ आउ किला से घोड़ा पर सवार होके बाहर निकस गेलइ - ओकन्हीं कइसे ई काम के अंजाम देलकइ, हमरा पता नयँ - बस रात के ओकन्हीं दुन्नु वापिस अइते गेलइ, आउ संतरी देखलकइ, कि अज़मात के जीन के आर-पार एगो औरत पड़ल हलइ, जेकर हाथ-गोड़ बान्हल हलइ, आउ सिर बुर्का से ढँक्कल ।

"आउ घोड़वा ?" हम स्टाफ-कप्तान के पुछलिअइ ।

"बतावऽ हिअइ, बतावऽ हिअइ । दोसरा दिन भोरे काज़बिच अइलइ आउ साथ में दस गो भेंड़ बेचे लगी हाँकले अइलइ । अपन घोड़वा के छरदेवारी के पास बान्हके, ऊ हमरा भिर अंदर अइलइ; हम ओकरा चाय के साथ स्वागत कइलिअइ, काहेकि हलाँकि ऊ डाकू हलइ, लेकिन तइयो हमर कुनाक [2] हलइ । हमन्हीं एन्ने-ओन्ने के गपशप करे लगलिअइ - अचानक, देखऽ हिअइ, काज़बिच चौंक उठलइ, ओकर चेहरा उतर गेलइ - आउ खिड़किया दने लपकलइ; लेकिन खिड़किया, दुर्भाग्य से, पिछलौका प्रांगण में खुललइ ।

"की होलउ ?" हम पुछलिअइ ।

"हमर घोड़वा ! ... घोड़वा ! ..." समुच्चे देह से थरथरइते ऊ कहलकइ ।

आउ सचमुच हम खुर के टाप सुनलिअइ - "ई तो, लगऽ हइ, कोय कज़ाक अइलइ ..."

"नयँ ! उरूस यामान, यामान ! [3]" ऊ चीख उठलइ आउ पूरा दम लगाके दौड़ पड़लइ, जंगली तेंदुआ नियन । दू छलाँग में ऊ प्रांगण में पहुँच गेलइ; किला के गेट बिजुन संतरी राइफल से ओकर रस्ता रोकलकइ; लेकिन ऊ राइफल के उपरे से उछलके निकस गेलइ आउ रोडवा पर से होके तेजी से दौड़ल गेलइ ... दूर में धूरी चक्कर मारते उपरे उठ रहले हल - अज़मात जोशीला कराग्योज़ के सरपट दौड़इले जा रहले हल; दौड़ते-दौड़ते काज़बिच अपन बंदूक खोल से निकास लेलकइ आउ फायर कर देलकइ, एक मिनट ऊ स्थिर रहलइ, जब तक कि ओकरा ई पक्का नयँ हो गेलइ, कि ऊ निशाना चूक गेले हल; फेर ऊ चीख पड़लइ, बंदूक के पत्थल पर पटक देलकइ, एकरा टुकड़ा-टुकड़ा कर देलकइ, जमीन पर लुढ़क गेलइ आउ बुतरू नियन कन्ने लगलइ ... किला से लोग ओकर चारो दने जामा हो गेते गेलइ - ऊ केकरो पर ध्यान नयँ देलकइ; लोग ओकरा भिर थोड़े देर रुकलइ, बहस कइलकइ आउ वापिस चल गेलइ; हम ओकर भेंड़ खातिर ओकरा भिर पैसा रक्खे के औडर देलिअइ - ऊ ओकरा नयँ छुलकइ, मुँह निच्चे कइले मुरदा नियन पड़ल रहलइ । की अपने विश्वास करथिन, कि ऊ ओइसीं देर रात तक पड़ल रहलइ, आउ समुच्चे रात ? ... दोसरे सुबह ऊ किला में अइलइ आउ विनती करे लगलइ, कि लोग ओकरा घोड़वा के अपहरण करे वला के नाम बता देइ । संतरी, जे देखलके हल, कि कइसे अज़मात घोड़वा के बन्हन खोललके हल आउ ओकरा पर सवार होके सरपट भाग गेले हल, ई बात के छिपाना जरूरी नयँ समझलकइ । ई नाम पर काज़बिच के आँख चमक उठलइ, आउ ऊ आउल रवाना हो गेलइ, जाहाँ परी अज़मात के बाप रहऽ हलइ ।

"आउ बाप के की होलइ ?"

"एहे तो बात हलइ, कि ओकरा काज़बिच खोज नयँ पइलकइ - ऊ कहीं तो करीब छो दिन लगी बाहर चल गेले हल, नयँ तो अज़मात के अपन बहिन के अपहरण करे में सफलता मिलते हल ?"

"आउ जब बाप वापिस अइलइ, त न तो बेटिया हलइ, आउ न बेटवा । अइसन धूर्त हलइ ऊ (अज़मात) - निम्मन से समझऽ हलइ, कि ओकर सिर के खैरियत नयँ, अगर ऊ पकड़ा गेलइ । त ऊ बखत से ऊ देखाय नयँ देलकइ - शायद, कोय आब्रेक के गिरोह में शामिल हो गेलइ, आउ तेरेक चाहे कुबान के पार अपन बेकाबू सिर के अंत कर देलकइ - ओनहीं ओकर रस्ता बच गेले हल ! ..."

अनूदित साहित्य             सूची            पिछला                     अगला