विश्वप्रसिद्ध रूसी नाटक "इंस्पेक्टर" ; अंक-2 ; दृश्य-10

दृश्य-10

(मेयर, ख़्लिस्ताकोव, दोबचिन्स्की)

मेयर - अब अपने हमन्हीं के शहर के कुछ संस्था के मुआइना करे लगी चाहथिन - जइसे कि अनुदान संस्था आदि ?

ख़्लिस्ताकोव - हुआँ परी देखे लायक की हइ ?

मेयर - ई देखथिन, कि हमन्हीं हियाँ काम-काज कइसे चल्लऽ हइ ... व्यवस्था कइसन हइ ...

ख़्लिस्ताकोव - बहुत खुशी से, हम तैयार हिअइ ।

(बोबचिन्स्की दरवाजा से अपन सिर चिपका ले हइ ।)

मेयर - अगर अपने के इच्छा होवइ, त हुआँ से जिला स्कूल भी चलल जा सकऽ हइ, ई देखे लगी कि हमन्हीं हीं ज्ञान-विज्ञान के विभिन्न विषय के कइसन सुव्यवस्था के साथ पढ़ावल जा हइ ।

ख़्लिस्ताकोव - बहुत अच्छा, बहुत अच्छा ।

मेयर - बाद में, अगर अपने के पसीन पड़इ त जेल आउ लोकल कैदखाना में भेंट देल जा सकऽ हइ - देखथिन कि हमन्हीं हीं अपराधी लोग के कइसे रक्खल जा हइ ।

ख़्लिस्ताकोव - लेकिन जेल काहे लगी ? एकरा से बेहतर तो हमन्हीं अनुदान संस्था के मुआइना करते जइबइ।

मेयर - जइसन अपने के मर्जी । अपने के की इच्छा हइ - अपन खुद के गाड़ी में कि हमरा साथ द्रोश्की (एक चाहे दू सीट वला उपरे दने खुल्लल घोड़ागाड़ी) में चलथिन ?

ख़्लिस्ताकोव - जी हाँ, बेहतर हम अपने के साथ द्रोश्की में जइबइ ।

मेयर - (दोबचिन्स्की से) प्योत्र इवानोविच, अपने लगी अब जगह नयँ हइ ।

दोबचिन्स्की - कोय बात नयँ, हम इंतजाम कर लेबइ ।

मेयर - (धीमे स्वर में, दोबचिन्स्की से) सुनथिन - अपने दौड़ल जाथिन, जेतना तेजी से हो सकइ आउ ई दू गो नोट सौंप देथिन - एक अनुदान संस्था में ज़िमल्यानिक के, आउ दोसरा हमर श्रीमती जी के । (ख़्लिस्ताकोव से) की हम अपने के उपस्थिति में अपन पत्नी के एक लाइन लिक्खे लगी अनुमति लेवे के निवेदन कर सकऽ हिअइ, कि ऊ आदरणीय अतिथि के स्वागत लगी तैयारी कर सकथिन ?

ख़्लिस्ताकोव - लेकिन काहे लगी ? ... खैर, अइकी रोशनाई हइ, खाली कागज - हमरा मालूम नयँ ... की ई बिल पर काम चल सकऽ हइ ?

मेयर - हम एकरे पर लिख लेबइ । (लिक्खऽ हका आउ साथे-साथ बड़बड़ा हका ।) आउ अइकी देखवे करबइ कि नश्ता आउ एगो छोटगर लेकिन मोटगर बोतल के बाद की गुल खिल्लऽ हइ ! हमन्हीं हीं देशी ठर्रा हइ - देखे में जादे नयँ लगऽ हइ, लेकिन एगो हाथी के गोड़ थरभसाके उलट देतइ । खाली हमरा ई जाने के हइ कि ऊ केऽ हइ आउ हमरा खुद के ओकरा से केतना हद तक बचावे के जरूरत हइ । (लिखना समाप्त कइला पर दोबचिन्स्की के दे हका, जे दरवाजा भिर जा हइ, लेकिन एतने में दरवाजा कब्जा निकस गेला से गिर जा हइ, आउ दोसरा दने से चुपके-चोरी अंदर के बातचीत सुन रहल बोबचिन्स्की एकरे साथ फर्श पर पड़ जा हइ । सब कोय चिल्ला उठऽ हइ । बोबचिन्स्की उठ जा हइ ।)

ख़्लिस्ताकोव - की बात हइ ? कहीं अपने के चोट तो नयँ लगलइ ?

बोबचिन्स्की - जी, कुछ नयँ, कुछ नयँ, कोय हानि नयँ, खाली नाक के उपरे जरी सुन हलका चोट लगलइ ! हम ख़्रिस्तियान इवानोविच के हियाँ दौड़ल जइबइ - जी, उनका पास बैंडेज हइ, ओकरा से ठीक हो जइतइ ।

मेयर - (बोबचिन्स्की तरफ फटकार के इशारा करते, ख़्लिस्ताकोव से) जी, ई कुछ नयँ हइ । हृदयपूर्वक निवेदन करऽ हिअइ, चलल जाय । आउ अपने के नौकर के कहऽ हिअइ कि ट्रंक ले अइतइ । (ओसिप से) प्यारे भाई, तूँ सब कुछ हमरा पास, मेयर के पास, लेके आवऽ - कोय भी तोरा रस्ता बता देतो । हम हृदय से निवेदन करऽ हियो ! (ऊ ख़्लिस्ताकोव लगी आगू रस्ता दे हका आउ ओकर पीछू-पीछू जा हका, लेकिन मुड़के, झिड़की के साथ बोबचिन्स्की से बोलऽ हका) आउ तूँ ! आउ कोय दोसर जग्गह नयँ मिललो गिरे लगी ! आउ चल अइलऽ हुआँ, शैतान जाने काहे लगी । (बहरसी चल जा हका; उनकर पीछू बोबचिन्स्की ।)

(परदा गिर जा हइ ।)

  

सूची            पिछला                     अगला